So Wunni Adagyew Wɔ Nnwuma Funu Yɛ Mu Anaa Wɔ Yehowa Som Mu?
“MESRƐ wo, minni adagyew.” Eyi ne anoyi a Yehowa Adansefo taa hyia bere a wɔka Ahenni no ho asɛmpa wɔ baguam no mu biako. (Mateo 24:14) Na ɛwom sɛ ka a wɔka sɛ “minni adagyew” no taa yɛ anoyi a wɔde ma ara kwa de, nanso nokwasɛm no ne sɛ nnipa pii nni adagyew. Ɛkame ayɛ sɛ nea ade a agye wɔn bere nyinaa ne “nneɛma nhyehyɛe yi mu dadwen”—nhyɛso a ɛne sika a wobenya de ahwɛ wɔn ho, atua wɔn ho aka horow, adwuma a wɔbɛkɔ na wɔasan aba fie, mmofra yɛn, fie, kar, ne ahode afoforo sohwɛ.—Mateo 13:22, New World Translation.
Nanso, ɛwom sɛ nokwarem no, ebia nnipa nni adagyew de, nanso wɔn mu kakraa bi pɛ na wɔreyɛ nnwuma a mfaso wɔ so ankasa. Ɛte sɛ nea onyansafo Salomo kyerɛw bere bi no: “Ɛdɛn na onipa nya ne brɛ nyinaa ne ne koma mu dadwen a ɔde haw ne ho owia ase no mu? Na ne nna nyinaa yɛ ayayade, na ne haw yɛ no awerɛhow, nso anadwo po ne koma ntɔ ne yam: eyi nso, ahuhude ne no.”—Ɔsɛnkafo 2:22, 23.
Bible no frɛ saa dwumadi a mfaso biara nnim yi sɛ “nnwuma funu” nso. (Hebrifo 9:14) So nnwuma a ɛte sɛɛ di akoten wɔ w’asetra mu? Ɛsɛ sɛ eyi yɛ nea ɛho hia wo kɛse sɛ Kristoni, efisɛ Onyankopɔn “betua onipa ka sɛ n’adwuma te.” (Dwom 62:12) Na esiane sɛ “wɔatwa bere a aka no tiaa” nti, ɛsɛ sɛ yɛhwɛ yiye na yɛamfa nnwuma funu yɛ ansɛe bere. (1 Korintofo 7:29) Nanso dɛn koraa ne nnwuma funu? Ɛsɛ sɛ yebu no dɛn?
Na yɛbɛyɛ dɛn atumi ahu pefee sɛ yɛde yɛn bere nyinaa yɛ nnwuma a mfaso ankasa wom?
Nnwuma Funu a Yebehu
Paulo kyerɛwee wɔ Hebrifo 6:1, 2 sɛ: “Enti momma yennyaw Kristo mfiase asɛm no, na yɛmpere nkɔ nea ɛyɛ pɛ no mu, na yɛamfa nnwuma funu mu adwensakra ne Onyankopɔn ho gyidi, ne asubɔ horow ho kyerɛ ne nsaguso ne awufo sɔre ne daa atemmu anhyɛ ase bio.” Hyɛ no nsow sɛ “nnwuma funu mu adwensakra” ka “mfiase asɛm” no ho. Sɛ Kristofo no, na wɔn a wɔkenkan Paulo asɛm no asakra afi nnwuma funu a ɛte sɛɛ ho dedaw. Ɔkwan bɛn so na wɔayɛ saa?
Ansa na wɔregye Kristo atom no, na afeha a edi kan no mufo binom de wɔn ho ahyɛ “ɔhonam nnwuma” funu a ɛne “aguamammɔ, efi, ahohwi, abosonsom, aduto,” ne nnwuma bɔne afoforo mu. (Galatifo 5:19-21) Sɛ wɔannyae a, anka nnwuma yi bɛma wɔawu wɔ honhom fam. Nanso, esiane mmɔborɔhunu a wɔdaa no adi kyerɛɛ wɔn nti, na saa Kristofo no adan afi ɔsɛe kwan a wɔnam so no so, anya adwensakra, ma “wɔaguare” wɔn. Enti, na wɔnam saa kwan no so nya Yehowa anim dom.—1 Korintofo 6:9-11.
Nanso, na ɛnyɛ Kristofo nyinaa na ehia sɛ wɔsakra fi nnwuma bɔne anaa nea ɛyɛ ɔbrasɛe ho. Paulo kyerɛw ne krataa no kɔmaa Yudafo gyidifo titiriw, a akyinnye biara nni ho sɛ na wɔn mu pii adi Mose Mmara no so ketee ansa na wɔregye Kristo atom. Ɛnde, nnwuma funu bɛn ho adwensakra na wonyae no? Nokwarem no, na bɔne biara nni Mmara no mu amanne ne adidi mu ahwehwɛde ahorow so a wodii no mu. So na Mmara no nyɛ “kronkron ne trenee ne papa”? (Romafo 7:12) Yiw, nanso Paulo kaa Yudafo no ho asɛm wɔ Romafo 10:2, 3 sɛ: “Midi wɔn adanse sɛ wɔwɔ Onyankopɔn ho mmɔdenbɔ de, nanso wonni no nimdeɛ mu. Na wonnim Nyankopɔn trenee no, na wɔhwehwɛ sɛ wɔde wɔn ankasa trenee si hɔ nti, wɔmmrɛɛ wɔn ho ase nhyɛɛ Onyankopɔn trenee ase ɛ.”
Yiw, Yudafo no dii mfomso susuw sɛ ɛdenam Mmara no a wobedi so pɛpɛɛpɛ so no, wobetumi anya wɔn nkwagye. Nanso, Paulo kyerɛkyerɛɛ mu sɛ “womfi mmara nnwuma mu na ebu onipa bem, gye sɛ ɛnam Kristo Yesu gyidi so nti.” (Galatifo 2:16) Wɔde Kristo agyede no mae akyi no, na Mmara nnwuma—ɛmfa ho sɛnea eye na ekura botae pa no—yɛ nnwuma funu a mfaso biara nni so wɔ nkwagye a obi benya mu. Enti Yudafo komapafo hwehwɛɛ Yehowa anim dom denam wɔn adwene a wɔsakrae wɔ nnwuma funu a ɛte sɛɛ ho na wɔma wɔbɔɔ wɔn asu de yɛɛ wɔn adwensakra no ho sɛnkyerɛnne no so.—Asomafo no Nnwuma 2:38.
Dɛn na yesua fi eyi mu? Sɛ ɛnyɛ nneyɛe bɔne ne ɔbrasɛe nko na ɛka nnwuma funu ho; adwuma biara a awu, mfaso nni so, na ɛnsow aba biara wɔ honhom fam no nso ka ho. Nanso so Kristofo nyinaa nsakra wɔn adwene wɔ nnwuma funu a ɛte sɛɛ ho ansa na wɔabɔ wɔn asu? Ampa, nanso afeha a edi kan no mu Kristofo binom de wɔn ho kɔhyɛɛ ɔbrasɛe mu bio. (1 Korintofo 5:1) Na na Yudafo a wɔyɛ Kristofo no bi taa san kɔyɛ Mose Mmara no mu nnwuma funu no bi. Na ɛsɛ sɛ Paulo bɔ saafo no nkae sɛ ɛnsɛ sɛ wɔsan kɔyɛ nnwuma funu bio.—Galatifo 4:21; 5:1.
Yɛn ho a Yɛbɛhwɛ Yiye wɔ Nnwuma Funu Ho
Enti ɛsɛ sɛ Yehowa nkurɔfo a wɔwɔ hɔ nnɛ no hwɛ yiye na wɔansan ankɔtɔ nnwuma funu afiri no mu. Nhyɛso ahorow a ɛbɛma yɛagyaa yɛn ho mu ama ɔbra bɔne, yɛrenni nokware, na yɛde yɛn ho ahyɛ aguamammɔ mu no fi afã horow nyinaa betua yɛn. Awerɛhosɛm ne sɛ Kristofo mpempem pii gyaa wɔn ho mu ma nhyɛso ahorow yi afe biara, na sɛ saafo yi ankyerɛ ahonu a, wotu wɔn fi Kristofo asafo no mu. Ɛnde ɛsɛ sɛ Kristoni tie Paulo afotu a ɛwɔ Efesofo 4:22-24 no yiye sen bere biara a atwam: “Mo kan abrabɔ fam de, munyi onipa dedaw a ɔresɛe wɔ nnaadaa akɔnnɔ mu no nkyene . . . na momma wɔnyɛ mo foforo mo adwene honhom mu, na monhyɛ onipa foforo a wɔbɔɔ no Nyankopɔn so, nokware trenee ne ahotew mu.”
Nokwarem no, na Efesofo a Paulo kyerɛw krataa yi kɔmaa wɔn no ahyɛ nipasu foforo no akɔ akyiri. Nanso Paulo boaa wɔn ma wohui sɛ saa a wɔbɛyɛ no yɛ ade a wɔkɔ so yɛ! Sɛ Kristofo ankɔ so anyere wɔn ho a, nnaadaa akɔnnɔ a ɛkɔ so yɛ nkɛntɛnso bɔne bɛma wɔasan akɔyɛ nnwuma funu. Saara na ɛte wɔ yɛn fam nnɛ. Ɛsɛ sɛ yɛkɔ so yere yɛn ho hyɛ nipasu foforo no, na ɛnsɛ sɛ yɛma kwan ma su horow bi a yenyae wɔ yɛn kan asetra kwan no mu no sɛe no. Ɛsɛ sɛ yɛkwati—yekyi—ɔhonam nnwuma bɔne no biara. Odwontofo no tu fo sɛ: “Mo a modɔ [Yehowa], munkyi bɔne.”—Dwom 97:10.
Yehowa nkurɔfo a wɔwɔ hɔ nnɛ mu dodow no ara atie afotu yi na wɔakɔ so akura abrabɔ fam ahotew mu ma wɔfata nkamfo. Nanso, nnwuma a bɔne biara nnim ankasa nanso awiei koraa no, ɛyɛ nea mfaso biara nnim no adaadaa ebinom. Sɛ nhwɛso no, ebinom de wɔn ho nyinaa ahyɛ nhyehyɛe a wɔnam so nya sika anaa honam fam nneɛma mu fee. Nanso Bible no bɔ kɔkɔ sɛ: “Na wɔn a wɔpɛ wɔn ho anya no hwe sɔhwɛ ne afiri ne nkwasea akɔnnɔ a enye mma nnipa na ɛtwe wɔn kogu ɔsɛe ne ɔyera mu mu.” (1 Timoteo 6:9) Wiase nhomasua nso ayɛ afiri ama ebinom nso. Ɛyɛ ampa sɛ ehia sɛ obi sua nhoma kodu baabi na ama watumi anya adwuma ayɛ. Nanso ebinom de wiase nhomasua a ɛkɔ akyiri na egye bere pii no akyidi apira wɔn ho wɔ honhom fam.
Yiw, nnwuma pii wɔ hɔ a ebia bɔne biara nnim ankasa. Nanso sɛ ɛmfa hwee nka yɛn asetra ho anaasɛ ɛmma yennya Yehowa anim dom a, ɛyɛ nnwuma funu. nnwuma a ɛtete saa gye bere ne ahoɔden pii nanso ɛmma yɛn honhom fam mfaso, ahoɔden foforo a ɛbɛtra hɔ akyɛ biara—Fa toto Ɔsɛnkafo 2:11 ho.
Akyinnye biara nni ho sɛ worebɔ mmɔden sɛ wode wo bere nyinaa bɛyɛ honhom fam nnwuma a mfaso wom. Nanso, sɛ wotaa hwehwɛ wo ho mu daa a, ɛbɛboa wo. Bere ne bere mu no, wubetumi abisa wo ho nsɛm te sɛ: ‘So m’asɛnkakɔ ne adesuakɔ rekɔ fam esiane sɛ meyɛ honam fam nnwuma a ɛho nhia nti anaa?’ ‘So minya bere ma ahomegye nanso minnya bere pii mma kokoam ne abusua adesua anaa?’ ‘So mede bere ne ahoɔden pii di honam fam ahonyade ahorow ho dwuma, nanso menhwɛ wɔn a ahia wɔn wɔ asafo no mu, te sɛ ayarefo ne wɔn a wɔn mfe akɔ anim no?’ Nsemmisa yi ho mmuae betumi ama woahu hia a ehia sɛ wode bere pii yɛ honhom fam nnwuma no.
Fa wo Bere Pii Yɛ Yehowa Som Adwuma
Sɛnea 1 Korintofo 15:58 ka no, yebetumi ‘ayɛ pii wɔ Awurade adwuma no mu.’ Nea edi mu akoten ne Ahenni asɛmpaka ne asuafoyɛ adwuma no. Wɔ 2 Timoteo 4:5 no, Paulo hyɛe sɛ: “Fa Asɛmpaka yɛ w’asetra mu adwuma, yɛ ɔsom adwuma no fefeefe.” (Jerusalem Bible) Mpanyimfo ne asafo mu asomfo nso wɔ pii yɛ wɔ nguankuw no ahiade ahorow ho dwuma a wobedi mu. (1 Timoteo 3:1, 5, 13; 1 Petro 5:2) Mmusua ti—a wɔn mu pii yɛ awofo a wonni ahokafo—nso wɔ asɛyɛde ahorow a emu yɛ duru wɔ wɔn mmusua a wɔbɛhwɛ wɔn na wɔaboa wɔn mma ma wɔanya nkɔanim wɔ wɔne Onyankopɔn ntam abusuabɔ mu no mu. Nnwuma a ɛte sɛɛ betumi ayɛ nea ɔbrɛ wom, ɛtɔ mmere bi mpo a, ebetumi abunkam obi so. Nanso ɛnyɛ nnwuma funu koraa, mmom no, ɛma abotɔyam ankasa!
Asɛnnennen no ne sɛ: Ɛbɛyɛ dɛn na obi anya bere de ayɛ nnwuma a ɛho hia na ɛso wɔ mfaso yi nyinaa? Ahohyɛso ne nhyehyɛe a obi bɛyɛ ama ne ho yɛ nea ɛho hia. Paulo kyerɛwee wɔ 1 Korintofo 9:26, 27 sɛ: “Mmirika a mitu yi, mintu no asunsumabo mu; kuturuku a meko yi, menko no sɛ nea ɔboro mframa, na mmom mehyɛ me nipadua ahometew, na midi no nya, na mereka asɛm makyerɛ ebinom yi, m’ankasa manyɛ nea ɔmfra.” Ɔkwan biako a wobɛfa so adi kyerɛwsɛm yi mu nnyinasosɛm no so ne sɛ wobɛyɛ w’ankasa dwumadi ne w’asetra kwan mu nhwehwɛmu bere ne bere mu. Ebia wubehu sɛ wubetumi ayi nneɛma bi a ɛho nhia a egye wo bere ne w’ahoɔden no afi mu.
Sɛ nhwɛso no, so wosɛe wo bere ne w’ahoɔden pii wɔ TV hwɛ, ahomegye, wiase nhoma akenkan, anaa anigyede ahorow akyidi mu? Sɛnea The New York Times mu asɛm bi kyerɛ no, sɛ wɔkyekyem pɛpɛɛpɛ a, obi a n’ani afi wɔ United States biara hwɛ TV “bɛboro nnɔnhwerew 30 nnawɔtwe biara.” Nokwarem no, wobetumi de bere yi ayɛ nneɛma a mfaso wɔ so sen eyi? Ɔhwɛfo ɔkwantufo bi yere bɔ amanneɛ sɛ: “Ɛkame ayɛ sɛ migyaee nneɛma a ɛsɛe bere nyinaa yɛ, te sɛ TV hwɛ sɛɛ.” Dɛn na efii mu bae? Otumi kenkan Bible nhwehwɛmu nhoma a wɔato din Insight on the Scriptures po abien no nyinaa!
Ebia ebehia nso sɛ wususuw faako a ɛsɛ sɛ woyɛ nneɛma kodu na w’asetra anyɛ hwanyann no ho. Salomo kae sɛ: “Odwumayɛfo didi kakraa oo, pii oo, ne nna yɛ no dɛ, na ɔmee a ɔdefo mee no mma onnya adaye.” (Ɔsɛnkafo 5:12) So wode wo bere pii di honam fam ahonyade a ɛho nhia ho dwuma? Nokwarem no, dodow a yɛwɔ nneɛma pii no, dodow no ara na ɛsɛ sɛ yɛhwɛ nneɛma pii so, kora so, siesie no, na yɛbɔ ho ban. So ebia ɛbɛyɛ mfaso ama wo sɛ wubeyi nneɛma binom afi wo ho kɛkɛ anaa?
Bere nhyehyɛe a wotumi de di dwuma a wubenya no nso yɛ ɔkwan foforo a wonam so betumi de wo bere adi dwuma ɔkwan pa so. Ɛsɛ sɛ bere nhyehyɛe a ɛte saa no ma wutumi nya ahomegye anaa agorudi a wuhia no. Nanso ɛsɛ sɛ woma honhom fam nneɛma di kan. Ɛsɛ sɛ wuyi bere si hɔ ma asafo nhyiam ahorow a wobɛkɔ no daa. Wubetumi adi kan apɛ nna anaa anwummere a wubetumi de ayɛ asɛmpaka adwuma no. Sɛ wode boasetɔ yɛ nhyehyɛe a, ebia wubetumi ayɛ pii wɔ ɔsom adwuma no mu, na ebia woasom sɛ akwampaefo boafo wɔ bere ne bere mu. Nanso, hwɛ hu sɛ wobɛyɛ bere nhyehyɛe ama kokoam ne abusua adesua, a ahosiesie a edi mũ a wobɛyɛ ama nhyiam horow no nso ka ho. Sɛ wusiesie wo ho a, ɛnyɛ sɛ w’ankasa wubenya pii afi nhyiam no mu nko, na mmom wonam wo mmuae a woma so betumi ‘atwetwe afoforo akɔ ɔdɔ ne nnwuma pa mu’ yiye.—Hebrifo 10:24.
Ebia bere a wubenya ama adesua no bɛhwehwɛ sɛ wode nneɛma bi bɔ afɔre. Sɛ nhwɛso no, Betel mmusua a wɔwɔ wiase nyinaa sɔre ntɛm anɔpa biara susuw ɛda no mu kyerɛwsɛm ho. So ebetumi ayɛ yiye ama wo sɛ wobɛtɔ bere kakraa bi anɔpa biara ama kokoam adesua? Odwontofo no kae sɛ: “Mitua ahema meteɛm, m’ani da w’asɛm so.” (Dwom 119:147) Nokwarem no, sɔre a wobɛsɔre ntɛm no bɛhwehwɛ sɛ woyɛ nhyehyɛe kɔda wɔ bere a ɛfata mu sɛnea ɛbɛyɛ a ade bɛkye a wobɛsɔre no, na watumi ahome ma woanya ahoɔden.
Bere Pii a Wɔde Yɛ Yehowa Som Adwuma mu Mfaso Horow
‘Pii a wubenya ayɛ wɔ Awurade adwuma no mu’ no hwehwɛ sɛ woyɛ nhyehyɛe, teɛ wo ho so, na wode wo ho bɔ afɔre. Nanso wubenya mfaso horow pii afi mu. Enti, fa wo bere pii yɛ adwuma, ɛnyɛ nnwuma funu a mfaso biara nnim a ɛde awerɛhow ne ɛyaw nkutoo na ɛba no mu, na mmom wɔ Yehowa som adwuma mu. Efisɛ ɛnam nnwuma a ɛte saa so na woda wo gyidi adi, nya Onyankopɔn mpeneso, ne awiei koraa no, daa nkwa akatua no!
[Mfonini wɔ kratafa 28]
Bere nhyehyɛe a wotumi de di dwuma a Kristoni bɛyɛ no boa no ma ɔde ne bere di dwuma wɔ nyansam