Nna A Edi Akyiri​—Adanse Bɛn?

“Na wɔammɔ dɔn biara na obiara ansu a ɛmfa ho sɛ hena na wahwere no efisɛ ɛkame ayɛ sɛ na obiara rehwɛ owu kwan . . . Na nkurɔfo kae na wogye dii sɛ, ‘Eyi ne wiase awiei.’”​—Italiani abakɔsɛm kyerɛwfo bi a na ɔrekyerɛw sɛnea Owu Tuntum no kaa nkurɔfo wɔ afeha 14 mu no ho asɛm.

NNIPA anokwafo a na wɔwɔ awo ntoatoaso a abɛsen mu no dii mfomso susuwii sɛ na wɔte nna a edi akyiri no mu. Wɔ asɛm a ɛwɔ atifi hɔ a wɔafa aka no mu no, ɛyɛ ɔyaredɔm a nkura de ba no na wobuu no sɛ ɛyɛ wiase awiei ho sɛnkyerɛnne no. Ebinom bu ano sɛ ekunkum Europa nnipa dodow nkyem abiɛsa mu biako. Nanso awiei no amma. Ná bere nsoe sɛ Onyankopɔn de ne ho gye nsɛm mu.

Enti ɔkwan bɛn so na obi betumi agye adi sɛ Yehowa Adansefo de no teɛ sɛ wɔbɔ mprempren wiase nhyehyɛe yi awiei a ɛbɛba ne Onyankopɔn ahenni nniso no a wɔbɛtrɛw mu ma akata asase nyinaa so no ho dawuru no? Ɛdenam nea wɔka no a wɔbɛhwehwɛ mu na wɔde atoto Bible nkɔmhyɛ ahorow ho no so. Enti, dɛn ne nkɔmhyɛ pɔtee a ɛka nneɛma a ebesisi a ɛhyɛ nna a edi akyiri no agyirae ho asɛm no?

Ɔko, Ɔkɔm, ne ɔyaredɔm

Wotwa nkɔmhyɛ ahorow yi mu nsɛntitiriw no bi tiawa wɔ Adiyisɛm mu apɔnkɔsotefo anisoadehu a agye din a ɛwɔ Adiyisɛm 6:1-8 no mu, na ɛne:

“Ɔpɔnkɔ foforo kɔkɔɔ bi fii adi, na wɔmaa nea ɔte no so no ahoɔden sɛ ommeyi asomdwoe mfi asase so na wonkunkum wɔn ho wɔn ho.” Yɛsrɛ wo hyɛ no nsow sɛ saa ɔpɔnkɔ yi sotefo no beyi asomdwoe afi asase so, ɛnyɛ fi aman kakraa bi mu. Enti, ɛyɛ wiase nyinaa ɔko ne kunkum ho mfonini. So yɛahu ɛno wɔ afeha 20 yi mu?

“Ɔpɔnkɔ biri bi ni, na nea ɔte no so no kura nsenia ne nsam.” Eyi yɛ aduankɔm ho mfonini ma ɛfata. So tebea horow yi wɔ hɔ wɔ yɛn awo ntoatoaso yi mu?

“Ɔpɔnkɔ nsonso bi ni, na nea ɔte no so no din de Owu, na asaman di n’akyi. Na wɔmaa wɔn asase abupɛn anan mu biako so tumi sɛ wɔmfa afoa ne ɔkɔm ne owu ne asase so mmoa nkunkum wɔn.” Wɔ ha no, ɔpatuwu, sɛ ɛyɛ nea ɔko, ɔkɔm, ɔyaredɔm, anaa asase so mmoa de ba no, ka wɔn a ɛka wɔn no boa so wɔ ɔdamoa (Hades) a ne bere nsoe mu. So ɔpedudu pii nkɔɔ ɔdamoa a ɛte saa mu wɔ yɛn bere yi so?

Nea ɛka anisoadehu ahorow yi ho ne tebea a Yesu ka siei no a ebi ne: “Ɔman bɛsɔre ɔman so, ne ahenni ahenni so; na ɔkɔm ne asasewosow bɛba . . . Atoro adiyifo bebree bɛsɔre, na wɔabɛdaadaa nnipa bebree. Na sɛ amumɔyɛ bɛdɔɔso nti, wɔn mu dodow no ara dɔ ano bedwo.” Ɔkaa wiase nyinaa adansedi adwuma, anaasɛ “ahenni ho asɛmpa” a wɔbɛka ansa na awiei no aba nso siei.

Nea ɛka ho no, Kristoni ɔsomafo Paulo kyerɛkyerɛɛ sɛnea nkurɔfo bɛyɛ wɔn ade mu, na ɔkae sɛ wɔ nna a edi akyiri no mu no “nnipa bɛyɛ ahopɛfo ne sikapɛfo . . . wɔn a wonni obu biara ma awofo, bonniayɛfo.” Ɔde kaa ho sɛ: “Wɔbɛyɛ nnipa a wɔde anigyede si Onyankopɔn ananmu, nnipa a wokura aniani som adeyɛ mu, nanso wɔpow emu paara no.”​—The New English Bible.a

Ma yɛnkae sɛ bere a Yesu nkɔmhyɛ no da no adi sɛ awiei bi bɛba wɔ nnipa abakɔsɛm mu bere a saa nneɛma yi nyinaa ba wɔ awo ntoatoaso koro no ara mu no, enhia sɛ ɛdɔɔso anaasɛ ɛyɛ kɛse sɛnea ɛbae wɔ awo ntoatoaso bi a atwam mu, ɛwom sɛ ebia saa na ɛbɛyɛ de.

So woahu saa nneɛma yi ne tebea horow yi wɔ saa afeha 20 yi mu, titiriw fi 1914? So wuhu mprempren mpo wɔ 1988 mu? Sɛ nea ɛbɛkae wo no, ma yɛnhwehwɛ nsɛntitiriw a aka adesamma na ɛda so ka wɔn no mu na yemmua asemmisa, So ɛkyerɛ sɛ Onyankopɔn bere a ɔnam n’Ahenni so de ne ho begye nsɛm mu no abɛn anaa? no.​—Luka 21:29-33.

[Ase hɔ nsɛm]

[Kratafa 4 mfoni]

Nkyerɛwee a ɛwɔ Wiase Ko I nkaedum nkorow mu biako yi ase no kenkan sɛ: “Wɔde ma Awufo Anuonyamfo a wofi Evesham [Engiresi Aburokyiri] Mantam mu a wɔde wɔn nkwa mae maa wɔn man wɔ Ɔko Kɛse no mu no daa nkae.”