Yɛn Ho A Yɛde Bɛhyɛ Ɔsom Kronn Mu Ama Nkwagye

“Onyamesom a ɛyɛ kronn ne nokware wɔ Agya Nyankopɔn anim no bɛda ne ho adi wɔ nneɛma te sɛ . . . tew a obi bɛtew ne ho afi wiase fĩ ho no mu.”​—YAKOBO 1:27, Phillips.

 1. Wɔakyerɛkyerɛ nyamesom mu dɛn, na hena na ntease wom sɛ ɔwɔ hokwan sɛ ɔbɛkyerɛ atoro som ne nokware som mu nsonsonoe?

WƆAKYERƐKYERƐ nyamesom mu sɛ “sɛnea onipa kyerɛ gyidi ne obu a ɔwɔ ma tumi bi a ɛkorɔn sen onipa a ogye no tom sɛ ɔne amansan no bɔfo ne sodifo.” Ɛnde, hena na ntease wom sɛ ɔwɔ hokwan sɛ ɔbɛkyerɛ nsonsonoe a ɛda nokware som ne atoro som ntam? Nokwarem no, ɛsɛ sɛ ɛyɛ Onii a wogye no di na wobu no no, Ɔbɔadeɛ no. Yehowa ada ne gyinabea wɔ nokware ne atoro som ho no adi pefee wɔ n’Asɛm mu.

Asɛmfua “Nyamesom” Wɔ Bible no Mu

 2. Ɔkwan bɛn so na nsɛm asekyerɛ nhoma ahorow kyerɛkyerɛ Hela mfitiase asɛmfua a wɔakyerɛ ase sɛ “ɔsom” anaa “nyamesom bi” no mu, na wobetumi de aka ɔsom ahorow bɛn ho asɛm?

² Hela asɛmfua a wɔakyerɛ ase sɛ “ɔsom anaa “nyamesom bi” no, ne thre·skeiʹa. A Greek-English Lexicon of the New Testament nhoma no kyerɛkyerɛ asɛmfua yi mu sɛ “Onyankopɔn som, nyamesom, sɛnea ɛda adi titiriw wɔ nyamesom mu dwumadi anaa nyamesom nneyɛe bi mu.” Nhoma Theological Dictionary of the New Testament de ho nsɛm pii ma sɛ: “Akyinnyegye bi wɔ asɛmfua no asekyerɛ ho; . . . nnɛyi adenimfo pɛ sɛ wɔde abusuabɔ bi to ɛne therap- (‘sɛ wɔbɛsom’) ntam. . . . Wobetumi ahu nsonsonoe wɔ ne ntease mu nso. Nea ɛkyerɛ adepa no ne ‘ɔsom mu nnamyɛ’ . . ., ‘Onyankopɔn som,’ ‘nyamesom.’ . . . Nanso nea ɛkyerɛ ade bɔne nso wɔ hɔ, ɛno ne ‘nyamesom ntraso’ ‘ɔsom a ɛmfata.’” Enti, wobetumi akyerɛ thre·skeiʹa ase sɛ “nyamesom” anaa “ɔsom,” nea eye anaa ennye.

 3. Ɔkwan bɛn so na ɔsomafo Paulo de asɛmfua a wɔakyerɛ ase sɛ “ɔsom bi” no dii dwuma, na asɛm a ɛyɛ anigye bɛn na wɔaka afa sɛnea wɔkyerɛɛ Kolosefo 2:18 ase no ho?

³ Asɛmfua yi pue mpɛn anan pɛ wɔ Kristofo Hela Kyerɛwnsɛm no mu. Ɔsomafo Paulo de dii dwuma mprenu de kaa atoro som ho asɛm. Wɔakyerɛw wɔ Asomafo no Nnwuma 26:5, New World Translation, sɛ ɔkae sɛ ansa na ɔrebɛyɛ Kristoni no, “sɛnea fekuw a wodi yɛn som [“nyamesom,” Phillips] so katee no te no, mebɔɔ me bra sɛ Farisini.” Ɔde kɔkɔbɔ mae wɔ krataa a ɔkyerɛw kɔmaa Kolosefo no mu sɛ: “Mommma obi mmma nkonimbo no mmmɔ mo, nea n’ani gye atoro ahobrɛase ne abɔfo som bi ho.” (Kolosefo 2:18, NW) Ɛda adi sɛ na abɔfo som a ɛte saa no abu so wɔ Frigia saa bere no mu, nanso na ɛyɛ atoro som bi a ɛwɔ hɔ.a Nea ɛyɛ anigye ne sɛ bere a Bible nkyerɛase ahorow pii kyerɛ thre·skeiʹa ase sɛ “nyamesom” no, wɔn mu pii de asɛmfua “ɔsom bi” na edi dwuma wɔ Kolosefo 2:18. New World Translation no kyerɛ thre·skeiʹa ase bere nyinaa sɛ “ɔsom bi,” na Reference Bible no mu ase hɔ asɛm bi kyerɛ bere biara a wɔbɛkyerɛ ase ɔkwan foforo so sɛ “nyamesom” wɔ Latin nkyerɛase ahorow mu no.

“Ɛho Tew na Ɛho Nni Fĩ” Onyankopɔn Anim

 4, 5. (a) Sɛnea Yakobo kyerɛ no, hena gyinabea wɔ ɔsom ho na ɛho hia sen biara? (b) Dɛn na ebetumi ama obi ɔsom ayɛ ɔkwa, na asɛmfua a wɔakyerɛ ase sɛ “ɔkwa” no kyerɛ dɛn?

⁴ Mmeae abien a aka a asɛmfua thre·skeiʹa pue no wɔ krataa a osuani Yakobo a na ɔyɛ afeha a edi kan Kristofo asafo sodikuw no muni no kyerɛw no mu. Ɔkyerɛwee sɛ: “Sɛ obi bu ne ho sɛ ɔyɛ onyamesomfo [“ɔpɛ ‘nyamesom,’” Phillips], na wanto ne tɛkrɛma nnareka, na mmom ɔkɔ so daadaa n’ankasa koma a, onii ko no ɔsom [“nyamesom,” Phillips] yɛ ɔkwa. Ɔsom bi [“nyamesom,” Phillips] a ɛho tew na ɛho nni fĩ yɛn Nyankopɔn ne Agya anim ne eyi: sɛ obi hwɛ nyisaa ne akunafo wɔ wɔn ahohia mu, na oyi ne ho fi wiase nkekae mu.”​—Yakobo 1:26, 27, NW.

⁵ Yiw, sɛ yɛpɛ sɛ yenya Yehowa mpeneso ne nkwagye de kɔ wiase foforo a wahyɛ ho bɔ no mu a, ne gyinabea wɔ ɔsom ho a yɛde bedi dwuma ho hia. (2 Petro 3:13) Yakobo kyerɛ sɛ ebia obi bebu ne ho sɛ ɔpɛ nyamesom ampa, nanso ebia ne som no bɛyɛ ɔkwa. Hela asɛmfua a wɔkyerɛɛ ase wɔ ha sɛ “ɔkwa” no kyerɛ nso sɛ “ɛnkyerɛ hwee, ade hunu, ɛnsow aba, mfaso nni so, tumi biara nnim, ɛnyɛ nokware.” Saa na ɛbɛyɛ bere a obi a ɔka sɛ ɔyɛ Kristoni nto ne tɛkrɛma nnareka na ɔde ayi Onyankopɔn ayɛ ahyɛ ne mfɛfo Kristofo nkuran no. Ɛbɛyɛ nea ‘ɔredaadaa n’ankasa koma,’ na ɛrenyɛ nea ɔde ne ho rehyɛ “onyamesom a ɛyɛ kronn ne nokware wɔ Onyankopɔn anim” mu. (Phillips) Yehowa adwene wɔ asɛm no ho na ɛho hia.

 6. (a) Dɛn ne krataa a Yakobo kyerɛwee no asɛmti? (b) Ɔsom kronn ahwehwɛde bɛn na Yakobo sii so dua, na dɛn na nnɛyi Sodikuw no aka wɔ eyi ho?

⁶ Yakobo mmobɔ nneɛma a Yehowa hwehwɛ wɔ ɔsom kronn mu no nyinaa din mmiako mmiako. Nea ɛne ne krataa no asɛmti titiriw a ɛne nnwuma a wɔde di gyidi ho adanse, ne sɛnea ehia sɛ yɛtwe yɛn ho fi Satan wiase no adamfofa ho hyia no, osi ahwehwɛde abien pɛ so dua. Biako ne “sɛ obi kɔhwɛ nyisaa ne akunafo wɔn ahohia mu.” Eyi kyerɛ nokware Kristofo dɔ. Yehowa fi ɔdɔ mu asusuw nyisaa ne akunafo ho bere nyinaa. (Deuteronomium 10:17, 18; Malaki 3:5) Afeha a edi kan Kristofo asafo sodikuw no dwumadi a edi kan no biako yɛ nea wɔyɛ maa Kristofo akunafo. (Asomafo no Nnwuma 6:1-6) Ɔsomafo Paulo de akwankyerɛ a emu da hɔ pefee mae wɔ ɔdɔ mu a wobefi ahwɛ akunafo ahiafo a wɔanyinyin a wɔde mfe pii adi nokware na wonni abusua a wɔbɛboa wɔn no ho. (1 Timoteo 5:3-16) Nnɛyi Yehowa Adansefo Sodikuw no nso de akwankyerɛ pɔtee ama saara wɔ “Ahiafo a Wɔbɛhwɛ Wɔn” ho, sɛ: “Nea ɛka nokware som ho ne sɛ wɔbɛhwɛ gyidifo ne anokwafo a ebia wohia honam fam mmoa.” (Hwɛ nhoma Nhyehyɛe a Wɔayɛ ma Yɛde Awie Yɛn Som Adwuma, nkratafa 122-3.) Mpanyimfo akuw anaa Kristofo ankorankoro a wobu wɔn ani gu eyi yɛ so no regyaw ɔsom a ɛho tew na ɛho nni fi yɛn Nyankopɔn ne Agya anim no fã bi a ɛho hia yiye.

“Oyi ne ho Fi Wiase Nkekae Mu”

 7, 8. (a) Nokware som ahwehwɛde a ɛto so abien bɛn na Yakobo kaa ho asɛm? (b) So asɔfo no du ahwehwɛde yi ho? (d) Dɛn na wobetumi aka wɔ Yehowa Adansefo ho?

⁷ Nokware som ahwehwɛde a ɛto so abien a Yakobo kaa ho asɛm ne ‘obi ho a obeyi afi wiase nkekae mu.’ Yesu kae sɛ: “M’ahenni mfi wi yi ase”; saa ara na ne nokware akyidifo no nso bɛyɛ wɔn a ‘womfi wiase.’ (Yohane 15:19; 18:36) So wobetumi aka eyi wɔ wiase yi ɔsom ahorow mu biara asɔfo ho? Wɔkamfo Amanaman Nkabom no kyerɛ. Wɔn akannifo no pii gyee nsa a paapa no to frɛɛ wɔn sɛ wonkohyiam wɔ Asisi, Italy, wɔ October 1986 mu nkɔbom mmɔ mpae mma “Amanaman Ntam Asomdwoe Afe” a Amanaman Nkabom no na ɛyɛɛ ho nhyehyɛe no yiyedi no so. Nanso na wɔn mmɔdenbɔ no yɛ ɔkwa, esiane nnipa mpempem pii a wɔakunkum wɔn wɔ saa afe no ne mfe a adi ɛno akyi aba mu akodi ahorow mu nti. Asɔfo no taa de wɔn ho bɔ amanyɛ kuw a ɛredi tumi no, bere a wɔne akuw afoforo a wɔsɔre tia aban no yɛ sum ase nhyehyɛe ahorow nkontompo kwan so sɛnea ɛbɛyɛ na obiara a obedi tumi no abu wɔn sɛ “nnamfo.”​—Yakobo 4:4.

⁸ Yehowa Adansefo ama wɔahu wɔn sɛ Kristofo a wonni afã biara wɔ amammuisɛm ne wiase yi ntawntawdi ahorow mu. Wokura saa gyinabea yi mu wɔ nsasepɔn ne aman nyinaa mu, sɛnea atesɛm amanneɛbɔ ne nnɛyi abakɔsɛm kyerɛwtohɔ ahorow a ɛwɔ wiase afanan nyinaa di ho adanse no. Nokwarem no, woyi wɔn “ho fi wiase nkekae ho.” Wɔn som no ne “onyamesom a ɛyɛ kronn ne nokware wɔ Onyankopɔn anim” no.​—Yakobo 1:27, Phillips.

Nokware Som Agyiraehyɛde Afoforo

 9. Dɛn ne nokware som ahwehwɛde a ɛto so abiɛsa, na dɛn ntia?

⁹ Sɛ nyamesom yɛ ‘obu ma tumi bi a ɛkorɔn sen onipa a wogye no tom sɛ ɔne amansan no bɔfo ne sodifo’ a, ɛnde nokwarem no, ɛsɛ sɛ nokware som no ma wɔsom nokware Nyankopɔn koro, Yehowa no. Ɛnsɛ sɛ ɛma Onyankopɔn ho ntease a nkurɔfo wɔ no tu fra denam abosonsom nkyerɛkyerɛ te sɛ onyame baasakoro bi a ɛma nnipa afoforo baanu bi ne Onyankopɔn kyɛ ade nyinaa so tumfoɔ a ɔyɛ, n’anuonyam, ne te a ɔte ase daa no wɔ Baasakoro ahintasɛm bi mu no so. (Deuteronomium 6:4; 1 Korintofo 8:6) Ɛsɛ sɛ ɛma wohu Onyankopɔn din Yehowa a ebiara ne no nsɛ no nso, na edi saa din no ni, nokwarem no, wɔde Onyankopɔn din no to wɔn so sɛ nnipa a wɔayɛ biako. (Dwom 83:18; Asomafo no Nnwuma 15:14) Ɛsɛ sɛ wɔn a wɔde wɔn ho hyem no di Kristo Yesu nhwɛso no akyi wɔ eyi yɛ mu. (Yohane 17:6) Yehowa Adansefo Kristofo akyi no, nnipa bɛn na wodu ahwehwɛde yi ho nnɛ?

10. Sɛ ɔsom bi betumi ama nnipa anya nkwa akɔ Onyankopɔn wiase foforo no mu a, dɛn na ɛsɛ sɛ ɛyɛ, na dɛn ntia?

¹⁰ Ɔsomafo Petro kae sɛ: “Na nkwagye nni obiara mu, na nso din [Yesu Kristo] foforo nni ɔsoro ase a wɔde ama wɔ nnipa mu a ɛsɛ sɛ wogye yɛn nkwa wɔ mu.” (Asomafo no Nnwuma 4:8-12) Enti ɛsɛ sɛ ɔsom kronn a ɛbɛma wɔanya nkwa akɔ Onyankopɔn wiase foforo no mu no kanyan wɔn ma wonya Kristo ne agyede afɔrebɔ no bo a ɛsom no mu gyidi. (Yohane 3:16, 36; 17:3; Efesofo 1:7) Bio nso, ɛsɛ sɛ ɛboa nokware asomfo ma wɔbrɛ wɔn ho ase ma Kristo sɛ Yehowa Hene a ɔredi tumi ne Ɔsɔfo Panyin a wɔasra no.​—Dwom 2:6-8; Filipifo 2:9-11; Hebrifo 4:14, 15.

11. Dɛn na ɛsɛ sɛ ɛyɛ nokware som nnyinaso, na dɛn ne Yehowa Adansefo gyinabea wɔ eyi mu?

¹¹ Ɛsɛ sɛ ɔsom kronn gyina nokware Nyankopɔn apɛde a wada no adi so na ɛnyɛ nnipa atetesɛm ne nyansapɛ ahorow so. Sɛ ɛnyɛ Bible no a, anka yɛrenhu Yehowa ne n’atirimpɔw ahorow a ɛyɛ anigye, anaa Yesu ne agyede afɔrebɔ no ho hwee. Yehowa Adansefo ma nkurɔfo nya Bible no mu ahotoso a enhinhim. Wɔnam wɔn daa asetra so kyerɛ sɛ wɔpene ɔsomafo Paulo asɛm a ɔkae yi so, sɛ: “Kyerɛw nyinaa fi Onyankopɔn home mu, na eye ma ɔkyerɛkyerɛ, ntɛnyi, nteɛso, . . . Na Onyankopɔn nipa ayɛ pɛ a wɔasiesie no koraa ama nnwuma pa nyinaa.”​—2 Timoteo 3:16, 17.

Nokware Som​—Ɛyɛ Asetra Kwan

12. Gyidi akyi no, dɛn nso na ɛho hia na ama ɔsom bi ayɛ nokware som, na nneɛma bɛn mu na wohu nokware som sɛ asetra kwan?

¹² JYesu kae sɛ: “Onyankopɔn yɛ Honhom, na wɔn a wɔsɔre no no, ɛsɛ sɛ wɔsɔre no honhom ne nokware mu.” (Yohane 4:24) Enti, nokware nyamesom, anaa ɔsom bi no, nyɛ onyamesom a wɔyɛ no sɛ guasodeyɛ, wɔ amanne kwan so, a wɔyɛ ma afoforo ahu. Ɔsom kronn yɛ honhom fam adeyɛ, a egyina gyidi so. (Hebrifo 11:6) Nanso, ɛsɛ sɛ wɔde nnwuma ka saa gyidi no ho. (Yakobo 2:17) Nokware som pow nea aba so foforo a nnipa pii ani gye ho. Ekura Bible no abrabɔ pa ne kasa a ɛho tew ho gyinapɛn ahorow mu. (1 Korintofo 6:9, 10; Efesofo 5:3-5) Wɔn a wɔde wɔn ho hyem no fi nokwaredi mu bɔ mmɔden sɛ wɔbɛsow Onyankopɔn honhom aba no wɔ wɔn abusua asetra, nnwuma, sukuu, ne ahomegye mpo mu. (Galatifo 5:22, 23) Yehowa Adansefo bɔ mmɔden sɛ wɔn werɛ remfi ɔsomafo Paulo afotu a edi so yi da: “Enti sɛ mudidi oo, monom oo, moyɛ biribiara oo, monyɛ ne nyinaa nhyɛ Onyankopɔn anuonyam.” (1 Korintofo 10:31) Wɔn ɔsom no nyɛ biribi a wɔyɛ ara kwa; ɛyɛ asetra kwan.

13. Dɛn na ɛwɔ nokware som mu, na dɛn nti na wobetumi aka sɛ Yehowa Adansefo yɛ nnipa a wɔpɛ ɔsom ampa?

¹³ Ampa, honhom fam dwumadi ahorow wɔ nokware som mu. Nea ɛka eyinom ho ne ankorankoro ne abusua mpaebɔ, Onyankopɔn Asɛm ne nhoma a wɔde sua Bible no a wosua daa, ne nokware Kristofo asafo nhyiam horow kɔ. Wɔde Yehowa ayeyi nnwom ne mpaebɔ na efi nea edi akyiri yi ase na wɔde wie. (Mateo 26:30; Efesofo 5:19) Wɔnam ɔkasa ahorow ne nhoma a obiara wɔ bi mu nsɛm a wɔde nsemmisa ne mmuae susuw ho so hwehwɛ honhom fam nsɛmti ahorow a ɛhyɛ nkuran mu. Wɔtaa yɛ nhyiam horow yi wɔ Ahenni Asa ahorow a ɛso tew nanso wɔnhyehyɛɛ mu kɔsɔɔ so, na wɔde di dwuma ma ɔsom dwumadi ahorow nkutoo mu: nhyiam horow a wɔyɛ no daa, ayeforohyia, nkaedi dwumadi ahorow. Yehowa Adansefo de obu ma wɔn Ahenni Asa ne Nhyiam Asa ahorow a ɛsosoe no sɛ mmeae a wɔahyira so ama Yehowa som. Ahenni Asa ahorow no nyɛ mmeae a akuw ahorow hyiam gye wɔn ani te sɛ nea ɛte wɔ Kristoman asɔre ahorow pii fam no.

14. Na ɔsom kyerɛ dɛn ma nnipa a wɔka Hebri kasa, na dwumadi bɛn na ɛma Yehowa Adansefo da nsow nnɛ?

¹⁴ Yɛadi kan ahu sɛ adenimfo de abusuabɔ bi to Hela asɛmfua a wɔakyerɛ ase sɛ “ɔsom bi” anaa “nyamesom” no ne adeyɛsɛm “sɛ wɔbɛsom” no ntam. Anigyesɛm ne sɛ wobetumi akyerɛ Hebri asɛmfua ‛avo·dhahʹ, a ɛne no hyia no ase sɛ “adwuma” anaasɛ “ɔsom.” (Fa toto Exodus 3:12 ne 10:26, NW-Reference Bible mu ase hɔ nsɛm no ho.) Na ɔsom kyerɛ adwuma ma Hebrifo no. Na saa na ɛkyerɛ ma nokware asomfo nnɛ. Nokware som agyiraehyɛde titiriw a ɛda nsow biako ne sɛ wɔn a wɔde wɔn ho hyem nyinaa yɛ adwuma pa a ɛne ka a wɔka “ahenni no ho asɛmpa yi wiase nyinaa de adi amanaman nyinaa adanse” no. (Mateo 24:14; Asomafo no Nnwuma 1:8; 5:42) Ɔsom bɛn na wonim wɔ wiase nyinaa sɛ wodi Onyankopɔn Ahenni no ho adanse wɔ baguam sɛ adesamma anidaso koro pɛ?

Tumi Pa a Ɛde Biakoyɛ Ba

15. Dɛn ne nokware som ho biribi a ɛda nsow?

¹⁵ Atoro som de mpaapaemu ba. Ɛde nitan ne mogyahwiegu aba, na ɛda so ara de ba. Nea ɛne no bɔ abira no, nokware som de biakoyɛ ba. Yesu kae sɛ: “Sɛ mododɔ mo ho a, nnipa nyinaa behu sɛ moyɛ m’asuafo.” (Yohane 13:35) Ɔdɔ a ɛka Yehowa Adansefo bom no tra ɔman a obi fi mu, n’asetra mu gyinabea, ne sikasɛm tebea, ne abusua a ofi mu mu akwanside ahorow a ɛpaapae adesamma a aka mu no. Adansefo no ‘agyina pintinn honhom koro mu, na wɔde ɔkra koro bom di apere ma asɛmpa no gyidi.’​—Filipifo 1:27.

16. (a) “Asɛmpa” bɛn na Yehowa Adansefo ka ho asɛm? (b) Nkɔmhyɛ ahorow bɛn na ɛrebam wɔ Yehowa nkurɔfo so, na nhyira horow bɛn na adi akyi aba?

¹⁶ “Asɛmpa” a wɔka ho asɛm no ne sɛ ɛrenkyɛ Onyankopɔn atirimpɔw a wontumi nsakra no bɛbam. Wɔbɛyɛ n’apɛde wɔ “asase so, sɛnea ɛyɛ ɔsoro” no. (Mateo 6:10) Wɔbɛtew Yehowa anuonyam din no ho, na asase no bɛdan paradise, faako a nokware asomfo betumi atra ase daa. (Dwom 37:29) Nnipa ɔpepem pii ankasa a wɔwɔ nsase nyinaa so de wɔn ho abɔ Yehowa Adansefo ho, na wɔka nea ɛma Bible nkɔmhyɛ yi bam no sɛ: “Yɛne mo bɛkɔ, na yɛate sɛ Onyankopɔn ne mo na ɛte.” (Sakaria 8:23) Yehowa rehyira ne nkurɔfo. “Akumaa” adan “ɔman a ɛyɛ den” ampa, wiase nyinaa asafo a wɔayɛ biako korakora wɔ biribiara mu​—wɔ adwenem, wɔ adwumam, wɔ ɔsom mu. (Yesaia 60:22) Eyi yɛ biribi a atoro som ntumi nyɛe da.

Ɔsom Kronn Nkonimdi

17. Dɛn na ɛbɛba Babilon Kɛse so, na ɛbɛyɛ dɛn na eyi aba?

¹⁷ Onyankopɔn Asɛm ahyɛ wiase atoro som ahemman a wɔfrɛ no sɛnkyerɛnne kwan so sɛ “Babilon Kɛse” no sɛe ho nkɔm. Bible no de aboa bi a ɔyɛ keka mmɛn gyina hɔ ma “ahene” anaa amammui atumfo nso. Ɛkyerɛ yɛn sɛ Onyankopɔn de bɛhyɛ atumfo yi koma mu sɛ wɔnka Satan Ɔbonsam ahyehyɛde yi a ɛte sɛ aguaman no mmutuw na wɔnsɛe no korakora.​—Hwɛ Adiyisɛm 17:1, 2, 5, 6, 12, 13, 15-18.b

18. Nkyerɛkyerɛmu atitiriw bɛn na Bible no de ma wɔ nea enti a wɔbɛsɛe Babilon Kɛse no ho, na bere bɛn na atoro som fii adeyɛ a ɛyɛ ahodwiriw yi ase?

¹⁸ Dɛn nti na Babilon Kɛse fata ɔsɛe? Bible no bua sɛ: “Ɛno mu na wohuu adiyifo ne ahotefo ne wɔn a wɔakum wɔn asase so no nyinaa mogya.” (Adiyisɛm 18:24) Yesu kyerɛe sɛ mogya ho asõdi a ɛda atoro som so no bae ansa na wɔrekyekye Babilon, na ɔkasa tiaa Yudasom mu ɔsom akannifo a na wɔde wɔn ho akɔbɔ Babilon Kɛse ho no, bere a ɔkae sɛ: “Awɔ, nhurutoa mma! Mobɛyɛ dɛn aguan [Gehena] atemmu? . . . Na mogya trenee a wɔahwie agu asase so nyinaa, efi Habel trenee mogya so [bɛba] mo so.” (Mateo 23:33-35) Yiw, ɛsɛ sɛ atoro som, a efii ase wɔ asase so bere a atuatew baa Eden no gye ne mogya ho asõdi a ɛyɛ ahodwiriw no ho asotwe.

19, 20. (a) Bere a wɔabu Babilon Kɛse atɛn awie no, dɛn na nokware asomfo bɛyɛ? (b) Dɛn na ebesi afei, na anidaso bɛn na ɛho kwan bebue ama nokware asomfo nyinaa?

¹⁹ Babilon Kɛse no sɛe akyi no, nokware asomfo a wɔwɔ asase so no ne ɔsoro nnwontofo kuw no bɛbom ato dwom sɛ: “Munyi Yah ayɛ! . . . Efisɛ wabu aguaman kɛse no atɛn . . . na wadi ne nkoa mogya ho were wɔ ne nsam. . . . Na wusiw a efi ne mu no kɔ so foro kɔ soro daa daa.”​—Adiyisɛm 19:1-3, NW.

²⁰ Afei wɔbɛsɛe Satan ahyehyɛde a aniwa hu no afã afoforo no. (Adiyisɛm 19:17-21) Eyi akyi no, wɔde Satan, a ɔne atoro som nyinaa farebae ne n’adaemone bɛto afiase. Wɔrennya kwan nkɔtaa Yehowa nokware asomfo bio. (Adiyisɛm 20:1-3) Ɛbɛyɛ nea ɔsom kronn adi atoro som so nkonim. Mmarima ne mmea anokwafo a wotie kɔkɔbɔ a ese womfi Babilon Kɛse no mu mfi no benya hokwan afi mu aka na wɔahyɛn Onyankopɔn wiase foforo no mu. Ɛhɔ na wobetumi de wɔn ho ahyɛ nokware som mu na wɔasom Yehowa daa daa.

[Ase hɔ asɛm]

Sɔ W’adwene Hwɛ

◻ Hena gyinabea wɔ ɔsom ho na ɛho hia sen biara, na dɛn ntia?

◻ Nokware som ahwehwɛde abien bɛn na Yakobo sii so dua?

◻ Dɛn ne ɔsom kronn ahwehwɛde afoforo?

◻ “Asɛmpa” bɛn na Yehowa Adansefo reka?

◻ Ɔkwan bɛn so na nokware som bedi atoro som so nkonim?

[Mfonini wɔ kratafa 17]

Nyamesom akannifo kohyiaam wɔ Assisi, Italy, wɔ October 1986 mu

[Mfonini wɔ kratafa 19]

Nea ɛka nokware som ho ne sɛ wɔbɛbom ahyiam ama ɔsom