Ioba
TE FAAITE NEI ELIHU, E PARAU-TIA TE MAU PARAU A TE ATUA RA.
36 Ua parau atura Elihu, na ô atura,
2 E faaoromai iti noa mai oe, e na ˈu e faaite atu, te vai nei â ta ˈu parau i te Atua. 3 No ǒ roa mai ta ˈu parau; e tuu vau i te parau-tia i tei hamani ia ˈu ra. 4 E ore ta ˈu parau e riro ei haavare; e taata ite mau ra tei mua ia oe. 5 Inaha! e puai to te Atua, e e ore oia e vahavaha mai: e puai i te mana e te paari. 6 E ore oia e faaora i te paieti ore; e faatia oia i te parau tia a te taata rii. 7 E ore to ˈna mata e hiˈo ê i te feia parau-tia ra, tei nia ïa i te terono o te hui arii ra; ia faateiteihia ratou, ua haamau-roa-hia ïa e ana. 8 E ia mau ratou i te auri, e ua tapeahia i te taura ra i te pohe; 9 ua faaite oia ia ratou i ta ratou parau, e o ta ratou mau hara ra tei hau. 10 Ua haafatafata oia i to ratou tariˈa i te aˈo, e ua faaue ia ratou ia hoˈi mai i te parau piˈo ra. 11 Ia haapao mai ratou e ia faaroo ia ˈna, e hope to ratou pue mahana i te maitai, e to ratou mau matahiti i te navenave. 12 Ia ore râ ratou ia faaroo ra, e pohe ratou i te ˈoˈe ra, e pohe hoi ratou ma te ite ore ra. 13 E na reira te aau ino i te haaputu i te riri; e ore e pii ia haamauhia ratou e ana. 14 Ei to ratou apîraa ra e pohe ai; e amuihia ratou i te oraraa ra i roto i te feia viivii. 15 E faaora oia i tei ati ra i to ratou poheraa, ia oti ratou i te aˈohia e taua pohe ra. 16 Oia atoa oe, ua faatia ïa ia oe i to oe ra pohe, e riro i te faaaanohia, eiaha te pirihao i to oe ra vahi, e te maa i nia i to airaa maa, e meˈi anaˈe ïa. 17 Ua rave hua oe i te parau a te taata ino; e roohia oe i te parau-tia e te parau au. 18 Ia roohia e te riri ra, e haapao maitai o te tairi-tia-noa-hia oe e pohe atu; ia rahi noa ˈtu te hoo, e ore oe e matara mai. 19 E haapao mai anei oia i ta oe ra taoˈa? e ore, eiaha te auro, e te puai atoa o te mana ra.
20 Eiaha e nounou rahi hua i te po, te riro ê nei hoi te taata atoa i to ratou ra vahi. 21 E ara! eiaha e hoˈi i te parau ino; ua faatia hoi oe i te reira, aore i te pohe. 22 Inaha! e faatia te Atua i to ˈna ihora mana, o vai te haapii e faito ia ˈna ra? 23 Na vai i faaite ia ˈna i to ˈna eˈa? e na vai e parau atu e, Ua hapa oe?
24 E haamanaˈo! ia faatura ˈtu oe i ta ˈna i rave ra, tei haapaohia e te taata atoa ra. 25 Te manaˈo nei te taata atoa i te reira; e te itehia nei e te taata atoa i te atea ê ra. 26 Inaha! e rahi te Atua e ore e itea e ta tatou, e te taioraa o to ˈna matahiti, e ore e tia ia imi. 27 Na ˈna i afai te topata pape ra i nia; e ua mairi maira ei ûa no roto mai i te mahu ra; 28 na te ata i haamairi i raro, e ua uˈana noa maira i nia i te taata. 29 O vai te ite i te hohoraraa o te mau ata; e te haruru o to ˈna ra sekene? 30 Inaha, ua hohora oia i to maramarama e ati aˈera te reira ra, e ua tapoˈi i te tumu o te moana! 31 O ta ˈna ïa ravea i te faautuaraa ˈtu i te mau fenua; e ua tuu mai hoi i te maa e rave rahi. 32 Te ati nei te raˈi atoa i te uira, na ˈna râ e faaite i te faatiaiaraa ˈtu. 33 Te faaite atura to ˈna patiri i te reira; e riri to reira i te feia taîata.