“Mo Nso Monyɛ Kronkron Abrabɔ Nyinaa Mu”

“Te sɛ nea ɔfrɛɛ mo no yɛ kronkron no, mo nso monyɛ kronkron abrabɔ nyinaa mu, na wɔakyerɛw sɛ: Monyɛ kronkron, efisɛ me, meyɛ kronkron.”—1 PETRO 1:15, 16.

 1. Dɛn nti na Petro ka kyerɛɛ Kristofo sɛ wɔnyɛ kronkron?

DƐN nti na ɔsomafo Petro de atifi hɔ afotu no mae? Efisɛ ohuu hia a ɛho hia sɛ Kristoni biara hwɛ ne nsusuwii ne ne nneyɛe yiye na wama ɛne Yehowa kronnyɛ ahyia. Enti, nea ɔka de fii atifi hɔ asɛm no ase ne sɛ: “Monkyekyere mo adwene asen, mo ani nna hɔ . . . [Monyɛ] sɛ asoɔmmerɛw mma, na monnyɛ mo ho sɛnea kan a munnim biribi no mo akɔnnɔ te no.”—1 Petro 1:13, 14.

 2. Dɛn nti na ansa na yɛresua nokware no, na yɛn akɔnnɔ ahorow ho ntew?

² Ná yɛn kan akɔnnɔ ho ntew. Dɛn ntia? Efisɛ yɛn mu pii dii wiase asetra kwan akyi ansa na yɛrebegye Kristofo nokware no atom. Ná Petro nim eyi bere a ɔkyerɛw no pefee sɛ: “Ɛdɔɔso sɛ yɛn asetra bere a atwam no mu yɛyɛɛ nea amanaman no pɛ, sɛ yɛnantew ahohwi, akɔnnɔ, asabow, agobɔne, didimee ne abosonsom a wokyi mu.” Ampa, Petro ammobɔ nneyɛe a ɛho ntew a yɛn nnɛ wiase yi mu nkutoo na ɛwɔ no din, efisɛ saa bere no na wonnim.—1 Petro 4:3, 4.

 3, 4. (a) Yɛbɛyɛ dɛn atumi adi akɔnnɔ a ɛmfata ho dwuma? (b) Ɛnsɛ sɛ Kristofo da nkate adi anaa? Kyerɛkyerɛ mu.

³ Wohyɛɛ no nsow sɛ akɔnnɔ ahorow yi na ɔhonam ne nkatede no pɛ? Sɛ yɛma kwan ma eyinom di yɛn so a, ɛma ɛyɛ mmerɛw sɛ yɛn nsusuwii ne yɛn nneyɛe bɛyɛ nea ɛho ntew. Eyi kyerɛ hia a ɛho hia sɛ yɛma adwene tumi no di yɛn nneyɛe so. Paulo kaa ho asɛm wɔ saa kwan yi so: “Enti, anuanom, migyina Onyankopɔn mmɔborohunu so mitu mo fo sɛ momfa mo nipadua nsi hɔ sɛ afɔre a ɛte ase a ɛyɛ kronkron a ɛsɔ Onyankopɔn ani a ɛne mo nyamesom a adwene [“adwene tumi,” NW] wɔ mu no.”—Romafo 12:1, 2.

⁴ Sɛ yebetumi de afɔre a ɛyɛ kronkron ama Onyankopɔn a, adwene tumi na ɛsɛ sɛ yɛma edi yɛn so, na ɛnyɛ nkate. Hwɛ nnipa dodow a wɔde wɔn ho ahyɛ ɔbrasɛe mu esiane sɛ wɔmaa wɔn nkate dii wɔn abrabɔ so nti! Ɛno nkyerɛ sɛ ɛsɛ sɛ yɛka yɛn nkate hyɛ; anyɛ saa a, anka yɛbɛyɛ dɛn ada anigye adi wɔ Yehowa som mu? Nanso, sɛ yɛpɛ sɛ yɛda honhom no aba adi sen sɛ yɛbɛda ɔhonam nnwuma adi a, ɛnde ɛsɛ sɛ yɛsakra yɛn adwene ma ɛne Kristo nsusuwii hyia.—Galatifo 5:22, 23; Filipifo 2:5.

Akatua Kronkron Hwehwɛ Abrabɔ Kronkron

 5. Dɛn nti na na Petro ani wɔ hia a kronnyɛ ho hia so?

⁵ Dɛn nti na na Petro ani wɔ hia a Kristofo kronnyɛ ho hia so saa? Efisɛ na onim ade kronkron a wotua de gyee adesamma asoɔmmerɛfo no yiye. Ɔkyerɛwee sɛ: “Munim sɛ wɔamfa nneɛma a ɛporɔw, dwetɛ anaa sika, annye mo, mo abrabɔ hunu a mo agyanom de maa mo no mu, na mmom wɔde Kristo a ɔte sɛ oguammaa a onni dɛm ne nkekae no mogya a ne bo yɛ den no na egyee mo.” (1 Petro 1:18, 19) Yiw, kronnyɛ Fibea, Yehowa Nyankopɔn, somaa ne Ba a ɔwoo no koro, “kronkronni no,” baa asase so betuaa agyede a ɛbɛma nnipa ne Onyankopɔn anya abusuabɔ pa no.—Yohane 3:16; 6:69; Exodus 28:36; Mateo 20:28.

 6. (a) Dɛn nti na ɛnyɛ mmerɛw sɛ yebenya abrabɔ kronkron? (b) Dɛn na ebetumi aboa yɛn ma yɛn abrabɔ ayɛ kronkron?

⁶ Nanso, ɛsɛ sɛ yegye tom sɛ ɛnyɛ mmerɛw sɛ yebenya abrabɔ kronkron bere a yɛte Satan wiase a aporɔw mu no. Osunsum Kristofo a wɔrebɔ mmɔden sɛ wobenya wɔn ho tɔtorɔtɔɔ wɔ ne nneɛma nhyehyɛe no mu no mfiri. (Efesofo 6:12; 1 Timoteo 6:9, 10) Nhyɛso a honam fam adwuma, abusuafo sɔretia, sukuu mu fɛwdi ne atipɛnfo de ba no ma honhom fam yiyedi a etu mpɔn ho hia na obi atumi akura kronnyɛ mu. Ɛno si mfaso kɛse a ɛwɔ so sɛ yɛbɛyɛ yɛn kokoam adesua na yɛakɔ Kristofo nhyiam daa no so dua. Paulo tuu Timoteo fo sɛ: “So nsɛm pa a eye a wotee me nkyɛn no nhwɛso no mu yiye, gyidi ne ɔdɔ a ɛwɔ Kristo Yesu mu mu.” (2 Timoteo 1:13) Yɛte saa nsɛm a ɛhyɛ den no wɔ yɛn Ahenni Asa so ne yɛn kokoam Bible adesua mu. Ebetumi aboa yɛn ma yɛn abrabɔ ayɛ kronkron da biara da, wɔ tebea horow pii mu.

Abrabɔ Kronkron Wɔ Abusua no Mu

 7. Ɔkwan bɛn so na ɛsɛ sɛ kronnyɛ ka yɛn abusua asetra?

⁷ Bere a Petro faa Leviticus 11:44 kaa asɛm no, ɔde Hela asɛmfua haʹgi·os, a ɛkyerɛ “nea wɔatew ho afi bɔne ho ma enti wɔahyira so ama Onyankopɔn, ɛyɛ kronn na edii dwuma.” (An Expository Dictionary of New Testament Words, a W. E. Vine yɛe) Ɛsɛ sɛ eyi ka yɛn dɛn wɔ yɛn Kristofo abusua asetra mu? Akyinnye biara nni ho sɛ ɛkyerɛ sɛ ɛsɛ sɛ yɛn abusua asetra gyina ɔdɔ so, efisɛ “Onyankopɔn ne dɔ.” (1 Yohane 4:8) Ɔdɔ a ɛma obi de ne ho bɔ afɔre ne ade a ɛhyɛ abusuabɔ a ɛda ahokafo ne nea ɛda awofo ne wɔn mma ntam no mu den.—1 Korintofo 13:4-8; Efesofo 5:28, 29, 33; 6:4; Kolosefo 3:18, 21.

 8, 9. (a) Tebea bɛn na ɛtɔ mmere bi a ɛsɔre wɔ Kristofo fie? (b) Afotu pa bɛn na Bible de ma wɔ asɛm yi ho?

⁸ Anhwɛ a yebesusuw sɛ ɔdɔ a ɛte saa a yɛbɛda no adi wɔ Kristofo abusua mu no ankasa bɛba. Nanso, ɛsɛ sɛ yegye tom sɛ ɔdɔ nkɔ so sɛnea ɛsɛ sɛ ɛyɛ wɔ Kristofo binom afie bere nyinaa. Ebetumi ayɛ te sɛ nea ɛkɔ so wɔ Ahenni Asa so, nanso hwɛ sɛnea ɛyɛ mmerɛw sɛ yɛn kronnyɛ bɛbrɛ ase wɔ fie. Ɛhɔ no, yɛn werɛ betumi afi ntɛm ara sɛ yɛn yere da so yɛ yɛn nuabea Kristoni anaasɛ yɛn kunu da so yɛ onua koro no ara (ne ebia asafo mu ɔsomfo anaa ɔpanyin) a ɛte sɛ nea na wobu no wɔ Ahenni Asa so no. Abufuw ba, na akasakasa a emu yɛ den tumi sɔre. Anhwɛ mpo a, nkakrankakra yebetumi anya asetra akwan abien. Ɛnna so nyɛ okunu ne ɔyere a wɔyɛ ade te sɛ Kristo wɔ wɔn ntam abusuabɔ mu, na mmom ɔbarima ne ɔbea a wɔredi aperepere ara kwa. Wɔn werɛ fi sɛ ɛsɛ sɛ ofie hɔ tebea yɛ kronn. Wobetumi afi ase akasa te sɛ wiasefo. Hwɛ sɛnea ɛyɛ mmerɛw sɛ asɛm a ɛnyɛ dɛ na ɛyɛ yaw betumi afi obi anom aba saa bere no!—Mmebusɛm 12:18; fa toto Asomafo no Nnwuma 15:37-39 ho.

⁹ Nanso, Paulo tu fo sɛ: “Mommma asɛm a ɛmfra biara [Hela, loʹgos sa·prosʹ, “kasa a ɛho agu fĩ,” ma enti ɛho ntew] mmfi mo anom, na mmom asɛm a eye na ɛma nkɔso a ehia, na wɔde dom wɔn a wɔte no.” Na ɛno fa atiefo a wɔwɔ fie nyinaa ho, a mmofra no nso ka ho.—Efesofo 4:29; Yakobo 3:8-10.

10. Ɔkwan bɛn so na kronnyɛ ho afotu fa mmofra ho?

¹⁰ Saa kronnyɛ ho akwankyerɛ yi fa mmofra a wɔwɔ Kristofo abusua mu nso ho saa ara. Hwɛ sɛnea ɛyɛ mmerɛw sɛ wobefi sukuu aba fie, na wɔafi ase asuasua wɔn atipɛnfo wiasefo no atuatew kasa a obu nnim no! Mmofra, mommma mo kɔn nnnɔ mmarimaa a na wonni ntetee pa a wɔyaw Yehowa diyifo no, a wɔn so nnipa wɔ hɔ nnɛ a wɔka kasafĩ ne abususɛm no suban. (2 Ahene 2:23, 24) Ɛnsɛ sɛ moma mo kasa dan mmɔnten so kasa a ɛmfra a nnipa a ɛyɛ wɔn den sɛ wɔbɛka kasa pa na wonni tema ka no. Sɛ́ Kristofo no, ɛsɛ sɛ yɛn kasa yɛ kronn, nea ahomeka wom, ɛma denhyɛ, nea ɛkyerɛ ayamye, na “nkyene wɔ mu.” Ɛsɛ sɛ ɛma yɛda nsow wɔ afoforo ho.—Kolosefo 3:8-10; 4:6.

Kronnyɛ ne Yɛn Abusuafo a Wonnye Nni

11. Dɛn nti na yɛ a yɛbɛyɛ kronkron no nkyerɛ sɛ yɛbɛyɛ yɛn ho atreneefo?

¹¹ Bere a yefi ahonim pa mu bɔ mmɔden sɛ yɛbɛyɛ nneɛma kronn no, ɛnsɛ sɛ yɛyɛ yɛn ho sɛ yɛkorɔn anaasɛ yɛyɛ atreneefo, titiriw bere a yɛne abusuafo a wonnye nni redi nsɛm no. Ɛsɛ sɛ anyɛ yiye koraa no, yɛn Kristofo abrabɔ a ayamye wom no boa wɔn ma wohu yɛn sɛ yɛyɛ soronko wɔ ɔkwan a ɛhyɛ nkuran so, sɛ yenim sɛnea woyi ɔdɔ ne mmɔborohunu adi kyerɛ, sɛnea Samariani mmɔborohunufo a ɔwɔ Yesu mfatoho mu no yɛe no.—Luka 10:30-37.

12. Kristofo awarefo bɛyɛ dɛn atumi ama wɔn ahokafo ani agye nokware no ho kɛse?

¹² Petro sii hia a su pa a yɛbɛda no adi akyerɛ yɛn abusuafo a wonnye nni no ho hia so dua bere a ɔkyerɛw kɔmaa ɔyerenom Kristofo sɛ: “Saa ara na mo, ɔyerenom, mommrɛ mo ho ase mma mo ankasa mo kununom, na sɛ ebinom antie asɛm no nso a, wɔafa ɔyerenom abrabɔ a ɔkasa nni mu so anya wɔn, sɛ wɔbɛhwɛ mo abrabɔ a ɛho tew wɔ osuro mu.” Ɔyere a ɔyɛ Kristoni (anaa okunu nso) betumi ama ne hokafo a onnye nni no ani agye nokware no ho kɛse, sɛ ɔma n’abrabɔ ho tew, osusuw afoforo ho, na obu ade a. Eyi kyerɛ sɛ ɛsɛ sɛ ɔma ne teokrase dwumadi nhyehyɛe yɛ fakaa sɛnea ɛbɛyɛ a ommu ɔhokafo a onnye nni no abomfiaa anaa ommu ani ngu ne so.a—1 Petro 3:1, 2.

13. Ɔkwan bɛn so na ɛtɔ mmere bi a mpanyimfo ne asafo mu asomfo betumi aboa okununom a wonnye nni no ma wɔn ani agye nokware no ho?

¹³ Ɛtɔ mmere bi a, mpanyimfo ne asafo mu asomfo betumi aboa denam okunu a onnye nni no a wɔne no bɛbɔ na wɔahu no so. Saa kwan yi so no, obetumi ahu sɛ Adansefo yɛ nnipa te sɛ afoforo, wɔn ho nni asɛm, na wɔn ani gye nneɛma pii ho, a ɛnyɛ Bible nkutoo na wɔn ani gye ho. Wɔ asɛm bi a esii mu no, ɔpanyin bi kyerɛɛ anigye wɔ mpataayi a na okunu bi de gyigye n’ani no ho. Na ɛno ara dɔɔso sɛ ebedi akwanside no so. Awiei koraa no, saa okunu no bɛyɛɛ onua a wɔabɔ no asu. Wɔ asɛm foforo bi a esii mu no, na okunu a onnye nni bi ani gye kanaafo ho. Mpanyimfo no ampa abaw. Wɔn mu biako suaa ho ade, enti bere a edi hɔ a ohyiaa ɔbarima no, otumi gyinaa asɛm a saa okunu no ani gye ho no so fii nkɔmmɔbɔ ase! Enti, sɛ yɛbɛyɛ kronkron no nkyerɛ sɛ yɛbɛyɛ katee anaa yɛbɛto yɛn adwene mu wɔ nneɛma foforo ho.—1 Korintofo 9:20-23.

Yɛbɛyɛ Dɛn Atumi Ayɛ Kronkron Wɔ Asafo no Mu?

14. (a) Dɛn ne Satan akwan a ɔfa so didi asafo no ase no biako? (b) Yɛbɛyɛ dɛn atumi ako atia Satan afiri no?

¹⁴ Satan Ɔbonsam yɛ otwirifo, efisɛ Hela asɛmfua ma Ɔbonsam, di·aʹbo·los, no kyerɛ “ɔnototofo” anaa “otwirifo.” Ntwiri ka nneɛma a ɔbɔ ho mmɔden paa no ho, na ɔbɔ mmɔden de di dwuma wɔ asafo no mu. Ɔkwan a ɔtaa fa so ne nsekudi. So yɛma kwan ma ɔde yɛn di dwuma wɔ saa abrabɔ a ɛho ntew yi mu? Ɛbɛyɛ dɛn na atumi aba saa? Ɛnam fi a yefi ase, ka a yɛka bi, anaa tie a yetie so. Abebusɛm a nyansa wom no se: “Onipa kɔntɔnkye hyɛ takrawogyam, na osututufo [otwirifo, NW] tetew nnamfo ntam.” (Mmebusɛm 16:28) Dɛn na wɔde siw nsekudi ne ntwiri ano? Ɛsɛ sɛ yɛhwɛ hu sɛ bere nyinaa yɛn kasa ma denhyɛ na egyina ɔdɔ so. Sɛ yɛhwɛ yɛn nuanom su pa ahorow mmom sen sɛ anka yɛbɛhwɛ nea yebu no sɛ enye wɔ wɔn ho no a, yɛn nkɔmmɔbɔ bɛyɛ anigye na ayɛ nea egyina honhom fam nneɛma so bere nyinaa. Kae sɛ ɔkasatia nyɛ den. Na obi a odi afoforo ho nseku kyerɛ wo no betumi adi wo nso wo ho nseku akyerɛ afoforo!—1 Timoteo 5:13; Tito 2:3.

15. Kristo su bɛn na ɛbɛboa ma asafo no mufo nyinaa ayɛ kronkron?

¹⁵ Sɛnea ɛbɛyɛ a yɛbɛma asafo no ayɛ kronkron no, ehia sɛ yɛn nyinaa nya Kristo adwene, na yenim sɛ ne su titiriw ne ɔdɔ. Enti, Paulo tuu Kolosefo no fo sɛ wɔnyɛ timmɔbɔ sɛ Kristo: “Enti sɛ moyɛ nnipa a Onyankopɔn apaw mo, ahotefo ne adɔfo, yi, monhyɛ ayamhyehye, ayamye, ahobrɛase adwene, odwo, abodwokyɛre . . . na momfa nkyekyɛ mo ho . . . Na eyinom nyinaa so na monhyɛ ɔdɔ a ɛne pɛyɛ hama no ngu” Ɔde kaa ho bio sɛ: “Na Kristo asomdwoe nni panyin mo koma mu.” Akyinnye biara nni ho sɛ, sɛ yɛwɔ saa fafiri su yi a, yebetumi ama biakoyɛ ne kronnyɛ a ɛwɔ asafo no mu no atra hɔ.—Kolosefo 3:12-15.

Yɛn Kronnyɛ Da Adi Wɔ Yɛn Mpɔtam?

16. Dɛn nti na ɛsɛ sɛ yɛn som kronn no yɛ anigye som?

¹⁶ Yɛn afipamfo nso ɛ? Wobu yɛn dɛn? Yɛda nokware no ho anigye adi, anaasɛ yɛma ɛyɛ te sɛ adesoa? Sɛ yɛyɛ kronkron sɛnea Yehowa nso yɛ kronkron no a, ɛnde ɛsɛ sɛ ɛda adi wɔ yɛn kasa ne yɛn abrabɔ mu. Ɛsɛ sɛ ɛda adi sɛ yɛn som kronn no yɛ anigye som. Dɛn nti na ɛte saa? Efisɛ Yehowa a ɔyɛ yɛn Nyankopɔn no yɛ anigye Nyankopɔn, na ɔpɛ sɛ n’asomfo ani gye. Enti, odwontofo no tumi kae wɔ Yehowa nkurɔfo a wɔtraa ase tete hɔ no ho sɛ: “Anigye ne ɔman a Yehowa ne wɔn Nyankopɔn!” Yɛda saa anigye no adi anaa? So yɛn mma nso da abotɔyam adi sɛ wɔka Yehowa nkurɔfo ho wɔ Ahenni Asa so anaa amansin nhyiam ase?—Dwom 89:15, 16; 144:15b, NW.

17. Nneɛma pa bɛn na yebetumi ayɛ de akyerɛ sɛ yɛwɔ kronnyɛ a ɛkari pɛ?

¹⁷ Yebetumi nso akyerɛ sɛ yɛkari pɛ wɔ kronnyɛ mu denam yɛn biakoyɛ su anaa ayamye a yebeyi no adi akyerɛ yɛn afipamfo so. Ɛtɔ mmere bi a na ɛho hia sɛ afipamfo ka wɔn tiri pam ho na ebia wosiesie mpɔtam hɔ anaa, sɛnea ɛte wɔ aman bi mu no, wɔboa ma wɔyeyɛ akwan nketewa ne akɛse yiye. Wɔ eyi mu no, yɛn kronnyɛ betumi ada adi wɔ sɛnea yɛhwɛ yɛn turo, yɛn adiwo, anaa yɛn agyapade afoforo so mu. Sɛ yegyaw nwura gugu hɔ anaasɛ yɛma yɛn adiwo yɛ fĩ anaa basaa, a ebi mpo a kar adedaw bi a asɛɛsɛe sisi hɔ ma obiara hu a, yebetumi aka sɛ yɛrekyerɛ obu ama yɛn afipamfo?—Adiyisɛm 11:18.

Kronnyɛ Wɔ Adwumam ne Sukuu Mu

18. (a) Dɛn na ɛyɛ ɔhaw kɛse ma Kristofo nnɛ? (b) Yɛbɛyɛ dɛn atumi ayɛ soronko wɔ wiase no ho?

¹⁸ Ɔsomafo Paulo kyerɛw kɔmaa Kristofo a na wɔwɔ kurow a ɛho akum Korinto no sɛ: “Makyerɛw mo nhoma no mu sɛ mo ne nguaman nnni afra. Ɛnyɛ wi yi ase nguaman anaa aniberefo ne amimfo anaa abosonsomfo ho asɛm koraa na meka; ɛno de, na anka ɛsɛ sɛ mufi wiase kɔ.” (1 Korintofo 5:9, 10) Eyi yɛ ɔhaw kɛse ma Kristofo, a da biara da ɛsɛ sɛ wɔne nnipa a wɔn bra asɛe anaa abrabɔ ho asɛm biara mfa wɔn ho bɔ no. Eyi yɛ mudi mu kura ho sɔhwɛ kɛse, titiriw wɔ aman a wɔhyɛ nna a wɔde guan nkurɔfo ho, ɔporɔw, ne atorodi ho nkuran anaa wɔnka ho hwee no mu. Wɔ mmeae a ɛtete saa no, yɛrentumi mmrɛ yɛn gyinapɛn ahorow ase na ama wɔn a wɔatwa yɛn ho ahyia no abu yɛn sɛ nnipa a wɔn ho “nni asɛm.” Mmom no, ɛsɛ sɛ yɛn Kristofo su a ayamye wom nanso ɛyɛ soronko no ma yɛda nsow wɔ nnipa a wɔn ani da hɔ, wɔn a wɔn ani ku wɔn honhom fam ahiade ho na wɔrehwehwɛ biribi pa no ani so.—Mateo 5:3; 1 Petro 3:16, 17.

19. (a) Sɔhwɛ bɛn na mo, mmofra, muhyia wɔ sukuu? (b) Dɛn na awofo betumi ayɛ de aboa wɔn mma ne wɔn abrabɔ kronkron no?

¹⁹ Saa ara na yɛn mmofra no rehyia sɔhwɛ pii wɔ sukuu mu. Mo, awofo, ɛyɛ a mokɔ mo mma sukuu mu? Munim tebea a ɛrekɔ so wɔ hɔ? Mo ne akyerɛkyerɛfo no wɔ abusuabɔ pa? Dɛn nti na nsɛmmisa yi ho hia? Efisɛ wɔ wiase nkurow akɛse pii mu no, sukuu abɛyɛ mmeae a basabasayɛ, nnubɔne, ne ɔbarima ne ɔbea nna kɔ so wɔ hɔ. Ɛbɛyɛ dɛn na mo mma akura wɔn mudi mu na wɔn abrabɔ ayɛ kronkron, sɛ wɔannya wɔn awofo mmoa a edi mu a efi ayamye mu a? Ɛfata sɛ Paulo tuu awofo fo sɛ: “Agyanom, munnyi mo mma abufuw, na wɔn koma antu.” (Kolosefo 3:21) Ɔkwan biako a wɔfa so hyɛ mmofra abufuw ne sɛ wonnya ɔhaw ne sɔhwɛ ahorow a wohyia no da biara da no ho ntease. Ahosiesie a wɔyɛ ma sɔhwɛ ahorow a wohyia wɔ sukuu no fi ase wɔ Kristofo fie a ɛwɔ honhom fam tebea pa mu.—Deuteronomium 6:6-9; Mmebusɛm 22:6.

20. Dɛn nti na kronnyɛ ho hia yɛn nyinaa?

²⁰ Nea edi akyiri no, dɛn nti na kronnyɛ ho hia yɛn nyinaa? Efisɛ ɛbɔ yɛn ho ban na Satan wiase ne ne nsusuwii annya yɛn so tumi. Ɛyɛ nhyira nnɛ ne daakye. Ɛboa ma yenya awerɛhyem sɛ yɛn nsa bɛka nkwa a ɛbɛyɛ nokware nkwa no wɔ trenee wiase foforo no mu. Ɛboa yɛn ma yɛyɛ Kristofo a yɛkari pɛ, afoforo tumi bɛn yɛn, na wotumi ne yɛn bɔ nkɔmmɔ—yɛnyɛ wɔn a wɔyɛ katee a wonnyae nsɛm mu mma ɛnka da. Ne tiaatwa mu no, ɛma yɛyɛ sɛ Kristo.—1 Timoteo 6:19.

[Ase hɔ asɛm]

Wokae?

◻ Dɛn nti na Petro huu hia a ɛho hia sɛ otu Kristofo fo wɔ kronnyɛ ho?

◻ Dɛn nti na ɛnyɛ mmerɛw sɛ obi de abrabɔ kronkron bɛtra ase?

◻ Dɛn na yɛn nyinaa betumi ayɛ ama kronnyɛ atu mpɔn wɔ abusua no mu?

◻ Sɛ asafo no bɛkɔ so ayɛ kronkron no, abrabɔ a ɛho ntew bɛn na ɛsɛ sɛ yɛkwati?

◻ Yɛbɛyɛ dɛn atumi akɔ so ayɛ kronkron wɔ adwumam ne sukuu mu?

[Mfonini ahorow wɔ kratafa 16, 17]

Sɛ Yehowa Adansefo no, ɛsɛ sɛ yɛn ani gye wɔ Onyankopɔn som ne nnwuma foforo mu