Ezera

TE HIERO I RAVE-FAAHOU-HIA I TE PARAU A NA PEROPHETA RA.

5 Ua tohu ihora na peropheta ra o Hagai e o Zekaria a Ido i te ati Iuda i parahi i Iuda e i Ierusalema, i te iˈoa o te Atua o Iseraela. 2 Ua tia maira Zerubabela a Sealatiela, e o Iesua a Iozadaka, ua tamata ihora i te patu faahou i te fare o te Atua i Ierusalema: raua e na peropheta a te Atua i te tururaa mai ia ratou.

3 I reira te haerea mai o te taata ra o Tatanai, e tavana no teie nei pae pape, e o Setara-bozanai, e to ratou atoa ra, e ua parau maira ia ratou; Na vai i parau mai ia outou e patu i teie nei fare, e e rave faahou i teie nei aua? 4 E ua na ô atura matou ia ratou, O vai ma anaˈe â te iˈoa o te feia e patu faahou i teie nei patu? 5 Te hiˈo maira râ te mata o to ratou Atua i te feia paari ati Iuda ra, e aita ˈtura ratou i faarue i taua ohipa ra, e tae noa maira te parau ia Dariu ra. Ua papai ihora hoi ratou i te tahi leta i taua parau nei.

6 Teie te huru o te leta i papaihia e Tatanai tavana i teie nei pae pape, e o Setara-bozanai, e to ratou atoa ra te Apharasateha i teie nei pae pape, ta ratou i hapono atu i te arii ra ia Dariu. 7 I na ôhia te papai i roto i taua leta ra i haponohia e ratou ra, I te arii ra ia Dariu, ia ora na. 8 Ia ite mai oe, e te arii e, ua haere matou i taua fenua ra o Iudea, i te fare o te Atua rahi, e patuhia aˈera i te ofai rarahi; e te raau hoi i te tuuraahia i nia i te patu ra, e te rave oioihia ra taua ohipa nei, e te tupu ra i to ratou rima. 9 Ua ui atura matou i te feia paari, na ô atura matou, Na vai i parau mai ia outou e patu i teie nei fare, e teie nei patu? 10 E ua ui atura matou ia ratou i te iˈoa a to ratou feia rarahi, ia papai hoi matou e ia faaite atu matou ia oe. 11 E ua parau maira ratou, na ô maira, E tavini matou no te Atua o te raˈi, e te fenua, e te patu faahou nei i te fare i patuhia i tahito ê ra, na te hoê arii rahi o Iseraela i patu, e oti roa aˈera. 12 Ia faaririhia ˈtura te Atua o te raˈi e to matou hui metua ra, ua horoa ˈtura oia ia ratou i te rima o te arii o Babulonia o Nebukanesa, e Kaladaio, o tei haaparari i teie nei fare e ua hopoi ê atura i te taata i Babulonia. 13 Tae aˈera râ i te matahiti matamua o te arii o Babulonia o Kuro, ua papai te arii ra o Kuro i te ture e patu faahou i taua fare o te Atua ra. 14 E te mau mea auro e te ario no te fare o te Atua ra, tei ravehia e Nebukanesa no roto i te hiero i Ierusalema, e ua hopoi mai i roto i te hiero i Babulonia, ua ravehia te reira e te arii ra e Kuro i roto i te hiero i Babulonia, e ua tuuhia ˈtu i te hoê taata o Sesebazara te iˈoa, tei faatavanahia e ana ra; 15 e ua parau atura ia ˈna, A rave i teie nei mau taoˈa, e haere, e hopoi i roto i te hiero i Ierusalema, e faatia faahou hoi i te fare o te Atua i to ˈna ra vahi. 16 Ua haere maira taua taata ra o Sesebazara, e ua haamau i te niu i te fare o te Atua i Ierusalema: e mai reira mai â, e tae roa aˈenei i teie nei i te patu-noa-raa, e aita hoi i oti. 17 E tena na, ia tia ia oe, e te arii, e imi oe i roto i te fare taoˈa a te arii ra, i Babulonia ra, i te itearaa e e ture tei tuuhia mai e te arii ra e Kuro, e faatia faahou i te fare o te Atua i Ierusalema, e na te arii e tuu mai i ta ˈna parau i taua mea nei.