Gyata A Ɔbobom No

GYATA mmobom yɛ nnyigyei a ɛyɛ hu. Wobetumi ate no bɛboro akwansin anum. Nneɛma abien nti na wɔbobom. Ɛyɛ ɔkwan a wɔfa so ne gyata akuw a wɔwɔ akyirikyiri di nkitaho na afei nso ɛkyerɛ asasesin a wɔwɔ mu no. Nea ɛne gyidi a agye din bɔ abira no, gyata ntaa mmobom bere a ɔrehwehwɛ mmoa akɛse akyere wɔn. Nanso bere a ɔrebɔ mmɔden sɛ obenya afiemmoa a wogu ban mu akyere wɔn no, gyata taa bobom. Nnyigyei huhuuhu no ma wɔbɔ pete na ɛma wobubu ban a ɛbɔ wɔn ho ban no, ma wɔda adi.

Eyi kae yɛn ɔsomafo Petro asɛm no. Ɔkyerɛw kɔmaa mfɛfo Kristofo sɛ: “Mo tamfo bonsam nam sɛ gyata a ɔbobom hwehwɛ nea obenya no amene” (1 Pet. 5:8) Sɛ́ Kristofo “nguan” a yenya ahobammɔ denam “oguanhwɛfo pa” Kristo Yesu so no, eye sɛ yetie Petro asɛm no. (Yoh 10:14, 15) Ɔsomafo no ka sɛ, “mo ani nna hɔ, monwɛn,” na Ɔbonsam ahunahuna mmobom no amma obiara ho annwiriw no na wanguan ankɔ baabi a honhom mu asiane wɔ.