Ɛrenkyɛ​—Wiase A Ɛyaw Nnim Bɛba!

WIASE a ɛyaw nnim bɛba nnansa yi ara? Asɛmpa bɛn ara na ɛno bɛyɛ ama wɔn a wɔahu amane akyɛ​—sɛ wɔn yaw no yɛ nipadua, adwene, anaa nkate mu de no​—sɛɛ yi! Sɛ nhwɛso no, ɔpepem pii ani begye mmoroso sɛ wobeyi nipadua mu yaw a emu yɛ den a akisikuru ahorow, ntini mu a etutuw yayaw, ne komayare a wɔfrɛ no angina pectoris no de ba no afi hɔ. Wɔn a wɔwɔ adwenemhaw a emu yɛ den no ani begye ho sɛ wobenya ahotɔ afi amanehunu kɛse a ɛtaa ba wɔn so no mu. Na sɛ nkate mu yaw a esiane ehu, awerɛhow, asodi, ɔhaw, ne adwenem basaayɛ nti ɛka ɔpepem pii no bɛba awiei a, anka wobedi ahurusi. Nanso so yɛpɛ ankasa sɛ yebehu ɛyaw nyinaa awiei?

Nipadua akwaa ho ɔdenimfo Allan Basbaum a ɔwɔ California Sukuupɔn a ɛwɔ San Francisco mu no kyerɛ sɛ: “Sɛ wonte ɛyaw biara koraa a, ɛyɛ asiane.” Ntease pa nti na ɔkaa saa asɛm no. Sɛ kɔkɔbɔ ade bi no, nipadua mu yaw ma yehu sɛ biribi a ɛsɛe ade rekɔ so.

Nipadua mu yaw a obi nte no betumi ayɛ asiane ankasa. Wɔyɛ eyi ho mfatoho wɔ Time nsɛmma nhoma no mu amanneɛbɔ bi mu: “Abarimaa a wadi mfe dumien no ano a ɔserew fɛfɛ no yɛ nea ɛbɔ sɛnea ne honam te no abira koraa. Ne nsa ne n’anan nyinaa adidi dɛm na akyeakyea, te sɛ nea ɔyɛ bafan. Ne nsateaa pii atwitwa. Kuru kɛse bi wɔ ne kotodwe biako anim, na n’anofafa a ɔde reserew no ayɛ kuru. Ɔte sɛ abofra a wɔaboro no . . . Wɔwoo no no, na ɔwɔ awo mu dɛm bi a ɛmma ɔnte yaw nka. Ne nsateaa pɛtɛwee anaasɛ ɛhyewee efisɛ wannyi ne nsa amfi nneɛma a na ɛyɛ hyew anaasɛ ebetumi apira no ho. Ne nnompe ne n’apɔw so akyinkyim efisɛ ɔnantew anaasɛ otu mmirika a, ɔde ne nan pem hɔ kɛse dodo. Nneɛma a ano yɛ nnam a ɔweawea faa so a wante nka biara no ama ne nkotodwe anim ayeyɛ akuru a enwu da. Sɛ ne dompe bi mu bu anaasɛ ne sisi mu huan a, ɔnte nka kɛse biara a ɛbɛma wateɛm ahwehwɛ mmoa.”

Nnipa binom de ntɛmpɛ ka sɛ Onyankopɔn na ɔde ɛyaw ne amanehunu a ɔpepem pii hyia no ba. Nanso, so yebetumi anunu Onyankopɔn ma afata wɔ adesamma amanehunu a ɛyɛ yaw no ho?

So Ɛsɛ sɛ Wonunu Onyankopɔn?

Bɛyɛ mfirihyia 6,000 ni no, adesamma ate nipadua, adwene, ne nkate mu yaw. Nokwarem no, bɛyɛ mfeha 19 ni no, Kristoni ɔsomafo Paulo kae ɔkwan a ɛteɛ so sɛ: “Abɔde nyinaa penepene a ɛko awo bedu nnɛ.” (Romafo 8:22) Nnuru a wɔde dwudwo ɛyaw ano a wɔtɔn wɔ nnutɔnbea ne nnuruyɛfo ne adwene ho animdefo mmɔdenbɔ nyinaa akyi no, ɛyaw ahorow nyinaa bi da so ara wɔ hɔ. Ɛdɛn, ebinom adome Onyankopɔn esiane amanehunu a wohyia nti, sɛnea ɔbarima Hiob yere hyɛɛ no sɛ ɔnyɛ mfehaha pii a atwam ni no! Nanso, sɛnea Hiob ankasa hui no, honhom a ɛte saa no yɛ agyimisɛm na ɛmfata.​—Hiob 2:9, 10.

Wɔrentumi nnunu Onyankopɔn mma ɛmfata wɔ ɛyaw a adesamma te nka mprempren no ho. Mmom no, asodi no da ɔtorofo bi a aniwa nhu no ne yɛn awofo a wodi kan no so. Ɔkwan bɛn so na ɛte saa?

Kyerɛwnsɛm no da no adi sɛ ɛwom sɛ na honhom abɔde bi yɛ ɔtreneeni mfiase no de, nanso n’ani bɛberee tumi ne kɛseyɛ. Nnipa asetra wɔ asase so mfiase no, ɔde n’ani buu adesamma abusua bi a wɔte paradise asase so, na wɔn nyinaa de ahofama koraa ma Ade Nyinaa so Tumfoɔ Nyankopɔn, Yehowa. Esiane sɛ koma a ɛyɛ bɔne kanyan honhom abɔde no nti, ɔtew atua tiaa Ɔbɔadeɛ no, na ɔpɛe sɛ onya adesamma ɔsom ne ahofama ma ne ho. N’adwemmɔne no daa adi bere a ɔde anifere dii atoro no. Eyi nso de bɔne baa wiase.

Yehowa Nyankopɔn ka kyerɛɛ onipa a odi kan, Adam, sɛ, sɛ odi papa ne bɔne hu dua no aba no bi a, owu na ebefi mu aba. (Genesis 2:15-17) Nanso wɔdaadaa Adam yere Hawa ma ɔyɛɛ asoɔden. Ɔdaadaafo a ɔyɛ honhom no de ɔwɔ redi dwuma sɛ ne kasamafo no, ɔka kyerɛɛ no sɛ:. “Ɛnyɛ owu na mubewu: na Onyankopɔn nim sɛ da a mubedi bi no, mo [Hawa ne ne kunu] ani bebue, na moayɛ sɛ Onyankopɔn ahu papa ne bɔne.” (Genesis 3:1-5) Atoro a edi kan nen, na ɛmaa honhom abɔde bɔne yi nyaa edin sɛ ‘atoro agya.’ (Yohane 8:44) Dwuma a ɔde ɔwɔ no dii saa da no wɔ Eden turom hɔ no ne sɛnea wɔda no adi wɔ Kyerɛwnsɛm mu sɛ “ɔwɔ dedaw no a wɔfrɛ ɔbonsam ne Satan” no hyia.​—Adiyisɛm 12:9.

Bɔne de apenepene ne ɛyaw na ɛbaa adesamma so. Sɛnea Onyankopɔn asɛm kae ampa no, da a Adam yɛɛ bɔne no ara no, Onyankopɔn de owu afobu baa mmaratofo no so. Atemmu mu, wɔ Yehowa fam no, Adam ne Hawa wui saa da no. (Fa toto Luka 20:37, 38 ho.) Onyankopɔn ka kyerɛɛ ɔbea a saa bere no na wayɛ bɔne no wɔ Eden sɛ: “Ɔdɔ na mɛma wo yaw ne wo nyinsɛn mu brɛ adɔɔso. Ɛyaw mu na wɔbɛwo mma.” (Genesis 3:16) Na Adam bɛtra ase ɛyaw mu wɔ Eden turo no akyi wɔ asase a ɛmmɛn paradise ho hwee no so. Yehowa kae sɛ: “W’anim fifiri mu na wubedidi de akosi sɛ wobɛsan akɔ dɔte mu, efisɛ emu na woyii wo fii, na woyɛ dɔte, na dɔte mu na wobɛsan akɔ.” (Genesis 3:17-19) Saa kwan no so na adesamma abusua no ɛyaw fii ase.

Enti, ɛnde na ɛyaw ne sintɔ, bɔne, ne owu a yenya fii Adam hɔ no wɔ abusuabɔ. Sɛnea ɔsomafo Paulo ka no no: “Sɛnea ɛnam onipa biako so na bɔne baa wiase, na owu nam bɔne so bae no, saa na ɛyɛe na owu trɛw kaa nnipa nyinaa, efisɛ wɔn nyinaa ayɛ bɔne.” (Romafo 5:12) Nanso Onyankopɔn Asɛm no boa yɛn ma yegyina ɛyaw ano, efisɛ ɛka nea enti a Yehowa ama ho kwan no kyerɛ yɛn, na ɛma yɛn awerɛhyem sɛ ɛrenkyɛ ɛbɛba awiei. Onyankopɔn maa ‘atoro agya’ a ɔte sɛ ɔwɔ no kwan ma ɔde amanehunu baa ɔtreneeni Hiob so, na ɔnam saayɛ so sɔɔ ne mudi mu kura hwɛe. Ná nea Ɔbonsam kyerɛ ne sɛ pɛsɛmenkominya nti na Hiob som Onyankopɔn, na ɛnyɛ ɔdɔ nti. (Hiob 1:8-12) Nanso Hiob dii nokware maa Onyankopɔn, na ɔkyerɛe sɛ adesamma a wɔnyɛ pɛ betumi asom No ɔdɔ mu, na wɔde nokwaredi agyina N’amansan tumidi no akyi a wɔn gyidi ho sɔhwɛ a emu yɛ den mfa ho. Gyina a Hiob gyinae sɛ mudi mu kurafo no boa ma wɔtew Yehowa din ho, na ɛkyerɛe sɛ Satan yɛ ɔtorofo, na ɛmaa agya panyin a ɔyɛɛ nhwɛso pa no nyaa akatua pa pii. (Hiob 42:12-17; Yakobo 5:11) Yebetumi afi Hiob osuahu no mu de aba awiei sɛ, sɛ wodi Onyankopɔn atirimpɔw ho dwuma wie a, ɛyaw a ɛda adesamma so no bɛba awiei. Nanso yɛbɛyɛ dɛn agye ɛno adi?

Sɛnea Ɛyaw Bɛba Awiei

Nokwarem no, Yehowa de ɔkwan bi a etu mpɔn kɛse a wɔnam so de adesamma ɛyaw bɛba awiei ama. Ogyina ne Ba Yesu Kristo ogye afɔre no so na ayɛ eyi. Yesu ne “Onyankopɔn guammaa a oyi wiase bɔne kɔ no.” (Yohane 1:29) Wamma asase so “sɛ wɔnsom no, na ɔbɛsomee, na ɔde ne kra [ne desani nkwa a ɛyɛ pɛ no] ayɛ agyede ama nnipa pii.” (Mateo 20:28) Adam nam asoɔden so hweree ɔdesani nkwa a ɛyɛ pɛ, ne hokwan ne anidaso a na ɛka ho nyinaa. Na ɛno pɛpɛɛpɛ ne nea wɔnam Yesu ogye afɔre no so gye no. (1 Timoteo 2:5, 6; Hebrifo 7:26) Ampa ara, “sɛnea Onyankopɔn dɔ [adesamma] wiase ni, sɛ ɔde ne ba a ɔwoo koro no mae, na obiara a ogye no di no anyera, na wanya daa nkwa.”​—Yohane 3:16.

Onyankopɔn ahyɛ bɔ pɔtee nso sɛ ɛyaw bɛba awiei. Kristoni ɔsomafo Yohane reka bere a ɛyaw a efi bɔne mu bɛyɛ nea enni hɔ bio no asie no, wɔde honhom fi soro kaa no ma ɔkyerɛwee sɛ:

“Mihuu ɔsoro foforo ne asase foforo, na kan soro ne kan asase no atwam, na ɛpo nni hɔ bio. . . . Na metee nne kɛse bi fi ahengua no mu a ese: Hwɛ, Onyankopɔn ntamadan wɔ nnipa mu, na ɔbɛtra mu wɔ wɔn mu, na wɔayɛ ne man, na Onyankopɔn ankasa ne wɔn bɛtra. Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam. Na nea ɔte ahengua no so no [Yehowa Nyankopɔn] se: Hwɛ, meyɛ ade nyinaa foforo. Na ose: Kyerɛw, efisɛ nsɛm yi wom na ɛyɛ nokware.”​—Adiyisɛm 21:1-5.

Ɛrenkyɛ, adesamma asoɔmmerɛwfo benya Yesu ogye afɔre no mu mfaso horow akosi ase. Eyi bɛba wɔ Ahenni a wɔn a wɔteɛ no fi bere tenten abɔ ho mpae sɛɛ no nniso ase: “Yɛn agya a wowɔ ɔsoro, wo din ho ntew, w’ahenni mmra, nea wopɛ nyɛ asase so, sɛnea ɛyɛ ɔsoro.” (Mateo 6:9, 10) Ɔsoro Ahenni no mu no, Yesu bedi hene kosi sɛ ɔde atamfo nyinaa bɛhyɛ ne nan ase, a ɛyaw ne ɔtamfo a odi akyiri a ɔne owu no ka ho.​—1 Korintofo 15:25, 26.

Yiw, adesamma asoɔmmerɛwfo fam de, ɛrenkyɛ Onyankopɔn ‘bɛpopa wɔn aniwam nusu nyinaa, na owu nni hɔ bio, na awerɛhow ne osu ne ɛyaw bi nni hɔ bio.’ (Adiyisɛm 21:4) Afei nkɔmhyɛsɛm a edidi so a enya honhom mu mmamu nnɛ yi nso bɛba mu honam fam: “Me kra, hyira [Yehowa], . . . Ɔno na ɔde wo mfomso nyinaa firi wo, na ɔsa wo nyarewa nyinaa.” “Ɔmanfo no mu bi renka sɛ: Magurow!”​—Dwom 103:1-3; Yesaia 33:24.

Bere Bɛn na Ɛyaw Bɛba Awiei

Ɛyaw awiei bɛba ɔkwan biara so. Yiw, ɛbɛba yɛn bere yi so, na saa awo ntoatoaso yi ara behu. Bible nkɔmhyɛ mmamu kyerɛ sɛ yɛte nneɛma nhyehyɛe bɔne yi awiei. Akodi, ɔkɔm, ne asasewosow a ebi mmae da ne asɛmpa no nso a Yehowa Adansefo ka no wiase nyinaa no yɛ Yesu ‘mmae’ wɔ ɔsoro Ahenni anuonyam mu a aniwa nhu no ho “sɛnkyerɛnne” a ɛwom pii no fã.​—Mateo 24:3-14, 21, 34.

Ɛrenkyɛ, “kan soro ne kan asase,” Satan Ɔbonsam nneɛma nhyehyɛe a wɔde asi hɔ no ne ne nniso nhyehyɛe nyinaa betwam akɔ. Adesamma abɔnefo “ɛpo” bagyabagya no rentra hɔ bio. Enti yegyina “ɔsoro foforo” nniso a wofi soro ahyira so a ebedi “asase foforo,” adesamma abusua a ɛteɛ so no abobow ano. Eyinom na “trenee te mu.”​—Adiyisɛm 21:1; 2 Petro 3:13.

Bere a nhyira horow a ɛtete sɛɛ wɔ nniso foforo​—Onyankopɔn Ahenni​—ase no abɛn kɛse no, nya koma. Kɔ so hwehwɛ wiase foforo a ɛyaw ne owu nnim no ho nimdeɛ pii. Ampa ara, hwɛ nhyira da a abɛn kɛse a wɔn a wɔdɔ Yehowa Nyankopɔn na wotie no nyinaa bɛtra wiase a ɛyaw nnim mu no kwan.