Pinepine te Bibilia i te faaau i te hara i te hopoia teimaha. O ta te arii Davida ïa i parau no ta ˈna mau hara: “Te na nia ra hoi ta ˈu mau hapa i to ˈu upoo. Mai te hoê hopoia teimaha eita e haere ia ˈu ia amo.” (Sal. 38:4) E faaore râ Iehova i te hara a te feia tatarahapa. (Sal. 25:18; 32:5) Te auraa o te taˈo Hebera tei hurihia ei “faaore i te hara,” e “iriti” ïa aore ra e “amo” i te reira. Ia faaore Iehova i ta tatou mau hara, mai te huru ra e te tatara ra o ˈna i ta tatou hopoia teimaha, oia hoi te manaˈo faahapa, a hopoi ê roa ˈtu ai i te reira. Te faataa ra te tahi atu faahohoˈaraa e nafea Iehova e hopoi ê roa ˈi i ta tatou mau hara. Te na ô ra te Salamo 103:12: “Mai te atea o te hitiraa mahana i te toparaa mahana, mai te reira atoa oia ia faaatea i ta tatou mau hara ia tatou nei.” Mea atea roa te pae hitia o te râ i te pae tooa o te râ. Te auraa, e faaatea ê roa Iehova i ta tatou mau hara ia tatou. Mea na ô Iehova ia faaore roa i ta tatou mau hara. Auê ïa parau mahanahana! w25.02 9 par. 5-6

I muri aˈe i to Iesu hoˈiraa i te raˈi, ua faaora semeio te aposetolo Petero i te pirioi o te hoê taata mai to ˈna fanauraahia mai. (Ohi. 1:8, 9; 3:2, 6-8) Ua horo mai iho â ïa te taata atoa ma te maere rahi. (Ohi. 3:11) Teie râ, ua huti anei Petero i to ˈna reva, inaha ua paari o ˈna e te manaˈo mea faufaa roa te tiaraa teitei? Aita roa ˈtu. Mea haehaa o Petero. Ua parau o ˈna i taua mau taata ra ia faahanahana ia Iehova e ia Iesu. Ua na ô hoi o ˈna: “Maoti to [Iesu] iˈoa e to mâua faaroo i to ˈna iˈoa i ora ˈi teie taata ta outou e ite nei e i matau.” (Ohi. 3:12-16) E nehenehe atoa tatou e tamau i te faatupu i te haehaa mai ia Petero. No to tatou here ia Iehova e i te taata e hamani maitai ai tatou ia vetahi ê, e ere râ no te hinaaro ia faatietiehia tatou. No reira, ia itehia mai ta tatou mau tutavaraa aore ra eita, e tavini noa tatou ia Iehova e i to tatou mau taeae e tuahine ma te oaoa. Ma te na reira, te faatupu ra ïa tatou i te haehaa.—Mat. 6:​1-4. w25.03 10-11 par. 11-12

E rahi atu â to tatou aau tae no te pororaa ma te tiatonu i to tatou here no Iehova e no te taata tupu. (Mat. 22:​37-39) A feruri na i to Iehova oaoa rahi a ite mai ai ia tatou ia poro, e te oaoa rahi o te mau taata a haamata ˈi ratou i te haapii i te Bibilia! A haamanaˈo atoa e nehenehe te feia o te faaroo i ta tatou poroi e o te faaoti e haamori ia Iehova e fanaˈo i te ora mure ore. (Ioa. 6:40) Eita paha oe e nehenehe e faarue i to oe fare no te tahi tumu. A tiatonu ïa i tei maraa ia oe no te faaite i to oe here no Iehova e no te taata tupu. I te roaraa o te maˈi parare COVID-19, ua mau Samuel raua Dania i ǒ raua. Noa ˈtu râ, aita raua i faaea i te poro na roto i te niuniu paraparau, i te papai i te rata, e i te faatere i te haapiiraa Bibilia na roto i te reni aparauraa Zoom. Ua iti mai ta Samuel raua Dania i nehenehe e rave i roto i te pororaa, ua rave râ raua i tei maraa ia raua e ua oaoa raua. w24.04 18 par. 15-16