Nsɛmmisa a Efi Akenkanfo Hɔ

Wɔ Hebrifo 2:14 no, dɛn nti na wɔfrɛ Satan “nea ɔwɔ owu tumi”?

Ne tiawa mu no, na Paulo kyerɛ sɛ Satan ankasa betumi ama nnipa awu anaasɛ ɔnam n’adwumayɛfo so betumi ayɛ saa. Nea ɛne no hyia no, Yesu frɛɛ Satan ‘owudifo a ofi mfiase.’—Yohane 8:44.

Ntawntawdi betumi asɔre wɔ Hebrifo 2:14 ho esiane sɛnea nkyerɛase ahorow bi kyerɛ ase nti, wɔkyerɛ ase sɛ Satan wɔ “owu ho tumi” anaa “owu so tumi.” (King James Version; Revised Standard; New International Version; Jerusalem Bible) Nkyerɛase a ɛte saa no betumi ama ayɛ sɛ Satan wɔ tumi kɛse sɛ obekum obiara a ɔpɛ. Nanso, ɛnte saa koraa. Sɛ ɛte saa a, anka ɛda adi ankasa sɛ wapopa Yehowa asomfo afi asase ani bere tenten ni.—Genesis 3:15.

Hela asɛm a wɔkyerɛ ase “owu so tumi” wɔ nkyerɛase ahorow bi mu, ne “owu tumi” wɔ Twi Bible mu ne “kraʹtos tou tha·naʹtou.” Tou tha·naʹtou yɛ asɛm bi a ɛkyerɛ “owu.” Nea Kraʹtos kyerɛ titiriw ne “tumi, ahoɔden.” Sɛnea Theological Dictionary of the New Testament ka no, ɛkyerɛ “tumi anaa ahoɔden bi a ɛwɔ hɔ ne bo a ɛsom, na ɛnyɛ dwuma a wɔde di.” Enti, wɔ Hebrifo 2:14 no, Paulo nkyerɛ sɛ Satan wɔ owu so tumi koraa. Mmom no, na ɔretwe adwene asi tumi a Satan wɔ sɛ ɔbɛma nkurɔfo awu no so.

Ɔkwan bɛn so na Satan de ‘owu tumi a ɔwɔ’ no di dwuma? Wɔ Hiob nhoma no mu no, yɛkenkan tebea bi a ɛte sɛ nea ɛyɛ soronko ho asɛm. Kyerɛwtohɔ no ka sɛ Satan nam ahum so maa Hiob mma ‘wuwui.’ Nanso, hyɛ no nsow sɛ Satan tumi yɛɛ eyi bere a Onyankopɔn maa ho kwan nkutoo, hokwan a wɔde maa no esiane ɔsɛmpɔw a na ɛda hɔ nti. (Hiob 1:12, 18, 19) Nokwarem no, Satan antumi ankum Hiob ankasa. Wɔamfa saa hokwan no amma no. (Hiob 2:6) Eyi kyerɛ sɛ, ɛmfa ho mpo sɛ ɛtɔ mmere bi a, Satan tumi ma nnipa anokwafo wu no, ɛnsɛ sɛ yesuro sɛ obetumi atwa yɛn nkwa so bere biara a ɔpɛ.

Satan nam ne nnipa ananmusifo nso so kum afoforo. Enti, Kristofo pii awu ama wɔn gyidi, a basabasayɛ kuw a wɔn bo afuw na ekum wɔn mu binom, na aban mpanyimfo anaa atemmufo a wɔn bra asɛe na wɔhyɛ ma wokum afoforo nso wɔ ɔkwan a ɛmfata so.—Adiyisɛm 2:13.

Bio nso, ɛtɔ mmere bi a Satan kum ebinom denam nnipa mmerɛwyɛ a ɔde di dwuma so. Wɔ Israelfo mmere so no, odiyifo Bileam tuu Moabfo fo sɛ wɔnnaadaa Israelfo ma ‘wɔnyɛ Yehowa so asoɔden.’ (Numeri 31:16) Ɛno maa Israelfo bɛboro 23,000 wuwui. (Numeri 25:9; 1 Korintofo 10:8) Saa ara na ɛnnɛ Satan “nnɛɛdɛe” nya ebinom ma wɔde wɔn ho hyɛ ɔbrasɛe anaa nneyɛe foforo a ɛmfata mu. (Efesofo 6:11) Ampa, mpɛn pii no, saafo no nwu ntɛm ara. Nanso asiane a ɛwom ne sɛ wɔrennya daa nkwa, na saa kwan yi so no, Satan ma wowu.

Ɛwom sɛ yenim sɛ Satan wɔ tumi sɛ ɔde ɔhaw bɛba de, nanso ɛnsɛ sɛ yesuro no ɔkwan a ɛmfata so. Bere a Paulo kae sɛ Satan wɔ owu tumi no, ɔsan nso kae sɛ Kristo wui na ama ‘watu Satan na wagye wɔn a anka owu ho hu nti wɔayɛ nkoa, nna a wɔde te ase nyinaa no.’ (Hebrifo 2:14, 15) Yiw, Yesu tuaa agyede no na ɔnam so gyee adesamma fii bɔne ne owu nkoasom mu.—2 Timoteo 1:10.

Nokwarem no, ɛwom sɛ ɛhaw adwene sɛ yebesusuw ho sɛ Satan wɔ owu tumi de, nanso yɛwɔ awerɛhyem sɛ Yehowa betumi ayi ɔhaw biara a Satan ne n’adwumayɛfo de ba no afi hɔ. Yehowa ma yɛn awerɛhyem sɛ Yesu a wɔanyan no no ‘bɛsɛe ɔbonsam nnwuma.’ (1 Yohane 3:8) Ɛdenam Yehowa tumi so no, Yesu benyan awufo na ɔnam so ayi owu afi hɔ koraa. (Yohane 5:28, 29) Awiei koraa no, Yesu bɛbrɛ Satan tumi ase bere a ɔde no to afiase no. Nea etwa to koraa no, Satan benya daa ɔsɛe.—Adiyisɛm 20:1-10.