Anidaso Ma Wɔn A Ɔkɔm De Wɔn

ABENFO Brown ne Anderson ka wɔ nhoma Historical Catastrophes: Famine no mu sɛ: “Nea ɛde ɔkɔm akɛse pii bae fi Wiase Ko I akyi ne ɔko ne ɔman anidan ahorow.”

Saa nokwasɛm yi ma yɛkae tete nkɔmhyɛ anisoadehu bi a wɔtaa frɛ no Adiyisɛm no mu Apɔnkɔsotefo Anan no. Ɛreka saa asɛmti yi ho asɛm no, Afrika atesɛm krataa bi bɔɔ amanneɛ sɛ: “Apɔnkɔsotefo Anan no resɛe nneɛma kɛse wɔ Ethiopia asase a enni anigye no so.” Nanso, nnipa kakraa bi na wohu anidaso a ɛyɛ nwonwa a ɛwɔ saa anisoadehu no mu no.

Nea Ɛde Mpatuwu Ba

Adiyisɛm no mu apɔnkɔsotefo a ɔto so abiɛsa no yɛ ɔkɔm ho mfonini ‘Okuta nsenia ne nsam,’ na ɛnne bi teɛm sɛ: “Awi susukora taku.” (Adiyisɛm 6:6) Ɔpɔnkɔsotefo a ɔyɛ ɔko ho mfonini tu mmirika di n’anim​—ɔko a ɛtrɛw kɔ akyiri na ɛkyɛ araa ma wɔka sɛ “ommeyi asomdwoe mfi asase so.” Saa apɔnkɔsotefo yi ma yehu sɛnea ɔkɔm ne ɔko wɔ abusuabɔ kɛse no.​—Adiyisɛm 6:3-6.

Ɛdefa saa abusuabɔ yi ho no, nhoma a wɔfrɛ no Historical Catastrophes: Famines ka sɛ: “Esiane sɛ nnipa a wotumi yɛ adwuma dodow so tew nti, ɛma nnuan a wonya so tew . . . ɔko no betumi asɛe afumduan ahorow a ɛsom bo pii. Ebia wɔbɛsɛe nnua ne afifide ahorow bi a egye mfe pii ansa na wɔatumi ahyɛ ananmu nso. Ebia akwantu ne aguadi rentumi nkɔ so ma enti bere a ɔmantam biako bi redi kɔm no na foforo bi a ɛbɛn hɔ nso anya nnuan ma aboro so.” Eyi ne osuahu a ɛyɛ awerɛhow a nnipa ɔpepem pii nyae wɔ Wiase Ko I ne II bere no mu ne mfe a ɛda ɔko abien no ntam no mu, na ɛda so ara ka nnipa ɔpepem pii nnɛ.

Ɔpɔnkɔsotefo foforo di abien a yɛaka wɔn ho asɛm wɔ atifi hɔ no akyi a wɔfrɛ no “Owu.” Ɔyɛ ɔpatuwu ahorow a aka nnipa ɔpepem pii fi saa afe 1914 a na emu yɛ den no mu ba no ho mfonini. Ɔko ne “aduankɔm” na edi kan wɔ nneɛma ahorow a wɔka siei sɛ ɛde eyi bɛba no mu. (Adiyisɛm 6:7, 8) Ɔko akunkum nnipa bɛboro 100,000,000 fi 1914 na “aduankɔm” ayɛ nea ɛsen saa. Nhoma a wɔfrɛ no The Hunger Primer no se: “Ɔkɔm akunkum nnipa pii wɔ mfe anum a abɛsen no mu sen wɔn a wowuwui wɔ akokoakoko, ɔman anidan ne awudi ahorow a esisii wɔ mfe 150 a atwam ni no mu.”

Anidaso ma Awufo

Biribi a ɛma anidaso di ɔpɔnkɔsotefoɔ wɔfrɛ no “Owu” no akyi pɛɛ. Ɛne “Asaman.” Ɛnde, ɛda adi sɛ nnipa a wɔawuwu ɔpatuwu no mu pii wɔ Asaman. Dɛn na asɛmfua “Asaman” no kyerɛ? Ɛyɛ Hela asɛmfua hai’des no nkyerɛase bi a wɔde di dwuma wɔ Bible mu, na ɛne Hebri asɛmfua a wɔkyerɛ ase “Sheol” no hyia. (Fa Dwom 16:10 toto Asomafo no Nnwuma 2:31 ho.) Ɛnka beae ankasa bi ho asɛm na mmom ɔhome tebea a nkate biara nni mu. (Ɔsɛnkafo 9:5, 10; Yohane 11:11-14) Ɛyɛ adesamma adamoa a owusɔre a wɔde befi hɔ ho anidaso wɔ mu.

Akyiri yi wɔkyerɛw bɔhyɛ yi too hɔ wɔ Adiyisɛm nhoma no mu: “Na mihuu awufo, nketewa ne akɛse, na wogyinagyina ahengua no anim . . . Na ɛpo yii n’awufo a ɛwɔ mu no mae, na owu ne asaman yii awufo a ɛwɔ mu no nso mae, na wobuu wɔn mu biara atɛn sɛnea wɔn nnwuma te.” (Adiyisɛm 20:12, 13) Enti daakye bi a ɛyɛ nwonwa wɔ hɔ ma nnipa pii a ɔkɔm akunkum wɔn no. Sɛ wɔkyerɛ nokware anisɔ ma Onyankopɔn nsiesiei ma nkwagye wɔ wɔn wusɔre no akyi a, ‘wobebu saafo yi atɛn’ sɛ wɔfata sɛ wɔtra ase daa wɔ asase so.​—Dwom 37:29; Yohane 5:28, 29; 1 Yohane 2:1, 2.

Nanso bere bɛn na saa owusɔre yi bɛba? Ɛyɛ bere a Adiyisɛm no mu apɔnkɔsotefo a odi kan a ɔyɛ Awurade Yesu Kristo ho mfonini no ‘wie ne nkonimdi’ no. (Adiyisɛm 6:2) Yehowa. Nyankopɔn asi ne Ba, Yesu Kristo, ɔhene wɔ adesamma nyinaa so. (Adiyisɛm 11:15) Ɔne “ateasefo ne awufo temmufo a Onyankopɔn ayi no” no.​—Asomafo no Nnwuma 10:42.

Anidaso ma Ateasefo

Ɛrenkyɛ wobeyi wɔn a wɔsɔre tia Kristo nniso nyinaa afi asase so. Wobeyi pɛsɛmenkominya nniso a nnipa ahyehyɛ nyinaa afi hɔ. (Daniel 2:44) “Wobegu abɔnefo ase afi asase so,” nanso wɔn a wɔbrɛ wɔn ho ase ma ɔsoro Hene a odi asase so no “na wɔbɛka mu.” (Mmebusɛm 2:21, 22) Wɔ saafo a wonya nkwa yi fam no, ɔkɔm bɛyɛ ade a atwam.​—Yesaia 25:6; 65:21, 22.

Bere a Yesu Kristo de tumi a ɛboro onipa de so a Onyankopɔn de ama no no redi dwuma no, ɔbɛhwɛ sɛ asase no asan anya n’ahoɔden a ɛma afifide yɛ yiye wɔ ɔkwan a ɛkari pɛ so. (Hwɛ Marko 4:37-41) Wɔbɛma Afrika anhweatam Sahara ne nsase afoforo a ɛredan anhweatam nyinaa no agyae. Onyankopɔn mfitiase atirimpɔw a ɛne sɛ asase nyinaa bɛyɛ paradise no bɛbam. (Genesis 1:28; 2:7, 8; Luka 23:43) Sɛnea wɔaka asie no, “na anhwea pradada . . . ahan sɛ nhwiren. . . . nsu betue sare so na nsuwansuwa asen anhwea pradada so.”​—Yesaia 35:1, 6.

Bible no ka Kristo adedi ho asɛm wɔ ɔkwan a ɛka koma yi so sɛ: “Ɔbɛkora ɔbrɛfo ne ohiani so, na wagye ahiafo kra nkwa . . . Asase no so aburofuw bedu mmepɔw atifi.”​—Dwom 72:8, 13, 14, 16.

[Asɛm a wɔafa aka wɔ kratafa 11]

“Obedi ɔman mu amanehunufo asɛm ama wɔn, na wagye ahiafo mma nkwa, na wabubu nhyɛsofo pasapasa. Asase no so aburofuw bedu mmepɔw atifi, na ɛso aba bɛwosow sɛ Lebanon, na nkurow no asoa sɛ asase so wura.”​—Dwom 72:4, 16.

[Kratafa 9 mfoni]

Ɔkɔm a ɛyɛ Adiyisɛm no mu ɔpɔnkɔsotefo a ɔto so abiɛsa no atra ne pɔnkɔ no so nnɛ wɔ Afrika afã horow pii

[Kratafa 10 mfoni]

Ɛrenkyɛ aduan bebu so ama Afrika ne wiase nyinaa