‘Etwa Sɛ Saa Nneɛma Yi Ba’

‘Yesu bua see wɔn sɛ: Etwa sɛ saa nneɛma yi ba, nanso na awiei no nnya nnui ɛ.’—MATEO 24:4-6.

 1. Asɛm bɛn na ɛsɛ sɛ yɛma ɛho hia yɛn?

AKYINNYE biara nni ho sɛ, wo nkwa ne wo daakye ho hia wo. Ɛnde ɛsɛ sɛ woma asɛm bi a egyee C. T. Russell adwene wɔ afe 1877 mu no ho hia wo nso. Russell a akyiri yi ɔbɛtee Ɔwɛn Aban Asafo no na ɔkyerɛw The Object and Manner of Our Lord’s Return nhomawa no. Saa nhomawa yi a ekura nkratafa 64 no kaa Yesu sanba, anaa ba a ɔbɛba bio daakye no ho asɛm. (Yohane 14:3) Bere bi a na ɔte Ngo Bepɔw no so no, asomafo no bisaa ba a na ɔbɛba bio no ho asɛm sɛ: “Bere bɛn na eyinom bɛba, na dɛn na ɛbɛyɛ wo ba a woaba [“wo ba,” King James Version] ne nneɛma nhyehyɛe no awiei no ho sɛnkyerɛnne?”—Mateo 24:3, NW.

 2. Dɛn nti na nnipa kura nsusuwii ahorow pii wɔ nkɔm a Yesu hyɛe no ho?

² So wunim Yesu mmuae no, na wote ase? Ɛwɔ Nsɛmpa abiɛsa no mu. Ɔbenfo D. A. Carson ka sɛ: “Bible no ti ahorow kakraa bi pɛ na nsɛm asekyerɛfo agye ho akyinnye pii sen Mateo 24 ne ne nsɛso a ɛwɔ Marko 13 ne Luka 21 no.” Afei ɔno ankasa kyerɛɛ n’adwene—ɛno nso yɛ nnipa nsusuwii a ɛne afoforo nhyia. Nsusuwii pii a ɛte saa a wɔada no adi wɔ afeha a etwaam no anaa nea ɛte saa mu no da gyidi a nkurɔfo nni adi. Wɔn a wɔka nsɛm a ɛte saa no kyerɛe sɛ ɛnyɛ Yesu na ɔkaa nsɛm a yɛkenkan wɔ Nsɛmpa no mu no koraa, na wɔkyerɛ sɛ, akyiri yi na woguguu ne nsɛm no mu, anaasɛ ne nkɔmhyɛ no annya ne mmamu—wɔn a wɔhwehwɛ Bible mu kɔ akyiri na wɔkekaa saa nsɛm yi. Sɛnkyerɛwfo bi mpo ‘gyinaa Mahayana-Buddhafo nyansapɛ so’ na ɛyɛɛ Marko Asɛmpa no mu nhwehwɛmu!

 3. Yehowa Adansefo yɛ wɔn ade dɛn wɔ Yesu nkɔmhyɛ no ho?

³ Nea ɛne eyinom bɔ abira no, Yehowa Adansefo gye nokware a Bible yɛ ne to a wotumi de ho to so, a nsɛm a Yesu ka kyerɛɛ asomafo baanan a na wɔne no wɔ Ngo Bepɔw no so bere a na aka nnansa ma wawu no ka ho, no tom. Efi C. T. Russell bere so no, Onyankopɔn nkurɔfo de nkakrankakra ate nkɔm a Yesu hyɛe wɔ hɔ no ase yiye. Mfe kakra a atwam no, Ɔwɛn-Aban ama nkɔmhyɛ yi ho ntease a wɔwɔ no mu akɔ so ada hɔ yiye. So woate emu nsɛm no ase, na wuhu sɛ anya w’asetra so nkɛntɛnso?a Ma yɛnhwehwɛ mu.

Ne Mmamu a Ɛyɛ Awerɛhow Abɛn

 4. Ɛbɛyɛ sɛ dɛn na ɛmaa asomafo no bisaa Yesu nsɛm a ebesisi daakye ho asɛm no?

⁴ Ná asomafo no nim sɛ Yesu ne Mesia no. Enti bere a wɔtee sɛ ɔreka ne wu, ne wusɔre, ne ba a ɔbɛba bio ho asɛm no, ɛbɛyɛ sɛ wosusuw ho sɛ, ‘Sɛ Yesu wu kɔ a, ɔbɛyɛ dɛn atumi ayɛ anwonwade a wɔhwɛ kwan sɛ Mesia no bɛyɛ no?’ Afei nso, Yesu kaa Yerusalem ne n’asɔrefie sɛe ho asɛm. Ɛbɛyɛ sɛ asomafo no susuwii sɛ, ‘Bere bɛn ne ɔkwan bɛn so na ɛno bɛba?’ Bere a na asomafo no rebɔ mmɔden sɛ wɔbɛte eyinom ase no, wobisae sɛ: “Kyerɛ yɛn bere ko a eyinom bɛba, na eyinom nyinaa rebɛbam a, ɛho sɛnkyerɛnne ne dɛn?”—Marko 13:4; Mateo 16:21, 27, 28; 23:37–24:2.

 5. Ɔkwan bɛn so na nea Yesu kae no nyaa ne mmamu wɔ afeha a edi kan no mu?

⁵ Yesu ka siei sɛ akodi, ɔkɔm, yaredɔm, asasewosow, nitan ne ɔtaa a wɔde bɛba Kristofo so, atoro mesia ahorow, ne Ahenni no ho asɛmpa a wɔbɛka wɔ wiase nyinaa, bɛba. Ɛno ansa na awiei no bɛba. (Mateo 24:4-14; Marko 13:5-13; Luka 21:8-19) Afe 33 Y.B. mu mfiase na Yesu kaa eyi. Mfe pii a edii hɔ mu no, n’asuafo a wɔn ani da hɔ no tumi hui sɛ nneɛma a ɔkaa ho asɛm siei no rebam ampa wɔ ɔkwan titiriw bi so. Yiw, abakɔsɛm da no adi sɛ sɛnkyerɛnne no nyaa ne mmamu saa bere no, na ɛde Yudafo nneɛma nhyehyɛe no baa awiei wɔ Romafo nsam wɔ afe 66-70 Y.B. mu. Ɔkwan bɛn so na eyi baa mu?

 6. Dɛn na ɛkɔɔ so wɔ Romafo ne Yudafo no ntam wɔ afe 66 Y.B. mu?

⁶ Wɔ afe 66 Y.B. mu, Yudafo ahohuru bere a emu yɛ hyew mu no, Yudafo Anuɔdenfo dii anim kɔtow hyɛɛ Romafo awɛmfo so wɔ abankɛse bi a ɛbɛn Yerusalem asɔrefie no ho, na ɛde basabasayɛ baa ɔman no fã bi. Ɔbenfo Heinrich Graetz ka wɔ nhoma History of the Jews mu sɛ: “Afei na Cestius Gallus a ɔyɛ Siria Amrado a ɔno na na ɛyɛ n’asɛyɛde sɛ ɔhwɛ ma nidi a Romafo asraafo wɔ tra hɔ no . . . ntumi nhwɛ atuatew a na ɛretwa ne ho hyia no a onsiw ano. Ɔboaboaa n’asafotow ano, na ahemfo a ɛbemmɛn hɔ no fii wɔn pɛ mu maa no asraafo.” Asraafo 30,000 yi twaa Yerusalem ho hyiae. Bere a wɔkoo kakra no, Yudafo no guan kohintaw afasu a ɛbɛn asɔrefie no ho no akyi. “Nnanum a edii hɔ no, Romafo no tow hyɛɛ afasu no so, nanso Yudafo no bɛmma a wɔtotowee no maa wɔsan wɔn akyi bere nyinaa. Da a ɛto so asia no nko na wotumi tuu ɔfasu a ɛwɔ atifi fam wɔ asɔrefie no anim no fã bi ase.”

 7. Dɛn nti na Yesu asuafo no huu nneɛma wɔ ɔkwan soronko so wɔ sɛnea Yudafo dodow no ara hui no?

⁷ Wo de hwɛ sɛnea ɛbɛyɛ sɛ Yudafo no adwene tu frae, efisɛ na wofi tete agye adi sɛ Onyankopɔn bɛbɔ wɔne wɔn kurow kronkron no ho ban! Nanso, na wɔadi kan abɔ Yesu asuafo no kɔkɔ sɛ amanehunu bɛba Yerusalem so. Na Yesu aka akyerɛ wɔn sɛ: “Nna bi bɛba wo so a w’atamfo betwa wo ho ka, na wɔatwa wo ho kɔntɔnkrɔn, na wɔaka wo ahyɛ mu baabiara, na wɔadwiriw wo ne wo mma a wɔwɔ wo mu no agu fam, na wɔrennyaw wo mu bo ɔbo so, efisɛ woanhu bere a [wɔdom] bɛhwɛɛ wo no.” (Luka 19:43, 44) Nanso, so na eyi de Kristofo a wɔwɔ Yerusalem wɔ afe 66 Y.B. mu no bɛkɔ owu mu?

 8. Awerɛhosɛm bɛn na Yesu kaa ho asɛm siei, na henanom ne wɔn a “wɔapaw wɔn” a wɔn nti wobetwa nna no so no?

⁸ Bere a Yesu rema asomafo no mmuae wɔ Ngo Bepɔw no so no, ɔka siei sɛ: “Nna no bɛyɛ ahohiahia a efi Onyankopɔn adebɔ no mfiase de bedu nnɛ ɛmmae saa da, nanso ɛremma saa bio. Na sɛ [Yehowa, NW] antwa nna no so a, anka wɔrennye ɔhonam biara nkwa; na wɔn a wɔapaw wɔn a ɔpaw wɔn no nti, watwa nna no so.” (Marko 13:19, 20; Mateo 24:21, 22) Enti wobetwa nna no so na ama wɔagye “wɔn a wɔapaw wɔn” no nkwa. Wɔne henanom? Ɛda adi sɛ ɛnyɛ Yudafo atuatewfo a wɔkyerɛe sɛ wɔsom Yehowa nanso na wɔapo ne Ba no. (Yohane 19:1-7; Asomafo no Nnwuma 2:22, 23, 36) Saa bere no wɔn a na wɔapaw wɔn ankasa no ne Yudafo ne wɔn a wɔnyɛ Yudafo a wɔkyerɛɛ Yesu mu gyidi sɛ Mesia ne Ogyefo no. Na Onyankopɔn apaw saafo yi, na na ɔde wɔn ayɛ honhom fam man foforo, “Nyankopɔn Israel,” wɔ Pentekoste afe 33 Y.B. mu.—Galatifo 6:16; Luka 18:7; Asomafo no Nnwuma 10:34-45; 1 Petro 2:9.

 9, 10. Ɔkwan bɛn so na “wotwaa” Romafo ntua no nna no so, na dɛn na efii mu bae?

⁹ So ‘wotwaa’ nna no so, na so wogyee wɔn a wɔasra wɔn a wɔapaw wɔn a na wɔwɔ Yerusalem no? Ɔbenfo Graetz kyerɛ sɛ: “[Cestius Gallus] hui sɛ nyansa nnim sɛ ɔbɛkɔ so ako atia nkurɔfo a wɔn asɛm yɛ den no, na ɔne wɔn adi ako bere tenten saa bere no, bere a na ɛrenkyɛ na otwabere mu osutɔbere afi ase a . . . na ɛremma n’asraafo no nsa nka nneɛma a wohia no. Ebetumi aba sɛ ɛno nti na ɛma osusuwii sɛ ɛyɛ nea nyansa wom koraa sɛ ɔbɛsan n’akyi no.” Ɛmfa ho nea na ɛwɔ Cestius Gallus adwenem biara no, Romafo asraafo no fii kurow no mu san wɔn akyi, na Yudafo a wɔtoaa wɔn no kunkum wɔn kɛse.

¹⁰ San a Romafo no san wɔn akyi mpofirim no maa wogyee “ɔhonam” bi—Yesu asuafo a na wɔn nkwa da asiane mu wɔ Yerusalem no—nkwa. Abakɔsɛm kyerɛ sɛ, bere a saa hokwan yi buei no, Kristofo no guan fii ɔmantam no mu. Hu a Onyankopɔn tumi hu nea ɛbɛba daakye na ɔhwɛ ma n’asomfo nya wɔn ti didi mu a ɔdaa no adi bɛn ara ni! Nanso, dɛn na ɛtoo Yudafo a wonnye nni a wɔkɔɔ so traa Yerusalem ne Yudea no?

Bere no Sofo Behu

11. Dɛn na Yesu ka faa “awo ntoatoaso yi” ho?

¹¹ Na Yudafo no pii susuw sɛ wɔn som a egyina wɔn asɔrefie no so no bɛtra hɔ daa. Nanso Yesu kae sɛ: “Munsua borɔdɔma . . . Sɛ n’abaa nya yɛ frɔmfrɔm na ɛreyiyi nhaban a, na munim sɛ ahohuru bere abɛn. Saa ara na mo nso, sɛ muhu eyinom nyinaa a, munhu sɛ abɛn, na adu apon ano! Nokware mise mo sɛ, awo ntoatoaso yi rentwam, gye sɛ eyinom nyinaa aba mu ansa. Ɔsoro ne asase betwam akɔ, na me nsɛm de, ɛrentwam da.”—Mateo 24:32-35; yɛn na yɛasi ɔfã bi so dua no.

12, 13. Ɔkwan bɛn so na asuafo no tee “awo ntoatoaso yi” ho asɛm a Yesu kae no ase?

¹² Mfe a edii afe 66 Y.B. anim no, ɛbɛyɛ sɛ Kristofo no huu nkɔmhyɛ a ɛwɔ afã pii no mu atitiriw mmamu—akodi, ɔkɔm, ne Ahenni ho asɛmpa a wɔkaa no kɛse no. (Asomafo no Nnwuma 11:28; Kolosefo 1:23) Nanso, bere bɛn na na awiei no bɛba? Dɛn na na Yesu kyerɛ bere a ɔkae sɛ: ‘Awo ntoatoaso yi [Hela, ge·ne·aʹ] rentwam no’? Mpɛn pii na Yesu frɛɛ bere no sofo, Yudafo pii a na wɔyɛ asɔretiafo, a na nyamesom akannifo ka ho no, “nnɛ mma abɔnefo ne awaresɛefo.” (Mateo 11:16; 12:39, 45; 16:4; 17:17; 23:36) Enti bere a ofii ase kaa “awo ntoatoaso yi” ho asɛm bio wɔ Ngo Bepɔw no so no, ɛda adi sɛ na ɛnyɛ Yudafo nyinaa a wɔatra ase fi teteete no ho asɛm na na ɔreka; saa ara na na ɛnyɛ n’akyidifo no, ɛwom sɛ na wɔyɛ “abusua a wɔapaw wɔn” de. (1 Petro 2:9) Saa ara nso na Yesu anka sɛ “awo ntoatoaso yi” kyerɛ bere pɔtee bi.

¹³ Mmom no, Yudafo asɔretiafo a na wɔwɔ hɔ saa bere no a na wobehu sɛnkyerɛnne a ɔde mae no mmamu no ho asɛm na na ɛwɔ Yesu adwenem. Ɛdefa “awo ntoatoaso yi” a ɛwɔ Luka 21:32 ho no, Ɔbenfo Joel B. Green ka sɛ: “Wɔ Asɛmpa a Ɛto so Abiɛsa no mu no, ‘awo ntoatoaso yi’ (ne nsɛm a ɛfa ho no) akyerɛ nnipa bi a wɔko tia Onyankopɔn atirimpɔw bere nyinaa. . . . [Ɛfa] nnipa a wofi ahantan mu bu wɔn ani gu Onyankopɔn atirimpɔw so ho.”b

14. Dɛn na ɛtoo saa “awo ntoatoaso” no, nanso ɔkwan bɛn so na nea ɛbaa Kristofo so no yɛɛ soronko?

¹⁴ Ná Yudafo asɔretiafo awo ntoatoaso bɔne a na wobetumi ahu sɛnkyerɛnne no mmamu no nso behu awiei no. (Mateo 24:6, 13, 14) Na wohui nso! Wɔ afe 70 Y.B. mu no, Romafo asraafo no bae bio a na Titus a ɔyɛ Ɔhempɔn Vespasian ba di wɔn anim. Ɛkame ayɛ sɛ amane a Yudafo a wɔkaa wɔn hyɛɛ kurow no mu bio hui no yɛ nea na enni kabea.c Flavius Josephus a asɛm no sii n’anim no bɔ amanneɛ sɛ, bere a Romafo no sɛee kurow no na Yudafo bɛyɛ 1,100,000 awuwu, na wɔfaa nnipa bɛyɛ 100,000 nnommum, na ankyɛ na ɔkɔm maa wɔn mu dodow no ara wuwuu owuyaw anaa wɔ Romafo agohwɛbea. Nokwarem no, ahohiahia a ɛbae wɔ afe 66-70 Y.B. mu no ne nea na ɛsen biara a na aba Yerusalem ne Yudafo nhyehyɛe no so pɛn, anaasɛ ɛbɛba so. Hwɛ sɛnea tebea no yɛɛ soronko maa Kristofo a na wɔatie Yesu nkɔmhyɛ kɔkɔbɔ no a na wɔafi Yerusalem bere a Romafo asraafo no fii hɔ kɔe wɔ afe 66 Y.B. mu no! ‘Wogyee’ Kristofo a wɔasra wɔn a “wɔapaw wɔn” no, anaasɛ wɔkoraa wɔn so wɔ afe 70 Y.B. mu.—Mateo 24:16, 22.

Ebenya Ne Mmamu Foforo

15. Yɛbɛyɛ dɛn atumi anya awerɛhyem sɛ Yesu nkɔmhyɛ no benya ne mmamu kɛse wɔ afe 70 Y.B. mu akyi?

¹⁵ Nanso, na ɛnyɛ ɛno ara ne no. Na Yesu adi kan aka sɛ sɛ wɔsɛe kurow no wie a, ɔbɛba wɔ Yehowa din mu. (Mateo 23:38, 39; 24:2) Afei ɔmaa eyi mu daa hɔ yiye wɔ nkɔm a ɔhyɛe wɔ Ngo Bepɔw so no mu. Bere a ɔkaa “ahohiahia kɛse” a ɛreba ho asɛm wiei no, ɔkae sɛ ɛno akyi no atoro Kristo bɛba, na amanaman betiatia Yerusalem so bere tenten bi. (Mateo 24:21, 23-28; Luka 21:24) So na ebetumi akyerɛ sɛ ne mmamu foforo, nea ɛyɛ kɛse sen saa, bɛba? Nokwasɛm ahorow ma mmuae no yɛ yiw. Sɛ yɛde Adiyisɛm 6:2-8 (a wɔkyerɛwee wɔ Yerusalem ahohiahia no akyi wɔ afe 70 Y.B. mu no) toto Mateo 24:6-8 ne Luka 21:10, 11 ho a, yehu sɛ akodi, aduankɔm, ne amanehunu kɛse da yɛn anim. Yesu nsɛm yi anya ne mmamu kɛse fi Wiase Ko I a ɛbae wɔ afe 1914 no mu.

16-18. Dɛn na yɛhwɛ kwan sɛ ɛbɛba?

¹⁶ Mfe pii ni na Yehowa Adansefo akyerɛkyerɛ sɛ, sɛnkyerɛnne no a ɛrenya ne mmamu mprempren no kyerɛ sɛ “ahohiahia kɛse” bi rebɛba. “Awo ntoatoaso” bɔne a ɛwɔ hɔ mprempren yi behu saa ahohiahia no. Ɛte sɛ nea ebenya ne mfiase foforo bio (tow a wɔbɛtow ahyɛ atoro som nyinaa so), sɛnea Gallus tow hyɛɛ Yerusalem so wɔ afe 66 Y.B. mu ma ɛde Yerusalem ahohiahia no bae no.d Afei, ɛno akyi bere bi no, awiei no bɛba—wiase nyinaa sɛe a ɛte sɛ nea ɛbae wɔ afe 70 Y.B. mu no.

¹⁷ Bere a Yesu reka ahohiahia a abɛn yɛn pɛɛ no ho asɛm no, ɔkae sɛ: “Nna no mu ahohiahia [atoro som sɛe] akyi no, ntɛm ara na owia beduru sum, na ɔsram renhyerɛn, na nsoromma befi soro ahwehwe ase, na ɔsoro ahoɔden awosow. Ɛno na onipa ba no sɛnkyerɛnne bɛda adi ɔsoro, na asase so mmusuakuw nyinaa besu, na wobehu onipa no sɛ ɔreba ɔsoro mununkum so ahoɔden ne anuonyam kɛse mu.”—Mateo 24:29, 30.

¹⁸ Enti, Yesu ankasa ka sɛ “nna no mu ahohiahia akyi,” anwonwade bi befi soro aba. (Fa toto Yoel 2:28-32; 3:15 ho.) Eyi bɛma ehu aka adesamma asoɔdenfo a wɔn ho adwiriw wɔn no araa ma ‘wɔasu.’ ‘Ehu ne nneɛma a wɔhwɛ a ɛreba wiase no bɛma nnipa pii atotɔ beraw.’ Nanso, ɛremma saa wɔ nokware Kristofo fam! Eyinom ‘bɛmoma wɔn ti so ahwɛ soro, efisɛ wɔn gye rebɛn.’—Luka 21:25, 26, 28.

Atemmu Reba!

19. Yɛbɛyɛ dɛn atumi ahu bere a nguanten ne mpapo ho bɛ no benya ne mmamu?

¹⁹ Hyɛ no nsow sɛ Mateo 24:29-31 ka siei sɛ (1) onipa Ba no bɛba, (2) ɔbɛba anuonyam kɛse mu, (3) abɔfo bɛka ne ho, na (4) asase so mmusuakuw nyinaa behu no. Yesu san si saa nneɛma yi so dua wɔ ne bɛ a ɛfa nguanten ne mpapo ho no mu. (Mateo 25:31-46) Enti, yebetumi aka sɛ saa bɛ yi fa bere no ho, bere a ahohiahia no afi ase, ne bere a Yesu ne n’abɔfo bɛba abɛtra n’ahengua so abu atɛn no. (Yohane 5:22; Asomafo no Nnwuma 17:31; fa toto 1 Ahene 7:7; Daniel 7:10, 13, 14, 22, 26; Mateo 19:28 ho.) Henanom na wobebu wɔn atɛn, na dɛn na ebefi mu aba? Ɛbɛ no da no adi sɛ Yesu de n’adwene besi amanaman nyinaa so, te sɛ nea wɔahyiam wɔ ne soro ahengua no anim.

20, 21. Dɛn na ɛbɛba nguanten a wɔwɔ Yesu bɛ no mu no so? (b) Dɛn na ɛbɛba mpapo no so daakye?

²⁰ Wɔde mmarima ne mmea a wɔte sɛ nguanten no begyina Yesu nsa nifa a ɔdom wom no so. Dɛn ntia? Efisɛ wɔde hokwan a wonyae no yɛɛ Yesu nuanom no papa—Kristofo a wɔasra wɔn a wɔne Kristo bedi ade wɔ soro Ahenni mu no. (Daniel 7:27; Hebrifo 2:9–3:1) Nea ɛne bɛ no hyia no, Kristofo a wɔte sɛ nguanten ɔpepem pii na wɔagye Yesu honhom fam nuanom no atom na wɔreyɛ adwuma boa wɔn. Ne saa nti, saa “nnipakuw kɛse” no wɔ anidaso a egyina Bible so sɛ wobenya wɔn ti adidi mu wɔ “ahohiahia kɛse” no mu, na afei wɔatra ase daa wɔ Paradise asase so, wɔ Onyankopɔn Ahenni mu.—Adiyisɛm 7:9, 14; 21:3, 4; Yohane 10:16.

²¹ Hwɛ sɛnea ebewie mpapo no wɔ ɔkwan soronko so koraa! Wɔka wɔn ho asɛm wɔ Mateo 24:30 sɛ sɛ Yesu reba a ‘wobesu.’ Na wɔfata sɛ wosu, efisɛ na wɔagye din sɛ nkurɔfo a wɔpo Ahenni ho asɛmpa no, wɔsɔre tia Yesu asuafo, na wɔdɔ wiase a ɛretwam no. (Mateo 10:16-18; 1 Yohane 2:15-17) Yesu na ɔkyerɛ wɔn a wɔyɛ mpapo—na ɛnyɛ n’asuafo a wɔwɔ asase so no mu biara. Ɔka wɔn ho asɛm sɛ: “Eyinom befi hɔ akɔ daa ɔsɛe mu.”—Mateo 25:46, NW.

22. Yesu nkɔmhyɛ no fã bɛn na ɛsɛ sɛ yesusuw ho bio?

²² Nkɔmhyɛ a ɛwɔ Mateo ti 24 ne 25 no mu ntease a yɛanya no nkakrankakra no ayɛ anigye. Nanso, Yesu nkɔmhyɛ no fã bi wɔ hɔ a ɛfata sɛ yesusuw ho—‘akyide a ɛbɔ ɔman a egyina kronkronbea hɔ no.’ Yesu hyɛɛ n’akyidifo nkuran sɛ wɔmfa nhumu nni eyi ho dwuma na wonsiesie wɔn ho nyɛ ho biribi. (Mateo 24:15, 16) Dɛn ne saa “akyide” yi? Bere bɛn na ebegyina kronkronbea hɔ? Na ɛfa yɛn mprempren asetra ne daakye anidaso ho dɛn? Yebesusuw eyi ho wɔ asɛm a edi hɔ no mu.

“Nea Ɔkan No Ma Ɔnte Ase”

“Sɛ muhu akyide a ɛbɔ ɔman . . . no sɛ egyina kronkronbea hɔ no a, . . . ɛno na wɔn a wɔwɔ Yudea nguan nkɔ mmepɔw so.”—MATEO 24:15, 16.

 1. Dɛn na efii kɔkɔbɔ a Yesu de mae wɔ Luka 19:43, 44 no mu bae?

YƐN adwene a wɔtwe si amanehunu bi a ɛreba so no betumi ama yɛakwati. (Mmebusɛm 22:3) Enti susuw tebea a na Kristofo a wɔwɔ Yerusalem no wom bere a Romafo tow hyɛɛ wɔn so wɔ afe 66 Y.B. mu no akyi no ho hwɛ. Na Yesu abɔ kɔkɔ sɛ wobetwa kurow no ho ahyia na wɔasɛe no. (Luka 19:43, 44) Yudafo dodow no ara buu wɔn ani guu ne so. Nanso, n’asuafo no tiee ne kɔkɔbɔ no. Ɛno nti, wogyee wɔn fii amanehunu a ɛbae wɔ afe 70 Y.B. mu no mu.

 2, 3. Dɛn nti na ɛsɛ sɛ yɛma Yesu nkɔmhyɛ a ɛwɔ Mateo 24:15-21 no ho hia yɛn?

² Wɔ nkɔmhyɛ bi a ɛfa yɛn ho nnɛ mu no, Yesu kaa sɛnkyerɛnne bi a ɛwɔ afã pii a nea ɛka ho bi ne akodi, aduankɔm, asasewosow, ɔyaredɔm, ne Kristofo a wɔka Onyankopɔn Ahenni ho asɛm a wɔbɛtaa wɔn no ho asɛm. (Mateo 24:4-14; Luka 21:10-19) Yesu maa n’asuafo no agyiraehyɛde bi a ɛbɛboa wɔn ma wɔahu sɛ awiei no abɛn—‘akyide bi a ɛbɔ ɔman a egyina kronkronbea hɔ.’ (Mateo 24:15) Ma yɛnhwehwɛ saa nsɛm a mfaso wɔ so yi mu bio na yɛnhwɛ sɛnea ebetumi aka yɛn asetra mprempren ne daakye.

³ Bere a Yesu kaa sɛnkyerɛnne no ho asɛm wiei no, ɔkae sɛ: “Sɛ muhu akyide a ɛbɔ ɔman a odiyifo Daniel kae no sɛ egyina kronkronbea hɔ no a,—nea ɔkan no, ma ɔnte ase!—ɛno na wɔn a wɔwɔ Yudea nguan nkɔ mmepɔw so. Nea ɔwɔ ɔdan atifi no, mma onnsian mmmɛfa biribi mmfi ne dan mu; na nea ɔwɔ wuram nso nnsan n’akyi mmmɛfa ne ntama. Na wɔn a wɔafa afuru ne wɔn a wɔma nufu nna no mu no nnue! Na mommɔ mpae na mo aguan no amma awɔw bere anaa homeda. Na ɛno na ahohiahia kɛse a efi wiase asefi de besi nnɛ ebi mmae da . . . bɛba.”—Mateo 24:15-21.

 4. Dɛn na ɛkyerɛ sɛ Mateo 24:15 nyaa ne mmamu wɔ afeha a edi kan no mu?

⁴ Marko ne Luka kyerɛwtohɔ no de nneɛma foforo ka ho. Baabi a Mateo de “egyina kronkronbea hɔ” di dwuma no, Marko 13:14 ka sɛ “egyina nea ɛnsɛ.” Luka 21:20 de bi ka Yesu nsɛm no ho sɛ: “Sɛ muhu sɛ dɔm atwa Yerusalem ho ahyia a, ɛnde munhu sɛ ne bɔ abɛn.” Eyi boa yɛn ma yehu sɛ ntua a Romafo de baa Yerusalem ne n’asɔrefie—beae a na Yudafo no bu no kronkron nanso na Yehowa mmu no kronkron bio—so a efii ase wɔ afe 66 Y.B. mu no ka ne mmamu a edi kan no ho. Ɔsɛe koraa no bae bere a Romafo no sɛee kurow no ne n’asɔrefie no wɔ afe 70 Y.B. mu no. Saa bere no, na dɛn ne “akyide a ɛbɔ ɔman” no? Na ɔkwan bɛn so na na ‘egyina kronkronbea hɔ’? Nsɛmmisa yi ho mmuae bɛboa yɛn ma yɛate ne nnɛyi mmamu ase.

 5, 6. (a) Dɛn nti na wɔn a wɔkenkan Daniel ti 9 hia nhumu? (b) Ɔkwan bɛn so na Yesu nkɔmhyɛ a ɛfa “akyide” ho no nyaa ne mmamu?

⁵ Yesu hyɛɛ akenkanfo nkuran sɛ wɔmfa nhumu nni dwuma. Akenkanfo a wɔkenkan dɛn? Ɛda adi sɛ, ɛyɛ Daniel ti 9. Ɛhɔ na yehu nkɔmhyɛ bi a ɛkyerɛ bere a Mesia no bɛba, na ɛka siei sɛ mfe abiɛsa ne fã akyi no “wobetwa” no akyene. Nkɔmhyɛ no ka sɛ: “Amamfõyɛ akyide no atifi na ɔsɛefo bɛba, na ɛbɛkɔ so akosi sɛ ɔsɛe pasaa a wɔahyɛ no pintinn behwie agu amamfõyɛ no so.”—Daniel 9:26, 27; yɛn na yɛasi ɔfã bi so dua no; hwɛ Daniel 11:31; 12:11 nso.

⁶ Yudafo no susuwii sɛ na eyi fa asɔrefie no a Antiochus IV guu ho fĩ bɛyɛ mfe 200 a na atwam no ho. Nanso, Yesu twee adwene sii ade foforo so, hyɛɛ nhumu a wɔde bedi dwuma ho nkuran efisɛ na “akyide a ɛbɔ ɔman” no nnya mmae mmegyinaa “kronkronbea hɔ.” Ɛda adi sɛ na Romafo asraafo a na wɔde frankaa soronko bɛba hɔ wɔ afe 66 Y.B. mu no ho asɛm na Yesu reka. Na agyiraehyɛde a ɛte saa a na wɔde adi dwuma fi bere tenten no yɛ ahoni, na na ɛyɛ akyide ma Yudafo no.a Nanso, bere bɛn na na ‘ebegyina kronkronbea hɔ’? Ɛno bae bere a Romafo asraafo de wɔn agyiraehyɛde bɛtow hyɛɛ Yerusalem ne n’asɔrefie a na Yudafo no bu no kronkron no so no. Romafo no fii ase tutuu asɔrefie no ho ɔfasu no ase mpo. Nokwarem no, afei na ade a wɔafi bere tenten abu no akyide no gyina kronkronbea hɔ!—Yesaia 52:1; Mateo 4:5; 27:53; Asomafo no Nnwuma 6:13.

Ɛnnɛyi “Akyide a Ɛbɔ Ɔman” No

 7. Yesu nkɔmhyɛ bɛn na ɛrenya ne mmamu wɔ yɛn bere yi mu?

⁷ Efi Wiase Ko I so no, yɛahu Yesu sɛnkyerɛnne a wɔayɛ ho kyerɛwtohɔ wɔ Mateo ti 24 no mmamu kɛse. Nanso, kae ne nsɛm no: “Sɛ muhu akyide a ɛbɔ ɔman . . . no sɛ egyina kronkronbea hɔ no a, . . . ɛno na wɔn a wɔwɔ Yudea nguan nkɔ mmepɔw so.” (Mateo 24:15, 16) Ɛsɛ sɛ nkɔmhyɛ no fã yi nya ne mmamu wɔ yɛn bere yi mu nso.

 8. Ɔkwan bɛn so na Yehowa Adansefo ada ɛnnɛyi “akyide” no adi, wɔ mfe pii a atwam no mu?

⁸ Bere a January 1, 1921, Engiresi Ɔwɛn-Aban reka ahotoso a Yehowa asomfo wɔ sɛ saa nkɔmhyɛ yi benya mmamu ho asɛm no, ɛtwee adwene sii nsɛm a na ɛrekɔ so wɔ Mediterranea Supɔw so no so. Enti, December 15, 1929, Engiresi Ɔwɛn-Aban no kratafa 374 kaa no pefee sɛ: “Amanaman Apam no botae nyinaa ne sɛ ɛbɛma nkurɔfo atwe wɔn ho afi Onyankopɔn ne Kristo ho, na enti ɛne amamfõyɛ akyide no, Satan ahyehyɛde, na ɛyɛ akyide wɔ Onyankopɔn ani so.” Enti “akyide a ɛbɔ ɔman” no bae afe 1919 mu. Bere bi akyi no, Amanaman Nkabom no besii Apam no ananmu. Yehowa Adansefo fi bere tenten ada nnipa asomdwoe ho ahyehyɛde ahorow yi adi sɛ ɛyɛ akyide wɔ Onyankopɔn ani so.

 9, 10. Ɔkwan bɛn so na ahohiahia kɛse no ho ntease a na yɛwɔ no nyaa adwene a yɛwɔ wɔ bere a “akyide” no begyina kronkronbea hɔ no so nkɛntɛnso?

⁹ Adesua asɛm a edi kan no bɔɔ Mateo ti 24 ne 25 mu nsɛm fã kɛse no ara ho nkyerɛkyerɛmu mua. So ‘akyide a ɛbɔ ɔman a egyina kronkronbea hɔ no’ ho nkyerɛkyerɛmu no bi abam pɛpɛɛpɛ? Ɛte saa. Yesu nkɔmhyɛ no de ‘kronkronbea hɔ a egyina’ no bata ba a “ahohiahia” a wɔaka ho asɛm asie no bɛba no ho. Enti, ɛwom mpo sɛ “akyide no” atra hɔ fi bere tenten de, nanso ɛsɛ sɛ yesusuw abusuabɔ a ɛda ‘kronkronbea hɔ a ebegyina’ ne ahohiahia kɛse no ntam no ho. Ɔkwan bɛn so?

¹⁰ Bere bi na Onyankopɔn nkurɔfo ntease ne sɛ ahohiahia kɛse no fã a edi kan no fii ase afe 1914, na ɔfã a etwa to no bɛba wɔ Harmagedon ko no mu. (Adiyisɛm 16:14, 16; fa toto April 1, 1939, Engiresi Ɔwɛn-Aban, kratafa 110 ho.) Enti, yebetumi ate nea enti a bere bi na wosusuw sɛ nna a edi akyiri yi mu “akyide” no sɔre gyinaa kronkronbea hɔ wɔ Wiase Ko I akyi no ase.

11, 12. Wɔ 1969 mu no, ahohiahia kɛse no ho adwene a na yekura ho nsakrae bɛn na wɔde too gua?

¹¹ Nanso, akyiri yi yɛabɛte nneɛma ase wɔ ɔkwan foforo so koraa. Wɔ Yawda, July 10, 1969, wɔ “Asase so Asomdwoe” Amanaman Ntam Nhyiam ase wɔ New York Kuropɔn mu no, F. W. Franz, a saa bere no na ɔyɛ Ɔwɛn Aban Asafo no titrani abadiakyiri no maa ɔkasa bi a na ɛyɛ anigye yiye. Bere a Onua Franz reka Yesu nkɔmhyɛ no ho ntease dedaw ho asɛm no, ɔkae sɛ: “Wɔde nkyerɛkyerɛmu no mae sɛ na ‘ahohiahia kɛse’ no afi ase wɔ afe 1914 Y.B. mu, na wɔamma ankɔ so ankosi awiei saa bere no, na mmom Onyankopɔn maa Wiase Nyinaa Ko I no gyaee wɔ November, 1918 mu. Efi saa bere no, ná Onyankopɔn rema kwan ma ne Kristofo a wɔapaw wɔn a wɔasra wɔn nkaefo no awie wɔn dwumadi ansa na wama ‘ahohiahia kɛse’ no fã a etwa to no afi ase wɔ Harmagedon ko no mu.”

¹² Afei ɔde nkyerɛkyerɛmu titiriw a wɔayɛ mu nsakrae no mae sɛ: “Sɛnea ɛbɛyɛ na ɛne nea ɛbae wɔ afeha a edi kan no mu . . . ahyia no, nea ‘ahohiahia kɛse’ a edi kan no yɛɛ ho mfonini no amfi ase afe 1914 Y.B. mu. Mmom no, nea ɛbaa nnɛyi sɛnkyerɛnne kwan so Yerusalem so wɔ afe 1914-1918 mu no yɛ ‘awoko yaw mfiase’ ara kwa . . . ‘Ahohiahia kɛse’ a ebi remma saa bio no wɔ yɛn anim, efisɛ ɛkyerɛ sɛe a wɔbɛsɛe wiase atoro som ahemman (a Kristoman ka ho), na ‘Onyankopɔn, ade nyinaa so tumfoɔ no, da kɛse no mu ko’ a ɛba wɔ Harmagedon no bedi akyi.” Eyi kyerɛe sɛ ahohiahia kɛse no nyinaa wɔ yɛn anim.

13. Dɛn nti na ɛyɛ ne kwan so sɛ yɛbɛka sɛ “akyide” no a ‘ebegyina kronkronbea hɔ’ no bɛba daakye?

¹³ Eyi fa hu a yebehu bere a “akyide” no begyina kronkronbea hɔ no ho pɔtee. Kae nea esii wɔ afeha a edi kan no mu no. Romafo no tow hyɛɛ Yerusalem so wɔ afe 66 Y.B. mu, nanso wɔsan wɔn akyi mpofirim maa wonyaa kwan gyee Kristofo, “ɔhonam,” bi nkwa. (Mateo 24:22) Saa ara na yɛhwɛ kwan sɛ ahohiahia kɛse no befi ase nnansa yi ara, nanso wɔn a Onyankopɔn apaw wɔn no nti wobetwa nna no so. Hyɛ asɛntitiriw yi nsow: Wɔ tete de no ho no, ntua a Romafo a na Ɔsahene Gallus di wɔn anim de bae wɔ afe 66 Y.B. mu no na ɛyɛɛ ‘akyide a egyinaa kronkronbea hɔ no’ mmamu. Saa ntua no nnɛyi nsusuwso—ahohiahia kɛse no a ɛbɛba mpofirim—no da so ara wɔ yɛn anim. Enti ɛda adi sɛ afei na “akyide a ɛbɔ ɔman,” a atra hɔ fi afe 1919 no rebegyina kronkronbea hɔ.b Eyi bɛba wɔ ɔkwan bɛn so? Na ɔkwan bɛn so na ebetumi aka yɛn?

Daakye Ntua

14, 15. Ɔkwan bɛn so na Adiyisɛm ti 17 boa yɛn ma yɛte nsɛm a ebesisi de akosi Harmagedon no ase?

¹⁴ Adiyisɛm nhoma no ka ɔsɛe pasaa a ɛbɛba atoro som so daakye ho asɛm. Eti 17 ka Onyankopɔn atemmu a ɛbɛba ‘Babilon Kɛse, nguaman na’—wiase atoro som ahemman no so ho asɛm. Kristoman di mu akoten, na wɔkyerɛ sɛ wɔne Onyankopɔn ayɛ apam. (Fa toto Yeremia 7:4 ho.) Atoro som ahorow a Kristoman ka ho, fi bere tenten ne ‘asase so ahene’ abɔ aguaman, nanso eyi bɛba awiei wɔ saa som ahorow no sɛe mu. (Adiyisɛm 17:2, 5) Wɔ henanom nsam?

¹⁵ Adiyisɛm ka “aboa kɔkɔɔ” bi a ɔwɔ hɔ bere bi, a ofi hɔ, na afei ɔsan ba ho asɛm. (Adiyisɛm 17:3, 8) Wiase atumfoɔ na wogyina saa aboa yi akyi. Nkyerɛkyerɛmu a wɔde ma wɔ nkɔmhyɛ no mu no boa yɛn ma yehu saa sɛnkyerɛnne kwan so aboa yi sɛ asomdwoe ho ahyehyɛde a ɛbae wɔ afe 1919 mu sɛ Amanaman Apam (“akyide”), na mprempren ɛne Amanaman Nkabom no. Adiyisɛm 17:16, 17 da no adi sɛ Onyankopɔn de bɛhyɛ nnipa sodifo bi a wɔwɔ din wɔ “aboa” yi mu komam ma wɔasɛe wiase atoro som ahemman no. Saa ntua no na ebefi ahohiahia kɛse no ase.

16. Nyamesom ho nsɛm bɛn na ɛrekɔ so a ɛfata sɛ yɛhyɛ no nsow?

¹⁶ Esiane sɛ ahohiahia kɛse no mfiase da so ara wɔ yɛn anim nti, so ‘kronkronbea hɔ a ebegyina no’ da so ara wɔ yɛn anim? Ɛte saa. Esiane sɛ “akyide” no bae wɔ afeha yi mfiase na atra hɔ mfirihyia pii nti, ɛrenkyɛ koraa, ebegyina “kronkronbea hɔ” wɔ ɔkwan soronko so. Sɛnea ɛbɛyɛ sɛ Kristo akyidifo a wɔtraa ase wɔ afeha a edi kan no mu de anidahɔ hwɛɛ ɔkwan a ɛbɛfa so ‘agyina kronkronbea hɔ’ no, saa ara na Kristofo a wɔwɔ hɔ nnɛ rehwɛ kwan. Nokwarem no, ɛsɛ sɛ yɛtwɛn ma enya ne mmamu ankasa ansa na yɛahu ɛho nsɛm nyinaa. Nanso, ɛsɛ sɛ yɛhyɛ no nsow sɛ wɔ nsase bi so no, ɛda adi sɛ wɔresɔre tia nyamesom dedaw. Amammuifo bi ne nkurɔfo bi a na anka wɔyɛ Kristofo a wɔawae afi nokware gyidi no ho ayɛ biako resɔre tia nyamesom nyinaa, na ne titiriw no, nokware Kristofo. (Dwom 94:20, 21; 1 Timoteo 6:20, 21) Enti, mprempren mpo amammui mu atumfoɔ no ne ‘oguammaa no reko,’ na sɛnea Adiyisɛm 17:14 kyerɛ no, ɔko yi mu bɛyɛ den. Esiane sɛ wɔn nsa ntumi nka Onyankopɔn Guammaa—Yesu Kristo a ɔwɔ n’anuonyam mu—ankasa nti, wɔbɛkɔ so ako atia Onyankopɔn nokware asomfo, ‘n’akronkronfo,’ no titiriw. (Daniel 7:25; fa toto Romafo 8:27; Kolosefo 1:2; Adiyisɛm 12:17 ho.) Onyankopɔn ama yɛn awerɛhyem sɛ Oguammaa no ne wɔn a wɔka ne ho no bedi nkonim.—Adiyisɛm 19:11-21.

17. Bere a yɛnka no pɔtee no, dɛn na yebetumi aka wɔ ɔkwan a “akyide” no bɛfa so abegyina kronkronbea hɔ no ho?

¹⁷ Yenim sɛ ɔsɛe retwɛn atoro som. ‘Ahotefo mogya abow’ Babilon Kɛse no, na wayɛ n’ade sɛ ɔhemmaa, nanso ne sɛe bɛba ɔkwan biara so. Nkɛntɛnso bɔne a wanya wɔ asase so ahene so no bɛsakra mpofirim ma ‘mmɛn du no ne aboa no’ atan no. (Adiyisɛm 17:6, 16; 18:7, 8) Sɛ “aboa kɔkɔɔ” no tow hyɛ nyamesom aguaman no so a, ɛnde na “akyide” no gyina beae a Kristoman bu no kronkronbea hɔ a ɛrebɛyɛ bɔne ama wɔn.c Enti ɔsɛe no befi ase wɔ Kristoman a enni nokware a ebu ne ho kronkron no so.

‘Yenguan’—Ɔkwan Bɛn So?

18, 19. Dɛn na yebetumi aka de akyerɛ sɛ ‘mmepɔw so a yebeguan akɔ’ no renkyerɛ ɔsom a yɛbɛsesa?

¹⁸ Bere a Yesu kaa ‘kronkronbea hɔ a akyide a ɛbɔ ɔman no begyina’ ho asɛm wiei no, ɔbɔɔ wɔn a wɔwɔ nhumu no kɔkɔ sɛ wɔnyɛ ho biribi. So na ɔkyerɛ sɛ saa nna a edi akyiri koraa no mu—bere a “akyide” no ‘gyina kronkronbea hɔ’—no, nnipa pii beguan afi atoro som mu aba nokware som mu? Dabi. Susuw ne mmamu a edi kan ho hwɛ. Yesu kae sɛ: “Ɛno na wɔn a wɔwɔ Yudea nguan nkɔ mmepɔw so; na nea ɔwɔ ɔdan atifi no nnsian mmma fam, nanso ɔnnhyɛn mu mmmɛfa biribi ne fi. Na nea ɔwɔ afuw mu no nnsan n’akyi mmmɛfa ne ntama. Na wɔn a wɔafa afuru ne wɔn a wɔma nufu nna no mu no nnue! Na mommɔ mpae, na amma awɔw bere mu.”—Marko 13:14-18; yɛn na yɛasi ɔfã bi so dua no.

¹⁹ Yesu anka sɛ wɔn a wɔwɔ Yerusalem nkutoo na ɛsɛ sɛ woguan, na ama n’asɛm no ayɛ sɛ nea na ɔrekyerɛ sɛ ɛsɛ sɛ woguan fi Yudafo som no asoɛe; saa ara na ne kɔkɔbɔ no anka ɔsom a wɔbɛsesa ho asɛm—sɛ wonguan mfi atoro som mu nkɔ nokware som mu. Ɛda adi sɛ na Yesu asuafo no nhia ɔsom biako mu a wobefi akɔ foforo mu ho kɔkɔbɔ biara; na wɔabɛyɛ nokware Kristofo dedaw. Na ntua a ɛbaa afe 66 Y.B. mu no ankanyan Yudasom mufo a na wɔwɔ Yerusalem ne Yudea nyinaa no amma wɔannyae wɔn som ammɛyɛ Kristofo. Ɔbenfo Heinrich Graetz ka sɛ wɔn a wotĩĩ Romafo a na wɔreguan no san baa kurow no mu: “Yudafo anuɔdenfo a na wɔretow akodi nkonimdi nnwom no san baa Yerusalem (October da a ɛto so 8), a na wɔn koma ani agye, na na wɔwɔ anidaso sɛ wɔanya ahofadi. . . . So na Onyankopɔn mfii mmɔborohunu mu mmoaa wɔn sɛnea na Waboa wɔn agyanom no? Ná Yudafo anuɔdenfo no nsuro nea ɛbɛba daakye.”

20. Ɔkwan bɛn so na tete asuafo no tiee Yesu kɔkɔbɔ a ese wonguan nkɔ mmepɔw so no?

²⁰ Ɛnde, ɔkwan bɛn so na wɔn a na wɔapaw wɔn saa bere no a na wɔnnɔɔso koraa no yɛɛ Yesu afotu no ho biribi? Wɔnam Yudea a wofii na woguan kɔɔ mmepɔw so wɔ Yordan agya no so kyerɛe sɛ na wɔnyɛ Yudafo nhyehyɛe no fã wɔ amammuisɛm anaa nyamesom mu. Wogyaw wɔn mfuw ne wɔn afie, na wɔamfa wɔn agyapade a ɛwɔ fie mpo. Bere a na wɔwɔ Yehowa ahobammɔ ne ne mmoa mu ahotoso no, wɔde ne som dii biribi foforo biara a na ɛte sɛ nea ɛho hia no kan.—Marko 10:29, 30; Luka 9:57-62.

21. Sɛ “akyide” no de ne ntua no ba a, dɛn na ɛsɛ sɛ yɛhwɛ kwan?

²¹ Afei, susuw ne mmamu kɛse no ho hwɛ. Yɛde mfe pii na aka akyerɛ nkurɔfo sɛ womfi atoro som mu mmra nokware som mu. (Adiyisɛm 18:4, 5) Nnipa ɔpepem pii ayɛ saa. Yesu nkɔmhyɛ no nkyerɛ sɛ sɛ ahohiahia kɛse no fi ase a, nnipadɔm bɛdan aba nokware som mu; nokwarem no, Yudafo nnipadɔm bi ansesa wɔn som wɔ afe 66 Y.B. mu. Nanso, nokware Kristofo benya biribi titiriw a wobegyina so atie Yesu kɔkɔbɔ no na wɔaguan.

22. Dɛn na Yesu afotu a ese yenguan nkɔ mmepɔw so no a yebetie no betumi de aba?

²² Mprempren, yentumi nka ahohiahia kɛse no ho nsɛm nyinaa, nanso yebetumi aka no yiye sɛ wɔ yɛn fam de, aguan a Yesu kaa ho asɛm no renkyerɛ asase no fã bi a yebeguan akɔ. Onyankopɔn nkurɔfo wɔ asase so mmaa nyinaa dedaw, ɛkame ayɛ sɛ yɛwɔ baabiara. Nanso, yebetumi anya ahotoso sɛ, sɛ ɛho behia sɛ Kristofo guan a, ɛbɛyɛ nsonsonoe kɛse a wɔbɛkɔ so ama ada wɔne atoro nyamesom ahyehyɛde ahorow ntam. Ɛho hia nso sɛ Yesu bɔɔ kɔkɔ sɛ obi nnsan nnkɔ ne fie nnkɔfa ntama anaa nneɛma foforo bi. (Mateo 24:17, 18) Enti ebetumi aba sɛ sɛnea yebu honam fam nneɛma ho sɔhwɛ ahorow no wɔ yɛn anim; so ɛno ne ade a ɛho hia sen biara, anaasɛ nkwagye a wɔn a wogyina Onyankopɔn afã benya no na ɛho hia kɛse? Yiw, yɛn aguan no betumi ama yɛn ho akyere yɛn na ama yɛahwere nneɛma bi. Ɛsɛ sɛ yɛyɛ krado sɛ yɛbɛyɛ nea ɛho hia sɛ yɛyɛ biara sɛnea yɛn mfɛfo a woguan fii Yudea kɔɔ Perea, wɔ Yordan agya no yɛe wɔ afeha a edi kan no mu no.

23, 24. (a) Ɛhe nkutoo na yebenya ahobammɔ? (b) Nkɛntɛnso bɛn na ɛsɛ sɛ Yesu kɔkɔbɔ a ɛfa ‘akyide no a ebegyina kronkronbea hɔ’ ho no nya wɔ yɛn so?

²³ Ɛsɛ sɛ yenya ahotoso sɛ Yehowa ne n’ahyehyɛde a ɛte sɛ bepɔw no da so yɛ yɛn guankɔbea. (2 Samuel 22:2, 3; Dwom 18:2; Daniel 2:35, 44) Ɛhɔ mmom na yebenya ahobammɔ! Yɛrensuasua adesamma mu dodow no ara a wobeguan akɔ “abodan” mu na wɔakohintaw “mmepɔw mu”—nnipa ahyehyɛde ahorow a ɛbɛtra hɔ bere tiaa bi wɔ Babilon Kɛse sɛe akyi no. (Adiyisɛm 6:15; 18:9-11) Ampa, nneɛma mu betumi ayɛ den yiye—sɛnea ɛyɛe wɔ afe 66 Y.B. mu ama mmea a na wɔafa afuru a woguan fii Yudea anaa obiara a na ɛsɛ sɛ oguan fi Yerusalem wɔ awɔw ne osutɔ bere mu no. Nanso, yebetumi anya ahotoso sɛ Onyankopɔn bɛma nnipa bi anya wɔn ti adidi mu. Enti momma yemfi nnɛ nhyɛ Yehowa ne ne Ba a mprempren ɔyɛ Ahenni no so Hene no mu ahotoso a yɛwɔ no mu den.

²⁴ Biribiara nni hɔ a enti ɛsɛ sɛ yesuro nea ɛrebɛba no. Na Yesu mpɛ sɛ n’asuafo a wɔwɔ hɔ saa bere no suro, na ɔmpɛ sɛ yesuro nnɛ anaa nna a ɛrebɛba no mu. Ɔbɔɔ yɛn kɔkɔ na ama yɛatumi asiesie yɛn koma ne yɛn adwene. Sɛnea ɛte no, sɛ wɔsɛe atoro som ne nhyehyɛe bɔne yi nkae no a, wɔrentwe Kristofo a wɔyɛ osetie no aso. Wɔbɛte ‘akyide a egyina kronkronbea hɔ’ no ase na wɔatie ho kɔkɔbɔ no. Na wobegyina wɔn gyidi a ɛyɛ den no so na ama wɔayɛ wɔn ade ntɛm so. Ɛmmra sɛ yɛn werɛ remfi Yesu bɔhyɛ a ɛne sɛ: “Nea obegyina akodu awiei no, ɔno na wobegye no” no.—Marko 13:13.

[Ase hɔ nsɛm]

So Wokae?

◻ Ɔkwan bɛn so na “akyide a ɛbɔ ɔman” no daa ne ho adi wɔ afeha a edi kan no mu?

◻ Dɛn nti na ntease wom sɛ yebesusuw sɛ nnɛyi “akyide” no begyina kronkronbea hɔ daakye?

◻ “Akyide” no ntua bɛn na Adiyisɛm kaa ho asɛm siei?

◻ “Aguan” bɛn na ebetumi aba sɛ ɛda so ara hia ma yɛn?

[Kratafa 16 mfonini]

Wɔfrɛ Babilon Kɛse no ‘nguaman na’

[Kratafa 17 mfonini]

Aboa kɔkɔɔ a Adiyisɛm ti 17 ka ne ho asɛm no ne “akyide” a Yesu kaa ho asɛm no

[Kratafa 18 mfonini]

Aboa no na obedi ntua a wɔde bɛsɛe nyamesom no anim

Ma W’ani Nna Hɔ Na Yɛ Nsi!

“Enti monwɛn, na munnim da anaa dɔn ko no.”—MATEO 25:13.

 1. Dɛn na na ɔsomafo Yohane rehwɛ kwan?

WƆ Yesu nkɔmmɔbɔ a etwa to wɔ Bible mu no, ɔhyɛɛ bɔ sɛ: “Mereba ntɛm.” Ne somafo Yohane buae sɛ: “Amen, Awurade Yesu, bra!” Akyinnye biara nni ho sɛ na ɔsomafo Yohane gye di yiye sɛ Yesu bɛba. Na Yohane ka asomafo a wobisaa Yesu sɛ: “Bere bɛn na eyinom bɛba, na dɛn na ɛbɛyɛ wo ba a woaba [Hela, pa·rou·siʹa] ne nneɛma nhyehyɛe no awiei ho sɛnkyerɛnne?” no ho. Yiw, Yohane de ahotoso hwɛɛ ba a na Yesu bɛba daakye no kwan.—Adiyisɛm 22:20; Mateo 24:3.

 2. Ɛdefa Yesu mmae ho no, tebea no te dɛn wɔ asɔre ahorow mu?

² Ahotoso a ɛte saa ho yɛ na nnɛ. Asɔre ahorow pii kyerɛkyerɛ ba a Yesu ‘reba’ ho ade, nanso emufo kakraa bi pɛ na wɔhwɛ kwan ankasa. Wɔde wɔn asetra kyerɛ saa. The Parousia in the New Testament nhoma no ka sɛ: “Parousia ho anidaso ketewaa bi pɛ na ɛda adi wɔ asɔrefo no asetra, wɔn nsusuwii, ne wɔn dwumadi mu. . . . Ahokeka a emu yɛ hyew a ɛsɛ sɛ asɔre no de yɛ adwensakra ne asɛmpatrɛw adwuma no mu agow, sɛ ɛnsae koraa mpo a.” Nanso, ɛnyɛ obiara na ɔte saa!

 3. (a) Nokware Kristofo te nka dɛn wɔ pa·rou·siʹa no ho? (b) Dɛn titiriw na yɛrebesusuw ho mprempren?

³ Yesu nokware asuafo de anigye retwɛn mprempren nneɛma nhyehyɛe bɔne yi awiei. Bere a yɛde nokwaredi reyɛ saa no, ɛsɛ sɛ yenya adwempa wɔ nneɛma a ɛfa Yesu mmae no nyinaa ho no ho na yedi ho dwuma ɔkwampa so. Ɛno bɛboa yɛn ma ‘yɛagyina akodu awiei na wɔagye yɛn nkwa.’ (Mateo 24:13) Bere a Yesu rehyɛ nkɔm a ɛwɔ Mateo ti 24 ne 25 no, ɔde afotu bi a nyansa wom mae a yebetumi de adi dwuma ma ɛso aba yɛn mfaso daa. Mmɛ bi wɔ ti 25 a ɛda adi sɛ wunim, a emu biako a ɛfa mmabaa du (mmabaa nyansafo ne nkwasea) ho, ne talente bɛ no, ka ho. (Mateo 25:1-30) Yɛbɛyɛ dɛn anya saa mmɛ yi so mfaso?