“Ɔkwan No, Ne Nokware No, Ne Nkwa No”

1, 2. Ɛkaa yɛn nko ara a, anka yɛrentumi nhu Yehowa na yɛne no mfa adamfo. Adɛn ntia? Dɛn na Yesu Kristo ayɛ de aboa yɛn wɔ wei mu?

WOAYERA pɛn? Ebia wobɛkae bere bi a na worekɔsra w’adamfo anaa wo busuani bi a woyeraa kwan. Wugyinaa wɔ kwan so bisaa obi ma ɔkyerɛɛ wo baabi a wofa a ɛde wo bɛkɔ baabi a worekɔ no anaa? Fa no sɛ onii no amfa ne nsa ankyerɛ wo hɔ kɛkɛ, na mmom ofi ayamye mu ka kyerɛɛ wo sɛ: “Di m’akyi ma menkɔkyerɛ wo hɔ.” Akyinnye biara nni ho sɛ anka w’ani begye paa!

² Wɔ ɔkwan bi so no, saa ara na Yesu Kristo kyerɛ yɛn kwan. Sɛ wɔgyaa yɛn nkutoo a, anka yɛrentumi nkɔ Onyankopɔn nkyɛn. Esiane bɔne ne sintɔ a yenya fii awo mu nti, adasamma nyinaa ayera, na “wɔatwe wɔn ho afi nkwa a Onyankopɔn de ma no ho.” (Efesofo 4:17, 18) Yehia mmoa na ama yɛahu ɔkwan a ɛsɛ sɛ yɛfa so. Yesu a yɛhwɛ no sua no no, ne yam ye. Enti ɛnyɛ afotu ne akwankyerɛ nko ara na ɔde ma yɛn, na mmom ɔyɛ nneɛma afoforo nso ka ho. Sɛnea yehui wɔ Ti 1 no, Yesu to nsa frɛ yɛn sɛ: “Bra bedi m’akyi.” (Marko 10:21) Nanso wanka no traa kɛkɛ. Mmom ɔkyerɛɛ nea enti a ɛsɛ sɛ yegye ne frɛ no so. Bere bi Yesu kaa sɛ: “Mene ɔkwan no, ne nokware no, ne nkwa no. Obiara mma Agya no nkyɛn, gye sɛ ɔnam me so.” (Yohane 14:6) Enti momma yɛnhwɛ nea enti a yɛrentumi mfa obi foforo biara so nkɔ Agya no nkyɛn, gye Ɔba no nko ara no. Afei yebegyina ɛno so na yɛahwɛ nea enti a Yesu yɛ “ɔkwan no, ne nokware no, ne nkwa no.”

 3. Dɛn nti na Yesu so na ɛsɛ sɛ yɛfa kɔ Onyankopɔn nkyɛn?

³ Nea edi kan koraa no, sɛ yebetumi akɔ Onyankopɔn nkyɛn a, gye sɛ yɛfa Yesu so, efisɛ Yehowa apaw ne Ba no de adwuma a ɛho hia sen biara ahyɛ ne nsa.a Agya no de Yesu ayɛ onipa titiriw a wɔnam ne so bɛma Onyankopɔn atirimpɔw nyinaa aba mu. (2 Korintofo 1:20; Kolosefo 1:18-20) Sɛ yebetumi ate dwuma titiriw a Ɔba no di ase a, ɛsɛ sɛ yesusuw nea esii bere a awarefo a wɔdi kan no kɔkaa Satan ho ma wɔtew Yehowa so atua wɔ Eden turom no ho.—Genesis 2:16, 17; 3:1-6.

 4. Atua a wɔtew wɔ Eden no, asɛm bɛn na ɛkɔfa bae, na gyinae bɛn na Yehowa sii na ama wɔatumi abua saa asɛm no?

⁴ Atua a wɔtew wɔ Eden no kɔfaa asɛm bi a ɛfa Onyankopɔn abɔde nyinaa ho bae. Ɛne sɛ: Enti ɛyɛ ampa sɛ Yehowa yɛ kronkron, ɔyɛ ɔtreneeni, na nea ɔyɛ biara kyerɛ sɛ ɔwɔ ɔdɔ anaa? Nea ɛbɛyɛ na yɛanya asɛm a ɛho hia yi ho mmuae no, Yehowa sii gyinae sɛ, ɔbɛma ne ba a ɔyɛ honhom a sintɔ biara nni ne ho aba asaase so. Ná adwuma a ne ba no bɛba abɛyɛ no nna fam koraa, efisɛ na ɔde ne nkwa bɛma de atew n’Agya din ho, na ɔde ayɛ agyede nso de agye adasamma. Sɛ ɔba a wɔapaw no yi di nokware kosi owu mu a, ɛbɛma wɔatumi asiesie ɔhaw a Satan atuatew no akɔfa aba no nyinaa. (Hebrifo 2:14, 15; 1 Yohane 3:8) Nanso, Yehowa wɔ honhom mu mma ɔpepepem pii. (Daniel 7:9, 10) Wɔn mu hena na ɔpaw no sɛ ɔmmɛyɛ adwuma a ɛho hia paa yi? Yehowa paw ne “Ba a ɔwoo no koro,” onii a akyiri yi wɔbɛfrɛɛ no Yesu Kristo no.—Yohane 3:16.

5, 6. Dɛn na Yehowa yɛ de kyerɛe sɛ ɔwɔ ne Ba no mu ahotoso, na saa ahotoso no gyina dɛn so?

⁵ Ɛsɛ sɛ yɛma ɛyɛ yɛn nwanwa sɛ Yehowa paw Yesu anaa? Daabida! Ná Agya no wɔ ne Ba a ɔwoo no koro no mu ahotoso a edi mu paa. Mfe pii ansa na Ɔba no reba asaase so no, Yehowa ka too hɔ sɛ, amanehunu a ne Ba no bɛfa mu nyinaa akyi no, obedi no nokware. (Yesaia 53:3-7, 10-12; Asomafo Nnwuma 8:32-35) Dɛn na ɛno ma yehu? Sɛnea abɔfo ne nnipa tumi paw nea wɔpɛ no, saa ara na na Ɔba no nso wɔ hokwan sɛ ɔpaw nea ɔpɛ. Nanso, na Yehowa wɔ ne Ba no mu ahotoso araa ma ɔhyɛɛ nkɔm too hɔ sɛ ne Ba no bedi no nokware mpo. Saa ahotoso yi, dɛn so na na egyina? Sɛ yɛbɛka no tiawa a, na egyina nimdeɛ so. Yehowa nim ne Ba no yiye paa, na ɔpɛ a ne Ba no wɔ sɛ ɔbɛyɛ nea ɛsɔ N’Agya ani no nso, na onim paa. (Yohane 8:29; 14:31) Ɔba no dɔ Agya no, na Yehowa nso dɔ Ne Ba no. (Yohane 3:35) Ɔdɔ a ɛwɔ Agya no ne Ɔba no ntam no ama ayɔnkofa a emu yɛ den paa abɛda wɔn ntam, na obiara di ne yɔnko nokware.—Kolosefo 3:14.

⁶ Esiane dwuma titiriw a Ɔba no di, ahotoso a Agya no wɔ wɔ ne mu, ne ɔdɔ a ɛka Agya no ne Ɔba no bom nti, ɛnyɛ nwanwa koraa sɛ Yesu nko ara so na yetumi fa kɔ Onyankopɔn nkyɛn. Nokwarem no, biribi foforo nso wɔ hɔ a enti Ɔba no nko ara na obetumi de yɛn akɔ Agya no nkyɛn.

7, 8. Yesu kaa nokwasɛm bi sɛ, obiara nnim Agya no yiye, “gye Ɔba no.” Adɛn nti na otumi kaa saa?

⁷ Sɛ yebetumi ne Yehowa afa adamfo a, ehia sɛ yɛyɛ nneɛma bi ansa. (Dwom 15:1-5) Yesu a ɔyɛ Ɔba no nko ara na onim nea ɛsɛ sɛ yɛyɛ na ama yɛadi Onyankopɔn akwankyerɛ so ama wagye yɛn atom. Enti ɔkaa sɛ: “M’Agya de nneɛma nyinaa ahyɛ me nsa, na obiara nnim Ɔba no yiye gye Agya no, na saa ara nso na obiara nnim Agya no yiye gye Ɔba no, ne nea Ɔba no pɛ sɛ ɔda Agya no adi kyerɛ no no.” (Mateo 11:27) Bere a Yesu kaa sɛ obiara nnim Agya no yiye “gye Ɔba no,” na ɛnyɛ sɛ ɔrehaahaa n’ani aka asɛm. Nokwasɛm na ɔkae no. Enti momma yɛnhwɛ nea ɛma otumi kaa saa.

⁸ Esiane sɛ Ɔba no yɛ “abɔde nyinaa mu abakan” nti, ɔne Yehowa wɔ ayɔnkofa soronko. (Kolosefo 1:15) Ayɔnkofa a ɛbɛdaa Agya no, ne Ɔba no ntam no, twa ho mfoni hwɛ: Wɔn mmienu nko ara de mfe pii a yennim ano boom yɛɛ adwuma. Wɔboom yɛɛ adwuma fii adebɔ mfiase kosii sɛ Yehowa bɔɔ abɔfo afoforo. (Yohane 1:3; Kolosefo 1:16, 17) Afei dwen hokwan soronko a Ɔba no nyae bere a na ɔwɔ Agya no nkyɛn no ho hwɛ. Onyaa hokwan huu Agya no apɛde, ne mmara, n’akwan, ne sɛnea osusuw nneɛma ho, na osuaa ne nyinaa. Enti sɛ Bible ka sɛ Yesu nim n’Agya no sen obiara a, ɛmmoa. Ayɔnkofa a emu yɛ den sei a Yesu ne n’Agya wɔ no nti, otumi maa nnipa huu sɛnea n’Agya no te sen sɛnea anka obi foforo biara betumi ayɛ.

9, 10. (a) Akwan bɛn so na Yesu ma yehuu n’Agya no? (b) Sɛ Yehowa begye yɛn atom a, dɛn na ɛsɛ sɛ yɛyɛ?

⁹ Sɛ wohwɛ Yesu nkyerɛkyerɛ a, wutumi hu sɛ na onim Yehowa yiye. Ná ne nkyerɛkyerɛ no ma yehu sɛnea Yehowa susuw nneɛma ho, sɛnea ɔte nka, ne nea ɔhwehwɛ sɛ n’asomfo yɛ.b Nanso ɛnyɛ ɛno nko ara. Ɔkwan foforo a ɛho hia paa wɔ hɔ a Yesu nam ɛno nso so maa nkurɔfo huu n’Agya. Ɔkaa sɛ: “Obiara a wahu me no ahu Agya no nso.” (Yohane 14:9) Osuasuaa n’Agya no pɛpɛɛpɛ wɔ biribiara a ɔkae ne nea ɔyɛe mu. Enti sɛ yɛkenkan Bible na yehu nsɛm a ɛyɛ dɛ na ɛka koma a Yesu de dii dwuma wɔ ne nkyerɛkyerɛ mu, ayamhyehye a ɛkaa no ma ɔsaa nkurɔfo yare, ne tema a na ɔwɔ ma nnipa a ɛno nti ɛma osui no a, yebetumi atwa mfoni wɔ yɛn adwene mu sɛ Yehowa na ɔreka saa nsɛm no na ɔreyɛ saa nneɛma no. (Mateo 7:28, 29; Marko 1:40-42; Yohane 11:32-36) Nsɛm a Ɔba no kae ne nea ɔyɛe no ma yehu nea Agya no pɛ, ne sɛnea ɔte ankasa. (Yohane 5:19; 8:28; 12:49, 50) Enti, sɛ Yehowa begye yɛn atom a, ehia sɛ yɛde Yesu nkyerɛkyerɛ yɛ adwuma, na yedi ne nhwɛso akyi.—Yohane 14:23.

¹⁰ Esiane sɛ Yesu nim Yehowa yiye, na ɔhwɛ no sua no pɛpɛɛpɛ nti, ɛnyɛ nwanwa sɛ Yehowa apaw Ɔba no sɛ ne so na yɛmfa nkɔ Agya no nkyɛn. Seesei, yɛate nea enti a Yesu nko ara so na yebetumi afa akɔ Yehowa nkyɛn no ase, enti afei momma yensusuw nea Yesu kae yi ho: “Mene ɔkwan no, ne nokware no, ne nkwa no. Obiara mma Agya no nkyɛn, gye sɛ ɔnam me so.”—Yohane 14:6.

11. (a) Sɛ yɛpɛ sɛ yɛne Onyankopɔn ntam yɛ papa a, gye sɛ yɛfa Yesu nko ara so. Adɛn ntia? (b) Dibea soronko a Yesu wɔ no, ɔkwan bɛn so na nsɛm a ɛwɔ Yohane 14:6 no si so dua? (Hwɛ ase hɔ asɛm no.)

¹¹ Yɛadi kan ahu sɛ, yɛrentumi nkɔ Onyankopɔn nkyɛn gye sɛ yɛnam Yesu so. Susuw nea asɛm yi kyerɛ ma yɛn no ho yiye. Yesu ne “ɔkwan no,” a nea ɛkyerɛ ne sɛ, ɔno nko ara na yebetumi afa ne so ne Onyankopɔn ntam ayɛ papa. Adɛn nti na ɛte saa? Yesu dii nokware kosii owu mu, na ɔde ne nkwa mae sɛ agyede afɔre. (Mateo 20:28) Sɛ ɛnyɛ agyede yi a, anka yɛrentumi nkɔ Onyankopɔn anim. Bɔne ma nnipa ne Onyankopɔn ntam tetew, efisɛ Yehowa yɛ kronkron na ɔrentumi mpene bɔne so da. (Yesaia 6:3; 59:2) Nanso, Yesu afɔre no siesiee adasamma ne Onyankopɔn ntam, na ɛpata maa yɛn bɔne. (Hebrifo 10:12; 1 Yohane 1:7) Sɛ yegye nhyehyɛe a Onyankopɔn nam Kristo so yɛe no tom, na yenya mu gyidi a, yebetumi anya Yehowa anim dom. Ɛno nko ara ne ɔkwan a wɔbetumi afa so “asiesie yɛne Onyankopɔn ntam.”c—Romafo 5:6-11.

12. Adɛn nti na yebetumi aka sɛ Yesu ne “ɔkwan no”?

¹² Yɛn mpaebɔ mu nso, Yesu ne “ɔkwan no.” Yesu nkutoo so na yebetumi afa akɔ Yehowa anim, na yɛanya awerɛhyem sɛ, sɛ yefi yɛn koma mu bɔ mpae a, Onyankopɔn betie yɛn. (1 Yohane 5:13, 14) Yesu ankasa kaa sɛ: “Biribiara a mubebisa Agya no, ɔde bɛma mo wɔ me din mu. . . . Mummisa, na mo nsa bɛka, na mo anigye adi mu.” (Yohane 16:23, 24) Enti yebetumi abɔ Yehowa mpae wɔ Yesu din mu, na yɛafrɛ Onyankopɔn sɛ “yɛn Agya” ama no ayɛ yiye. (Mateo 6:9) Ade foforo nti a Yesu ne “ɔkwan no” ne sɛ, ɔyɛɛ nhwɛso maa yɛn. Sɛnea yɛahu dedaw no, Yesu suasuaa n’Agya pɛpɛɛpɛ wɔ biribiara mu. Enti nhwɛso a Yesu yɛe no ma yehu sɛnea ɛsɛ sɛ yɛbɔ yɛn bra na ama yɛasɔ Yehowa ani. Wei nti, sɛ yebetumi akɔ Yehowa anim a, ɛsɛ sɛ yedi Yesu anammɔn akyi.—1 Petro 2:21.

13, 14. (a) Dɛn na ɛma yehu sɛ na Yesu ka nokware? (b) Dɛn na na ɛsɛ sɛ Yesu yɛ na ama edin “nokware no” afata no? Adɛn nti na na ɛsɛ sɛ ɔyɛ saa?

¹³ Yesu kaa n’Agya nkɔmhyɛ ahorow ho nokwasɛm kyerɛɛ nkurɔfo bere nyinaa. (Yohane 8:40, 45, 46) Wɔanhu nnaadaasɛm biara wɔ Yesu anom da. (1 Petro 2:22) Nnipa a na wɔsɔre tia no no mpo gye toom sɛ nea ɔkyerɛkyerɛ “fa Onyankopɔn ho no yɛ nokware.” (Marko 12:13, 14) Nanso bere a Yesu kaa sɛ “Mene . . . nokware no,” na ɛnyɛ ne kasa, n’asɛnka, ne nokwasɛm a ɔde kyerɛkyerɛ no nko ara ho asɛm na ɔreka. Mmom, na ɛkɔ akyiri sen saa.

¹⁴ Kae sɛ mfe pii ansa na Yesu reba asaase so no, Yehowa de ne honhom kaa nnipa a wɔkyerɛw Bible no ma wɔhyɛɛ nkɔm pii faa Mesia, anaa Kristo no ho. Saa nkɔmhyɛ ahorow yi kaa n’asetena, ne som adwuma, ne ne wu ho asɛm kɔɔ akyiri. Bio nso, na nkɔmhyɛ ahorow bi wɔ Mose Mmara no mu a, Mesia no na ɔbɛma aba mu. (Hebrifo 10:1) Nanso asɛm no ne sɛ, na Yesu bedi nokware akosi owu mu na ama nkɔm a wɔhyɛ faa ne ho no nyinaa aba mu anaa? Sɛ wantumi anni nokware a, na ɛbɛkyerɛ sɛ Yehowa hyɛ nkɔm a, ɛmma mu. Ɛno nti, na asɛde kɛse abɛtɔ Yesu so. Sɛnea Yesu bɔɔ ne bra, kyerɛ sɛ, nsɛm a ɔkae ne nneɛma a ɔyɛe nyinaa ma ɛdaa adi sɛ, Bible nkɔmhyɛ a ɛfa ne ho no nyinaa yɛ nokware. (2 Korintofo 1:20) Ɛno nti, na akyinnye biara nni ho sɛ Yesu ne “nokware no,” efisɛ nea ɔyɛɛ wɔ asaase so nyinaa maa Yehowa nkɔmhyɛ baa mu.—Yohane 1:17; Kolosefo 2:16, 17.

15. Gyidi a yebenya wɔ Ɔba no mu no kyerɛ sɛn, na sɛ yenya saa gyidi no a, dɛn na ɛbɛma yɛanya?

¹⁵ Yesu ne “nkwa no,” efisɛ ɔno nko ara na yebetumi afa ne so anya “nkwa ankasa” no, kyerɛ sɛ, daa nkwa. (1 Timoteo 6:19) Bible ka sɛ: “Nea ogye Ɔba no di no wɔ daa nkwa; nea ontie Ɔba no rennya nkwa, na Onyankopɔn abufuhyew remfi no so da.” (Yohane 3:36) Dɛn na gyidi a yebenya wɔ Onyankopɔn Ba no mu kyerɛ? Ɛkyerɛ sɛ, yɛwɔ ahotoso paa sɛ Ɔba no nko ara na yɛnam ne so benya nkwa. Bio nso, nea ɛkyerɛ ne sɛ yɛde nnwuma bɛda yɛn gyidi adi, na yɛakɔ so atie Yesu, na yɛayɛ nea yebetumi biara adi ne nkyerɛkyerɛ ne ne nhwɛso akyi. (Yakobo 2:26) Enti, Onyankopɔn Ba no mu gyidi a yebenya no bɛma yɛanya daa nkwa. Kristofo a wɔde honhom asra wɔn a wɔyɛ “nguankuw ketewa” no, wɔbɛtena soro sɛ honhom abɔde, na wɔbenya daa nkwa a owu nnim. “Nnipakuw kɛse bi” a wɔyɛ “nguan foforo” no nso bedi mu a sintɔ biara nni wɔn ho, na wɔbɛtena ase daa wɔ paradise asaase so.—Luka 12:32; 23:43; Adiyisɛm 7:9-17; Yohane 10:16.

16, 17. (a) Ɔkwan bɛn so na Yesu betumi ayɛ “nkwa” ama wɔn a wɔawuwu no mpo? (b) Ahotoso bɛn na yebetumi anya?

¹⁶ Na wɔn a wɔawuwu dedaw no nso ɛ? Wɔn nso, asɛm a ɛne sɛ Yesu ne “nkwa no” fa wɔn ho. Bere tiaa bi ansa na Yesu renyan n’adamfo Lasaro afi owu mu no, Yesu ka kyerɛ Lasaro nuabea Marta sɛ: “Mene owusɔre ne nkwa. Nea ogye me di no, sɛ owu mpo a, ɔbɛba nkwa mu.” (Yohane 11:25) Yehowa de “owu ne Ɔdamoa” nsafoa ama ne Ba no, na wama no tumi a ɔde benyan awufo. (Adiyisɛm 1:17, 18) Yesu a wɔahyɛ no anuonyam no de saa nsafoa no bebue adasamma nyinaa damoa apon, na wayi wɔn a wɔwɔ hɔ nyinaa.—Yohane 5:28, 29.

¹⁷ “Mene ɔkwan no, ne nokware no, ne nkwa no.” Yesu nam asɛm tiawa a ɔkae yi so ma yehu nea enti a ɔbaa asaase so bɛyɛɛ ne som adwuma no. Asɛm yi kyerɛ nneɛma pii ma yɛn nnɛ. Kae sɛ Yesu san ka toaa so sɛ: “Obiara mma Agya no nkyɛn, gye sɛ ɔnam me so.” (Yohane 14:6) Yesu asɛm yi da so ara yɛ adwuma nnɛ. Enti yebetumi anya ahotoso kɛse sɛ, sɛ yedi Yesu akyi a, yɛrenyera da. Ɔno nkutoo na obetumi akyerɛ yɛn kwan akɔ “Agya no nkyɛn.”

18. Dɛn na Yesu akyidifo ankasa a yɛbɛyɛ no hwehwɛ sɛ yɛyɛ?

¹⁸ Esiane dwuma titiriw a Yesu di ne sɛnea onim Agya no yiye nti, ɛfata paa sɛ yedi Ɔba no akyi. Sɛnea yehui wɔ ti a edi kan no mu no, yɛn nneyɛe na yɛde kyerɛ sɛ yɛyɛ Yesu akyidifo ankasa, na ɛnyɛ yɛn anom nsɛm anaa sɛnea yɛte nka. Kristo a yebedi n’akyi no hwehwɛ sɛ yɛde ne nkyerɛkyerɛ bɔ yɛn bra na yesuasua ne nhwɛso. (Yohane 13:15) Nhoma a worekenkan seesei yi betumi aboa wo ama woayɛ saa.

19, 20. Dɛn na ɛwɔ nhoma yi mu a ebetumi aboa wo ama woadi Kristo akyi?

¹⁹ Eti ahorow a edidi so no mu no, yebesusuw Yesu asetena ne ne som adwuma ho akɔ akyiri. Wɔakyekyɛ ti ahorow yi mu ayɛ no afã mmiɛnsa. Ɔfã a edi kan no mu no, yebesusuw Yesu suban ahorow ho, na yɛahwɛ sɛnea ɔyɛɛ n’ade. Ɔfã a ɛtɔ so mmienu no mu no, yɛbɛhwɛ nsi ne ahokeka a ɔde yɛɛ asɛnka ne ɔkyerɛkyerɛ adwuma no. Ɔfã a etwa to no nso bɛma yɛahu akwan a Yesu faa so kyerɛɛ ne dɔ. Efi Ti 3 rekɔ no, wubehu adaka bi a yɛato din, “Wobɛyɛ Dɛn Adi Yesu Akyi?” wɔ ti biara mu. Wɔayɛ kyerɛwnsɛm ne nsɛmmisa a ɛwɔ adaka no mu no wɔ ɔkwan bi so a ɛbɛboa yɛn ama yɛadwinnwen sɛnea yebetumi asuasua Yesu kasa ne ne nneyɛe ho.

²⁰ Yehowa Nyankopɔn adaworoma, enhia sɛ woyera anaasɛ wode wo ti pempem, anaa woma bɔne a wɔde awo wo no twe wo fi ne ho. Mmom, wubetumi ne ne ntam ayɛ kama. Yehowa hweree ade kɛse paa bere a ɔsomaa ne Ba no baa asaase so, sɛnea ɛbɛyɛ a yebetumi ne ne ntam ayɛ kama. (1 Yohane 4:9, 10) Ma ɔdɔ kɛse a Onyankopɔn ada no adi yi mpusuw wo na gye nsa a Yesu reto afrɛ wo yi so. Ɔse: “Bedi m’akyi.”—Yohane 1:43.