Genese

FAARUE HUNA ˈTURA IAKOBA IA LABANA; EIÂHIA IHORA TO ˈNA MAU ATUA E RAHELA.

31 Ite aˈera Iakoba i te parau a na tamarii a Labana i te na ôraa e, Ua pau roa te taoˈa a to tatou metua ia Iakoba; no roto i ta to tatou metua ra taua taoˈa rahi na ˈna aˈera i noaa. 2 E te hiˈo atura Iakoba i te mata o Labana; e inaha, e ere mai tei mutaaihora. 3 E ua parau mai na Iehova ia Iakoba e, A hoˈi oe i te fenua o to metua na, i to oe ra fetii, e ei ǒ na atoa vau ia oe na. 4 Ua tono atura Iakoba i te tapapa ia Rahela raua o Lea, ia haere mai i reira i taua nǎnǎ puaa na ˈna ra; 5 e ua parau atura oia ia raua, Te hiˈo nei au e, ua huru ê te mata o to orua metua tane ia ˈu, aore mai tei mutaaihora: i pihai-atoa-iho râ te Atua o to ˈu ra metua ia ˈu nei. 6 Ua ite hoi orua e, ua faahope au i to ˈu puai i te raveraa i te ohipa a to orua metua na. 7 E ua haavare mai hoi to orua metua ia ˈu, e ua ahuru aˈenei i te faahuru-ê-raa i ta ˈu nei utua; aita râ i tia i te Atua ia ino vau ia ˈna. 8 Ia na ô mai oia e, O te mea opatapata rii ra o ta oe ïa utua; ua fanau maira te mau puaa atoa i te mea opatapata anaˈe. E ia na ô mai oia e, O te mea opatapata rarahi ta oe utua; ua fanau mai te mau puaa atoa i te mea opatapata rarahi anaˈe. 9 Ua na reira iho nei te Atua i te rave i te taoˈa a to orua metua, e ua horoa mai ia ˈu nei. 10 Tei te tau i apiti haere ai te mau puaa ra, to ˈu ïa iteraa i te taoto no ˈu ra, e inaha, i nânâ aˈera vau i tau mata i nia, e ite atura vau i te mau oni i ouˈa i nia i te mau puaa ra, e e opatapata rarahi, e te opatapata rii, e te purepure anaˈe. 11 E ua parau maira te melahi a te Atua ia ˈu i taua taoto ra, na ô maira, E Iakoba e! Ua parau atura vau, Teie au. 12 Ua parau maira oia, A nânâ na i to mata i nia, e hiˈo i te mau oni e ouˈa i nia i te mau puaa, opatapata rarahi, e te opatapata rii, e te purepure anaˈe: ua hiˈo hoi au i ta Labana i rave ia oe na: 13 O vau te Atua o Betela ra, i te vahi ta oe i faatahinu i te pou ofai ra, e ta oe hoi i euhe mai ia ˈu ra: a tia i tena na, e faarue mai i teie nei fenua; a hoˈi i te fenua o to oe ra fetii. 14 Ua parau maira Rahela raua o Lea, na ô maira ia ˈna, E faufaa iti aˈe anei ta mâua i noaa i te fare o to mâua nei metua? 15 E ere anei ua faariro oia ia mâua ei taata ěê? ua hoo hoi oia ia mâua, e taua hoo ia mâua ra ua pau roa ïa ia ˈna. 16 Na mâua iho, e na ta mâua tamarii, te mau taoˈa atoa a to mâua metua i ravehia e te Atua ra; E tena na, e haapao oe i ta te Atua i parau mai ia oe ra.

17 Ua tia aˈera Iakoba i nia, ua tuu aˈera i ta ˈna mau tamarii, e na vahine na ˈna ra, i nia i te mau kamela; 18 ua rave atoa i te mau puaa atoa na ˈna ra, e te mau taoˈa atoa i noaa ia ˈna, oia te mau puaa i noaa ia ˈna i Padana-arama ra, e haere i tana metua ia Isaaka ra i te fenua ra i Kanaana. 19 Ua reva ˈtura Labana e pâoti i te mau mamoe na ˈna ra; ua eiâ ihora Rahela i te mau teraphima no to ˈna ra metua. 20 Haere huna ˈtura hoi Iakoba aore Labana Arama ra i ite, aore hoi oia i faaite noa ˈtu i taua haerea no ˈna ra. 21 Reva ˈtura oia, e ta ˈna atoa ra mau taoˈa: ua tia aˈera hoi oia i nia, e tae atura i tera pae pape, ua fariu atura tana mata i te mouˈa ra o Gileada.

22 E tae aˈera i te rui toru i faaitehia ˈtu ai Labana e, ua reva Iakoba. 23 Ua amui atoa maira oia i to ˈna ra fetii, tipapa ˈtura oia ia ˈna e rui hitu aˈera, roohia ˈtura i nia i te mouˈa ra o Gileada. 24 Roohia ihora Labana ati-Arama e te Atua i te taoto i te rui, e ua parau maira ia ˈna, E ara ia oe, eiaha oe e parau noa ˈtu ia Iakoba i te parau ino e te parau maitai atoa.

25 A roohia ˈtu ai Iakoba e Labana ra, ua patiahia to Iakoba tiahapa i nia i te mouˈa; ua patia atoa ihora Labana e to ˈna atoa ra fetii i to ratou tiahapa i nia atoa i taua mouˈa ra o Gileada. 26 Ua parau atura Labana ia Iakoba, Eaha ta oe i rave na, i haere huna mai ai oe aore au i ite, e ua riro mai nei hoi tau pue tamahine ia oe mai te ivi i riro i te tamaˈi ra? 27 Eaha oe i horo huna noa mai ai, i haere eiâ mai ai, aore i parau mai ia ˈu; ia tuu mai hoi au ia oe ma te oaoa, e ma te pehe, ma te tophe, e ma te kinura? 28 aita aˈenei hoi i tia ia ˈu ia hôˈi noa ˈtu i tau pue tamarii e tau pue tamahine, ia oe? E parau maamaa ta oe, o oe i na reira. 29 E tia noa ia ˈu ia rave ino atu ia outou na, ua parau mai râ te Atua no to outou metua ia ˈu inarui, na ô maira, E ara ia oe, eiaha oe e parau noa ˈtu ia Iakoba i te parau ino e te parau maitai atoa. 30 E tena na, e riro te ru na oe e haere, no te mea te hinaaro na oe i te utuafare o to metua na; eaha râ hoi oe i eiâ ˈi i tau mau atua nei? 31 Ua parau maira Iakoba ia Labana, na ô maira, No te mea i mǎtaˈu vau; i manaˈo hoi au e, e riro oe i te haru mai i to pue tamahine nei: 32 area te mau atua no oe na, o te taata ia itea ˈtu tei ia ˈna ra, ia pohe ˈtu ïa: a imi na oe i ta oe na taoˈa i ǒ nei ia ˈu nei, i mua i te aro o to tatou atoa nei, e itea ˈtu a rave. Aore hoi Iakoba i ite e ua eiâhia te reira e Rahela.

33 Ua haere atura Labana i roto i te tiahapa o Iakoba, e i roto atoa i te tiahapa o Lea, e te tiahapa o na tavini vahine ra; aore râ i itea ia ˈna. Ua haere maira oia mai roto mai i te tiahapa o Lea ra, e ua tomo atura i roto i te tiahapa o Rahela ra. 34 Ua ravehia taua na idolo ra e Rahela, e ua oomohia e ana i roto i te parahiraa kamela, parahi ihora oia i nia iho. Ua imi ihora Labana e ati noa ˈˈe taua tiahapa ra, e aore roa i itea. 35 Ua parau maira oia i tana metua, Eiaha na oe e riri, e paino, i te mea vau aore i tia i nia i mua i to aro nei; o te peu hoi i te vahine nei teie i nia ia ˈu nei. Ua imi ihora oia, aita râ i itea taua na idolo ra.

36 Riri aˈera Iakoba, e ua tamaˈi maira ia Labana; ua parau maira Iakoba ia Labana, na ô maira, Eaha ta ˈu hapa, eaha to ˈu ino, i auau hua mai ai oe ia ˈu nei? 37 Ua paheru hua iho nei oe i te mau taoˈa atoa na ˈu nei; eaha ta oe mea iti i itea i te mau taoˈa atoa na oe na? A tuu mai na i ǒ nei nei, i mua i te aro o to matou nei, e i mua hoi i te aro o to outou, e na ratou e tuu mai i te parau ia tâua nei. 38 Hoê taau aˈenei o ˈu matahiti i ǒ na ia oe na, e aore roa ta oe mamoe e te puaaniho i mairi i to ratou fanauˈa; aore hoi te mau oni o ta oe ra nǎnǎ i amuhia e au. 39 O tei motu i te taehae ra, aore ïa vau i hopoi atu ia oe na, na ˈu ïa i taui, o tei riro i te ao ra, e o tei riro hoi i te rui, ua titau mai oe i te hoo ia ˈu nei. 40 I pohe au i te auhâ i te ao, e te toetoe i te rui; e aore hoi o ˈu e taoto. 41 Ua tau mau â o ˈu matahiti i to oe na utuafare; hoê ahuru ma maha o ˈu matahiti i te taviniraa ia oe i na tamahine toopiti a oe na, e ono hoi matahiti no te mau puaa nei ïa: e ua ahuru hoi o oe faahuru-ê-raa i ta ˈu nei utua. 42 Ahiri te Atua o tau metua, o te Atua o Aberahama, i tei mǎtaˈuhia e Isaaka, aore i ǒ nei ia ˈu nei ua tuua-noa-hia mai au e oe i teie nei â ma te faufaa ore: ua hiˈo mai râ te Atua i to ˈu nei ati, e te ohipa i ravehia e tau rima, i aˈo mai ai oia ia oe inarui nei.

43 Ua parau atura Labana ia Iakoba, na ô atura, O teie nei pue tamahine, e tamahine ïa na ˈu; e teie nei mau tamarii, e tamarii ïa na ˈu; e teie nei mau mamoe, e mamoe ïa na ˈu; e na ˈu atoa te mau mea atoa ta oe e hiˈo na: e teie nei, e nahea vau i taua na tamahine na ˈu nei, e te mau tamarii nei ta ratou i fanau? 44 e tena na, e faaau na tâua i te tahi faufaa na tâua, a vaiiho ai ei ite no tâua.

45 Ua rave ihora Iakoba i te hoê ofai, ua faatia aˈera ei pou. 46 Ua parau atura Iakoba i to ratou ra, A haaputu mai na i te ofai. Ua hopoi maira ratou i te ofai, ua haapue maira i te puea, ua amu ihora ratou i te maa i taua puea ra. 47 E mairihia ihora e Labana ia Iegara-Sahaduta, area o Iakoba, mairi ihora oia i taua puea ra ia Galeeda. 48 Ua na ǒ aˈera hoi Labana, Ei ite teie nei puea no tâua i teie nei mahana. I mairihia ˈi te iˈoa ra ia Galeeda; 49 e ia Mizepa, no te mea ua parau oia, e Ia tiai mai Iehova ia tâua, ia moe ê tâua te tahi e te tahi: 50 ia hamani ino oe i tau pue tamahine nei, e ia faaipoipo oe i te vahine ê atu â, a amui ai i tau na tamahine nei, aore e taata i pihaiiho ia tâua ei ite; tera râ te ite ia tâua, o te Atua.

51 Ua parau atura Labana ia Iakoba, Inaha teie nei puea, e inaha teie nei pou, i faatiahia e au i ropu ia tâua nei: 52 ei ite teie nei puea, e ei ite teie nei pou, e e ore teie nei puea e mairi ia ˈu a haere ˈtu ai ia oe ra, e ore hoi teie nei puea e teie nei pou e mairi ia oe, a haere mai ai oe ia ˈu, mai te mea e hamani ihora: 53 ei te Atua no Aberahama, e te Atua no Nahora, (oia te Atua no to raua Metua,) te hiˈo mai ia tâua nei. Ua tǎpǔ ihora hoi Iakoba i tei mǎtaˈuhia e tana metua ra e Isaaka. 54 Ua patia ihora Iakoba i te puaa i nia i taua mouˈa ra, e ua parau atura i to ratou ra e amu i taua maa ra; ua amu ihora hoi ratou i taua maa ra, e taoto ihora i nia i taua mouˈa ra i te reira rui.

55 Ua tia aˈera Labana i nia i te poipoi roa, ua hôˈi ihora i na tamarii e na tamahine na ˈna ra, e ua haamaitai maira ia ratou, reva ˈtura, hoˈi atura Labana i to ˈna ra vahi mau.