Nsemmisa A Efi Akenkanfo Hɔ

Ɔkwan bɛn so na Kristo Yesu sɔfo panyin nnwuma a wɔka ho asɛm wɔ Hebrifo 4:15, 16 no fa “nguan foforo” no ho nnɛ?

Ɛwom sɛ Yesu dwumadi sɛ Ɔsɔfo Panyin no fa wɔn a wɔbɛkɔ akɔka ne ho wɔ soro no ho titiriw de, nanso Kristofo a wɔwɔ asase so asetra ho anidaso no nya Yesu asɔfodwuma no so mfaso mprempren mpo.

Bɔne ahyɛ nnipa so fi Adam so. Sintɔ a yenya fii awo mu no ma yehu amane, sɛnea ɛtoo Israelfo no. Wɔdan kɔɔ asɔfo mpanyin ne asɔfo nkumaa a wodidii so bae a wɔbɔɔ wɔn ankasa bɔne ne ɔman no de ho afɔre no nkyɛn. Bere kɔɔ so no, wɔsraa Yesu sɛ ɔsɔfo wɔ “Melkisedek dibea so.” Wonyan Yesu akyi no, okopuee Yehowa anim de ne desani afɔre a ɛyɛ pɛ no bo a ɛsom kɔmae.—Dwom 110:1, 4.

Dɛn na eyi kyerɛ ma yɛn nnɛ? Wɔ Paulo krataa a ɔkyerɛw kɔmaa Hebrifo no mu no, ɔkaa Yesu adwuma sɛ Ɔsɔfo Panyin no ho asɛm. Yɛkenkan wɔ Hebrifo 5:1 sɛ: “Ɔsɔfo panyin biara, woyi no fi nnipa mu hyɛ no sɔfo ma nnipa, Onyankopɔn fam nneɛma ho, na bɔne nti ɔde ayɛyɛde ne afɔre ama.” Afei, Paulo kyerɛe wɔ nkyekyem 5 ne 6 sɛ Yesu bɛyɛɛ ɔsɔfo panyin, na ebetumi de mfaso horow abrɛ yɛn.

Ɔkwan bɛn so? Paulo kyerɛwee sɛ: “Ɔyɛ ɔba de, nanso osuaa amane a ohui no mu osetie, na onya yɛɛ pɛ no, ɔyɛɛ wɔn a wotie no nyinaa daa nkwagye farebae.” (Hebrifo 5:8, 9) Nea edi kan no, saa nkyekyem no betumi ama yɛasusuw sɛnea yebetumi anya wiase foforo no mu mfaso ho, bere a wobeyi wɔn a wodi Onyankopɔn ne Yesu nokware no bɔne afi hɔ na wɔanya daa nkwa no. Ɛno yɛ anidaso pa a egyina Yesu afɔrebɔ no mu ogye no so mfaso ne n’adwuma sɛ Ɔsɔfo Panyin no so.

Nanso, nokwarem no, yebetumi anya n’asɛyɛde anaasɛ n’adwuma sɛ Ɔsɔfo Panyin no mu mfaso mprempren yi ara. Hyɛ Hebrifo 4:15, 16 nsow: “Yenni ɔsɔfo panyin a ontumi nhu yɛn mmerɛwyɛ mma yɛn, na mmom nea wɔasɔ no ahwɛ ade nyinaa mu sɛ yɛn ara, nso onni bɔne. Enti momma yɛmfa nnam mmra ɔdom ahengua no anim, na yɛanya mmɔborohunu, na yɛahu ɔdom, na ɛbere a ɛsɛ mu aboa yɛn.” “Ɛbere a ɛsɛ” no bɛyɛ bere bɛn? Ɛyɛ bere a yehia mmɔborohunu ne ɔdom no. Esiane sɛ yɛnyɛ pɛ nti, ɛsɛ sɛ yɛn nyinaa te nka sɛ yehia eyi nnɛ.

Hebrifo 4:15, 16 da no adi sɛ Yesu—a mprempren ɔyɛ ɔsɔfo wɔ soro no—betumi ayi tema adi efisɛ ɔno nso ayɛ nnipa pɛn. Obeyi adi akyerɛ henanom? Yɛn. Bere bɛn? Ɛnnɛ. Bere a na Yesu yɛ ɔdesani no, ohyiaa ahokyere ne nhyɛso a nnipa taa hyia no bi. Ɔkɔm ne sukɔm dee Yesu bere bi. Ɛmfa ho sɛ na ɔyɛ pɛ no, ɔtee brɛ nka. Ɛsɛ sɛ ɛno ma yɛn awerɛhyem. Dɛn ntia? Esiane sɛ Yesu tee ɔbrɛ ankasa nka nti, onim sɛnea yɛtaa te nka. Kae nso sɛ na ɛsɛ sɛ Yesu gyina n’asomafo no ntam akasakasa a efi ahoɔyaw mu ano. (Marko 9:33-37; Luka 22:24) Yiw, ohyiaa abasamtu ahorow. So ɛnsɛ sɛ ɛno ma yenya ahotoso sɛ ɔte yɛn ase bere a yehyia abasamtu, na yɛn abam bu no? Ɛda adi saa.

Sɛ w’abam bu a, dɛn na wubetumi ayɛ? Paulo kae sɛ ɛsɛ sɛ wotwɛn kosi bere a wo Sɔfo Panyin, Yesu, bɛboa wo wɔ wiase foforo no mu ma woayɛ pɛ wɔ adwene ne nipadua mu anaa? Dabi. Paulo kae sɛ: “[Yebetumi anya] mmɔborohunu, na yɛahu ɔdom, na ɛbere a ɛsɛ mu aboa yɛn,” na mprempren nso ka ho. Afei nso, bere a na Yesu yɛ ɔdesani no, ohyiaa amanehunu ne ɔhaw ahorow, ‘wɔsɔɔ no hwɛe ade nyinaa mu sɛ yɛn ara.’ Enti, sɛ yehyia nneɛma a ɛtete saa a, wayɛ krado sɛ ɔbɛboa yɛn, a egyina sɛnea ɔte tebea a yɛwom no ase so. Ɛno ntwe wo mmɛn no anaa?

Afei hyɛ nkyekyem 16 nsow. Paulo ka sɛ yɛn—a ɛfa wɔn a wɔasra wɔn ne nguan foforo no mufo ho—betumi de ɔkasa mu ahofadi akɔ Onyankopɔn anim. (Yohane 10:16) Ɔsomafo no ankyerɛ sɛ yebetumi aka biribiara a yɛpɛ kɛkɛ wɔ mpaebɔ mu, nneɛma a ɛhyɛ abufuw, na ɛnkyerɛ obu mpo. Mmom, Yesu afɔrebɔ ne n’adwuma sɛ Ɔsɔfo Panyin no nti, yebetumi akɔ Onyankopɔn anim ɛmfa ho mpo sɛ yɛyɛ abɔnefo.

Ɔkwan foforo a yebetumi afa so anya mfaso afi yɛn Sɔfo Panyin, Yesu Kristo, adwuma no mu nnɛ mpo no fa yɛn bɔne anaasɛ yɛn mfomso ahorow ho. Nokwarem no, yɛnhwɛ kwan sɛ Yesu de n’afɔre no so mfaso bedi dwuma wɔ yɛn ho akosi ase wɔ mprempren nhyehyɛe yi mu. Sɛ ɔyɛ saa mpo a, yɛrennya daa nkwa. Wokae asɛm a ɛwɔ Luka 5:18-26, a ɛfa ɔbarima bubuafo bi a wɔde ne kɛtɛ faa ɔdan atifi tokuru mu kɔɔ mu ho no? Yesu ka kyerɛɛ no sɛ: “Onipa, wɔde wo bɔne afiri wo.” Ná ɛno nkyerɛ sɛ bɔne ahorow pɔtee bi na ɛma obubui. Na ɛbɛkyerɛ ɔbarima no bɔne nyinaa, na ɔkwan bi so no, na ebetumi ayɛ nea ɛfa ne sintɔ a onya fii awo mu, a ɛde ahohia ba no.

Ná Yesu nam afɔre a ɔbɛbɔ no so betumi asoa ɔbarima no bɔne akɔ, sɛnea na Asasel ɔpapo soa Israel bɔne kɔ wɔ Mpata Da no. (Leviticus 16:7-10) Nanso na ɔbarima a wabubu no da so ara yɛ onipa. Ná ɔbɛsan ayɛ bɔne bio, na bere kɔɔ so no, owui, sɛnea ɛsɛ sɛ ɛba abɔnefo so no. (Romafo 5:12; 6:23) Nea Yesu kae no nkyerɛ sɛ ɔbarima no nyaa daa nkwa amonom hɔ ara. Na mmom, wɔde ɔbarima no bɔne firii no koduu baabi saa bere no.

Afei susuw tebea a yɛwom no ho. Esiane sɛ yɛnyɛ pɛ nti, yɛfom da biara da. (Yakobo 3:2) Dɛn na yebetumi ayɛ wɔ ho? Yɛwɔ Ɔsɔfo Panyin mmɔborohunufo wɔ soro a yebetumi afa no so akɔ Yehowa anim. Yiw, sɛnea Paulo kyerɛwee no, yɛn nyinaa betumi ‘de kasa mu ahofadi akɔ Onyankopɔn ɔdom ahengua no anim, na yɛanya mmɔborohunu, na yɛahu ɔdom, na ɛbere a ɛsɛ mu aboa yɛn.’ Ne saa nti, akyinnye biara nni ho sɛ wɔn a wɔyɛ nguan foforo nnɛ no nyinaa renya mfaso a ɛyɛ nwonwa, a ahonim pa ka ho, fi Kristo sɔfo panyin nnwuma no mu.

Kristofo a wɔwɔ asase so asetra ho anidaso nyinaa betumi ahwɛ mfaso kɛse a wobetumi anya wɔ wiase foforo a ɛreba mu no kwan. Afei yɛn Sɔfo Panyin a ɔwɔ soro no de n’afɔrebɔ no so mfaso bedi dwuma akosi ase, na ama yɛanya bɔne fafiri koraa. Ɔnam nnipa honam fam ne honhom fam akwahosan ho dwuma a obedi nso so bɛma wɔanya mfaso kɛse. Na Yesu bɛtrɛw nkyerɛkyerɛ a ɔde bɛma Onyankopɔn nkurɔfo a wɔwɔ asase so no mu kɛse, efisɛ na ɛyɛ Israel asɔfo no asɛyɛde titiriw sɛ wɔde Mmara no bɛkyerɛkyerɛ. (Leviticus 10:8-11; Deuteronomium 24:8; 33:8, 10) Enti, bere a yenya Yesu asɔfodwuma ahorow no so mfaso nnɛ no, dodow no ara na ɛbɛba daakye!