Djesu akapangidza nge mushobo wakakwana kuti Djehovha ndi Mwari ano usisi. (Juau 14:9) Zviro zvakabhuiwa uye zvakaizwa na Djesu, zvakapangidza kuti Baba ake ano usisi anoda anhu uye anoda kubetsera umwe na umwe wedu kuti akunde citema. Kusiya izvona, Djesu akabetsera anhu ano citema kuti agare no cido cekuita cinjo uye kumuteera. (Ruka 5:27, 28) Djesu aizviziya kuti aizopira upenyu wake. Zvekuti pa migariro yakawanda, iyena akabvunza ateeri ake kuti aaizotengeswa uye aizokhomerhwa pa danda. (Mat. 17:22; 20:18, 19) Iyena aizviziyawo kuti cibairo cake caizoita kuti abvise citema pa nyika yese. Djesu akabhuyawo kuti mumasure me kufa kake aizoita kuti “anhu akasiyana-siyana auye” kaari. (Juau 12:32) Izvi zvinoreya kuti munhu uya waizopangidza kutenda muna Djesu uye ogara muteeri wake waizopfadza Djehovha. Aya aizoita izvona ‘aizosudzunurhwa pa citema.’ (Aro. 6:14, 18, 22; Juau 8:32) Ndiyo ndaa, Djesu ainga ano ushingi uye ainga akagadzirira kubatana no rufu rinorhwadza maningi.—Juau 10:17, 18. w24.08 paji. 5 mandi. 11-12

Rangarirai mushobo wamakazwa pamakatanga kuzwa cokwadi ngezve Soko ra Mwari. Imwimwi makafunda kuti Baba enyu e kudenga anomudai maningi uye anoda kuti muite dii re mhuri ye anamati ake. Imwimwi makafundawo kuti iyena akagondesa kupedza matambudziko ese uye munokwanisazve kuona anhu amunoda pa rumuko. Izvi i zviro zvinganani zvamakafunda. (Mark. 10:29, 30; Juau 5:28, 29; Aro. 8:38, 39; Zvak. 21:3, 4) Imwimwi makapfara maningi pamakafunda cokwadi ici. (Ruka 24:32) Imwimwi makafundira kuda zviro zvese izvi uye makada maningi kubvunzawo amweni nge zvazvo! (Ezanisai na Djeremiya 20:9.) Kana isusu tikada zvokwadi zvo Bhaibheri, tinogara no cidaka-daka ce kubvundzawo amweni nge zvazvo. (Ruka 6:45) Isusu tinozwawo zvakazwa afundi a Djesu, awo akati: “Atingasii kureketa zviro zvatakaona no zvatakazwa.” (Zvii. 4:20) Isusu tinoda maningi cokwadi zvekuti tinoda kureketa ngezvazvo kuno anhu akawanda. w24.05 paji. 15 ndi. 5; paji. 16 ndi. 7

Hinga anhu a Djehovha, isusu tinoparidzira amweni ngokuti tinoda Baba edu e kudenga uye tinoda kubetsera anhu kuti amuziye. Asi amweni ano citsinzwa ce kuona mupfaro mu basa re kuparidzira. Ngei? Anhu amweni pamweni anothya kana kuti aadzigondi pacawo. Amweni angazwa asikazi kusudzunuka kuenda pa nyumba pe munhu asikazi kupikwa. Amweni angathya kuti aazotambirhwi zvakanaka. Amweni pamweni akafundiswa kuti asaitire hasha amweni. Hama no hanzvadzi idzi zvinoashuphira kukhwederera anhu e nyika dzimweni kuti dzirekete nawo masoko akanaka. Nguwa dzimweni, zvinomushuphirai kuzwa mupfaro mu basa re kuparidzira? Kana izvona zvakamboitika kamuri, musaore mwoyo. Kakawanda kakhona, izvi zvinopangidza kuti imwimwi munodzidodosa uye amudi kudzionesa kana kuti kunyangadzisa amweni. Kusiya izvona, munhu wese unoda kutambirhwa zvakanaka, maka-maka paya paanonga eciita zviro zvakanaka ku munhu umweni. Asi imwimwi mungagara no rugondo rekuti Baba enyu e kudenga, anoziya kuti izvona zvinoshupha kudini kamuri uye awona anoda kumubetserai paya pa zvinodikanwa.—Isa. 41:13. w24.04 paji. 14 mandi. 1-2