Yehowa Ne Me Boafo

“Yɛde nnam ka sɛ: [Yehowa] ne me boafo, merensuro; onipa betumi ayɛ me dɛn?”​—HEBRIFO 13:6.

 1, 2. (a) Yehowa mu awerɛhyem bɛn na odwontofo no ne ɔsomafo Paulo nyinaa daa no adi? (b) Nsemmisa bɛn na ɛsɔre?

YEHOWA NYANKOPƆN yɛ mmoa fibea a enni huammɔ. Ná odwontofo no fi osuahu mu nim eyi na otumi kae sɛ: “[Yehowa] wɔ m’afa, minsuro, dɛn na onipa betumi ayɛ me?” (Dwom 118:6) Ɔsomafo Paulo daa nkate a ɛte saa adi bere a ɔkyerɛw ne krataa a efi honhom mu no kɔmaa Hebrifo Kristofo no.

² Bere a ɛda adi sɛ na Paulo refa odwontofo no nsɛm afi Hela Septuagint no mu aka no, ɔka kyerɛɛ mfɛfo Hebrifo asomfo no sɛ: “Yɛde nnam ka sɛ: [Yehowa] ne me boafo, merensuro; onipa betumi ayɛ me dɛn?” (Hebrifo 13:6) Dɛn nti na ɔsomafo no kyerɛwee wɔ saa kwan yi so? Na dɛn na yebetumi asua afi emu nsɛm no mu?

Ná Wohia Yehowa Mmoa

 3. (a) Tebea horow bɛn mu na Yehowa daa no adi sɛ na ɔyɛ Paulo Boafo? (b) Dɛn nti na na Hebrifo Kristofo no titiriw hia Yehowa sɛ wɔn Boafo?

³ Ná Paulo yɛ ɔdansefo a ɔde ne ho bɔ afɔre a na wanya adanse a ɛkyerɛ sɛ Yehowa ne ne Boafo. Onyankopɔn boaa ɔsomafo no wɔ amanehunu pii mu. Wɔde Paulo too afiase, wɔboroo no, wosiw no abo. Wɔ n’akwantu ahorow sɛ́ Kristoni ɔsomfo mu no, oguu asu na ohyiaa asiane afoforo pii nso. Ná onim ɔbrɛ, pɛsi, ɔkɔm, sukɔm, ne adagyaw mpo yiye. Ɔkae sɛ: “Nea ɛbatabata ho no nkamfuaw, nea ɛkyere me so daa ne asafo no nyinaa ho dadwen.” (2 Korintofo 11:24-29) Ná Paulo dwen Hebrifo Kristofo no ho saa ara. Na ɛrenkyɛ na wɔasɛe Yerusalem, na na ɔsomafo no nuanom Yudafo no behyia gyidi ho sɔhwɛ akɛse. (Daniel 9:24-27; Luka 21:5-24) Enti na ɛho behia sɛ wonya Yehowa sɛ wɔn Boafo.

 4. Afotu titiriw bɛn na wɔde ma wɔ Hebrifo krataa no mu nyinaa?

⁴ Paulo refi ne krataa a ɔde kɔmaa Hebrifo no ase no, ɔkyerɛe sɛ sɛ wotie Onyankopɔn Ba Yesu Kristo nkutoo a na wobenya ɔsoro mmoa. (Hebrifo 1:1, 2) Ɔkyerɛkyerɛɛ saa ɔsɛmpɔw yi mu wɔ krataa no mu. Sɛ nhwɛso no, ɔsomafo no kaee n’akenkanfo no sɛ wɔtwee Israelfo no aso sare no so esiane asoɔden nti de gyinaa n’afotu no akyi. Sɛ Hebrifo Kristofo no pow nea Onyankopɔn nam Yesu so aka na wɔbɛyɛ awaefo a wɔde wɔn ho afam Mose Mmara a Kristo afɔrebɔ no yi sii nkyɛn no ho a, ɛbɛyɛ dɛn na wɔaguan asotwe!​—Hebrifo 12:24-27.

Onuadɔ Adwumayɛ

 5. (a) Afotu foforo bɛn na krataa a wɔde kɔmaa Hebrifo no de ma? (b) Dɛn na Paulo ka faa ɔdɔ ho?

⁵ Krataa a wɔde kɔmaa Hebrifo no de sɛnea wɔn a wɔbɛyɛ ɔsoro Ahenni no mu ahene no betumi adi wɔn nhwɛsofo Yesu Kristo akyi na ‘wɔde ɔsom kronn ama onyamesom pa osuro ne ehu mu,’ na wɔafa Yehowa sɛ wɔn Boafo no ho afotu mae. (Hebrifo 12:1-4, 28, 29, New World Translation) Paulo hyɛɛ mfɛfo gyidifo sɛ wonhyiam daa na ‘wɔntwetwe wɔn ho wɔn ho nkɔ ɔdɔ ne nnwuma pa mu.’ (Hebrifo 10:24, 25) Afei otuu fo sɛ: “Onuadɔ ntra hɔ daa.”​—Hebrifo 13:1.

 6. Ntease bɛn mu na Yesu maa n’akyidifo ɔdɔ ho “ahyɛde foforo”?

⁶ Yesu hwehwɛe sɛ n’akyidifo nya ɔdɔ a ɛte saa, efisɛ ɔkae sɛ: “Ahyɛde foforo na mema mo, sɛ monnodɔ mo ho, sɛnea medɔɔ mo no, sɛ mo nso monnodɔ mo ho mo ho! Sɛ mododɔ mo ho a, nnipa nyinaa behu sɛ moyɛ m’asuafo.” (Yohane 13:34, 35) Ná eyi yɛ “ahyɛde foforo” kyerɛ sɛ na ɛhwehwɛ pii sen sɛnea Mose Mmara no yɛe, nea ɛkae sɛ: “Dɔ wo yɔnko [anaa wo fipamfo] sɛ wo ho.” (Leviticus 19:18) “Ahyɛde foforo” no yɛɛ pii sen hwehwɛ a na ɛhwehwɛ sɛ obi dɔ ne yɔnko sɛ ne ho no. Ɛhwehwɛe sɛ wonya ɔdɔ a ɛde ne ho bɔ afɔre kosi sɛ obi de ne nkwa bɛto hɔ ama ɔfoforo. Yesu asetra ne ne wu yɛɛ saa ɔdɔ yi ho nhwɛso. Tertullian kaa saa agyiraehyɛde yi ho asɛm bere a ɔfaa wiasefo nsɛm a na wɔka fa Kristofo ho kae no, sɛ: “Wose, ‘Monhwɛ sɛnea wɔdodɔ wɔn ho wɔn ho . . . ne sɛnea wɔasiesie wɔn ho sɛ wobewu ama wɔn ho wɔn ho.’”​—Apology, ti XXXIX, 7.

 7. Ɔkwan bɛn so na onuadɔ daa adi wɔ Pentekoste 33 Y.B. akyi?

⁷ Onuadɔ daa adi wɔ Yesu asuafo no mu wɔ Pentekose 33 Y.B. akyi. Sɛnea ɛbɛyɛ a gyidifo afoforofo pii a wɔabɔ wɔn asu no betumi atra Yerusalem akyɛ na wɔasua Onyankopɔn nkwagye nsiesiei a ɛnam Kristo so no ho ade pii no, “wɔn a wogye dii nyinaa hyiaa faako, na wɔn nneɛma nyinaa yɛ kwasafode, na wɔtɔn wɔn ahonyade ne wɔn nneɛma, na wɔkyɛɛ mu maa wɔn nyinaa, sɛnea ehia obiara.”​—Asomafo no Nnwuma 2:43-47; 4:32-37.

 8. Adanse bɛn na ɛwɔ hɔ a ɛkyerɛ sɛ onuadɔ wɔ Yehowa Adansefo mu nnɛ?

⁸ Onuadɔ a ɛte saa wɔ Yehowa Adansefo mu wɔ yɛn bere yi so. Sɛ nhwɛso no, wɔ Wiase Ko II akyi no, ɔdɔ a ɛte saa kaa Onyankopɔn nkurɔfo ma wɔyɛɛ mfe abien ne fã ogye ɔsatu. Adansefo a wɔwɔ Canada, Sweden, Switzerland, United States, ne nsase afoforo so de ntade ne sika a wɔde bɛtɔ nnuan kɔmaa mfɛfo gyidifo a wɔwɔ Austria, Belgium, Bulgaria, China, Czechoslovakia, Denmark, England, Finland, France, Germany, Greece, Hungary, Italy, Netherlands, Norway, Phillipines, Poland, ne Romania aman a na ɔko ayɛ hɔ pasaa mu no. Eyi yɛ nhwɛso biako pɛ, efisɛ Onyankopɔn nkoa akyerɛ ɔdɔ a ɛte saa ama wɔn a nsasewosow kaa wɔn wɔ Peru ne Mexico, ne wɔn a ahum kaa wɔn wɔ Jamaica, ne wɔn a asiane a ɛtete saa a asisi mmeaemmeae kaa wɔn no nnansa yi mfe mu. Eyi mu ne akwan afoforo so no, Yehowa nkurɔfo ‘ma wɔn onuadɔ tra hɔ daa.’

Munnya Ahɔhoyɛ Su

 9. (a) Onyamesom pa su bɛn na wɔbɔ din wɔ Hebrifo 13:2? (b) Ɔkwan bɛn so na ebinom ‘yɛɛ abɔfo ahɔho’ a na wɔn ani nni wɔn ho so?

⁹ Nea edi hɔ no Paulo bɔɔ su foforo a wɔn a wodi Kristo akyi, ‘wɔde ɔsom kronn ma onyamesuro ne ehu mu’ na Yehowa yɛ wɔn Boafo no yi adi no din. Ɔhyɛe sɛ: “Ahɔhoyɛ nso, mommma mo ani mmpa so; efisɛ eyi so na ebinom nam yɛɛ abɔfo ahɔho a wɔn ani nni so.” (Hebrifo 13:2) Henanom na “wɔyɛɛ abɔfo ahɔho” a na wɔn ani nni so no? Wiɛ, agya panyin Abraham yɛɛ abɔfo baasa hɔho. (Genesis 18:1-22) Baanu fii hɔ kɔe, na ne wɔfase Lot too nsa frɛɛ saa ahɔho koro yi ara kɔɔ ne fi wɔ Sodom. Nanso, ansa na wɔbɛkɔ akɔda no, dɔm betwaa Lot fi ho hyiae, “efi mmofra so kosi mpanyimfo so.” Wobisae sɛ Lot nyi n’ahɔho no mmra na wɔne wɔn mmu ɔbrabɔne, nanso ɔpowee denneennen. Ɛwom sɛ mfiase no na Lot nnim de, nanso na wayɛ abɔfo a akyiri yi wɔboaa ɔne ne mmabea ma woguan owu bere a ‘Yehowa tɔɔ sufre ne gya fii soro guu Sodom ne Gomora so’ no ahɔho.​—Genesis 19:1-26.

10. Nhyira horow bɛn na Kristofo a wɔwɔ ahɔhoyɛ su nya?

¹⁰ Kristofo a wɔwɔ ahɔhoyɛ su nya nhyira pii. Wɔte osuahu ahorow a eye a wɔn ahɔho ka kyerɛ no na wonya wɔn fekubɔ a honhom fam akatua wom no mu mfaso. Wɔkamfoo Gaio sɛ ofi ahɔhoyɛ su mu gyee mfɛfo gyidifo “ahɔho,” sɛnea Yehowa nkurɔfo pii gye ahwɛfo akwantufo ahɔho nnɛ no. (3 Yohane 1, 5-8) Ahɔhoyɛ su a woyi adi yɛ ade a ɛma obi fata sɛ wɔpaw no sɛ ɔpanyin. (1 Timoteo 3:2; Tito 1:7, 8) Ɛfata sɛ yɛhyɛ no nsow sɛ Yesu de Ahenni nhyira horow hyɛɛ wɔn a wɔte sɛ nguan a wofi ahɔhoyɛ su mu yɛɛ ne “nuanom” a wɔasra wɔn no yiye no bɔ.​—Mateo 25:34-40.

Monkae Wɔn a Wɔtaa Wɔn

11. Dɛn nti na na afotu a ɛwɔ Hebrifo 13:3 no yɛ nea ɛfata?

¹¹ Ɛnsɛ sɛ wɔn a wɔpɛ sɛ wonya Yehowa mmoa na ‘wɔde ɔsom kronn ma no onyamesuro ne ehu mu’ no ma wɔn werɛ fi wɔn mfɛfo gyidifo a wɔrehu amane. Ná Paulo te amanehunu a Kristofo a wɔyɛ wɔn ayayade no gyina ano no ase. Bere bi a edi kan mu no, na ɔtaa ama asuafo no abɔ ahwete, na na afei ara na wɔayi ne yɔnko odwumayɛni Timoteo afi afiase. (Hebrifo 13:23; Asomafo no Nnwuma 11:19-21) Ná Kristofo asɛmpatrɛwfo nso nenam rehyehyɛ asafo afoforo anaasɛ wɔrehyɛ nea ɛwowɔ hɔ dedaw no den honhom mu. Esiane sɛ na anuanom a wɔnenam saa bere no mu pii yɛ Amanaman mufo nti, ɛbɛyɛ sɛ na Hebrifo Kristofo no binom nnwen wɔn ho sɛnea ɛsɛ. Enti, na afotu yi yɛ nea ɛfata: “Monkae nneduafo, sɛnea mo ne wɔn na ɛda duam, ne wɔn a wohu amane biara, sɛ mo ankasa nso da so wɔ ɔhonam mu yi.”​—Hebrifo 13:3.

12. Ɔkwan bɛn so na yebetumi de afotu a ɛne sɛ yɛmma mfɛfo Kristo a wohu amane no ntra yɛn adwenem no adi dwuma?

¹² Ná Hebrifo no ama ‘nneduafo amane aka wɔn,’ nanso na ɛnsɛ sɛ wɔma wɔn werɛ fi mfɛfo gyidifo anokwafo a wɔte saa no, sɛ wɔyɛ Yudafo anaa Amanaman mufo no. (Hebrifo 10:34) Na yɛn nso ɛ? Ɔkwan bɛn so na yebetumi akyerɛ sɛ yɛma Kristofo a wohu amane no tra yɛn adwenem? Wɔ nsɛm no bi mu no, ebia ɛbɛyɛ nea ɛfata sɛ yɛnam krataa so srɛ nniso atumfoɔ wɔ mmɔden a yɛbɔ sɛ yɛbɛboa mfɛfo gyidifo a wɔde wɔn agu afiase esiane wɔn gyidi nti wɔ nsase a wɔabara Ahenni asɛnka adwuma wɔ hɔ so no. Ɛsɛ sɛ yɛkae wɔn mpaebɔ mu titiriw, na sɛ ɛbɛyɛ yiye a yɛbɔ ebinom din mpo. Wɔn ɔtaa no ka yɛn kɛse, na Yehowa tie yɛn adesrɛ a anibere wom ma wɔn no. (Dwom 65:2; Efesofo 6: 17-20) Bere a ɛnyɛ nea yɛwɔ afiase dan koro no ara mu no, ɛte sɛ nea yɛne wɔn na ɛwɔ hɔ a yebetumi aboa wɔn na yɛahyɛ wɔn nkuran. Ɛda adi yiye sɛ Kristofo a wɔde honhom awo wɔn no ma wɔn a wɔasra wɔn a wohu amane no amanehunu ka wɔn. (Fa toto 1 Korintofo 12:19-26 ho.) Eyinom dwen wɔn ahokafo a wɔwɔ asase so anidaso a wɔtaa wɔn a wɔn nso wohu ataafo nsam amane pii no ho saa ara. Tema a ɛte saa no fata esiane sɛ yɛn nyinaa da so wɔ ɔhonam mu na yebetumi ahyia amanehunu ne ɔtaa sɛ Yehowa asomfo nti.​—1 Petro 5:6-11.

Ɛsɛ sɛ Wodi Aware Ni

13. Titiriw no, dɛn na Paulo kae wɔ Hebrifo 13:14?

¹³ Ɛsɛ sɛ Kristo nhwɛso akyidi ne ‘Yehowa a yɛde onyamesuro ne ehu bɛsom no ɔsom kronn’ no ka sɛnea yedwen afoforo ho no wɔ akwan afoforo pii so. Paulo kae sɛ “mo ankasa nso da so wɔ ɔhonam mu” no akyi no, ɔkaa abusuabɔ bi a ɛyɛ nipadua anaa ɔhonam mu de a ɛma wonya hokwan sɛ wɔbɛkyerɛ obu a ɛfata ama afoforo ho asɛm. (Hebrifo 13:3) Ɔde saa afotu yi maa Hebrifo Kristofo no: “Wonni aware ni, ade nyinaa mu, na wonngu aware mpa ho fi; efisɛ nguaman ne awaresɛefo de, Onyankopɔn bebu wɔn atɛn.” (Hebrifo 13:4) Esiane sɛ na ɔbrasɛe abu so wɔ Roma Ahemman no mu nti, na saa afotu yi fata dɛn ara! Ɛho hia sɛ Kristofo a wɔwɔ hɔ nnɛ nso tie saa nsɛm yi esiane wiase no abrabɔ gyinapɛn ahorow a ɛba fam ne nokwasɛm a ɛyɛ sɛ wotu ɔpepem pii fi asafo no mu afe biara esiane ɔbarima ne ɔbea nna mu ɔbrasɛe nti no.

14. Dɛn nti na wobɛka sɛ aware yɛ nea nidi wom?

¹⁴ Wɔn a na wɔnkyerɛ obu kɛse mma aware no mu binom ne Esenefo a na wɔwɔ hɔ wɔ Paulo bere so no. Mpɛn pii no na wɔyɛ sigyafo, te sɛ nea asɔfo bi a wodi mfomso susuw sɛ sigyadi yɛ kronkron sen aware yɛ nnɛ no. Nanso, Paulo nam nea ɔkyerɛwee no so daa no adi pefee sɛ aware yɛ nea nidi wom. Sɛnea ɛsɛ sɛ wɔkyerɛ obu kɛse ma no no daa adi bere a Naomi kaa eyi a na ɛne n’apɛde no kyerɛɛ ne nsewnom Rut ne Orpa no: “[Yehowa] mma munnya atraye mo kununom fi.” (Rut 1:9) Wɔ baabi foforo no, Paulo ankasa daa no adi sɛ ‘akyiri nna bi mu ebinom bɛtwe wɔn ho afi gyidi ho na wɔasiw aware kwan.’​—1 Timoteo 4:1-5.

15. Henanom na wɔfrɛɛ wɔn nguaman ne awaresɛefo wɔ Hebrifo 13:4 no, na Onyankopɔn bebu wɔn atɛn dɛn?

¹⁵ Ná Hebrifo a bere bi na wɔwɔ Mmara no ase nanso wɔde wɔn aba apam foforo no mu no nim mmarasɛm yi: “Nsɛe aware.” (Exodus 20:14) Nanso na wɔte ɔbrasɛe wiase mu na na wohia kɔkɔbɔ yi: “Wonngu aware mpa ho fi; efisɛ nguaman ne awaresɛefo de, Onyankopɔn bebu wɔn atɛn.” Wɔn a wɔka nguaman no ho ne nnipa a wɔnnwaree a wɔde wɔn ho hyɛ ɔbarima ne ɔbea nna mu no. Wɔn a wɔyɛ awaresɛefo ankasa no ne awarefo a wɔne wɔn a wɔnyɛ wɔn ahokafo bom tra, na wogu wɔn ankasa aware mpa ho fi no. Esiane sɛ nguaman ne awaresɛefo a wɔnnsakra wɔn adwene fata Onyankopɔn atemmu a enye nti, wɔrennye wɔn nkɔ ɔsoro Yerusalem Foforo no mu anaasɛ wɔrennya daa nkwa wɔ asase so wɔ Ahenni nniso ase. (Adiyisɛm 21:1, 2, 8; 1 Korintofo 6:9, 10) Ɛsɛ sɛ saa kɔkɔbɔ a ese wonngu aware mpa ho fi yi ma Kristofo a wɔaware kwati nna mu afide a wɔne wɔn ahokafo bɛyɛ, ɛwom sɛ fi biara nni aware mu honam fam ayɔnkofa a ɛfata no ho de.​—Hwɛ March 15, 1983 Watchtower, nkratafa 27-31.

Mompene Nea Mowɔ

16, 17. Dɛn na wɔkae wɔ Hebrifo 13:5, na dɛn nti na na Hebrifo no hia saa afotu yi?

¹⁶ Sɛ yedi yɛn nhwɛsofo no akyi na ‘yɛde onyamesuro ne ehu som ɔsom kronn’ a, yebenya abotɔyam a yɛwɔ ahotoso sɛ Yehowa ne yɛn Boafo. Honam fam nneɛma akyidi mu a yɛde yɛn ho bɛhyɛ kɛse no betumi ayɛ sɔhwɛ. Wɔka kyerɛɛ Hebrifo no sɛ: “Mommma sikanibere mmma mo abrabɔ mu, na mompene nea mowɔ; efisɛ ɔno ankasa aka sɛ: Merennyaw wo, nanso merempa wo da.” (Hebrifo 13:5) Dɛn nti na na Hebrifo no hia saa afotu yi?

¹⁷ Ebia na Hebrifo no ma sika ho asɛm haw wɔn dodo esiane sɛ na wɔkae “ɔkɔm kɛse” a ɛbae Klaudio Kaesare adedi bere so (41-54 Y.B.) no nti. Ná saa ɔkɔm no mu yɛ dɛn araa ma Kristofo a na wɔwɔ mmeae afoforo de ogye nneɛma kɔmaa wɔn nuanom a wɔwɔ Yudea no. (Asomafo no Nnwuma 11:28, 29) Sɛnea Yudani abakɔsɛm kyerɛwfo Josephus kyerɛ no, ɔkɔm no dii mfe abiɛsa anaa nea ɛboro saa, na ɛmaa ohia a emu yɛ den baa Yudea ne Yerusalem.​—Antiquities of the Jews, XX, 2, 5; 5, 2.

18. Asuade bɛn na afotu a ɛwɔ Hebrifo 13:5 no de ma yɛn?

¹⁸ So asuade bi wɔ ha ma yɛn anaa? Yiw, efisɛ ɛmfa ho sɛ ahia yɛn sɛ dɛn ara no, ɛnsɛ sɛ yɛdɔ sika anaasɛ yɛma ɛho asɛm haw yɛn dodo. Sɛ́ anka yɛbɛdwennwen honam fam ahobammɔ ho, na ebia yɛabɛyɛ aniberefo mpo mmom no, ɛsɛ sɛ ‘yɛpene nea yɛwɔ.’ Yesu kae sɛ: “Monhwehwɛ Onyankopɔn ahenni ne ne trenee kan; na wɔde eyinom nyinaa bɛka mo ho.” (Mateo 6:25-34) Ɔkyerɛe nso sɛ ɛsɛ sɛ yɛde yɛn adwene si ‘adefo a yɛbɛyɛ Onyankopɔn fam’ no so efisɛ ‘ɛnyɛ ade a yɛanya no so na yɛn nkwa gyina.’ (Luka 12:13-21) Ɛnde, sɛ sika ho dɔ reyɛ aka yɛn honhom mu yiyedi a, momma yentie Paulo afotu a ɔde kɔmaa Hebrifo no na yɛnkae sɛ “onyamesom pa a ɔpene wɔ mu yɛ adenya kɛse.”​—1 Timoteo 6:6-8.

Munnya Yehowa mu Ahotoso

19. Awerɛhyem bɛn na Onyankopɔn de maa Yosua, na ɛsɛ sɛ eyi ka yɛn dɛn?

¹⁹ Sɛ́ Yesu akyidifo a wɔhwehwɛ sɛ ‘wɔde onyamesuro ne ehu bɛsom ɔsom kronn’ no, ɛsɛ sɛ yɛde yɛn ahotoso hyɛ yɛn soro Agya a yehia ne mmoa kɛse no mu, na ɛnyɛ sika mu. Ɛmfa ho sɛ nsɛnnennen bɛn ara na yehyia no, ɛsɛ sɛ yɛkae n’awerɛhyem a ɔde ma yɛn no: “Merennyaw wo, nanso merempa wo.” (Hebrifo 13:5) Ɛha no, Paulo faa Onyankopɔn nsɛm a ɔka kyerɛɛ Yosua no kae: “Merempa wo na merennyaw wo.” (Yosua 1:5, fa toto Deuteronomium 31:6, 8 ho.) Yehowa annyaw Yosua da, na sɛ yenya Ne mu ahotoso a, Ɔrempa yɛn.

20. (a) 1990 afe asɛm no ne dɛn? (b) Bere a yensuro no, dɛn na ɛsɛ sɛ yɛkɔ so yɛ?

²⁰ Wobesi Onyankopɔn mmoa a enni huammɔ no so dua wɔ Yehowa Adansefo mu asram a edi yɛn anim no mu efisɛ wɔn 1990 afe asɛm no kenkan sɛ: “Yɛde nnam ka sɛ: [Yehowa] ne me boafo.” Wohu saa nsɛm yi wɔ Hebrifo 13:6, faako a Paulo faa odwontofo no nsɛm kae na ɔka kyerɛɛ Hebrifo no sɛ: “Ɛma yɛde nnam ka sɛ: [Yehowa] ne me boafo, merensuro; onipa betumi ayɛ me dɛn?” (Dwom 118:6) Ɛwom sɛ wɔtaa yɛn de, nanso yensuro, efisɛ nnipa rentumi nyɛ ntra nea Onyankopɔn ma kwan. (Dwom 27:1) Sɛ ɛsɛ sɛ yewu sɛ mudi mu kurafo mpo a, yɛwɔ owusɔre anidaso. (Asomafo no Nnwuma 24:15) Enti momma yɛnkɔ so nni yɛn nhwɛsofo no akyi ‘onyamesuro ne ehu a yɛde som ɔsom kronn’ no mu, a yɛwɔ ahotoso sɛ Yehowa ne yɛn Boafo.

Wubebua Dɛn?

◻ Dɛn nti na na Hebrifo Kristofo no titiriw hia Yehowa mmoa?

◻ Ɔkwan bɛn so na Yehowa nkurɔfo ‘ama wɔn onuadɔ atra hɔ’?

◻ Dɛn nti na ɛsɛ sɛ yenya ahɔhoyɛ su?

◻ Dɛn na yebetumi ayɛ de akyerɛ sɛ yɛkae mfɛfo gyidifo a wohu amane?

◻ Dɛn nti na ɛsɛ sɛ wodi aware ni?