• “Onipa A Onni Mmara No” A Wobehu No
    Ɔwɛn-Aban—1990 | February 1

    • “Onipa A Onni Mmara No” A Wobehu No

      “Na wobeyi nea onni mmara bi no adi, nea Awurade [Yesu] de n’anom honhom bekum no no.”​—2 TESALONIKAFO 2:8.

       1, 2. Dɛn nti na ɛho hia sɛ yehu “onipa a onni mmara no”?

      YƐTE mmarato bere mu. Ɛyɛ ade a ɛkɔ so wiase nyinaa. Wosuro mmaratofo ne sɛe a wobetumi asɛe yɛn ankasa ne yɛn agyapade no wɔ baabiara. Nanso, mmaratofo onitewfo bi reto mmara mfehaha pii ni. Wɔfrɛ no “onipa a onni mmara” wɔ Bible mu.

      2 Ɛho hia sɛ yehu onii ko a onipa a onni mmara yi yɛ. Dɛn ntia? Efisɛ wabɔ ne tirim sɛ ɔbɛsɛe gyinabea pa a yɛwɔ wɔ Onyankopɔn anim ne yɛn daa nkwa anidaso no. Ɔkwan bɛn so? Ɔnam ma a ɔbɛma yɛapow nokware no na yɛagye atosɛm adi mmom no so, na ɔnam saayɛ so adan yɛn afi som a yɛbɛsom Onyankopɔn “honhom ne nokware mu” no ho. (Yohane 4:23) Eyi da adi wɔ mmaratofo yi a ɔsɔre tia Onyankopɔn ne n’atirimpɔw ahorow ne ne nkurɔfo a wɔahyira wɔn ho so nso no nneyɛe mu.

       3. Ɔkwan bɛn so na Bible twe yɛn adwene si nea onni mmara no so?

      3 Bible ka onipa a onni mmara yi ho asɛm wɔ 2 Tesalonikafo 2:3. Wɔde Onyankopɔn honhom kaa ɔsomafo Paulo ma ɔkyerɛwee sɛ: “Mommma obiara nnnaadaa mo biribiara fam, efisɛ [Yehowa da a ɔbɛsɛe nhyehyɛe bɔne yi] remma, gye sɛ ɔwae a wɔbɛwae no aba ansa, na wɔayi onipa a onni mmara no adi.” Paulo hyɛɛ nkɔm wɔ ha sɛ ɔwae ne onipa a onni mmara bi bɛba ansa na nhyehyɛe yi awiei aba. Nokwarem no, Paulo ka wɔ 2Te 2 nkyekyem 7 sɛ: “Na mmarato ahintasɛm no anya reyɛ adwuma.” Enti, wɔ afeha a edi kan no mu no na onipa a onni mmara yi afi ase reda ne ho adi.

      Faako a Onipa a Onni Mmara no Fi

       4. Hena na ɔmaa onipa a onni mmara no bae na ɔboa no?

      4 Hena na ɔmaa onipa a onni mmara yi bae na ogyina n’akyi? Paulo bua sɛ: “Ɔno nso na ne ba no, ɔba no Satan adwumayɛ so, atoro tumi ne sɛnkyerɛnne ne ahodwiride nyinaa mu ne nea ɛnteɛ nnaadaa nyinaa mu, wɔn a wɔyera no mu, efisɛ wɔannye nokware dɔ na wɔde agye wɔn nkwa.” (2 Tesalonikafo 2:9, 10) Enti Satan ne onipa a onni mmara yi agya na ɔno na ɔboa no. Na sɛnea Satan sɔre tia Yehowa, N’atirimpɔw, ne Ne nkurɔfo no, saa ara nso na onipa a onni mmara no yɛ, sɛ ebia onim anaasɛ dabi no.

       5. Dɛn na ɛbɛba onipa a onni mmara no ne wɔn a wodi n’akyi no so?

      5 Nea ɛbɛba onipa a onni mmara yi so no bi ara na ɛbɛba wɔn a wodi n’akyi no so​—ɔsɛe: “Wobeyi nea onni mmara bi no adi, nea Awurade . . . bekum no na ɔde ne ba no pue beyi no hɔ koraa no.” (2 Tesalonikafo 2:8) Ɛrenkyɛ na bere a wɔbɛsɛe onipa a onni mmara no ne n’akyigyinafo (“wɔn a wɔresɛe”) no adu “ɛda a wobeyi Awurade Yesu adi afi soro, ne ne tumi abɔfo, ogyaframa mu, na adi wɔn a wonnim Nyankopɔn ne wɔn a wɔantie yɛn Awurade Yesu asɛmpa no were. Wɔn na wobenya akatua, daa ɔsɛe.”​—2 Tesalonikafo 1:6-9.

       6. Asɛm foforo bɛn na Paulo ka fa onipa a onni mmara no ho?

      6 Paulo san ka onipa a onni mmara yi ho asɛm sɛ: “Ɔsɔre na ɔma ne ho so hyɛ nea wɔfrɛ no Nyankopɔn anaa wɔsom nyinaa, ma ɔno ara kɔtra Onyankopɔn asɔredan mu de ne ho kyerɛ sɛ ɔne Nyankopɔn.” (2 Tesalonikafo 2:4) Enti Paulo bɔ kɔkɔ sɛ Satan bɛma obi a onni mmara so, obi a ɔmfata ɔsom a ɛbɛma ne ho so asen Onyankopɔn mmara.

      Onii a Onipa a Onni Mmara no Yɛ a Wobehu No

       7. Dɛn nti na yɛka sɛ na ɛnyɛ onipa biako pɛ na Paulo reka ne ho asɛm, na onipa a onni mmara no gyina hɔ ma dɛn?

      7 So na Paulo reka onipa biako bi ho asɛm? Dabi, efisɛ ɔka sɛ na “onipa” yi ayi ne ho adi wɔ Paulo bere so na ɔbɛkɔ so atra hɔ akosi sɛ Yehowa bɛsɛe no wɔ nhyehyɛe yi awiei. Enti watra ase mfehaha pii. Ɛda adi sɛ onipa ankasa biara nni hɔ a watra ase bere tenten saa. Enti ɛsɛ sɛ asɛm “onipa a onni mmara no” yɛ sɛnkyerɛnne kwan so de, a egyina hɔ ma kuw anaasɛ nnipa bi.

       8. Hena ne onipa a onni mmara no, na nneɛma a ɛma yehu no bi ne nea ɛwɔ he?

      8 Wɔne henanom? Adanse no kyerɛ sɛ wɔne Kristoman asɔfokuw ahantanfo ne anuonyampɛfo a wɔayɛ wɔn ho mmara ama wɔn ho mfehaha pii a atwam ni no. Nokwasɛm a ɛyɛ sɛ nyamesom ne awaefo akuw mpempem pii na ɛwɔ Kristoman mu, a emu biara wɔ ne sɔfo, nanso ebiara ne afoforo a aka no adwene nhyia wɔ nkyerɛkyerɛ anaa nneyɛe bi ho no ma yetumi hu eyi. Mpaapaemu yi yɛ adanse pefee sɛ worentumi mfi Onyankopɔn. (Fa toto Mika 2:12; Marko 3:24; Romafo 16:17; 1 Korintofo 1:10 ho.) Nanso ade biako a nyamesom ahorow yi nyinaa yɛ ne sɛ wonkura Bible nkyerɛkyerɛ mu, na wɔabu ahyɛde a ɛdi so yi so: “Munnnwen nntra nea wɔakyerɛw so.”​—1 Korintofo 4:6; hwɛ Mateo 15:3, 9, 14 nso.

       9. Gyidi horow a ɛne Kyerɛwnsɛm nhyia bɛn na nea onni mmara no de asi Bible nokware ahorow ananmu?

      9 Enti, nea onni mmara yi yɛ nnipakuw bi: Kristoman nyamesom asɔfo. Asodi da wɔn nyinaa so wɔ nea nyamesom akannifo kuw no ayɛ ho, sɛ ebia wɔyɛ paapanom, asɔfo, tete agyanom, anaasɛ Protestant asɛnkafo. Wɔde abosonsom mu atosɛm, nkyerɛkyerɛ a enni Kyerɛwnsɛm mu te sɛ onipa kra a enwu da, hell-gya, ahodwiragya, ne Baasakoro asi Onyankopɔn ho nokware ahorow ananmu. Wɔte sɛ nyamesom akannifo a Yesu kaa wɔn ho asɛm sɛ: “Mo agya a mufi no mu ne ɔbonsam, na mo agya no akɔnnɔde na mopɛ sɛ moyɛ. . . . Ɔyɛ ɔtorofo ne atoro agya” no. (Yohane 8:44) Wɔn nneyɛe nso pa wɔn ho ntama sɛ mmaratofo, efisɛ wɔde wɔn ho hyɛ dwumadi ahorow a ebu Onyankopɔn mmara so mu. Yesu ka kyerɛ saafo no sɛ: “Mumfi me so nkɔ, mo a moyɛ nea ɛnteɛ!”​—Mateo 7:21-23.

      Ma a Wɔma Wɔn Ho So

      10. Abusuabɔ bɛn na onipa a onni mmara no ne amammui sodifo wɔ?

      10 Abakɔsɛm kyerɛ sɛ onipa a onni mmara kuw yi mufo ada ahantan ne ahomaso adi araa ma wɔakyerɛ wiase no sodifo ahorow no nea ɛsɛ sɛ wɔyɛ ankasa Asɔfo nam ‘hokwan a wofi soro de ama ahene’ no so akyerɛ sɛ wɔne sodifo ne Onyankopɔn ntamgyinafo a wɔn ho hia. Wɔasisi ahene ne ahempɔn na wɔatu wɔn ade so, na wɔatumi ama ɔmanfo a wɔba fam no agyina sodifo ahorow akyi anaasɛ wɔasɔre atia wɔn. Nokwarem no, wɔaka te sɛ nea Yudafo asɔfo mpanyin a wɔpow Yesu no kae no, sɛ: “Yenni hene bi sɛ Kaesare.” (Yohane 19:15) Nanso, Yesu kyerɛkyerɛɛ pefee sɛ: “M’ahenni mfi wi yi ase.”​—Yohane 18:36.

      11. Ɔkwan bɛn so na asɔfo ama wɔn ho so?

      11 Sɛnea ɛbɛyɛ na onipa a onni mmara kuw yi ama wɔn ho so kɛse asen nnipa a wɔba fam no, wɔapaw atade soronko bi, mpɛn pii no atade tuntum. Afei nso, wɔde aboɔdenne ahorow pii, ne ahenkyɛw, mmeamudua ahorow ne asɔfokyɛw ahyehyɛ wɔn ho. (Fa toto Mateo 23:5, 6 ho.) Nanso na Yesu ne n’akyidifo nni ntade a ɛte saa no bi; wosiesiee wɔn ho te sɛ nnipa a wɔba fam no ara pɛ. Asɔfo ama wɔn ho abodin ahorow nso, te sɛ “Papa,” “Papa Kronkron,” “Nea Nidi Sɛ No,” “Nea Nidi a Ɛsen Biara Sɛ No,” “Okunini,” ne “Onuonyamfo” a ɛsan ma ‘wɔma wɔn ho so sen obiara.’ Nanso, Yesu kaa nyamesom mu abodin ho asɛm sɛ: “Mommfrɛ obiara mo agya asase so.” (Mateo 23:9) Saa ara na bere a Elihu rekasa atia Hiob awerɛkyekyefo nyaatwomfo no, ose: “Ɛmpare me sɛ mɛhwɛ obi anim; na mede abodin mama onipa.”​—Hiob 32:21, New World Translation.

      12. Hena na Paulo kae sɛ asɔfo resom no ankasa?

      12 Bere a Paulo kae wɔ ne bere so sɛ onipa a onni mmara no afi n’adwuma ase no, ɔkaa wɔn a na wɔda su a ɔwɔ no bi adi nso ho asɛm sɛ: “Na saa nnipa yi yɛ atoro asomafo, nnaadaa adwumayɛfo a wɔdan wɔn ho yɛ sɛ Kristo asomafo. Na ɛnyɛ nwonwa; efisɛ Satan ankasa po dan ne ho sɛ hann bɔfo. Enti sɛ n’asomfo nso dan wɔn ho yɛ sɛ trenee asomfo a, ɛnyɛ ade kɛse bi; na ebewie wɔn sɛnea wɔn nnwuma te.”​—2 Korintofo 11:13-15.

      Atuatew a Etia Nokware Som

      13. Dɛn ne ɔwae a Paulo kaa ho asɛm siei no?

      13 Paulo kae sɛ onipa a onni mmara yi ne ɔwae na ɛbɛba. Nokwarem no, Paulo nnyinasode a edi kan a ɛbɛma wɔahu onii a onipa onni mmara kuw yi yɛ ne sɛ, ‘Yehowa da [bere a ɔsɛe nneɛma nhyehyɛe bɔne yi] remma gye sɛ ɔwae a wɔbɛwae no ba ansa (2 Tesalonikafo 2:2, 3) Nanso “ɔwae” kyerɛ dɛn? Wɔ asɛm yi mu no, ɛnkyerɛ honhom mu mmerɛwyɛ a ɛma wɔtwe wɔn ho kɛkɛ. Hela asɛmfua a wɔde dii dwuma wɔ ha maa “ɔwae no kyerɛ, nea ɛka nneɛma afoforo ho no, “po a wɔpow,” anaasɛ “atuatew.” Nkyerɛase pii kyerɛ ase sɛ “atuatew.” William Barclay nkyerɛase no ka sɛ: “Saa da no rentumi mma gye sɛ Atuatew Kɛse no aba ansa.” Jerusalem Bible no frɛ no “Atuatew Kɛse no.” Enti wɔ nea Paulo reka no mu no, “ɔwae” kyerɛ atua a wɔtew tia nokware som.

      14. Bere bɛn na ɔwae no fii ase bae kɛse?

      14 Ɛyɛɛ dɛn na ɔwae yi, atuatew yi fii ase? Wɔ Paulo bere so no, Paulo kyerɛw ‘nea esiw onipa a onni mmara no kwan’ ho asɛm wɔ Tesalonikafo 2:6. Na ɛyɛ dɛn? Na ɛyɛ asomafo no tumi a esiw no kwan no. Na wɔ a wɔwɔ hɔ ne tumi akyɛde a honhom kronkron de maa wɔn no siw ɔwae kwan ma antumi antrɛw saa bere no. (Asomafo no Nnwuma 2:1-4; 1 Korintofo 12:28) Nanso bere a asomafo no wui no, woyii nea esiw kwan no fii hɔ bɛyɛ afeha a edi kan no awiei.

      Asɔfokuw a Wɔn Nneyɛe Ne Kyerɛwnsɛm Nhyia Ba

      15. Nhyehyɛe bɛn na Yesu de sii hɔ maa Kristo asafo no?

      15 Asafo a Yesu hyehyɛe no nyinii wɔ afeha a edi kan no mu wɔ mpanyimfo (ahwɛfo) ne asafo mu asomfo akwankyerɛ ase. (Mateo 20:25-27; 1 Timoteo 3:1-13; Tito 1:5-9) Woyii eyinom fii asafo no mu. Na wɔyɛ mmarima a wɔfata honhom mu a na wonni nyamekyerɛ ntetee biara, te sɛ nea Yesu annya ntetee biara a ɛte saa no. Nokwarem no, n’atamfo bisae sɛ: “Ɛyɛɛ dɛn na oyi nsuaa nhoma pɛn na onim yi?” (Yohane 7:15) Nyamesom sodifo no kaa asɛnkoro no ara faa asomafo no ho sɛ: Na wohuu Petro ne Yohane nnam, na wɔtee sɛ wɔyɛ nnipa a wonsuaa nhoma da, na mmom wɔyɛ mpapahwekwa no, ɛyɛɛ wɔn nwonwa, na wohuu wɔn sɛ wɔne Yesu na ɛtrae.”​—Asomafo no Nnwuma 4:13.

      16. Ɔkwan bɛn so na ɔwae no ma wɔtwee wɔn ho fii afeha a edi kan no mu Kristofo nhwɛso ma asafo mu nhyehyɛe ho?

      16 Nanso, ɔwae no de gyidi horow a wonya fii Yudafo asɔfo hɔ ne awiei koraa no, abosonsom Roma nyamesom ahyehyɛde no mu bae. Bere a bere twaam na wae a wɔwae fi nokware gyidi ho bae no, asɔfo a wɔn nneyɛe ne Kyerɛwnsɛm no nhyia kuw bae. Obi a wɔayɛ no paapa fii ase dii paapanom abadiakyiri a woyii wɔn fii asɔfo mpanyin a wɔn nso wɔyɛ asɔfo a wɔatete wɔn wɔ nyamekyerɛ sukuu mu a wɔama wɔn saa dibea no mu no so. Enti, wɔ afeha a edi kan no akyi bere tiaa bi no, tumi bedii asɔfokuw a wɔkanyan ehu nsam wɔ Kristoman mu. Ɛnyɛ afeha a edi kan Kristo mpanyimfo ne asafo mu asomfo so na wɔhwɛ hyehyɛɛ kuw yi, na mmom abosonsom nhyehyɛe so.

      17. Bere bɛn titiriw na wɔhyɛɛ nea onni mmara no tumi mu den?

      17 Na wɔayɛ gyidifo a wɔnyɛ asɔfo no asɔremma kɛkɛ wɔ afeha a ɛto so abiɛsa no mu tɔnn. Onipa a onni a mmara a wawae no fii ase dii tumi nkakrankakra. Wɔhyɛɛ saa tumi mu den wɔ Roma ɔhempɔn Konstantino nniso ase, ne titiriw wɔ Nicaea Nhyiam a wɔyɛe afe 825 Y.B. mu no mu. Afei wɔkaa asɔre ne Ɔman no boom. Enti, onipa a onni mmara​—Kristoman asɔfo​—bɛyɛɛ mfehaha pii awaefo a wɔtoatoa so a wɔatew atua atia nokware Nyankopɔn Yehowa. Mmara ne Nhyehyɛe a wɔadi akyi no nyɛ Onyankopɔn de na mmom wɔn ankasa de.

      Abosonsom Nkyerɛkyerɛ

      18. Abosonsom nkyerɛkyerɛ a ɛyɛ abususɛm bɛn na nea onni mmara no gye toom?

      18 Onipa a onni mmara a ɔrenyin no fɛm abosonsom nkyerɛkyerɛ nso. Sɛ nhwɛso no, ɔde Baasakoro ahintasɛm nyame a wontumi nte ase no sii Nea ɔka sɛ: “Mene [Yehowa], me din ne no, na meremfa m’anuonyam mma obi.” “Mene [Yehowa], na obi nni hɔ bio; Onyankopɔn bi nni hɔ sɛ me nko” no ananmu. (Yesaia 42:8; 45:5) Wɔtrɛw nnipa, abosonsom gyidi horow mpo a wɔde asi Onyankopɔn ho nokware ahorow ananmu no mu ma abususɛm foforo bɛkaa ho: Bible mu ɔhobrɛasefo Maria a wɔsom no sɛ Kristoman “Onyankopɔn ne na.” Enti, wɔn a wɔma atoro nkyerɛkyerɛ a ɛte saa nya nkɔso a wɔne asɔfokuw no, abɛyɛ “wura” a Satan gui sɛ ɔbɛbɔ mmɔden de amene aba pa a Kristo gui no mu nea anyin yiye.​—Mateo 13:36-39.

      19. Ɔkwan bɛn so na Kristoman mu paapaee wɔ mfehaha pii no mu, na dɛn na wɔma ɛkɔɔ so?

      19 Bere a mpaapaemu bae no, Kristoman mu paapae yɛɛ nyamesom ne awaefo akuw ɔhaha pii. Nanso nyamesom foforo biara kuraa asɔfo ne asɔremma mu mpaapaemu no mu, gye emu kakraa bi pɛ na anyɛ saa. Enti, onipa a onni mmara no akɔ so atra hɔ abedu nnɛ. Na ɛda so ara nam n’atade soronko ne abodin akɛse no so ma ne ho so sen nnipa a wɔba fam no. Ɛda adi pefee sɛ Paulo angugu nsɛm mu bere a ɔkae sɛ onipa a onni mmara kuw no bɛhyɛ ne ho anuonyam na wama ne ho so te sɛ onyame bi no.

      Paapanom Ahyehyɛde No

      20. Katolekfo nhoma bi ka paapa ho asɛm dɛn?

      20 Anuonyamhyɛ a ɛte saa ho nhwɛso fa paapanom ahyehyɛde a ɛwɔ Roma no ho. Nyamesom nsɛm asekyerɛ nhoma bi a Lucio Ferraris kyerɛwee a wotintim no Italy ka paapa no ho asɛm sɛ “ɔwɔ nidi ne sɛ ɔkorɔn araa ma ɔnyɛ onipa ara kwa, na mmom ɔyɛ Onyankopɔn, sɛ yɛbɛka no saa a, ne Onyankopɔn nanmusifo.” Sɛ “ɔsoro, asase, ne hell hene no,” n’ahenkyɛw yɛ ahenkyɛw abiɛsa a ɛbom biako. Saa nsɛm asekyerɛ nhoma koro no toa so ka sɛ: “Sɛ yɛbɛka a, paapa no yɛ Onyankopɔn a ɔwɔ asase, ɔnokwafo Kristo bapɔmma koro pɛ, ahene nyinaa mu nea ɔyɛ kɛse sen biara.” Ɛde ka ho sɛ: “Ɛtɔ bere bi a, paapa no betumi atwa ɔsoro mmara no mu.” Afei nso, The New Catholic Dictionary ka paapa no ho asɛm sɛ: “N’ahemmɔfo korɔn sen ahemmɔfo afoforo biara.”

      21. Kyerɛ nsonsonoe a ɛwɔ paapa no nneyɛe ne Petro ne ɔbɔfo no de mu.

      21 Paapa no nte sɛ Yesu asuafo no nti, ɔtaa hyɛ atade a wɔadi mu adwini yiye, na ogye nidi ntraso a wɔde ma nnipa no tom. Paapa no ma kwan ma nnipa kotow no, wɔfew ne mpɛtea ho, na wɔsoa no wɔ akongua soronko bi mu. Ahuhude bɛn ara na paapanom ayɛ wɔ mfehaha a atwam no mu sɛɛ yi! Adeyɛ a ɛne Petro a ɔkaa eyi kyerɛɛ Kornelio, Romafo asraafo panyin a ɔkotow Petro nan ase sɛ ɔde ɔsom rema no no ahobrɛase bɔ abira: “Sɔre, . . . meyɛ onipa ara kwa”! (Asomafo no Nnwuma 10:25, 26, Catholic Jerusalem Bible) Na hwɛ sɛnea ɛne nea ɔbɔfo a ɔde Adiyisɛm no maa Yohane no yɛe no bɔ abira! Yohane bɔɔ mmɔden sɛ ɔbɛkotow ɔbɔfo no ɔsom kwan so nanso ɔbɔfo no kae sɛ: “Hwɛ, nyɛ sa, meyɛ wo ne wo nuanom adiyifo ne wɔn a wokura nhoma yi mu nsɛm no awurakwaa. Kotow Nyankopɔn!”​—Adiyisɛm 22:8, 9.

      22. Kyerɛwnsɛm mu ahyɛde bɛn na ebetumi ama wɔahu onipa a onni mmara no?

      22 So asɔfokuw no ho nhwehwɛmu yi mu yɛ den? Yebetumi ahu eyi denam ahyɛde a Yesu de mae a ɛbɛma wɔahu atoro adiyifo a yɛde bedi dwuma no so: “Wɔn aba na mode behu wɔn.” (Mateo 7:15, 16) Ɛnde, aba bɛn na asɔfo asow wɔ mfehaha no mu ne yɛn afe 20 yi mu? Dɛn na ɛbɛba onipa a onni mmara yi so, na henanom na ebi bɛka wɔn? Asɛm bɛn na wɔn a wosuro Onyankopɔn ampa no wɔ wɔ onipa a onni mmara yi ho? Nsɛm a edidi so no bɛka nsɛntitiriw yi ho asɛm.