Ɛhe Na Yɛn Adɔfo A Wɔawuwu No Wɔ Mprempren?

“ƐHE na abofra ketewaa no wɔ mprempren?” Ɛna a odi yaw (a yɛaka ne ho asɛm wɔ asɛm a edi kan no mu no) kɔɔ so susuw baabi a ne ba a wawu no kɔ no ho. So na ɔwɔ soro anaasɛ beae foforo bi? Ankyɛ biara wɔde mmuae maa Andrew maame. Bere a ne ba panyin a ɔno nso yɛ Roman Katolekni tee asiane no ho asɛm no, obuae sɛ: “Andrew wɔ Limbo.” Nanso so na ɔwɔ hɔ?

Ɛhe na Limbo wɔ Anaasɛ Ɛyɛ Dɛn?

The Concise Oxford Dictionary ka sɛ Limbo yɛ “beae bi a ɛwɔ hell hye so, na wɔkyerɛ sɛ ɛyɛ nnipa atreneefo a wɔtraa ase ansa na Kristo reba ne nkokoaa a wɔammɔ wɔn asu trabea; . . . awerɛfiri ne tebea bi a wobu ani gu so.” New Catholic Encyclopedia no ka wɔ Limbo ho sɛ: “Ɛnnɛ nyamekyerɛfo de asɛmfua no di dwuma de kyerɛ tebea ne beae a akra a wɔamfata sɛ wɔkɔ hell ne daa asotwe ahorow no mu nanso wɔantumi ankɔ soro ansa na Ogye no ba (agya no Limbo) no wɔ anaasɛ saa akra a wɔannya Onyankopɔn ho nimdeɛ biara tẽẽ esiane kan bɔne no nkutoo nti (mmofra Limbo) no wɔ.”

Nanso saa nhoma koro no ara ka nso sɛ: “Nokwarem no, nkokoaa a wowuwu a wɔammɔ wɔn asu no nkrabea yɛ ɔhaw a ɛho asɛm yɛ ka na kɛse. . . . Asemmisa a ɛfa Limbo ho no ka nyamekyerɛ mu nsemmisa a wonnyaa ho mmuae no ho. Wonhui sɛ Asɔre no ahyɛ ada apene wɔ a Limbo wɔ hɔ no so. The Encyclopœdia Britannica ka nea edidi so yi de si so dua: “Esiane sɛ Roman Katolek Asɔre no nhyɛɛ da mpenee limbo nkyerɛkyerɛ no so sɛ tebea anaasɛ beae a ɛwɔ hɔ nti, limbo ho adwene no kɔ so yɛ asemmisa a wonnyaa ho mmuae ɛ.”

Wɔ eyi nyinaa akyi no, Katolekfo ahofamafo pii gye Limbo adwene no tom. Nanso yɛsrɛ wo susuw asɛm yi ho yiye: Dɛn nti na wobu nkokoaa fɔ sɛ ɛsɛ sɛ wɔkɔtra baabi a ɛhɔ yɛ nwonwa a wontumi nte ase daa esiane sɛ wɔammɔ wɔn asu ara kwa nti?

So Bible no bɔ Limbo din? Dabi, Onyankopɔn Asɛm mmɔ din koraa. Enti eyi ma asemmisa a ɛho hia no sɔre: Ɛhe na nnipa a nkokoaa ka ho no kɔ, bere a wɔawu no?

Ɛhe na Nnipa Kɔ wɔ Owu Mu?

Adwene a agye din a Kristoman mu asɔrekɔfo kura ne sɛ nnipa kɔ soro anaasɛ hell. Nanso dɛn na Bible no ka wɔ eyi ho? Ɛka sɛ: “Na ateasefo nim sɛ wobewuwu, na awufo de, wonnim biribiara.” (Ɔsɛnkafo 9:5) Enti awufo nnim hwee. Wɔnte nkwa mu wɔ baabi na mmom wɔawu koraa. Wonnim hwee.

Saa nsɛm a ɛwɔ Bible nhoma a ɛne Nnwom no mu a edidi so yi si saa nokwasɛm yi so dua: “Ɛnyɛ awufo na ebeyi [Yehowa] ayɛ, na ɛnyɛ wɔn a wosian kɔ kommyɛ mu biara.” (Dwom 115:17) “Mommfa mo ho nnto ahene anaa onipa ba a nkwagye bi nni ne mu so. Ne honhom fi kɔ, ɔsan kɔ ne dɔte mu, da no ara ne tirim a ɔbobɔe yera.”​—Dwom 146:3, 4.

Na ɔkra no nso ɛ? So ɛnyɛ nea entumi nwu? Dabi. Nea ɛne nea nnipa pii gye di bɔ abira no, ɔkra no wu. Wɔada nokwasɛm yi adi pefee wɔ Bible mu, nea ɛka eyi no: “Ɔkra a ɔyɛ bɔne no, ɔno ara na obewu.” (Hesekiel 18:4, 20) Yehu ade foforo a esi eyi so dua wɔ Asomafo no Nnwuma 3:23, nea ɛka eyi no: “Na ɛbɛba sɛ ɔkra biara a ɔrentie odiyifo [Yesu] no no, wɔbɛsɛe no afi ne man mu.”

So Owu Yɛ Biribiara Awiei

Owu nyɛ biribiara awiei ankasa. Wɔkyerɛkyerɛ sɔre a wɔn a wɔawuwu no bɛsɔre no pefee wɔ Kyerɛwnsɛm no mu. Yesu kae sɛ: “Mommma eyi nnyɛ mo nwonwa, efisɛ dɔn no reba a wɔn a wɔwɔ ada mu nyinaa bɛte ne nne, na wɔafi adi; wɔn a wɔayɛ papa no bɛkɔ nkwa sɔre mu, na wɔn a wɔayɛ bɔne no bɛkɔ atemmu sɔre mu.” (Yohane 5:28, 29) Afei nso, Yesu ankasa nyanee nnipa bi wɔ ne som adwuma no mu wɔ asase so. Asɛm a ɛyɛ nwonwa sen biara no ne nea ɛfa Yesu adamfo Lasaro ho no. Na wawu nnanan. Nanso bere a Yesu teɛɛm sɛ: “Lasaro, fi bra!” no, owufo no tiei na ofii ɔda no mu fii adi. Hwɛ sɛnea ɛyɛɛ nnipadɔm a na wɔrehwɛ no anigye! Hwɛ sɛnea na ɛyɛ ade a ɛyɛ anigye ma Maria ne Marta, Lasaro nuabeanom no!​—Yohane 11:38-45.

Na ɛhe na Lasaro wɔ wɔ saa nnanan no mu? So na ɔwɔ soro? So na ɔwɔ Limbo? Dabi. Bible no anka saa anaasɛ ankyerɛ saa. Sɛ na Lasaro te nkwa mu wɔ baabi a, anka nokwarem no, ɔbɛka ho asɛm akyerɛ afoforo. Nanso sɛnea Bible no ka no: “Awufo nnim hwee.”​—Ɔsɛnkafo 9:5, The Jerusalem Bible.

Asɛm foforo a ɛyɛ anigye sii wɔ kurow Nain mu. Bere a Yesu bɛn kurow no pon ano no, ohyiaa ayifo a wɔato santen. Na owufo no ‘yɛ ne na’ a ɔyɛ okunafo no ‘ba koro.’ Na ɔresu denneennen. Eyi kaa Yesu ayamye ne ɔdɔ koma no. Ɔbɛn wɔn, ɔma wogyinae na ɔkae sɛ: “Aberante, mise wo sɛ: Sɔre!” Na aberante no sɔree! So wubetumi asusuw anigye a ɛna no nyae ne ahodwiriw a ɛyɛɛ wɔn a na wogyina nkyɛn no ho?​—Luka 7:11-17.

So aberante yi nyaa biribi kae sɛ na ɔwɔ soro anaasɛ Limbo? Dabi? Ɔbɛyɛ dɛn atumi aka saa? “Awufo nnim hwee.” Bible no de owu toto nnahɔ nso ho. Dawid kae sɛ: “Hwɛ na gye me so, [Yehowa], me Nyankopɔn, tew m’ani, na manna owu nna.” (Dwom 13:3) Bio nso, bere a aka bere tiaa bi na Yesu anyan Lasaro no, ɔde owu totoo nna ho.​—Yohane 11:11-14.

Wɔ ha no, asemmisa foforo sɔre.

So Nnipa Pa no Mu Binom Kɔ Soro?

Yiw, nnipa pa binom kɔ soro. Nokwasɛm a ɛyɛ anigye sen biara a ɛfa nnipa pa anaasɛ nokware Kristofo ho a asɔrekɔfo pii nnim ne sɛ nnipa akuw abien na wɔwɔ hɔ. Wɔn mu kakraa bi kɔ soro ne Yesu kodi hene, bere a wɔn mu fã kɛse no ara benya daa nkwa wɔ asase so. Ebia eyi ma wo ho dwiriw wo. Enti, ma yensusuw nea Bible no wɔ ka wɔ asɛm a ɛyɛ anigye yi ho no ho.

Na dɛn ne Onyankopɔn mfitiase atirimpɔw ma adesamma? Bere a ɔbɔɔ Adam ne Hawa no, so na ɔpɛ sɛ wonya asetra mu anigye kakra wɔ Eden turo no mu na afei wɔawu akɔ soro? Dabi. Onyankopɔn de dwumadi titiriw bi hyɛɛ wɔn nsa a na ɛfa asase no ho bere a ɔkaa eyi no: “Monwo, na monnɔ, na monyɛ asase so ma, na monhyɛ so, na munni ɛpo mu mpataa ne wim nnomaa ne mmoa a wɔkeka wɔn ho wɔ asase so nyinaa so.” (Genesis 1:28) Na Yehowa nsakra n’atirimpɔw a ɔde asi hɔ. Ɔka wɔ Dwom 89:34 sɛ: “Merensakra nea afi m’anom no.” Enti ɛsɛ sɛ wɔsan de Eden Paradise no ba na Yehowa nkoa anokwafo​—kuw kɛse a yɛaka wɔn ho asɛm wɔ atifi hɔ no nya mu anigye.

Wɔde hokwan titiriw bi ma kuw ketewaa no, ɛne di a wɔne Kristo bedi hene wɔ soro. Sɛ yɛbɛka no ɔkwan foforo so a, wɔne Yesu bɛbom adi wɔn a wɔte asase so no so. Eyi ne Ahenni nniso a Kristofo bɔ ho mpae wɔ Awurade mpaebɔ no mu no. Nea ɛyɛ anigye no, yɛka wɔ mpaebɔ koro no ara mu sɛ: “Nea wopɛ nyɛ asase so, sɛnea ɛyɛ ɔsoro.”​—Mateo 6:9, 10.

So Bible no da nnipa a wobenya hokwan kɛse a ɛne sɛ wɔne Kristo bedi hene wɔ soro no dodow adi? Yiw, ɛyɛ saa. Adiyisɛm ti 14, nkyekyem 1 ka sɛ: “Na mihui, na hwɛ, oguammaa no gyina Sion bepɔw so, na mpem ɔha aduanan anan a wɔakyerɛkyerɛw ne din ne n’agya din wɔ moma so no ka ne ho.” Ma ɛntra w’adwenem sɛ Adiyisɛm de sɛnkyerɛnnede sɛnea wɔada no adi wɔ nkyekyem a edi kan no mu, Adiyisɛm 1:1 di dwuma. “Oguammaa” no ne Yesu Kristo. (Fa toto Yohane 1:29 ho.) Na Bepɔw Sion gyina hɔ ma “ɔsoro Yerusalem” na ɛnyɛ Israel amammui ahenkurow no.​—Hebrifo 12:22.

Adiyisɛm ti 7 de amanneɛbɔ ma yɛn wɔ ɔsoro kuw ne asase so kuw a yɛaka wɔn ho asɛm yi nyinaa ho. Nkyekyem 4-8 ka 144,000 no ho asɛm sɛ “wɔasɔ wɔn ano Israel mma mmusuakuw nyinaa mu.” Eyi yɛ sɛnkyerɛnnede ho asɛm foforo na ɛkyerɛ honhom mu Israel anaasɛ “Nyankopɔn Israel.” (Galatifo 6:16) Romafo 2:29 ka sɛ: “Na mmom Yudani ne nea ɔyɛ no ne mu, na twetiatwa ne nea wɔayɛ no komam, wɔ honhom mu.” Afei Adiyisɛm 7:9 ka asase so kuw no ho asɛm bere a ɛka eyi no: “Eyinom akyi no mihui, na hwɛ, nnipakuw kɛse a obi ntumi nkan wɔn a wofi aman ne mmusuakuw ne nkurɔfo ne ɔkasa nyinaa mu.”

Nnipa Pa Bɛtra Asase so

Nnipa pa ɔpepepem pii bɛtra paradise asase so. (Luka 23:43) So wobɛpɛ sɛ wobɛka wɔn ho? Nokwarem no, wopɛ saa. Hwɛ hokwan a ɛbɛyɛ sɛ wobɛtra asase a wɔatew so a efĩ, ɔkɔm, nsɛmmɔnedi, ɔyare, amanehunu ne nuklea ɔko ho akwanhwɛ a ɛyɛ hu nni so so! So Bible no hyɛ biribi a ɛte saa ho nkɔm ankasa? Yiw, ɛte saa. Ɛka sɛ: “Na wobeyi nnebɔneyɛfo bɔ, na wɔn a wɔtwɛn [Yehowa] no, wɔn na wobenya asase no adi. . . . Na ahobrɛasefo benya asase no adi, na wɔagye wɔn ani asomdwoe bebree mu. Treneefo benya asase no adi, na wɔatra so daapem.”​—Dwom 37:9, 11, 29; fa toto Mateo 5:5 ho.

Ɛnde, nkokoaa a wɔawuwu no nso ɛ? So wɔn nso wɔbɛba Paradise asase no so? Wɔnkɔ Limbo a enni hɔ no. Nanso mmofra nkumaa a Onyankopɔn kae wɔn no bɛsan aba wɔ awufo sɔre no mu​—nkɔmhyɛ ahorow a ɛyɛ nwonwa wɔ Onyankopɔn Asɛm no mu no mu biako, sɛnea yɛadi aka dedaw no. (Yohane 5:28, 29; Asomafo no Nnwuma 24:15) Ebia woahwere adɔfo wɔ owu mu na wɔtaa bisa faako a wɔwɔ mprempren. Yehu fi Kyerɛwnsɛm no mu pefee sɛ wɔadeda, wɔretwɛn owusɔre. So wobɛpɛ sɛ wunya asetra wɔ paradise ho anidaso yi a ɛyɛ nwonwa no ho nsɛm pii? Sɛ saa a, dɛn nti na wone Yehowa Adansefo mmɔ eyi ho nkɔmmɔ bere foforo a wɔbɛba wo fie no?

[Asɛm a wɔafa aka wɔ kratafa 6]

Nnipa pa binom kɔ som. Wɔne henanom?

[Mfonini wɔ kratafa 5]

Na ɛhe na Lasaro wɔ bere a owui no?

[Mfonini Fibea wɔ kratafa 7]

Photo taken at Brooklyn Botanic Garden