Ebesi wo Dɛn wɔ Atemmu Agua no Anim?

“Onipa ba no bɛba n’anuonyam mu a n’abɔfo nyinaa ka ne ho no, ɔbɛtra n’anuonyam ahengua so.”—MATEO 25:31.

1-3. Dɛn nti na yebetumi anya awerɛhyem wɔ atɛntrenee ho?

‘ODII BEM ANAA ODII FƆ?’ Sɛ nnipa pii te sɛ wɔadi asɛm bi wɔ asennibea a, saa na wobisa. Ebia atemmufo ne asenni baguafo bɛbɔ mmɔden sɛ wobedi asɛntrenee, nanso mpɛn pii no wobu atɛntrenee? Wontee atɛnkyea ne animhwɛ wɔ asenni mu ho asɛm? Ntɛnkyea a ɛte saa no nyɛ ade foforo sɛnea yehu wɔ Yesu mfatoho a ɛwɔ Luka 18:1-8 no mu no.

² Ɛmfa ho nea woahu wɔ onipa atemmu ho no, hyɛ asɛm a Yesu ka twaa to yi nsow: “Onyankopɔn . . . [remmu] ntɛn nnye wɔn a wapaw wɔn a wosu frɛ no awia ne anadwo no anaa? Mise mo sɛ, obebu ntɛn agye wɔn ntɛm. Nanso onipa ba no ba a, so anka obehu gyidi asase so?”

³ Yiw, Yehowa bɛhwɛ ma n’asomfo nsa aka atɛntrenee awiei koraa. Asɛm no fa Yesu nso ho, titiriw nnɛ, efisɛ yɛte mprempren nhyehyɛe yi “nna a edi akyiri” mu. Ɛrenkyɛ Yehowa nam ne Ba a ɔwɔ tumi no so bɛpopa amumɔyɛ afi asase so koraa. (2 Timoteo 3:1; 2 Tesalonikafo 1:7, 8; Adiyisɛm 19:11-16) Yebetumi ahu nea Yesu bɛyɛ wom no ho biribi afi ne mfatoho ahorow a etwa to no biako a wɔtaa frɛ no nguanten ne mpapo ho bɛ no mu.

 4. Ntease bɛn na yɛanya wɔ bere a nguanten ne mpapo ho bɛ no benya mmamu ho, nanso dɛn nti na yebesusuw ɛbɛ no ho seesei? (Mmebusɛm 4:18)

⁴ Bere tenten a atwam ni no, na yɛte ase sɛ ɛbɛ no fa bere a Yesu traa ase sɛ Ɔhene wɔ 1914 na efi saa bere no ɔrebu atɛn—ma nnipa a wɔbɛyɛ wɔn ade sɛ nguan no anya daa nkwa, na mpapo no anya daa owu—no ho. Nanso ɛbɛ no a yɛsan susuw ho no da ntease foforo adi wɔ bere a ebesi ne nea ɛkyerɛ no ho. Saa ntease a wɔama mu ada hɔ yiye yi si hia a yɛn asɛnka adwuma no ho hia ne nea esu a nkurɔfo da no adi wɔ ho no kyerɛ so dua. Nea ɛbɛyɛ na yɛahu ɛbɛ no ho ntease a emu dɔ yi nnyinaso no, momma yensusuw nea Bible da no adi wɔ Yehowa ne Yesu ho sɛ Ahene ne Atemmufo no ho.

Yehowa Sɛ́ Ɔtemmufo Pumpuni

 5, 6. Dɛn nti na ɛfata sɛ yebu Yehowa sɛ ɔyɛ Ɔhene san yɛ Temmufo?

⁵ Yehowa ne amansan no sodifo a ɔwɔ ade nyinaa so tumi. Esiane sɛ onni mfiase nni awiei nti, ɔyɛ “mmeresanten Hene.” (1 Timoteo 1:17; Dwom 90:2, 4; Adiyisɛm 15:3) Ɔwɔ tumi sɛ ɔyeyɛ atɔremude anaa mmara, na ɔhwɛ ma wodi so. Nanso tumi a ɔwɔ no bi ne sɛ ɔyɛ Ɔtemmufo. Yesaia 33:22 ka sɛ: “[Yehowa] ne yɛn temmufo, [Yehowa] ne yɛn mmarahyɛfo, [Yehowa] ne yɛn hene, ɔno na obegye yɛn nkwa.”

⁶ Onyankopɔn asomfo abu Yehowa sɛ ɔne Ɔtemmufo wɔ nsɛm ne nsɛmpɔw mu fi bere tenteenten. Sɛ nhwɛso no, bere a “Nea obu asase nyinaa atɛn no” susuw adanse a ɛfa Sodom ne Gomora amumɔyɛ ho no ho no, obuu atɛn sɛ ɛhɔfo no fata ɔsɛe, na ɔhwɛ maa saa trenee atemmu no baa so. (Genesis 18:20-33; Hiob 34:10-12) Hwɛ awerɛhyem a ɛsɛ sɛ ɛma yenya sɛ yebehu sɛ Yehowa yɛ Ɔtemmufo a ɔteɛ a obetumi adi n’atemmu ho dwuma bere nyinaa!

 7. Ɔkwan bɛn so na Yehowa ne Israel dii sɛ Ɔtemmufo?

⁷ Wɔ tete Israel no, ɛtɔ da bi a na Yehowa bu atɛn tee. Sɛ wowɔ hɔ saa bere no a, anka wo koma ntɔ wo yam esiane sɛ wunim sɛ Ɔtemmufo a ɔyɛ pɛ na ɔredi nsɛm ho dwuma nti? (Leviticus 24:10-16; Numeri 15:32-36; 27:1-11) Onyankopɔn de ‘atemmude’ nso a na ne nyinaa ye mae sɛ wɔmfa nyɛ gyinapɛn mmu atɛn. (Leviticus 25:18, 19; Nehemia 9:13; Dwom 19:9, 10; 119:7, 75, 164; 147:19, 20) Ɔno ne “Nea obu asase nyinaa atɛn no,” enti yɛn nyinaa ho wɔ asɛm no mu.—Hebrifo 12:23.

 8. Anisoadehu a ɛho hia bɛn na Daniel nyae?

⁸ Yɛwɔ asɛm yi ho adanse a efi “obi a ɔde n’ani hui” hɔ. Wɔmaa odiyifo Daniel nyaa anisoadehu a ɛfa nkekaboa a wɔn ho yɛ hu a wogyina hɔ ma nniso anaa nhemman ho. (Daniel 7:1-8, 17) Ɔde kaa ho sɛ: “Wosisii agua, na obi a ne nna akyɛ bɛtraa ase, n’atade hoa sɛ nsukyerɛmma.” (Daniel 7:9) Hyɛ no nsow sɛ Daniel huu nhengua, “na Obi a ne nna akyɛ [Yehowa] bɛtraa ase.” Bisa wo ho sɛ, ‘Nea Daniel hui no yɛ Onyankopɔn a na ɔrebɛyɛ Ɔhene anaa?’

 9. Dɛn ne ntease biako a ‘tra a wɔtra ase’ wɔ ahengua so no kura? Ma nhwɛso ahorow.

⁹ Wiɛ, sɛ yɛkenkan sɛ obi “bɛtraa ase” wɔ ahengua so a, ebia yebesusuw sɛ ɔbɛyɛɛ ɔhene, efisɛ ɛtɔ da bi a Bible no de kasa a ɛte saa di dwuma. Sɛ nhwɛso no: “Na [Simri bedii] hene, na ɔtraa ahengua so ara pɛ no, . . . ” (1 Ahene 16:11; 2 Ahene 10:30; 15:12; Yeremia 33:17) Mesia ho nkɔmhyɛ bi kae sɛ: “Watra n’agua so adi hene.” Enti, sɛ ‘obi bɛtra ahengua so’ no betumi akyerɛ sɛ wabɛyɛ ɔhene. (Sakaria 6:12, 13) Wɔka Yehowa ho asɛm sɛ Ɔhene a ɔte ahengua so. (1 Ahene 22:19; Yesaia 6:1; Adiyisɛm 4:1-3) Ɔyɛ “mmeresanten Hene.” Nanso, sɛ ɔfa tumidi wɔ ɔkwan foforo so a, wotumi ka ne ho asɛm sɛ wabɛyɛ Ɔhene, te sɛ nea watra n’ahengua so foforo.—1 Beresosɛm 16:1, 31; Yesaia 52:7; Adiyisɛm 11:15-17; 15:3; 19:1, 2, 6.

10. Dɛn ne dwuma titiriw a Israel ahene dii? Ma mfatoho.

¹⁰ Nanso asɛnhia bi ni: Dwuma titiriw a tete ahene dii ne sɛ wodii nsɛm buu ntɛn. (Mmebusɛm 29:14) Kae sɛnea Salomo de nyansa buu atɛn bere a na mmea baanu repere akokoaa koro ho no. (1 Ahene 3:16-28; 2 Beresosɛm 9:8) Mmeae a na ɛwɔ n’ahemfie hɔ no biako ne “ahengua abrannaa a ɛhɔ na obebu atɛn” a na wɔsan frɛ no “atemmu abrannaa.” (1 Ahene 7:7) Wɔkaa Yerusalem ho asɛm sɛ baabi a “wɔde nkongua sisi maa atemmu no.” (Dwom 122:5) Ɛda adi pefee sɛ ‘tra a obi tra ahengua so’ no betumi akyerɛ tumi a ɔde bu atɛn nso.—Exodus 18:13; Mmebusɛm 20:8.

11, 12. (a) Tra a Yehowa traa ase a wɔaka ho asɛm wɔ Daniel ti 7 no kyerɛ dɛn? (b) Ɔkwan bɛn so na kyerɛw nsɛm foforo si so dua sɛ Yehowa tumi tra ase bu atɛn?

¹¹ Afei momma yɛnsan nkɔ baabi a Daniel hui sɛ ‘Obi a ne Nna akyɛ bɛtraa ase’ no. Daniel 7:10 (NW) de ka ho sɛ: “Asenni Bagua no bɛtraa ase, na wobuebuee nhoma mu.” Yiw, Nea ne Nna akyɛ no traa ase sɛ ɔrebu atɛn wɔ wiase tumidi ho abu atɛn sɛ onipa Ba no fata sɛ odi hene. (Daniel 7:13, 14) Afei yɛkenkan sɛ ‘Nea ne Nna akyɛ no bae, na wobuu atɛn maa ahotefo no,’ wɔn a wobuu atɛn sɛ wɔfata sɛ wɔne onipa Ba no di hene no. (Daniel 7:22) Awiei koraa no, “Asenni Bagua no traa ase,” na wobuaa wiase tumi a etwa to no fɔ.—Daniel 7:26, NW.a

¹² Enti, na hu a Daniel hui sɛ Onyankopɔn ‘traa ahengua so’ no kyerɛ ba a Ɔreba abebu atɛn. Ná Dawid adi kan ato dwom sɛ: “[Yehowa,] woabu atɛn ama me adi m’asɛm, woatra atemmu agua so sɛ ɔtemmufo trenee.” (Dwom 9:4, 7) Yoel nso kyerɛwee sɛ: “Amanaman nsɔre ntu mmra Yehosafat bon no mu; na ɛhɔ na [me, Yehowa] mɛtra ase mabu amanaman a wofi afa nyinaa atɛn.” (Yoel 3:12; fa toto Yesaia 16:5 ho.) Yesu ne Paulo nyinaa kɔɔ asenni bagua anim maa onipa bi traa ase dii wɔn asɛm buu wɔn atɛn.b—Yohane 19:12-16; Asomafo no Nnwuma 23:3; 25:6.

Yesu Gyinabea

13, 14. (a) Awerɛhyem bɛn na Onyankopɔn nkurɔfo nyae sɛ Yesu bɛyɛ Ɔhene? (b) Bere bɛn na Yesu traa n’ahengua so, na ɔkwan bɛn so na odii ade fi afe 33 Y.B. mu?

¹³ Yehowa yɛ Ɔhene san yɛ Ɔtemmufo. Yesu nso ɛ? Ɔbɔfo a ɔde n’awo ho amanneɛbɔ mae no kae sɛ: “[Yehowa] Nyankopɔn de n’agya Dawid ahengua bɛma no . . . na n’ahenni no to rentwa da.” (Luka 1:32, 33) Ná Yesu bɛyɛ Dawid ahenni no difo akosi daa. (2 Samuel 7:12-16) Obefi soro adi hene, efisɛ Dawid kae sɛ: “[Yehowa] asɛm a osee me wura [Yesu] ni: Tra me nifa kosi sɛ mede w’atamfo mɛyɛ wo nan ase ntiaso. Wo tumidi poma no, [Yehowa] fi Sion bɛteɛ. ‘Di hene w’atamfo mfinimfini!’”—Dwom 110:1-4.

¹⁴ Ɛno bɛba bere bɛn? Yesu anni Hene bere a na ɔyɛ onipa no. (Yohane 18:33-37) Wɔ afe 33 Y.B. mu no, owui, wonyanee no, na ɔkɔɔ soro. Hebrifo 10:12 ka sɛ: “Ɔno de, onya bɔɔ bɔne ho afɔre biako no, ɔkɔtraa Onyankopɔn nifa ma ɛkɔ so ara.” Tumi bɛn na na Yesu wɔ? “[Onyankopɔn de] no traa ne nifa ɔsoro . . . panyinni ne tumidi ne ahoɔden ne wurayɛ nyinaa so . . . na ɔde no ayɛ ade nyinaa so ti ama asafo [no].” (Efesofo 1:20-22) Esiane sɛ na Yesu di Kristofo so hene saa bere no nti, Paulo tumi kyerɛwee sɛ Yehowa na “wayi yɛn afi sum tumi ase de yɛn aba ne dɔba ahenni mu.”—Kolosefo 1:13; 3:1.

15, 16. (a) Dɛn nti na yɛka sɛ Yesu ammɛyɛ Onyankopɔn Ahenni no Hene wɔ 33 Y.B. mu? (b) Bere bɛn na Yesu fii ase dii ade wɔ Onyankopɔn Ahenni no mu?

¹⁵ Nanso, saa bere no, Yesu anyɛ amanaman no so Hene ne Temmufo. Ɔtraa Onyankopɔn nkyɛn twɛn kosii sɛ bere bɛso ma wayɛ Onyankopɔn Ahenni no Hene. Paulo kyerɛw faa ne ho sɛ: “Abɔfo no mu hena ho na waka pɛn sɛ: Tra me nifa so kosi sɛ mede w’atamfo mɛyɛ wo nan ase ntiaso?”—Hebrifo 1:13.

¹⁶ Yehowa Adansefo atintim nsɛm pii a edi adanse sɛ bere a Yesu de twɛnee no baa awiei wɔ 1914 mu, bere a ɔbɛyɛɛ Onyankopɔn Ahenni no sodifo wɔ soro a aniwa nhu hɔ no. Adiyisɛm 11:15, 18 se: “Wiase ahenni ayɛ yɛn Awurade ne Kristo no de, na obedi hene daa daa.” “Na amanaman no bo afuw, na w’abufuw . . . bere no adu.” Yiw, amanaman no bo fuw wɔn ho wɔn ho wɔ Wiase Ko I no mu. (Luka 21:24) Akodi, asasewosow, ɔyaredɔm, aduankɔm, ne nneɛma a ɛtete saa a yɛahu fi 1914 no si so dua sɛ seesei Yesu redi ade wɔ Onyankopɔn Ahenni no mu, na wiase awiei koraa abɛn.—Mateo 24:3-14.

17. Nsɛntitiriw bɛn na ɛde besi ha no yɛasusuw ho?

¹⁷ Yɛmmɔ no mua wɔ saa kwan yi so: Wobetumi aka sɛ Onyankopɔn atra ahengua so sɛ Ɔhene, nanso wɔ ntease foforo mu no, obetumi atra n’ahengua so abu atɛn. Wɔ afe 33 Y.B. mu no, Yesu traa Onyankopɔn nifa so, na seesei ɔyɛ Ahenni no so Hene. Nanso, Yesu a mprempren ɔyɛ Ɔhene no san yɛ Ɔtemmufo anaa? Na dɛn nti na ɛsɛ sɛ eyi ho hia yɛn saa bere yi titiriw?

18. Adanse bɛn na ɛwɔ hɔ a ɛkyerɛ sɛ na Yesu bɛyɛ Ɔtemmufo nso?

¹⁸ Yehowa a ɔwɔ hokwan sɛ ɔpaw atemmufo no paw Yesu sɛ Ɔtemmufo a odu Ne gyinapɛn ahorow ho. Yesu daa eyi adi bere a na ɔreka nkwa a nnipa benya wɔ honhom mu ho asɛm no: “Agya no nso mmu obiara atɛn, na ɔde atemmu nyinaa ahyɛ ɔba no nsa.” (Yohane 5:22) Nanso Yesu atɛn a obu no kɔ akyiri sen saa atemmu no, efisɛ ɔyɛ ateasefo ne awufo temmufo. (Asomafo no Nnwuma 10:42; 2 Timoteo 4:1) Bere bi Paulo kae sɛ: “[Onyankopɔn ayi] da bi ato hɔ a ɔnam ɔbarima [Yesu] a wayi no asi hɔ so bebu wiase ntɛn trenee mu; ɔno na wama wasɔre afi awufo mu de adi adanse sɛ nnipa nyinaa nnye nni.”—Asomafo no Nnwuma 17:31; Dwom 72:2-7.

19. Dɛn nti na ɛyɛ ne kwan so sɛ yɛbɛka sɛ Yesu bɛtra ase sɛ Ɔtemmufo?

¹⁹ Ɛnde sɛ yɛka sɛ Yesu bɛtra anuonyam ahengua so a dwuma pɔtee a obedi ne sɛ ɔbɛyɛ Ɔtemmufo a, ɛyɛ ne kwan so? Yiw. Yesu ka kyerɛɛ asomafo no sɛ: “Awofoforo no mu no, da a onipa ba no bɛtra n’anuonyam ahengua so no, mo nso mobɛtra nhengua dumien so abu Israel mmusuakuw dumien no atɛn.” (Mateo 19:28) Ɛwom sɛ seesei Yesu yɛ Ahenni no Hene de, nanso ne dwumadi foforo a wɔka ho asɛm wɔ Mateo 19:28 no fã bi ne sɛ ɔbɛtra ahengua so abu atɛn wɔ Mfirihyia Apem nniso no mu. Saa bere no obebu adesamma nyinaa atɛn, wɔn a wɔteɛ ne wɔn a wɔnteɛ. (Asomafo no Nnwuma 24:15) Mfaso wɔ so sɛ yɛma eyi tra yɛn adwene mu bere a yɛdan yɛn adwene kɔ Yesu mmɛ no biako a ɛfa yɛn bere yi ne yɛn nkwa ho so no.

Dɛn na Ɛbɛ no Ka?

20, 21. Asɛm bɛn na Yesu asomafo no bisae a ɛfa yɛn bere yi ho, na asemmisa bɛn na ɛma ɛsɔre?

²⁰ Aka kakra ma Yesu awu no, n’asomafo no bisaa no sɛ: “Kyerɛ yɛn da ko a eyinom bɛba, na ɛdɛn na ɛbɛyɛ wo ba ne wiase awiei no ho sɛnkyerɛnne?” (Mateo 24:3) Yesu hyɛɛ nsɛm atitiriw a ebesisi asase so ansa na ‘awiei no aba’ ho nkɔm. Sɛ ɛrebɛka kakraa bi ama saa awiei no aba a, amanaman no ‘behu onipa ba no sɛ ɔreba ɔsoro mununkum so ahoɔden ne anuonyam kɛse mu.’—Mateo 24:14, 29, 30.

²¹ Nanso sɛ onipa Ba no ba n’anuonyam mu a, ebesi wɔn a wɔwɔ saa amanaman no mu dɛn? Momma yɛnhwehwɛ mu wɔ nguanten ne mpapo ho bɛ a nsɛm a ɛde fi ase na edi so yi mu: “Onipa ba no bɛba n’anuonyam mu a n’abɔfo nyinaa ka ne ho no, ɔbɛtra n’anuonyam ahengua so. Na wɔbɛboaboa amanaman nyinaa ano n’anim.”—Mateo 25:31, 32.

22, 23. Nsɛm bɛn na ɛkyerɛ sɛ nguanten ne mpapo ho bɛ no amfi ase annya mmamu wɔ 1914 mu?

²² Saa bɛ yi baa mu bere a Yesu traa ahenni tumidi mu 1914 sɛnea yɛate ase bere tenten no anaa? Wiɛ, Mateo 25:34 ka ne ho asɛm sɛ Ɔhene, enti sɛnea ntease wom no, ɛbɛ no nya mmamu wɔ bere a Yesu bɛyɛɛ Ɔhene fi 1914 no. Nanso atɛn bɛn na obui wɔ ɛno akyi pɛɛ? Wammu “amanaman nyinaa” atɛn. Mmom no, ɔde n’ani sii wɔn a wɔkyerɛ sɛ wɔka bom yɛ “Onyankopɔn fi” no so. (1 Petro 4:17) Sɛnea ɛne Malaki 3:1-3 hyia no, sɛ Yehowa bɔfo no, Yesu bɛhwɛɛ Kristofo a wɔasra wɔn a wɔaka wɔ asase so no buu wɔn atɛn. Ná bere adu nso sɛ wobu Kristoman a edii atoro kae sɛ ɛne “Onyankopɔn fi” no atɛn.c (Adiyisɛm 17:1, 2; 18:4-8) Nanso biribiara nkyerɛ sɛ saa bere no anaa ɛno akyi no, Yesu traa ase buu nnipa a wofi amanaman nyinaa mu atɛn sɛ nguanten anaa mpapo awiei koraa.

²³ Sɛ yɛhwehwɛ dwuma a Yesu di wɔ bɛ no mu no mu a, yehu sɛ obu amanaman nyinaa atɛn awiei koraa. Ɛbɛ no nkyerɛ sɛ saa atemmu no bɛkɔ so bere tenten ma mfe pii atwam, te sɛ nea gyama obiara a wawu wɔ mfe kakra a atwam yi mu no yɛ nea wɔabu no atɛn sɛ ɔfata daa owu anaa daa nkwa. Ɛte sɛ nea wɔn a wɔawuwu wɔ mfe kakra a atwam yi mu no dodow no ara kɔ adesamma nyinaa damoa mu. (Adiyisɛm 6:8; 20:13) Nanso ɛbɛ no kyerɛ bere a Yesu bebu “amanaman nyinaa” mufo a wɔte ase saa bere no atɛn, de n’atemmu aba wɔn so.

24. Bere bɛn na nguanten ne mpapo ho bɛ no benya mmamu?

²⁴ Yɛbɛka no kwan foforo so a, ɛbɛ no kyerɛ nea ɛbɛba daakye bere a onipa Ba no aba n’anuonyam mu no. Ɔbɛtra ase abu nnipa a wɔte ase saa bere no atɛn. N’atemmu no begyina nnipa ko a wɔdaa no adi sɛ wɔyɛ no so. Saa bere no, wobehu “nsonoe a ɛda ɔtreneeni ne ɔbɔnefo ntam” no pefee. (Malaki 3:18) Atɛn a wobebu na wɔadi ho dwuma ankasa no bɛkɔ so wɔ bere tiaa mu. Yesu begyina su a ankorankoro da no adi so abu atɛntrenee.—Hwɛ 2 Korintofo 5:10 nso.

25. Dɛn na Mateo 25:31 kyerɛ bere a ɛka sɛ onipa Ba no tra anuonyam ahengua so no?

²⁵ Enti eyi kyerɛ sɛ tra a Yesu ‘bɛtra anuonyam ahengua so’ abu atɛn a wɔka ho asɛm wɔ Mateo 25:31 no benya mmamu daakye bere a saa Ɔhene a ɔwɔ tumi yi tra ase bu amanaman no atɛn di ho dwuma. Yiw, atɛn a Yesu bebu a ɛho asɛm wɔ Mateo 25:31-33, 46 no te sɛ nea wɔka ho asɛm wɔ Daniel ti 7 no, bere a Ɔhene a ɔredi ade, Nea ne Nna akyɛ no, traa ase yɛɛ n’adwuma sɛ Ɔtemmufo no.

26. Ɛbɛ no ho nkyerɛkyerɛmu foforo bɛn na ada adi?

²⁶ Ntease a ɛte sɛɛ a yebenya wɔ nguanten ne mpapo ho bɛ no ho no kyerɛ sɛ atemmu a wɔde ba nguanten ne mpapo no so no yɛ daakye asɛm. “Ahohiahia” a wɔka ho asɛm wɔ Mateo 24:29, 30 no ba ma onipa Ba no ‘ba n’anuonyam mu’ ansa na aba. (Fa toto Marko 13:24-26 ho.) Afei, bere a nhyehyɛe bɔne no nyinaa adu n’awiei no, Yesu bɛtra ase abu atɛn ama obiara n’akatua.—Yohane 5:30; 2 Tesalonikafo 1:7-10.

27. Dɛn na ɛsɛ sɛ yɛn ani gye ho sɛ yebehu wɔ Yesu bɛ a etwa to no ho?

²⁷ Eyi kyerɛkyerɛ ntease a yɛwɔ wɔ bere a Yesu bɛ a ɛkyerɛ bere a wobebu nguanten ne mpapo no atɛn no benya mmamu no mu fann. Nanso ɛka yɛn a yɛde nsiyɛ reka Ahenni ho asɛmpa no dɛn? (Mateo 24:14) Ɛmma yɛn adwuma no ho nhia pii, anaa ɛde asɛyɛde pii mmom na ɛba? Momma yɛnhwɛ sɛnea ɛka yɛn wɔ asɛm a edi hɔ no mu.

Daakye Bɛn na Ɛwɔ hɔ ma Nguanten ne Mpapo No?

“Ɔbɛpaapae wɔn mu, sɛnea oguanhwɛfo paapae nguanten ne mpapo mu.”—MATEO 25:32.

1, 2. Dɛn nti na ɛsɛ sɛ nguanten ne mpapo ho bɛ no hia yɛn?

AKYINNYE biara nni ho sɛ Yesu Kristo ne Ɔkyerɛkyerɛfo a ɔsen biara a watra asase so pɛn. (Yohane 7:46) Ɔkwan biako a ɔnam so kyerɛkyerɛe ne sɛ ɔde mmebu ne mfatoho ahorow dii dwuma. (Mateo 13:34, 35) Ná eyinom asete nyɛ den nanso na etumi boa yiye ma wɔte honhom ne nkɔmhyɛ mu nokware ahorow ase.

² Wɔ nguanten ne mpapo ho bɛ no mu no, Yesu kyerɛɛ bere bi a obedi dwuma titiriw bi: “Onipa ba no bɛba n’anuonyam mu a . . . ” (Mateo 25:31) Ɛsɛ sɛ eyi ho hia yɛn efisɛ ɛno ne mfatoho a Yesu de wiee saa asemmisa yi ho mmuaema: “Ɛdɛn na ɛbɛyɛ wo ba ne wiase awiei no ho sɛnkyerɛnne?” (Mateo 24:3) Nanso dɛn na eyi kyerɛ ma yɛn?

 3. Dɛn na Yesu dii kan kae wɔ ne kasa no mu sɛ ɛbɛba wɔ ahohiahia kɛse no mfiase pɛɛ?

³ Yesu hyɛɛ nsɛntitiriw a ebesisi bere a ahohiahia kɛse no afi ase “akyi,” nsɛm a yɛrehwɛ kwan sɛ ebesisi, ho nkɔm. Ɔkae sɛ saa bere no “onipa ba no sɛnkyerɛnne” bɛda adi. Eyi benya “asase so mmusuakuw nyinaa,” a “wobehu onipa ba no sɛ ɔreba ɔsoro mununkum so ahoɔden ne anuonyam kɛse mu” so tumi kɛse. Onipa Ba no ne “n’abɔfo” na ɛbɛba. (Mateo 24:21, 29-31)a Nguanten ne mpapo ho bɛ no nso ɛ? Wɔ nnɛyi Bible ahorow mu no, ɛwɔ ti 25, nanso ɛka Yesu mmuae no ho, na ɛka nsɛm foforo a ɛkɔ akyiri a ɛfa ba a ɔbɛba wɔ anuonyam mu ho, na ɛtwe adwene si atɛn a obebu “amanaman nyinaa” no so.—Mateo 25:32.

Wɔn a Wɔka Wɔn Ho Asɛm Wɔ Bɛ no Mu

 4. Wɔ nguanten ne mpapo ho bɛ no mfiase no, dɛn na ɛka fa Yesu ho, na henanom nso ho asɛm na ɛka?

⁴ Asɛm a Yesu ka de fi bɛ no ase ne sɛ: “Na onipa ba no bɛba.” Ɛda adi sɛ wunim onii ko a “onipa ba no” yɛ. Asɛmpa akyerɛwfo no de saa asɛm no gyinaa hɔ maa Yesu mpɛn pii. Yesu ankasa mpo yɛɛ saa, na akyinnye biara nni ho sɛ na nea ɛwɔ n’adwenem ne “obi a ɔte sɛ onipa ba” a ɔkɔɔ Nea ne Nna akyɛ no nkyɛn kogyee “tumi ne anuonyam ne ahenni” ho anisoadehu a Daniel nyae no. (Daniel 7:13, 14; Mateo 26:63, 64; Marko 14:61, 62) Ɛwom sɛ Yesu ne ɛbɛ yi mu nipa titiriw de, nanso afoforo ka ne ho. Ná wadi kan aka wɔ ɔkasa yi mu sɛnea ɛwɔ Mateo 24:30, 31 no sɛ, sɛ onipa Ba no ‘ba ahoɔden ne anuonyam kɛse’ mu a, n’abɔfo bedi dwuma titiriw bi. Saa ara na nguanten ne mpapo ho bɛ no nso kyerɛ sɛ abɔfo ka Yesu ho bere a ‘ɔtra n’anuonyam ahengua so’ bu atɛn no. (Fa toto Mateo 16:27 ho.) Nanso Ɔtemmufo no ne n’abɔfo wɔ soro, enti wɔka nnipa ho asɛm wɔ bɛ no mu anaa?

 5. Yɛyɛ dɛn tumi hu Yesu “nuanom”?

⁵ Ɛbɛ no mu a yɛhwehwɛ no da akuw abiɛsa a ehia sɛ yehu nea wogyina hɔ ma adi. Nguanten ne mpapo no akyi no, onipa Ba no ka kuw a ɛto so abiɛsa a ɛho hia yiye sɛ yehu nea wogyina hɔ ma na yɛatumi ahu nea nguanten ne mpapo no nso gyina hɔ ma ho asɛm. Yesu frɛ kuw a ɛto so abiɛsa yi sɛ ne honhom fam nuanom. (Mateo 25:40, 45) Wɔbɛyɛ nokware asomfo, efisɛ Yesu kae sɛ: “Obiara, a ɔbɛyɛ m’agya . . . apɛde no, ɔno ara ne me nuabarima ne onuabea ne ɛna.” (Mateo 12:50; Yohane 20:17) Nea ɛfa asɛm no ho pɔtee paa ne sɛ Paulo kyerɛwee sɛ Kristofo bi yɛ “Abraham asefo” ne Onyankopɔn mma. Ɔfrɛɛ saafo yi Yesu “anuanom” ne ‘wɔn a wɔfra ɔsoro frɛ no mu.’—Hebrifo 2:9–3:1; Galatifo 3:26, 29.

 6. Henanom ne Yesu nuanom “nketewaa” no?

⁶ Dɛn nti na Yesu kae sɛ ne nuanom “nketewaa”? Saa nsɛm no ne nea na wadi kan aka ma asomafo no ate no sɛ. Bere a Yesu rekyerɛ nsonsonoe a ɛda Yohane Osuboni a owu gyaa Yesu, ma enti na ɔwɔ asase so anidaso no, ne wɔn a wobenya ɔsoro asetra no ntam no, ɔkae sɛ: “[Obiara] nsɔree a ɔsen Yohane suboni; nanso nea ɔyɛ aketewa koraa ɔsoro ahenni mu no yɛ kɛse sen no.” (Mateo 11:11) Ebia na wɔn a wɔrekɔ soro no bi wɔ din wɔ asafo no mu, te sɛ asomafo no, bere a afoforo nni din, nanso wɔn nyinaa yɛ Yesu honhom fam nuanom. (Luka 16:10; 1 Korintofo 15:9; Efesofo 3:8; Hebrifo 8:11) Enti, sɛ na ɛte sɛ nea ebinom ba fam wɔ asase so mpo a, na wɔyɛ ne nuanom a ɛsɛ sɛ anka wɔne wɔn di no saa kwan no so.

Henanom ne Nguanten ne Mpapo No?

 7, 8. Dɛn na Yesu ka faa nguanten no ho, enti dɛn na yebetumi aka wɔ wɔn ho?

⁷ Yɛkenkan wɔ atɛn a wobu nguanten no ho sɛ: “[Yesu] bese wɔn a wɔwɔ ne nifa no sɛ: Mo a m’agya ahyira mo, mommra mmɛfa ahenni a wɔasiesie ama mo fi wiase asefi mu no nni! Na ɔkɔm dee me, na momaa me biribi midii, osukɔm dee me, na momaa me biribi menomee, meyɛɛ ɔhɔho, na mofaa me kɔɔ mo fi; medaa adagyaw, na mufuraa me ntama, meyaree, na mobɛhwɛɛ me, medaa afiase, na mobaa me nkyɛn. Ɛnna nnipa trenee no bebua no sɛ: Awurade, da bɛn na yehuu wo sɛ ɔkɔm dee wo, na yɛmaa wo aduan, anaasɛ osukum dee wo, na yɛmaa wo nsu nomee? afei da bɛn na yehuu wo sɛ woyɛɛ ɔhɔho na yɛfaa wo kɔɔ ofie, anaasɛ wodaa adagyaw na yefuraa wo ntama? Afei da bɛn na yehuu wo sɛ woyaree, anaasɛ wodaa afiase, na yɛbaa wo nkyɛn? Na ɔhene bebua ase wɔn sɛ: Nokware mise mo sɛ, sɛ moayɛ ama me nuanom nketewaa yi mu biako yi, moayɛ ama me.”—Mateo 25:34-40.

⁸ Ɛda adi pefee sɛ nguanten a wobuu wɔn atɛn sɛ wɔfata sɛ wogyina Yesu nifa a ɛkyerɛ nidi ne ɔdom no gyina hɔ ma nnipakuw bi. (Efesofo 1:20; Hebrifo 1:3) Dɛn na wɔyɛe, na bere bɛn? Yesu ka sɛ wofi ayamye ne obu ne wɔn pɛ mu maa no aduan, nsu, ne ntama, na wɔboaa no bere a na ɔyare anaa ɔda afiase no. Bere a nguanten no ka sɛ wɔnyɛɛ eyi mmaa Yesu ankasa no, ɔka kyerɛ wɔn sɛ wɔboaa ne honhom fam nuanom, Kristofo a wɔasra wɔn nkaefo no, enti saa kwan no so no, wɔyɛ maa no.

 9. Dɛn nti na bɛ no rennya mmamu wɔ Mfirihyia Apem nniso no mu?

⁹ Ɛbɛ no rennya mmamu wɔ Mfirihyia Apem nniso no mu, efisɛ ebedu saa bere no na wɔn a wɔasra wɔn no nyɛ nnipa a ɔkɔm anaa sukɔm de wɔn, wɔyare, anaasɛ wɔde wɔn to afiase. Nanso, wɔn mu pii ahyia tebea a ɛtete saa wɔ nneɛma nhyehyɛe yi awiei yi mu. Efi bere a wɔtoo Satan kyenee asase so no, wafa nkaefo no ho abufuw titiriw ama nkurɔfo adi wɔn ho fɛw ayɛ wɔn ayayade, na wɔakunkum wɔn.—Adiyisɛm 12:17.

10, 11. (a) Dɛn nti na ntease nnim sɛ yebesusuw sɛ obiara a ɔyɛ Yesu nuanom adɔe biara ka nguanten no ho? (b) Henanom na nguanten no gyina hɔ ma wɔn ma ɛfata?

¹⁰ So Yesu kyerɛ sɛ obiara a ɔbɛyɛ ne nuanom biako adɔe kakra, sɛ ebia ɔma no paanoo kakra anaa nsu kuruwa biako no fata sɛ ɔbɛyɛ nguanten yi mu biako? Ampa, adɔe a ɛte saa a wɔbɛyɛ no bɛda nnipa ayamye adi, nanso ɛte sɛ nea ɛbɛ yi mu nguanten no yɛ ade kɔ akyiri sen saa koraa. Sɛ nhwɛso no, ɛnyɛ wɔn a wonni Onyankopɔn mu gyidi anaa asɔfo a wofu mu yɛ ne nuanom biako adɔe ho asɛm koraa na na Yesu reka. Nea ɛne no bɔ abira no, Yesu frɛɛ nguanten no “nnipa trenee” mprenu. (Mateo 25:37, 46) Enti nguanten no bɛyɛ nnipa a wofi bere tenten bi aboa—wɔayere wɔn ho aboa—Kristo nuanom, na wɔada gyidi adi akɔ akyiri ma wɔanya gyinabea pa wɔ Onyankopɔn anim.

¹¹ Wɔ mfehaha a atwam mu no, nnipa pii te sɛ Abraham anya gyinabea pa. (Yakobo 2:21-23) Noa, Abraham, ne anokwafo foforo ka “nguan foforo” a wobenya Paradise asetra wɔ Onyankopɔn Ahenni ase no ho. Nnansa yi, afoforo ɔpepem pii de wɔn ho ahyɛ nokware som mu sɛ nguan foforo, na wɔne wɔn a wɔasra wɔn no abɛyɛ “kuw biako.” (Yohane 10:16; Adiyisɛm 7:9) Saa nnipa yi a wɔwɔ asase so anidaso no bu Yesu nuanom sɛ Ahenni no ho ahemmɔfo ma enti wɔaboa wɔn—honam fam ne honhom fam. Yesu bu nea nguan foforo no ayɛ ama ne nuanom a wɔwɔ asase so no sɛ wɔayɛ ama no. Sɛ ɔba sɛ ɔrebebu amanaman no atɛn a, obebu saafo a wɔte ase no atɛn sɛ wɔyɛ nguanten.

12. Dɛn nti na nguanten no betumi abisa ɔkwan a wɔfaa so yɛɛ Yesu adɔe?

¹² Sɛ nguan foforo no ne nkaefo no reka asɛmpa no boa wɔn seesei de a, ɛnde dɛn nti na wobebisa sɛ: “Awurade, da bɛn na yehuu wo sɛ ɔkɔm dee wo, na yɛmaa wo aduan, anaasɛ osukɔm dee wo, na yɛmaa wo nsu nomee?” (Mateo 25:37) Ebetumi agyina nneɛma pii so. Eyi yɛ bɛ. Yesu nam so kyerɛ atenka a emu dɔ a ɔwɔ ma ne honhom fam nuanom; wɔn atenka, wɔn amanehunu ka no bi. Ná Yesu aka bere bi a atwam sɛ: “Nea ogye mo no gye me, na nea ogye me no gye nea ɔsomaa me no.” (Mateo 10:40) Yesu bae nnyinasosɛm no mu wɔ mfatoho yi mu de kyerɛ sɛ nea wɔde yɛ ne nuanom no (papa oo, bɔne oo), edu soro mpo; ɛte sɛ nea wɔde yɛ no wɔ soro. Afei nso Yesu si Yehowa atemmu ho gyinapɛn so dua wɔ ha, na ɔda no adi pefee sɛ Onyankopɔn atemmu fata na ɛteɛ, sɛ́ ɛyɛ bembu anaa afobu no. Mpapo no ntumi nka eyi mfa nyi wɔn ho ano sɛ, ‘Yɛamfa yɛn ani anhu wo ntia.’

13. Dɛn nti na ebia wɔn a wɔte sɛ mpapo no bɛfrɛ Yesu sɛ “Awurade”?

¹³ Sɛ yenya hu bere a atemmu a wɔka ho asɛm wɔ bɛ yi mu no bɛba so a, ɛma yehu wɔn a mpapo no gyina hɔ ma wɔn no yiye. Ebenya mmamu bere a “onipa ba no sɛnkyerɛnne bɛda adi ɔsoro, na asase so mmusuakuw nyinaa besu, na wobehu onipa ba no sɛ ɔreba . . . ahoɔden ne anuonyam kɛse mu.” (Mateo 24:29, 30) Ebia afei de wɔn a wobenya wɔn ho atete wɔ ahohiahia a ɛbɛba Babilon Kɛse so no mu a wɔtan Ɔhene no nuanom no fi ahoyeraw mu bɛfrɛ Ɔtemmufo no “Awurade,” a wɔhwɛ kwan sɛ ɛbɛma wɔanya nkwa.—Mateo 7:22, 23; fa toto Adiyisɛm 6:15-17 ho.

14. Dɛn na Yesu begyina so abu nguanten ne mpapo no atɛn?

¹⁴ Nanso, Yesu rennyina nsɛm a nnipa a na wɔkɔ asɔre, na wonnye Onyankopɔn nni, anaa nea nnipa foforo de ahoyeraw ka so mmu atɛn. (2 Tesalonikafo 1:8) Mmom no, ɔtemmufo no bɛhwɛ nnipa koma mu ne su a bere bi a atwam no, woyii adi kyerɛɛ “[ne nuanom] nketewaa yi mu biako” no. Nokwarem no, Kristofo a wɔasra wɔn a wɔaka wɔ asase so no dodow so retew. Nanso, bere tenten a wɔn a wɔasra wɔn no, a wɔka bom yɛ “akoa nokwafo ne ɔbadwemma” no kɔ so de honhom fam aduan ne akwankyerɛ ma no, wɔn a wobetumi abɛyɛ nguanten no wɔ hokwan a wobetumi de ayɛ akoa kuw no adɔe, sɛnea ‘nnipakuw kɛse a wofi aman ne mmusuakuw ne ɔkasa nyinaa mu’ ayɛ no.—Adiyisɛm 7:9, 14.

15. (a) Ɔkwan bɛn so na nnipa pii ayɛ wɔn ade te sɛ mpapo? (b) Dɛn nti na ɛnsɛ sɛ yɛka sɛ obi yɛ oguanten anaa ɔpapo?

¹⁵ Ɔkwan bɛn so na nkurɔfo ne Kristo nuanom ne nguan foforo ɔpepem pii a wɔne wɔn aka abom sɛ kuw biako no adi? Ɛwom sɛ ebia nnipa pii ntaa Kristo ananmusifo no tẽẽ de, nanso wonyii ɔdɔ adi nkyerɛɛ ne nkurɔfo. Esiane sɛ wɔn ani gye wiase bɔne no mmom ho nti, wɔn a wɔte sɛ mpapo no pow Ahenni asɛm no, ɛmfa ho sɛ wɔka kyerɛ wɔn tẽẽ anaa ɔkwan foforo so no. (1 Yohane 2:15-17) Nokwasɛm ne sɛ, awiei koraa no, Yesu ne nea wɔapaw no sɛ ommu atɛn. Ɛnyɛ yɛn na ɛsɛ sɛ yɛkyerɛ wɔn a wɔyɛ nguanten ne wɔn a wɔyɛ mpapo.—Marko 2:8; Luka 5:22; Yohane 2:24, 25; Romafo 14:10-12; 1 Korintofo 4:5.

Dɛn na Ɛbɛba Kuw Biara so Daakye?

16, 17. Dɛn na nguanten no benya daakye?

¹⁶ Yesu buu nguanten no atɛn sɛ: “Mo a m’agya ahyira mo, mommra mmɛfa ahenni a wɔasiesie ama mo fi wiase asefi mu no nni!” Hwɛ anigye a wɔde to nsa frɛ wɔn—“Mommra”! Mmegye dɛn? Wommegye daa nkwa, sɛnea ɔkaa no tiawa sɛ: “Nnipa trenee no bɛkɔ daa nkwa mu” no.—Mateo 25:34, 46.

¹⁷ Wɔ talente ho bɛ no mu no, Yesu kyerɛɛ nea wɔhwehwɛ wɔ wɔn a wɔne no bedi hene wɔ soro no ho, nanso wɔ saa bɛ yi mu no, ɔkyerɛ nea wɔhwehwɛ wɔ Ahenni no nkoa ho. (Mateo 25:14-23) Nea ɛho hia ne sɛ, esiane sɛ nguanten no de koma nyinaa boaa Yesu nuanom nti, wonya n’Ahenni no asase so atrae no mu kyɛfa. Wobenya paradise asase so asetra—anidaso a Onyankopɔn siesie maa wɔn fii adesamma a wogye wɔn nkwa a ɛyɛ yiye no “wiase asefi.”—Luka 11:50, 51.

18, 19. (a) Yesu bebu mpapo no atɛn bɛn? (b) Yɛbɛyɛ dɛn atumi agye adi sɛ mpapo no renhu amane daa?

¹⁸ Hwɛ sɛnea ɛbɔ atɛn a wobu mpapo no abira! “Ɛnna ɔbɛka akyerɛ wɔn a wɔwɔ benkum no nso sɛ: Mo a wɔadome mo, mumfi me so nkɔ daa ogya a wɔasiesie ama ɔbonsam ne n’abɔfo no mu! Na ɔkɔm dee me, na moamma me biribi manni, osukɔm dee me, na moamma me biribi mannom; meyɛɛ ɔhɔho, na moamfa me ankɔ mo fi, medaa adagyaw, na moamfura me ntama; meyaree na medaa afiase, na moammɛhwɛ me. Ɛnna wɔn nso bebua sɛ: Awurade, da bɛn na yehuu wo sɛ ɔkɔm dee wo, anaasɛ osukɔm dee wo, anaasɛ woyɛɛ ɔhɔho, anaasɛ wodaa adagyaw, anaasɛ woyaree, anaasɛ wodaa afiase, na yɛammɛsom wo? Ɛnna obebua wɔn sɛ: Nokware mise mo sɛ, sɛ moanyɛ amma nketewaa yi mu biako yi, moanyɛ amma me.”—Mateo 25:41-45.

¹⁹ Bible asuafo nim sɛ eyi ntumi nkyerɛ sɛ nnipa a wɔte sɛ mpapo akra behu amane wɔ daa ogya bi mu. Dabi, efisɛ nnipa yɛ akra; wonni akra a enwu. (Genesis 2:7; Ɔsɛnkafo 9:5, 10; Hesekiel 18:4) Sɛ Ɔtemmufo no bu mpapo no fɔ sɛ wɔnkɔ “daa ogya” mu a, ɔkyerɛ ɔsɛe a daakye anidaso biara nni hɔ, na ɛno na ɛbɛyɛ Ɔbonsam ne n’adaemone nso awiei korakora. (Adiyisɛm 20:10, 14) Enti, Yehowa Temmufo no ka nsɛm a biako bɔ foforo abira. Ɔka kyerɛ nguan no sɛ, “Mommra”; ne mpapo no sɛ, “Mumfi me so nkɔ.” Nguan no benya “daa nkwa.” Mpapo no bɛkɔ “daa ɔyera mu.”—Mateo 25:46, NW.b

Dɛn na Ɛkyerɛ Ma Yɛn?

20, 21. (a) Adwuma a ɛho hia bɛn na Kristofo wɔ yɛ? (b) Mpaapaemu bɛn na ɛrekɔ so seesei? (d) Sɛ nguanten ne mpapo ho bɛ no fi ase nya mmamu a, tebea bɛn na nnipa bɛkɔ mu?

²⁰ Asomafo baanan a wɔtee mmuae a Yesu de mae wɔ nea ɛbɛyɛ ne ba ne nhyehyɛe no awiei ho sɛnkyerɛnne ho no nyaa nsɛm pii a wobesusuw ho. Ná ɛho behia sɛ wɔma wɔn ani da hɔ na wɔwɛn. (Mateo 24:42) Na ɛho behia nso sɛ wɔyɛ adansedi adwuma a wɔaka ho asɛm wɔ Marko 13:10 no. Yehowa Adansefo de nnamyɛ reyɛ saa adwuma no nnɛ.

²¹ Ɛnde, dɛn na nguanten ne mpapo ho bɛ no mu ntease foforo a yɛanya yi kyerɛ ma yɛn? Nkurɔfo rekyerɛ ɔfã a wogyina dedaw. Ebinom nam ‘ɔkwan a ɛtrɛw a ɛkɔ ɔsɛe mu no’ so, na afoforo nso bɔ mmɔden sɛ wɔbɛkɔ so anantew ‘ɔkwan hiahiaa a ɛkɔ nkwa mu’ no so. (Mateo 7:13, 14) Nanso bere a Yesu bebu nguanten ne mpapo a wɔwɔ bɛ no mu atɛn koraa no nnui. Sɛ onipa Ba no ba sɛ Ɔtemmufo a, ɔbɛda no adi sɛ nokware Kristofo pii—nguan a wɔahyira wɔn ho so “nnipakuw kɛse” ankasa—bɛfata sɛ wotwa “ahohia kɛse” no fã a edi akyiri no kɔ wiase foforo no mu. Ɛsɛ sɛ saa anidaso no ma yenya anigye nnɛ. (Adiyisɛm 7:9, 14) Ɔkwan foforo so no, nnipadɔm a wofi “amanaman nyinaa” mu bɛyɛ wɔn ade te sɛ mpapo a wɔnte asɛm. “Wobefi hɔ akɔ daa ɔyera mu.” Hwɛ sɛnea ɛbɛma asase ho adwo no!

22, 23. Esiane sɛ ɛbɛ no nnyaa mmamu nti, dɛn nti na yɛn asɛnka adwuma no ho hia nnɛ?

²² Ɛmfa ho sɛ atemmu a wɔka ho asɛm wɔ bɛ no mu no bɛba daakye a enni akyiri no, ɛnnɛ mpo biribi a ɛho hia rekɔ so. Yɛn Kristofo reyɛ nkwagye adwuma bi a ɛne sɛ yɛreka asɛm a ɛpaapae nnipa mu. (Mateo 10:32-39) Paulo kyerɛwee sɛ: “Obiara a ɔbɛbɔ [Yehowa] din no benya nkwa. Na afei ɛbɛyɛ dɛn na wɔbɛfrɛ nea wonnye no nni? Nanso ɛbɛyɛ dɛn na wobegye nea wɔntee ne ho asɛm no adi? Nanso sɛ ɔsɛnkafo nni hɔ a, ɛbɛyɛ dɛn na wɔbɛte?” (Romafo 10:13, 14) Yɛn baguam som adwuma no de Onyankopɔn din ne ne nkwagye asɛm no adu nsase bɛboro 230 so. Kristo nuanom a wɔasra wɔn no na wɔda so di adwuma yi anim. Nguan foforo bɛyɛ ɔpepem anum abɛka wɔn ho seesei. Na nnipa a wɔwɔ wiase nyinaa retie asɛm a Yesu nuanom reka no.

²³ Nnipa pii te yɛn asɛm no bere a yɛka asɛm wɔ afie afie anaa bɔnnɔ so no. Afoforo nso tumi fa akwan a yennim so hu Yehowa Adansefo ne nnipa ko a wɔyɛ. Sɛ atemmu bere du a, Yesu bebu obi afra ne ho nnipa anaa n’abusua akosi he? Yentumi nka, na mfaso nni so sɛ yɛbɔ yɛn tirim ka ho biribi. (Fa toto 1 Korintofo 7:14 ho.) Ɛnnɛ nnipa pii ntie, wodi fɛw, anaa wɔboa ma wɔtaa Onyankopɔn nkurɔfo denneennen. Ne saa nti, yɛwɔ bere titiriw mu; ebia saafo no reyɛ wɔn ade sɛ wɔn a Yesu bebu wɔn atɛn sɛ wɔyɛ mpapo no.—Mateo 10:22; Yohane 15:20; 16:2, 3; Romafo 2:5, 6.

24. (a) Dɛn nti na ɛho hia sɛ ankorankoro tie asɛm a yɛka no? (b) Adwene bɛn na saa adesua yi aboa w’ankasa ma woanya wɔ wo som adwuma no ho?

²⁴ Nanso, nea ɛyɛ anigye no, nnipa pii tie, na wosua Onyankopɔn Asɛm no bɛyɛ Yehowa Adansefo. Wɔn a seesei wɔte sɛ mpapo no bi betumi asesa abɛyɛ sɛ nguanten. Asɛm no ne sɛ, wɔn a wɔretie na wɔreboa Kristo nuanom nkaefo no denneennen no nam saa kwan no so de adanse rema seesei a Yesu begyina so de wɔn agyina ne nifa, bere a ɔtra n’ahengua so bu atɛn daakye a enni akyiri no. Wɔrehyira saafo yi, na wɔbɛkɔ so ahyira wɔn. Enti, ɛsɛ sɛ saa bɛ yi kanyan yɛn ma yɛde nsiyɛ kɛse yɛ Kristofo som adwuma no. Ɛsɛ sɛ yɛyɛ nea yebetumi biara de bɔ Ahenni ho asɛmpa no dawuru na yɛfa saa kwan no so ma afoforo nya hokwan tie ansa na aka akyiri dodo. Afei, Yesu na obebu atɛn akɔ afobu anaa bemdi mu.—Mateo 25:46.