E “umere” to te Atua nunaa no to ratou mauruuru rahi ia Iehova. Maoti te pue parau mau faaitoito, te mau parau fafau Bibilia tamahanahana e to tatou tiaturiraa papu niuhia i nia i te tusia o te Mesia, e oaoa to tatou aau. E rahi atu â te oaoa ia tauaparau tatou no nia i te reira. (Sal. 34:8; 133:1-3) O te here e te auhoêraa i rotopu i to Iehova nunaa te mea matamua e itehia i roto i te paradaiso pae varua. E faaite mai teie ‘taamu tia roa e tahoê ai te taata’ mai te aha te oraraa i roto i te ao apî, i reira te mau tavini a Iehova e oaoa e e tahoê atu â ˈi. (Kol. 3:14) I roto i to tatou paradaiso pae varua e fanaˈo ai te taata i te oaoa e te mauruuru. Noa ˈtu eaha te manaˈo o teie nei ao i te mau tavini a Iehova, e roo maitai to ratou i rotopu i te fetii taeae.—Isa. 65:15. w24.04 21 par. 7-8

E nafea tatou e tauturu ai i te mau Kerisetiano e hinaaro ra e faaipoipo? Ma te haapao maitai ïa i ta tatou mau parau. (Eph. 4:29) E uiui anaˈe: ‘Mea faaooo anei na ˈu te mau taeae e tuahine e hinaaro ra e faaipoipo? Ia ite au i te hoê taeae e tuahine taa noa e paraparau ra, oioi anei au i te manaˈo e te faahinaaro ra raua te tahi i te tahi?’ (Tim. 1, 5:13) Eiaha roa atoa ratou e manaˈo, no tatou aˈe, e fifi to ratou i ore ai ratou i faaipoipo atura. E haapopou anaˈe râ ia ratou, mea maitai aˈe. Ia manaˈo noa ˈtu tatou e tano maitai te hoê taeae no te tahi tuahine, e haamanaˈo tatou i ta te Bibilia e parau ra, e haapao i to vetahi ê manaˈo. (Roma 15:2) Mea rahi te Kerisetiano taa noa eita e hinaaro e na vetahi ê e faafarerei ia ratou no te haamatauraa. E faatura anaˈe ïa. (Tes. 2, 3:11) E hinaaro paha te tahi atu i te tauturu, mea tano aˈe râ e na ratou e ani mai.—Mas. 3:27. w24.05 24-25 par. 14-15

I te tahi taime, e tupu taue mai te tahi mau fifi aore ra e taui roa to tatou oraraa. E mauruuru roa tatou e nehenehe tatou e ani i te tauturu i te Atua ra o Iehova! Ia tauturu mai o ˈna, papu roa ˈtu â ia tatou “e Atua ora o Iehova!” (Sal. 18:46) I muri iho râ, ua faaau Davida i te Atua i te tahi mea e ere i te mea ora. Ua pii oia ia Iehova “to ˈu Mato.” Eaha ta ˈna e hinaaro ra e parau? Te faaau ra te Bibilia ia Iehova i te hoê “mato” no te tauturu ia tatou ia taa vetahi o to ˈna mau huru maitatai. Pinepine ta ˈna mau tavini i te faataa ia ˈna mai tera ia arue anaˈe ratou ia ˈna no to ˈna mau huru maitatai. Te faahitiraa matamua, to roto ïa i te Deuteronomi 32:4. A pure ai Hana, ua parau oia “aita ˈtu e mato mai to tatou Atua.” (Sam. 1, 2:2) Ua pii Habakuka ia Iehova “to ˈu Mato.” (Hab. 1:12) “Te mato o to ˈu aau” ta tei papai i te Salamo 73 i parau. (Sal. 73:26) Ua faaau atoa Iehova ia ˈna i te hoê mato.—Isa. 44:8. w24.06 26 par. 1, 3