‘Mommɔ Mpae Mma Mo Ho Mo Ho’

YEHOWA ne “mpaebɔ Tiefo.” (Dwom 65:2) Otie wɔn a wofi koma nyinaa mu de wɔn ho ma no no mpaebɔ bere nyinaa, na yebetumi agye adi sɛ otie bere a wɔbɔ mpae ma wɔn ho wɔn ho no.

Nanso dɛn nti na ɛsɛ sɛ yɛbɔ mpae ma yɛn ho yɛn ho? Ɛsɛ sɛ yɛbɔ mpae a ɛte sɛɛ no fa dɛn ho? So ɛfata bere nyinaa sɛ yɛbɔ mpae ma obi foforo? Na su pa ahorow bɛn na enya nkɔanim bere a yɛbɔ mpae ma yɛn ho yɛn ho no?

Dɛn Nti na Ɛsɛ sɛ Yɛbɔ Mpae ma Yɛn ho Yɛn Ho?

Kyerɛwnsɛm no hyɛ Yehowa nkurɔfo nkuran sɛ wɔmmɔ mpae mma wɔn ho wɔn ho. Na mpae a wɔbɔ ma afoforo ka ɔsomafo Paulo adesrɛ a ɔde too Onyankopɔn anim no ho. (Kolosefo 1:3; 2 Tesalonikafo 1:11) Bio nso, osuani Yakobo kyerɛwee sɛ: ‘Mommɔ mpae mmoma mo ho mo ho.’​—Yakobo 5:16.

Mpae a wɔbɔ ma Onyankopɔn nkoa afoforo tu mpɔn. Eyi da adi wɔ Yakobo 5:13-18, faako a wɔhyɛ Kristoni a ɔyare honhom mu no sɛ ɔmma asafo no mu mpanyimfo ‘mmɛbɔ no so mpae, na wɔnsra no ngo Yehowa din mu’ no. Wɔn mpaebɔ no tie betumi ahyɛ onipa a wahaw no den na wagye adi sɛ Onyankopɔn betie n’ankasa nso mpaebɔ. (Dwom 23:5; 34:18) Wɔ mpae a wɔne onii no bɛbɔ akyi no, mpanyimfo no bɛbɔ mmɔden sɛ wɔbɛma wasan anya honhom mu ahoɔden bio denam Kyerɛwnsɛm mu nsusuwii a ɛte sɛ ngo a ɛma obi ho dwo no a wɔbɛda no adi no so.

Yakobo de ka ho sɛ: “Na gyidi mpaebɔ begye ɔyarefo no nkwa, na [Yehowa] bɛma no so.” Yiw, ebia mpanyimfo no “gyidi mpaebɔ” no bɛboa onipa a ɔyare honhom mu no. Afei nso, Onyankopɔn “bɛma no so” ma wanya honhom mu ahoɔden, sɛ ɔpɛ sɛ Kyerɛwnsɛm no boa no a. Na sɛ honhom mu yare no fi bɔne a anibere wom nso ɛ? Wiɛ, sɛ onii no kyerɛ ahonu a, Yehowa de befiri no.

Enti, Yakobo se: ‘Monkeka mo mfomso nkyerɛkyerɛ mo ho mo ho, na mommɔ mpae mmoma mo ho mo ho, na wɔasa mo yare. Onipa trenee adesrɛ a emu yɛ den tumi yɛ ade bebree. Elia bɔɔ mpae dennen sɛ osu nntɔ. Na osu antɔ asase so mfirihyia abiɛsa ne asram asia. Na ɔbɔɔ mpae bio, na ɔsoro tɔɔ osu, na asase sow n’aba.’ (1 Ahene 17:1-7; 18:1, 42-45) Tumi wɔ ɔtreneeni mpaebɔ a ɛne Onyankopɔn apɛde hyia no mu.​—1 Yohane 5:14, 15.

Ɛsɛ sɛ Yɛbɔ Dɛn Ho Mpae?

Yebetumi abɔ mpae ama yɛn yɔnko gyidini afa asɛm biara ho. Sɛ nhwɛso no, Paulo ka kyerɛɛ afoforo sɛ wɔmmɔ mpae na watumi anya ahoɔden aka asɛmpa no. (Efesofo 6:17-20) Sɛ yenim sɛ wɔresɔ obi ahwɛ a, dɛn na ɛsɛ sɛ yɛyɛ? Yebetumi abɔ mpae sɛ ‘ɔnnyɛ bɔne bi’ ne sɛ, Onyankopɔn nnnyaw no wɔ sɔhwɛ no mu, na mmom onyi no ɔbɔne no, Satan Ɔbonsam nsam. (2 Korintofo 13:7; Mateo 6:13) Sɛ obi yare wɔ honam fam a, yebetumi aka akyerɛ Yehowa sɛ ɔmma no ahoɔden a ehia no na watumi agyina ne yare no ano.​—Dwom 41:1-3.

Bere nyinaa ɛfata sɛ yɛbɔ mpae ma yɛn mfɛfo Yehowa asomfo a wɔtaa wɔn. Paulo ne ne mfɛfo hyiaa ɔtaa a emu yɛ den, na ɔka kyerɛɛ Korintofo Kristofo no sɛ: “Mo nso mokotɔ srɛ ma yɛn abia, na ɔdom akyɛde a wɔnam nnipa pii so de akyɛ yɛn no nti, nnipa pii nso ada ase ama yɛn.” (2 Korintofo 1:8-11; 11:23-27) Sɛ wɔde yɛn ato afiase mpo a, yebetumi abɔ mpae ama anuanom afoforo a wɔtaa wɔn no, na yɛakae bere nyinaa sɛ Yehowa tie “treneefo mpaebɔ.”​—Mmebusɛm 15:29.

Ɛsɛ sɛ yɛbɔ mpae ma yɛn nuanom a wodi asɛyɛde akɛse ho dwuma wɔ Yehowa ahyehyɛde no mu no titiriw. Wɔn a wɔkyerɛ ahyehyɛde no kwan na wosiesie honhom fam aduan a “akoa nokwafo ne ɔbadwemma” de ma no ka eyinom ho. (Mateo 24:45-47) Sɛ nhwɛso no, Yehowa Adansefo Sodikuw no mufo fata yɛn mpaebɔ, na yebetumi abɔ mpae sɛ Onyankopɔn mma wɔn “nyansa honhom.”​—Efesofo 1:16, 17.

Kristofo Su Horow Nya Nkɔanim

Yɛnam mpae a yɛbɔ ma mfɛfo gyidifo no so da yɛn ho adi sɛ yedwen afoforo ho, yɛnyɛ pɛsɛmenkominya, na yɛwɔ ɔdɔ. Ɔdɔ mu a yefi susuw yɛn honhom mu nuanom ho a pɛsɛmenkominya nnim no ne Paulo asɛm a ese ɔdɔ ‘nhwehwɛ nea ɛyɛ n’ankasa de’ no hyia. (1 Korintofo 13:4, 5) Mpae a obi bɔ ma afoforo yɛ ɔkwan biako a ɔnam so “nnhwɛ ne nko de, na mmom ɔnhwɛ ne mfɛfo de bi.” (Filipifo 2:4) Bere a yɛma afoforo honhom mu yiyedi ho hia yɛn wɔ yɛn mpaebɔ mu no, yehu nso sɛ yetwiw bɛn wɔn kɛse wɔ onuadɔ a ɛma wohu Yesu asuafo no mu.​—Yohane 13:34, 35.

Yenya ayamhyehye su ma wɔn a yɛbɔ mpae ma wɔn no. (1 Petro 3:8) Yɛwɔ ayamhyehye ma wɔn, na yɛne wɔn kyɛ wɔn anigye ne wɔn haw ahorow. Wɔ nipadua no mu no, sɛ nsa biako pira a, foforo a aka no hwɛ no na ɛbɔ mmɔden sɛ ɛbɛma ɛyaw a kuru no ma ɛte no ano abrɛ ase. (Fa toto 1 Korintofo 12:12, 26 ho.) Saa ara nso na mpae a yɛbɔ ma yɛn nuanom mmarima ne mmea a wohu amane no ma yenya ayamhyehye ma wɔn na yedwen wɔn ho. Ɛyɛ adehwere ma yɛn, sɛ yebu ani gu mfɛfo Kristofo anokwafo so wɔ yɛn mpaebɔ mu a, efisɛ Onyankopɔn ne Kristo nnyaw wɔn.​—1 Petro 5:6, 7.

Su pa ahorow nya nkɔanim bere a yɛbɔ mpae ma afoforo no. Yɛte wɔn ase kɛse na yenya boasetɔ ma wɔn. Yetu abufuw ase na yedwen nneɛma a ɛhyɛ nkuran a ɛma yɛdɔ afoforo na yenya anigye no ho. Mpae a yɛbɔ ma afoforo nso ma asomdwoe ne biakoyɛ nya nkɔso wɔ Yehowa nkurɔfo mu.​—2 Korintofo 9:13, 14.

Momma Yɛnkɔ So Mmɔ Mpae Mma Yɛn ho Yɛn Ho

Te sɛ Paulo no, yebetumi abisa afoforo ma wɔabɔ mpae ama yɛn. Wɔ mpae a yɛne wɔn bɛbɔ akyi no, yɛn nnamfo betumi abɔ Onyankopɔn mpae kokoam ama yɛn, abɔ yɛn din, abɔ yɛn haw din, na wɔaka akyerɛ no sɛ ɔmmoa yɛn. Na yebenya mmoa, efisɛ “Yehowa nim sɛnea obeyi wɔn a wɔwɔ onyamesom pa ahofama afi sɔhwɛ mu.”​—2 Petro 2:9, NW.

Yehowa Adansefo a wɔbɔ yɛn din wɔ wɔn mpaebɔ mu no nso betumi ahyia sɔhwɛ ahorow​—ebetumi ayɛ nea ɔhaw wom sen yɛn de. Nanso, wɔsoa yɛn dadwen wɔ Daa Ɔhene no anim, na ebia wosu ma yɛn mpo. (Fa toto 2 Korintofo 2:4; 2 Timoteo 1:3, 4 ho.) Aseda bɛn ara na ɛsɛ sɛ yɛde ma wɔ eyi ho sɛɛ yi! Enti, momma yɛmmɔ mpae mma yɛn ho yɛn ho esiane anisɔ ne nneɛma afoforo a yɛasusuw ho seesei ara no nti.