Genese

FAAORA IHORA TE ATUA IA NOA, E AˈO ATURA E ARA I TE TOTO.

9 Ua haamaitai maira te Atua ia Noa, e ta ˈna ra mau tamarii, ua na ô maira ia ratou, Ia fanau te tamarii, e ia rahi outou, e ia î te fenua nei. 2 E e tuuhia te mǎtaˈu ia outou, e te mehameha ia outou, i nia i te mau manu avae maha atoa o te fenua nei, e i nia atoa i te mau manu o te reva, e te mau mea e nee haere i nia iho i te fenua, e i nia atoa i te mau iˈa atoa o te miti; tei to outou rima anaˈe ïa. 3 Te mau mea ora atoa e haere nei, ei maa ïa na outou, mai te mau raau maa atoa ra: ua horoa-atoa-hia ˈtu e au na outou: 4 o te iˈo râ ma te ora atoa i roto ra, oia te toto, eiaha outou e amu i te reira. 5 Eita roa hoi au e ore i te titau i te hoo i to outou na toto i ora ˈi outou; e titau hoi au i te reira i te mau mea ora atoa, e i te rima hoi o te taata nei; e titau hoi au i te hoo no to te taata nei ora, i te rima o to te taata ihora taeae. 6 O te haamanii i to te taata nei toto, na te taata atoa to ˈna toto e haamanii: i hamani hoi te Atua i te taata ma to ˈna ihora huru. 7 O outou râ, ia rahi te tamarii, e ia rahi outou; ia rahi to outou huaai i nia i te fenua, e ia rahi roa outou i reira.

8 Ua parau maira hoi te Atua ia Noa, e ta ˈna mau tamarii atoa ra, na ô maira, 9 O vau nei inaha, te fafau nei au i ta ˈu nei faufaa ia outou, e to outou huaai a muri atu; 10 e te mau mea ora atoa i ǒ na ia outou na, i te mau manu pererau ra, e te mau puaa ra, e te mau manu avae maha atoa o te fenua; i te mau mea ora atoa o te fenua mai roto atoa mai i te pahi, e outou atoa na. 11 Te fafau nei au i ta ˈu nei faufaa ia outou, e e ore roa e hope faahou te mau mea ora i te pohe i te pape diluvi; e ore hoi e diluvi-faahou-hia e pohe roa ˈtu ai te fenua ra. 12 Ua parau maira hoi te Atua, Teie te tapao o te faufaa ta ˈu e tuu nei ei tapao no ˈu, e no outou, e te mau mea ora atoa i ǒ na ia outou na, no te mau ui atoa a muri noa ˈtu: 13 O tau anuanua i roto i te ata ra ta ˈu ïa e haapao nei, ei tapao no te faufaa na ˈu i to te ao atoa na. 14 E ia faatupu vau i te ata i nia ˈˈe i te fenua nei, e ua itea te anuanua i roto i taua ata ra; 15 ei reira vau e manaˈo ai i tau faufaa nei, o vau te tahi pae, e o outou te tahi, e te mau mea ora atoa e rave rahi te huru; e e ore roa te pape e riro faahou ei diluvi, e hope ai te mau mea ora i te pohe ra: 16 ia anuanuahia hoi i roto i te ata ra, e hiˈo ïa vau, ia manaˈo vau i te faufaa mure ore na te Atua i te mau mea ora atoa e rave rahi te huru i nia i te fenua nei. 17 Ua parau maira te Atua ia Noa, O te tapao faufaa ra teie i haamauhia e au no ˈu, e te mau mea ora atoa o te fenua nei.

18 E taua na tamarii a Noa mai roto mai i te pahi ra, o Sema ïa, o Hama ïa, e o Iapheta: o te metua hoi Hama no Kanaana. 19 O na tamarii tootoru a Noa ra teie; e ua î paatoa te fenua atoa ia ratou. 20 Riro atura Noa ei taata faaapu, e ua ô ihora oia i te ô vine: 21 e ua inu hoi oia i te uaina, e taero ihora; e taoto tahaa noa ˈtura oia i roto i to ˈna fare. 22 Ite aˈera te metua o Kanaana ra o Hama, i tana metua i te vai-tahaa-noa-raa, e ua faaite aˈera i na tuaana no ˈna i rapae ra. 23 Ua rave ihora Sema raua o Iapheta i te hoê ahu, tuu aˈera i nia iho ia raua, haere otua ˈtura, i muri to raua mata, tapoˈi atura i to raua metua; aore raua i ite i te vai-tahaa-raa o to raua metua. 24 Ara aˈera Noa i taua uaina na ˈna ra; e ite aˈera oia i ta te tamaiti hopea i parau ia ˈna ra.

25 Ua na ô aˈera, E ino roa Kanaana, e riro oia ei tavini haehaa roa no to ˈna ra mau tuaana. 26 E ua na ô aˈera hoi oia, E haamaitaihia Iehova, te Atua no Sema ra, e e riro hoi Kanaana ei tavini no ˈna ra. 27 E faarahi roa te Atua ia Iapheta; e parahi hoi oia i roto i te mau tiahapa o Sema, e e riro atoa Kanaana ei tavini no ˈna.

28 E a toru aˈera o Noa hanere i te matahiti, e pae ahuru tiahapa, i muri aˈe i te diluvi ra. 29 E to Noa pue matahiti atoa i te ao nei, e iva ïa hanere, e pae ahuru tiahapa; pohe ihora oia.