Nea Yesua Fi Nkurow Ahorow A Enyaa Dimmɔne No Mu

ƐYƐ nkurow a na akɔ so yiye, a ebiara wɔ n’ankasa hene. Mpofirim, da koro bi, wɔde ogya sɛee ne nyinaa a wɔansan ansi bio. Eyi bae bɛyɛ mfirihyia 3,900 a atwam ni.

Nanso, saa nkurow ahorow a ɛbɔ ho abien a enyaa dimmɔne no wɔ din a wɔakora so de abesi nnɛ wɔ kasa horow pii mu a ɛkyerɛ ahohwibɔ​—Sodom. Kurow foforo a ɛka ho ne Gomora.

Sɛnea wɔsɛee saa nkurow ahorow abien yi koraa fae no amma wɔannya dɔte bi a esum hɔ a wobetumi de wɔn nsa akyerɛ sɛ ɛha na na na kurow no wɔ. The New Encyclopedia Britannica no ka fa saa nkurow ahorow abien yi ho sɛ: “Ebia mprempren yi al-Lisan keseefam po nsa-basa a ɛwɔ Po a Awu a ɛwɔ Israel keseefam no mu nsu a ɛnnɔ no akata so.” Wobetumi ahyɛ no nsow sɛ wɔn a wɔdɔ asukɔ a wɔpɛɛpɛɛ nneɛma a ɛwɔ saa po yi ase no huu biribi a ɛte sɛ afasu. Sɛnea ɛbɛyɛ na yɛbɛte nea ɛbaa saa nkurow a wonnye koraa yi so no ase no, momma yɛnsan nkɔ bere a na kurow yi wɔ hɔ no nna mu.

Tebea Horow a Na Ɛwɔ Sodom

Da koro anadwofa bi, ahɔho baanu bi hyɛn Sodom. Kurow no mu mmarima a asi wɔn yiye no huu wɔn, nanso kurow no muni biara anyɛ wɔn atuu. Awiei no, Lot, ɔbarima a osuro Onyankopɔn a wakɔtra beae hɔ no duu hɔ. Bere a ohuu wɔn no, ɔhyɛɛ wɔn sɛ wɔne no mmɛtra ne fie saa anadwo no. Bere a Lot ne n’ahɔho yi reba pɛ na nnipadɔm no betwaa ofie no ho hyiae. Sodom kurow no mu ahohwibɔfo fi abofra so kosi ɔpanyin so pɛe sɛ wɔde ahɔho no hyɛ wɔn nsa. Dɛn ntia? Wɔpɛ sɛ wɔto wɔn mmonnaa.

Yiw, Sodom yɛ kurow a wɔbɛto ɔhɔho biara a ɔbɛba hɔ no mmonnaa. Kurow no mufo no mmu hokwan a obi wɔ na nea wɔpɛ ara ne sɛ wobedi wɔn akɔnnɔ horow no ho dwuma. Nnipa a atwa wɔn ho ahyia no haw yeyi wɔ obu a wonni mma ɔdesani yi ho. Eyi ma wɔkasa tiaa sodom ne Gomora kɛse. Bible no kae sɛ “asase nyinaa Temmufo,” Yehowa Nyankopɔn ammu n’ani angu nea ɛrekɔ so no so.​—Gen. 18:20, 21, 25.

Ahɔho baanu a na wɔaba Sodom no nyɛ nea wɔabehyia hɔ mpofirim ara kwa. Sɛnea Bible kyerɛwtohɔ kyerɛ no, wɔyɛ ɔsoro abɔfo a wɔasoma wɔn sɛ wɔmmɛbɔ Lot ne n’abusua kɔkɔ na womfi kurow no mu ansa na wɔasɛe no. Lot ne ne mmabea baanu no guanee, nanso ne yere wui esiane sɛ wantie abɔfo no kɔkɔbɔ a ɛfa guan a ɛsɛ sɛ woguan no ho no.​—Gen. 19:1-26.

Bible mu asɛm no ne fam tutu ho adanse a ada adi no hyia. Nea Kyerɛwnsɛm no kyerɛ fa beae a Lot wɔ wɔ Sodom no kyerɛ beae a na “nsu pa sen hɔ kɔ Po a Awu no mu na ɛma po mu adwuma kɔ so yiye wɔ hɔ.” (Encyclopaedia Britannica) Bible no se: “‘Ne nyinaa so wɔ nsu,​—ansa na Yehowa sɛee Sodom ne Gomora no.”​—Gen. 13:10.

Afei nso, Amonfo ne Moabfo a wɔyɛ Lot mmabea no asefo no traa asase a ɛbɛn Po a Awu no ho no so. Na famtutu nso di eyi ho adanse. Enti, ɛnyɛ anansesɛm bi ho dwuma na yɛredi no, na mmom biribi a esii ankasa wɔ abakɔsɛm mu.

Nea Ɛyɛ Asuade Ma Yɛn Wɔ Mu

Asuade ahorow a ɛho hia wɔ saa abakɔsɛm yi mu ma yɛn. Bɛyɛ sɛ mfirihyia 2,000 wɔ bere a saa kurow a wonyaa dimmɔne yi asɛe akyi no, Kristoni osuani Yuda kyerɛwee sɛ: “Sɛ Sodom ne Gomora ne nkurow a ɛdeda ho a wɔyɛe sɛ eyinom, de wɔn ho maa aguamammɔ na wokodii ɔhonam foforo akyi no, anya akatua deda hɔ sɛ daa ogya ho sɛnnahɔ.”​—Yuda 7.

Onyankopɔn a ɔde ɔsɛe baa Sodom ne Gomora so no nsakraa ne gyinapɛn ahorow. Ɔpae mu ka wɔ n’Asɛm no mu sɛ: “Na me, Yehowa, mensakrae.” (Mal. 3:6) Enti n’abufuw da wɔn a wɔbɔ ahohwi na wodi nneɛma bɔne a wɔyɛɛ wɔ Sodom no akyi no so.

Atesɛm nkrataa ne amanneɛbɔ ahorow ka a akyinnye biara nni ho sɛ yɛn bere yi ne bere a ɛnyɛ sɛ nneɛma horow a wɔyɛɛ wɔ Sodom no nso rekɔ so wɔ ɔkwan a ɛdɔɔso so na mmom wɔrepene so kɛse. Eyi nso betumi ayɛ kɔkɔbɔ a yebesua ade afi mu. Sodomfo yɛ ahantan, wɔwɔ ade na wɔte nka sɛ asiane biara nni hɔ sɛ da bi wobebu wɔn ho akontaa. Wonni mmɔborohunu biara, wɔnkyerɛ obu mma ohiani ne nea n’ade ayɛ mmɔbɔ. (Hes. 16:49, 50) So eyi nte sɛ nnipa a nnɛ wɔn nso ahohwibra na wɔde tra ase no?

Lot asewnom buu ɔsɛe a ɛreba Sodom so no sɛ ɛyɛ fɛwdi. (Gen. 19:14) Nanso na ɛnyɛ fɛwdi bere a wɔn ankasa sɛee wɔ saa ogya no mu no.

Ɔsorosoroni no rempene nsɛmmɔnedi so nkosi daa. Ɔde bere bi asi hɔ a ɔde bebu amanaman nyinaa atɛn. (Aso. 17:31) Saa atemmu da yi rebɛn wɔ ɔkwan a ɛyɛ hu so. Sɛnea ɛho behiae sɛ Lot ne ne mmabea no guan fi Sodom no, saa ara nso na wɔn a wɔpɛ sɛ woguan ɔsɛe a ɛreba nhyehyɛe bɔne a ennim Onyankopɔn yi so no nso sua Onyankopɔn nhyehyɛe ma nkwagye anaasɛ ogye no ho asɛm.​—Luka 17:28-32.

Saa nhyehyɛe yi wɔ Kyerɛwnsɛm no mu na emu da hɔ ma obiara, a abrabɔ tebea a ɛwɔ hɔ mprempren no mfa ho, sɛ wɔpɛ sɛ wɔtra ase ma ɛne Yehowa akwan hyia de a. Yehowa Adansefo a wɔwɔ beae a wowɔ no ani begye ho sɛ wɔne wo bɛkyɛ amanneɛbɔ a ɛho hia yi. Yɛto nsa frɛ wo sɛ fa wo ho ma na nya ofie Bible adesua a wonnye obi sika wɔ mu no mu kyɛfa kwa wɔ wo fie.

[Box on page 23]

“Ɛnyɛ apɔnkɔ ahoɔden na ɛyɛ no fɛ, na ɛnyɛ ommirikatufo anan nso; na mmom n’ani gye wɔn a wosuro no no ho.”​—Dw. 147:10, 11. The New English Bible.