Nguan Foforo No Ne Apam Foforo No

“Ananafo . . . no, obiara a odi homeda a ongu ho fĩ ne wɔn a wokura [m’apam] mu no, mede wɔn mɛba me bepɔw kronkron no so.”—YESAIA 56:6, 7.

 1. (a) Sɛnea Yohane nyaa anisoadehu no, bere a wɔtwentwɛn Yehowa atemmu ho mframa no ase no, dɛn na ɛma wotumi yɛ? (b) Nnipakuw kɛse bɛn na Yohane huu wɔn?

WƆ Adiyisɛm nhoma no mu anisoadehu a ɛto so anan mu no, ɔsomafo Yohane hui sɛ wɔtwentwɛn Yehowa atemmu ho mframa a ɛsɛe ade no ase, na ama wɔasɔ “Nyankopɔn Israel” mufo nyinaa ano awie. Eyinom ne nnipa a wodi kan a wɔnam Abraham aseni titiriw, Yesu, so hyiraa wɔn. (Galatifo 6:16; Genesis 22:18; Adiyisɛm 7:1-4) Wɔ anisoadehu koro no ara mu no, Yohane huu “nnipakuw kɛse a obi ntumi nkan wɔn a wofi aman ne mmusuakuw ne nkurɔfo ne ɔkasa nyinaa mu . . . , na wɔde nne kɛse teɛɛm sɛ: Nkwagye no yɛ yɛn Nyankopɔn a ɔte ahengua no so ne oguammaa no dea.” (Adiyisɛm 7:9, 10) Ka a nnipakuw kɛse no ka sɛ, ‘yɛn nkwagye fi oguammaa no’ kyerɛ sɛ wɔn nso nam Abraham Aseni no so nya nhyira.

 2. Bere bɛn na wohuu nnipakuw kɛse no, na ɔkwan bɛn na wɔfa so hu wɔn?

² Wohuu nnipakuw kɛse yi wɔ 1935 mu, na ɛnnɛ wɔboro ɔpepem anum. Esiane sɛ wɔahyɛ wɔn agyirae sɛ wobetwa ahohiahia kɛse no nti, sɛ Yesu paapae “nguanten” ne “mpapo” no mu a, obeyi wɔn asi nkyɛn ama daa nkwa. Kristofo a wɔyɛ nnipakuw kɛse no mufo ka Yesu nguankuw ho mfatoho no mu “nguan foforo” no ho. Wɔn ani da so sɛ wɔbɛtra ase daa wɔ paradise asase so.—Mateo 25:31-46; Yohane 10:16; Adiyisɛm 21:3, 4.

 3. Ɔkwan bɛn so na ɛsono Kristofo a wɔasra wɔn no ne nguan foforo no wɔ apam foforo no mu?

³ Wɔ 144,000 no fam no, apam foforo no so na wɔnam nya Abraham apam no mu nhyira. Sɛ́ apam yi mufo no, wɔba “ɔdom ase” ne “Kristo mmara mu.” (Romafo 6:15; 1 Korintofo 9:21) Enti, Nyankopɔn Israel no mu nnipa 144,000 no pɛ na wotumi nya Yesu wu Nkaedi mu adidi ho sɛnkyerɛnne no mu kyɛfa, na wɔn nkutoo na Yesu ne wɔn yɛɛ N’ahenni ho apam no. (Luka 22:19, 20, 29) Nnipakuw kɛse no mufo nni apam foforo no mu bi. Nanso, wɔne Nyankopɔn Israel bɔ fekuw, ne wɔn tra wɔn “asase” so. (Yesaia 66:8) Enti ntease wom sɛ yɛbɛka sɛ wɔn nso ba Yehowa dom ase, ne Kristo mmara mu. Ɛmfa ho sɛ wonni apam foforo no mu bi no, wonya mu mfaso.

“Ananafo” ne “Nyankopɔn Israel”

 4, 5. (a) Sɛnea Yesaia kyerɛ no, nnipa bɛn na wɔbɛsom Yehowa? (b) Ɔkwan bɛn so na Yesaia 56:6, 7 nya mmamu wɔ nnipakuw kɛse no so?

⁴ Odiyifo Yesaia kyerɛwee sɛ: “Ananafo a wɔabɛbata [Yehowa, NW] ho sɛ wɔresom no na wɔadɔ [Yehowa, NW] din na wɔadannan [ne] nkoa no, obiara a odi homeda a ongu ho fĩ ne wɔn a wokura [m’apam] mu no, mede wɔn mɛba me bepɔw kronkron no so, na mama wɔn ani agye me mpaebɔ fi, wɔn hyew afɔre ne wɔn kum afɔre bɛsɔ m’ani, m’afɔremuka so.” (Yesaia 56:6, 7) Wɔ Israel no, na eyi kyerɛ sɛ “ananafo,” wɔn a wɔnyɛ Israelfo, bɛsom Yehowa—wɔbɛdɔ ne din, adi ne Mmara apam mu ahyɛde so, adi Homeda no, na wɔde ayɛyɛde akɔbɔ afɔre wɔ asɔrefie hɔ, Onyankopɔn “mpaebɔ fi.”—Mateo 21:13.

⁵ Yɛn bere yi so no, “ananafo a wɔabɛbata [Yehowa, NW] ho” no ne nnipakuw kɛse no. Saafo yi de wɔn ho bɔ Nyankopɔn Israel de ɔsom ma Yehowa. (Sakaria 8:23) Afɔrebɔde ahorow a ɛsɔ ani a Nyankopɔn Israel de ma no ara bi na wɔde ma. (Hebrifo 13:15, 16) Wɔsom wɔ Onyankopɔn honhom fam asɔrefie, ne “mpaebɔ fi.” (Fa toto Adiyisɛm 7:15 ho.) So wodi dapɛn dapɛn Homeda no? Wɔmmaa wɔn a wɔasra wɔn anaa nguan foforo no ahyɛde sɛ wɔnyɛ saa. (Kolosefo 2:16, 17) Nanso, Paulo ka kyerɛɛ Hebrifo Kristofo a wɔasra wɔn sɛ: “Homedadi aka ama Onyankopɔn man. Na nea wahyɛn ne home mu no, ɔno nso home fii ne nnwuma ho, sɛnea Onyankopɔn home fii ne de ho no.” (Hebrifo 4:9, 10) Saa Hebrifo no kɔɔ “homedadi” yi mu bere a wɔbrɛɛ wɔn ho ase hyɛɛ “Onyankopɔn trenee ase” na wɔhome fii mmɔden a wɔbɔe sɛ wɔnam Mmara mu nnwuma so bebu wɔn ho bem mu no. (Romafo 10:3, 4) Amanaman mufo Kristofo a wɔasra wɔn no nso nya ɔhome a ɛte saa ara, bere a wɔbrɛ wɔn ho ase hyɛ Yehowa trenee ase no. Nnipakuw kɛse no ka wɔn ho wɔ saa ɔhome no mu.

 6. Ɔkwan bɛn so na nnɛ nguan foforo no kura apam foforo no mu?

⁶ Bio nso, nguan foforo no bekura apam foforo no mu sɛnea tete ananafo no kuraa Mmara apam no mu no. Ɔkwan bɛn so? Ɛnyɛ sɛ wɔbɛyɛ emufo, na mmom wɔnam ɛho mmara a wɔbrɛ wɔn ho ase hyɛ ase, ne emu nsiesiei a wonya mu mfaso no so. (Fa toto Yeremia 31:33, 34 ho.) Te sɛ wɔn mfɛfo a wɔasra wɔn no, wɔakyerɛw Yehowa mmara agu nguan foforo no “koma mu.” Wɔdɔ Yehowa ahyɛde ne ne nnyinasosɛm paa, na wodi so. (Dwom 37:31; 119:97) Te sɛ Kristofo a wɔasra wɔn no, wonim Yehowa. (Yohane 17:3) Twetiatwa nso ɛ? Bɛyɛ mfe 1,500 ansa na wɔreyɛ apam foforo no, Mose hyɛɛ Israelfo no sɛ: “Muntwitwa mo koma twetia.” (Deuteronomium 10:16; Yeremia 4:4) Ɛwom sɛ honam fam twetiatwa a na ɛyɛ ahwehwɛde no ne Mmara no twaam kɔe de, nanso ɛsɛ sɛ wɔn a wɔasra wɔn ne nguan foforo no nyinaa ‘twitwa’ wɔn koma “twetia.” (Kolosefo 2:11) Nea etwa to no, Yehowa gyina Yesu “mogya a ɛyɛ apam ade” a ohwie gui no so de nguan foforo no bɔne firi wɔn. (Mateo 26:28; 1 Yohane 1:9; 2:2) Onyankopɔn mfa wɔn nyɛ honhom fam mma te sɛ 144,000 no. Nanso, obu nguan foforo no atreneefo, sɛnea wobuu Abraham treneeni sɛ Onyankopɔn adamfo no.—Mateo 25:46; Romafo 4:2, 3; Yakobo 2:23.

 7. Anidaso bɛn na ebue ma nguan foforo a ɛnnɛ wobu wɔn atreneefo te sɛ Abraham no?

⁷ Wɔ 144,000 no fam no, bu a wobu wɔn atreneefo no bue hokwan ma wonya anidaso sɛ wɔne Yesu bedi hene wɔ ɔsoro Ahenni no mu. (Romafo 8:16, 17; Galatifo 2:16) Wɔ nguan foforo no fam no, bu a wobu wɔn atreneefo sɛ Onyankopɔn nnamfo no ma wobegye daa nkwa wɔ paradise asase so ho anidaso no tom—sɛ́ nnipakuw kɛse no mufo a wobetwa Harmagedon no bi anaa denam ‘wɔn a wɔteɛ wusɔre’ no so. (Asomafo no Nnwuma 24:15) Hwɛ hokwan ara a ɛyɛ sɛ obi benya saa anidaso no, na wayɛ amansan Hene no adamfo, ‘asoɛ ne ntamadan mu’! (Dwom 15:1, 2) Yiw, wɔn a wɔasra wɔn ne nguan foforo no nyinaa nam Abraham Aseni, Yesu, so nya nhyira nwonwaso.

Mpata Da a Ɛkyɛn So

 8. Dɛn na Mmara no mu Mpata Da afɔrebɔ ahorow no yɛɛ ho mfonini?

⁸ Bere a Paulo reka apam foforo no ho asɛm no, ɔkaee n’atiefo Mmara apam no mu afe afe Mpata Da no. Edu saa da no a, na wɔbɔ afɔre ahorow ahorow—wɔbɔ biako ma Lewi asɔfokuw abusua no, na wɔbɔ biako nso ma mmusuakuw 12 a wɔnyɛ asɔfo no. Wofi bere tenten akyerɛkyerɛ mu sɛ eyi gyina hɔ ma Yesu afɔrebɔ kɛse a ɛso bɛba 144,000 a wɔwɔ ɔsoro anidaso no ne nnipa ɔpepem pii a wɔwɔ asase so anidaso no nyinaa mfaso no.a Paulo kyerɛe sɛ wɔ nsusuwso kwan so no, wɔnam apam foforo no mu Mpata Da a ɛkyɛn so bi so de Yesu afɔrebɔ no mu mfaso horow bɛma. Sɛ́ da a ɛkyɛn so yi ho Sɔfo Panyin no, Yesu de ne nkwa a ɛyɛ pɛ no mae sɛ mpata afɔre na ama wanya “daa ogye” ama nnipa.—Hebrifo 9:11-24.

 9. Dɛn na na Hebrifo Kristofo betumi agye sɛ apam foforo no mufo?

⁹ Ná afeha a edi kan no mu Hebrifo Kristofo bebree da so ara “bɔ [Mose] mmara no ho mmɔden.” (Asomafo no Nnwuma 21:20) Enti na ɛyɛ ne kwan so sɛ Paulo bɔɔ wɔn nkae sɛ: “[Yesu yɛ] Apam foforo ntamgyinafo, na owu a owui de yɛɛ kan apam no mu mfomso ho gye nti, wɔn a wɔabɔ daa agyapade din afrɛ wɔn no anya bɔhyɛ no.” (Hebrifo 9:15) Apam foforo no maa Hebrifo Kristofo no nyaa wɔn ho tetee wɔ apam dedaw, a ɛdaa wɔn adi sɛ abɔnefo, no ho. Apam foforo no mmoa so nti, na wobetumi agye “daa [ɔsoro] agyapade” no.

10. Dɛn ho aseda na wɔn a wɔasra wɔn no ne nguan foforo no de ma Nyankopɔn?

¹⁰ “Obiara” a “ogye ɔba no di no” benya agyede afɔrebɔ no so mfaso. (Yohane 3:16, 36) Paulo kae sɛ: “Kristo a wɔde no bɔɔ afɔre prɛko sɛ ɔnsoa nnipa bebree bɔne no bɛkwati bɔne ayi ne ho adi ne mprenu so, akyerɛ wɔn a wɔhwɛ no kwan no, de wɔn akɔ nkwagye mu.” (Hebrifo 9:28) Ɛnnɛ, wɔn a wɔhwɛ Yesu kwan denneennen no bi ne Nyankopɔn Israel mu Kristofo a wɔasra wɔn no nkaefo, ne nnipa ɔpepem pii a wɔbom yɛ nnipakuw kɛse, a wɔn nso wɔ daa agyapade no. Akuw abien no nyinaa de aseda ma Nyankopɔn wɔ apam foforo no ne nhyira horow a egye nkwa a ɛbata ho, a Mpata Da a ɛkyɛn so no ne Ɔsɔfo Panyin, Yesu, som adwuma a ɔyɛ wɔ ɔsoro Kronkron mu Kronkronbea ka ho no ho.

Wɔyere Wɔn Ho Wɔ Ɔsom Kronn Mu

11. Esiane sɛ wɔnam Yesu afɔrebɔ no so atew wɔn ahonim ho nti, dɛn na wɔn a wɔasra wɔn no ne nguan foforo no nyinaa de anigye yɛ?

¹¹ Wɔ Paulo krataa a ɔkyerɛw kɔmaa Hebrifo no mu no, osii ɛbo a Yesu afɔrebɔ a ɛwɔ apam foforo nhyehyɛe mu no som sen bɔne ho afɔre a wɔbɔe wɔ apam dedaw no mu no so dua. (Hebrifo 9:13-15) Yesu afɔrebɔ a ɛkyɛn so no tumi ‘tew yɛn ahonim ho fi nnwuma funu mu, na ama yɛasom Onyankopɔn teasefo no.’ Wɔ Hebrifo Kristofo fam no, na “nnwuma funu” no bi ne “kan apam no mu mfomso” a wɔyɛe no. Wɔ Kristofo fam nnɛ no, ebi ne bɔne a wɔayɛ atwam a wɔakyerɛ nokware ahonu wɔ ho, ma Onyankopɔn de afiri wɔn no. (1 Korintofo 6:9-11) Esiane sɛ wɔatew Kristofo a wɔasra wɔn no ahonim ho nti, ‘wɔsom Onyankopɔn teasefo no.’ Na nnipakuw kɛse no nso yɛ saa ara. Esiane sɛ wɔnam “oguammaa no mogya” so atew wɔn ahonim ho nti, wɔwɔ Onyankopɔn honhom fam asɔredan kɛse no mu, na “wɔsom no awia ne anadwo.”—Adiyisɛm 7:14, 15.

12. Yɛyɛ dɛn kyerɛ sɛ yɛwɔ “gyidi a akyinnye nnim koraa”?

¹² Nea ɛka ho bio no, Paulo kae sɛ: “Momma yɛmfa nokware koma wɔ gyidi a akyinnye nnim koraa mu mmɛn sɛ nnipa a wɔapete wɔn koma ho afi ahonim bɔne mu, na wɔde nsu kronn aguare wɔn nipadua.” (Hebrifo 10:22) Yɛbɛyɛ dɛn atumi anya “gyidi a akyinnye nnim koraa”? Paulo hyɛɛ Hebrifo Kristofo nkuran sɛ: “Momma yenso [ɔsoro] anidaso asɛm a yegyina so ka no mu pintinn, efisɛ ɔnokwafo ne nea ɔhyɛɛ bɔ no, na momma yɛnhwehwɛ yɛn ho ntwetwe yɛn ho yɛn ho nkɔ ɔdɔ ne nnwuma pa mu. Na mommma yennnyae yɛn ho yɛn ho nhyiam, sɛnea ebinom anya nyɛe, na mmom momma yentutu yɛn ho yɛn ho fo, dodow a muhu sɛ ɛda no rebɛn no.” (Hebrifo 10:23-25) Yɛn nso sɛ yɛn gyidi te apɔw a, ‘yɛrennyae yɛn ho yɛn ho nhyiam.’ Yɛn ani begye sɛ yɛbɛtwetwe yɛn nuanom na wɔn nso atwetwe yɛn akɔ ɔdɔ ne nnwuma pa mu, na ahyɛ yɛn den ama baguam mpaemuka adwuma a ɛho hia a ɛfa yɛn anidaso ho, sɛ́ ɛyɛ asase so de anaa ɔsoro de, no.—Yohane 13:35.

“Daa Apam” No

13, 14. Akwan bɛn so na apam foforo no tra hɔ daa?

¹³ Sɛ 144,000 no mu nea otwa to koraa nya ne soro anidaso no a, dɛn na ebesi? So apam foforo no begyae adwuma yɛ? Saa bere no, ɛrenka Nyankopɔn Israel muni biara wɔ asase so. Ebedu hɔ no na apam no mufo nyinaa ka Yesu ho wɔ “[n’agya] ahenni mu.” (Mateo 26:29) Nanso yɛkae Paulo nsɛm a ɛwɔ ne krataa a ɔkyerɛw kɔmaa Hebrifo no mu yi: “Asomdwoe Nyankopɔn [no nam] daa apam no mogya so ayi nguan no hwɛfo kɛse . . . afi awufo mu.” (Hebrifo 13:20; Yesaia 55:3; yɛn na yɛasi ɔfã bi so dua no.) Ɔkwan bɛn so na apam foforo no tra hɔ daa?

¹⁴ Nea edi kan no, ɛremma da sɛ wɔde foforo besi ananmu te sɛ Mmara apam no. Nea ɛto so abien no, nea ebefi ne dwumadi mu aba no bɛtra hɔ daa, te sɛ Yesu nniso no ara pɛ. (Fa Luka 1:33 toto 1 Korintofo 15:27, 28 ho.) Ɔsoro Ahenni no bedi dwuma daa wɔ Yehowa atirimpɔw mu. (Adiyisɛm 22:5) Na nea ɛto so abiɛsa no, nguan foforo no bɛkɔ so anya apam foforo nhyehyɛe no mu mfaso. Wɔ Kristo Mfirihyia Apem Nniso no mu no, nnipa anokwafo bɛkɔ so ‘asom Yehowa awia ne anadwo wɔ n’asɔredan mu’ sɛnea wɔreyɛ seesei no. Yehowa renkɔfa bɔne a wɔayɛ atwam a wogyinaa Yesu “mogya a ɛyɛ apam ade” no so de firii wɔn no mma bio. Wɔbɛkɔ so anya trenee gyinabea sɛ Yehowa nnamfo, na ne mmara no bɛda so ara awɔ wɔn koma mu.

15. Kyerɛ abusuabɔ a Yehowa ne n’asase so asomfo benya wɔ wiase foforo no mu.

¹⁵ So Yehowa betumi aka nnipa a wɔsom no yi ho asɛm saa bere no sɛ: ‘Meyɛ wɔn Nyankopɔn, na wɔyɛ me man’? Yiw. “Ɔbɛtra mu wɔ wɔn mu, na wɔayɛ ne man, na Onyankopɔn ankasa ne wɔn bɛtra.” (Adiyisɛm 21:3; yɛn na yɛasi ɔfã bi so dua no.) Wɔbɛyɛ “ahotefo . . . nsraban,” “kurow a wɔdɔ no no” asase so ananmusifo, Yesu Kristo soro ayeforo no. (Adiyisɛm 14:1; 20:9; 21:2) Eyi nyinaa betumi ayɛ yiye efisɛ wɔwɔ Yesu “mogya a ɛyɛ apam ade” a ohwie gui no mu gyidi, na wɔbrɛ wɔn ho ase ma ɔsoro ahene ne asɔfo, a bere a wɔwɔ asase so no, na wɔyɛ Nyankopɔn Israel no.—Adiyisɛm 5:10.

16. (a) Hokwan horow bɛn na ɛda hɔ retwɛn wɔn a wobenyan wɔn aba asase so no? (b) Nhyira horow bɛn na ɛbɛba wɔ mfirihyia apem no awiei?

¹⁶ Na awufo a wobenyan wɔn aba asase so no nso ɛ? (Yohane 5:28, 29) Wɔbɛto nsa afrɛ wɔn nso sɛ ‘wommenya nhyira’ denam Abraham Aseni, Yesu, so. (Genesis 22:18) Ebehia sɛ wɔn nso wɔdɔ Yehowa din, som no, de afɔrebɔ a ɛsɔ ani ma no, na wɔde ɔsom kronn ma no wɔ ne mpaebɔ fie. Wɔn a wɔyɛ saa no bɛhyɛn Nyankopɔn home mu. (Yesaia 56:6, 7) Ebedu mfirihyia apem no awiei no, na wɔnam Yesu Kristo ne ne mfɛfo asɔfo 144,000 no som adwuma so ama anokwafo nyinaa kɔ ɔdesani pɛyɛ mu. Wɔbɛyɛ atreneefo, a ɛrenkyerɛ sɛ wɔabu wɔn atreneefo sɛ Onyankopɔn nnamfo kɛkɛ. Wɔbɛba ‘nkwa mu,’ na wɔade wɔn ho koraa afi bɔne ne owu a wonya fii Adam hɔ no mu. (Adiyisɛm 20:5; 22:2) Hwɛ nhyira ara a ɛbɛyɛ! Sɛnea yehu nneɛma nnɛ no, ɛte sɛ nea Yesu ne 144,000 no asɔfodwuma no bɛba awiei saa bere no. Ebedu hɔ no na Mpata Da a ɛkyɛn so no adi n’atirimpɔw ho dwuma akosi ase. Ɛno akyi no, Yesu de “ahenni no bɛhyɛ Agya Onyankopɔn nsa.” (1 Korintofo 15:24) Wɔde sɔhwɛ a etwa to bɛba adesamma so, na afei wɔasɛe Satan ne n’adaemone korakora.—Adiyisɛm 20:7, 10.

17. Esiane anigye a ɛda hɔ retwɛn yɛn nti, dɛn na ɛsɛ sɛ yɛn mu biara si ne bo sɛ ɔbɛyɛ?

¹⁷ Dwuma bɛn na “daa apam” no bedi wɔ anigye bere a ebedi hɔ aba no mu? Yentumi nkyerɛ. Nea Yehowa ada no adi de besi nnɛ no ara dɔɔso ma yɛn seesei. Ɛma yɛn ho dwiriw yɛn. Wo de susuw ho hwɛ—daa nkwa a yebenya sɛ “ɔsoro foforo ne asase foforo” no mufo! (2 Petro 3:13) Ɛmmra sɛ biribiara rennwudwo ɔpɛ a yɛwɔ sɛ yebenya saa bɔhyɛ no. Ebia gyina a yebegyina pintinn no renyɛ mmerɛw. Paulo kae sɛ: “Boasetɔ hia mo, na, sɛ muwie nea Onyankopɔn pɛ no yɛ a, mo nsa aka bɔhyɛ no.” (Hebrifo 10:36) Nanso, kae sɛ, sɛ yɛde ɔhaw biara ne ɔsɔretia biara a yɛbɛfa mu no toto anigye a ɛda hɔ retwɛn yɛn no ho a, ɛyɛ ade ketewaa bi. (2 Korintofo 4:17) Enti, mommma yɛn mu biara nnyɛ “wɔn a wɔtwe wɔn ho kɔ ɔsɛe mu.” Mmom no, momma yɛnna yɛn ho adi sɛ “wɔn a wogye di kɔ ɔkra nkwagye mu.” (Hebrifo 10:39) Ɛmmra sɛ yɛn nyinaa benya Yehowa, Onyankopɔn a ɔyɛ apam ahorow no, mu ahotoso korakora, na ama yɛn mu biara anya daa nhyira.

[Ase hɔ asɛm]

Wotee Ase?

◻ Kristofo a wɔasra wɔn akyi no, henanom na wɔnam Abraham Aseni no so rehyira wɔn?

◻ Ɔkwan bɛn so na nhyira a nguan foforo no nam apam foforo no so nya no ma wɔyɛ te sɛ ananafo a na wɔadan Yudafo wɔ apam dedaw no mu no?

◻ Ɔkwan bɛn so na wɔnam Mpata Da a ɛkyɛn so no nhyehyɛe so hyira nguan foforo no?

◻ Dɛn nti na Paulo frɛɛ apam foforo no “daa apam”?

[Kratafa 21 adaka]

Ɔsom Kronn Wɔ Asɔrefie No Mu

Nnipakuw kɛse no ne Kristofo a wɔasra wɔn no som wɔ Yehowa honhom fam asɔrefie kɛse no abangua a ɛwɔ asase so no mu. (Adiyisɛm 7:14, 15; 11:2) Biribiara nni hɔ a yebegyina so aka sɛ wɔwɔ Amanaman mufo Aban soronko bi mu. Bere a na Yesu wɔ asase so no, na Amanaman mufo Aban bi wɔ asɔrefie no mu. Nanso, wɔ Salomo ne Hesekiel asɔrefie no ho mfonini a wofi soro de mae no mu no, na Amanaman mufo Aban biara nni mu. Wɔ Salomo asɔrefie no, na wɔwɔ abangua bi wɔ adiwo a Israelfo ne afoforo a na wɔadan Yudafo, mmarima ne mmea, bom som. Eyi ne honhom fam asɔrefie no asase so abangua, a Yohane hui sɛ nnipakuw kɛse no de ɔsom kronn rema wɔ hɔ no nkɔmhyɛ kwan so nsusuwso.

Nanso, asɔfo ne Lewifo nkutoo na na wotumi kɔ abangua a ɛhyɛ mfinimfini no mu, faako a na afɔremuka no si no; asɔfo nkutoo na na wotumi kɔ Kronkronbea hɔ; na ɔsɔfo panyin nkutoo na na otumi kɔ Kronkron mu Kronkronbea hɔ. Yɛabɛte ase sɛ abangua a ɛhyɛ mfinimfini no ne Kronkronbea no gyina hɔ ma honhom fam tebea soronko a Kristofo a wɔasra wɔn no wom wɔ asase so. Na Kronkron mu Kronkronbea no gyina hɔ ma ɔsoro ankasa, baabi a Kristofo a wɔasra wɔn no ne wɔn soro Sɔfo Panyin no nya asetra a owu nni so tumi no.—Hebrifo 10:19, 20.

[Kratafa 23 mfonini]

Esiane anigye a ɛda hɔ retwɛn yɛn nti, momma yennya ‘gyidi a ɛkɔ ɔkra nkwagye mu’