Salamo

TO DAVIDA TIAIRAA ˈTU I TE ATUA.

Na te Menasehe. E Salamo na Davida.

40 Tiai maite atura vau ia Iehova, e ua fariu maira oia ia ˈu, e ua faaroo i ta ˈu pure. 2 Ua ume oia ia ˈu i rapae i taua apoo riaria ra, no roto i te vari hohonu e te piripiri; e ua tuu oia i tau avae i nia i te pǎpǎ, e ua faaau maite hoi i to ˈu mau haerea.

3 E ua tuu mai oia i te himene apî i roto i to ˈu nei vaha; e himene haamaitai i to tatou Atua. E rave rahi te hiˈo, e ua mǎtaˈu ia ˈna, e tiaturi hoi ratou ia Iehova. 4 E ao to te taata e tiaturi ia Iehova, e aore i haapao i te teoteo, e tei fariu i te parau haavare ra. 5 E rave rahi, e tau Atua, e Iehova, te mau ohipa taa ê i ravehia e oe ra, e to oe ra manaˈo ia matou nei e ore e tia ia taio noa ˈtu i mua ia oe na: e faaite hoi au, e parau vau i te reira, eita râ e tia ia taio atu i te rahi.

6 Aore oe i hinaaro i te tusia e te tusia amu; ua haafatafata oe i to ˈu pue tariˈa: te tusia taauahi e te tusia no te hara ra aita oe i titau mai; 7 ua parau atura vau, Inaha, te haere atu nei au! ua papaihia te parau no ˈu i roto i te buka ra; 8 E mea au na ˈu te rave i to oe hinaaro, e tau Atua; te vai nei hoi ta oe ture tei roto i to ˈu nei aau. 9 Te parau nei au i te parau-tia i roto i te amuiraa rahi o te taata nei; inaha, aore roa tau vaha i mamû i te reira, ua ite atoa hoi oe, e tau Atua, e Iehova. 10 Aore au i huna i te parau-tia na oe i roto i tau aau; te faaite nei au i to parau mau e te ora na oe. Aore au i huna i to hamani maitai e to parau mau i te amuiraa rahi ra.

11 Eiaha oe e hopoi ê i to aroha hamani maitai ia ˈu, e Iehova e; na to hamani maitai e to parau mau e tiai mai ia ˈu. 12 Ua haaatihia hoi au e te ino e rave rahi; ua roohia vau i ta ˈu nei mau hara, e eita e tia ia nânâ noa ˈtu i nia ra; e rahi te reira i te io rouru i to ˈu nei upoo; e teie nei, ua taiâ tau aau i roto ia ˈu nei. 13 Ia tia ia oe, e Iehova, e faaora ia ˈu: ia peepee mai, e Iehova, e tauturu mai ia ˈu. 14 Ia haama ratou e ia hepohepo ratou atoa ra o tei titau mai ia ˈu nei ia pohe: ia faahoˈihia ratou e ia hepohepo tei titau mai ia ˈu nei ia ino. 15 O te pau te noaa ia ratou, ei utua no ta ratou faaino, o tei parau ia ˈu nei e, Aitoa! aitoa! 16 O te feia atoa ra i imi ia oe ra, e oaoa ïa ratou, e ia rearea ïa ia oe; e te feia i hinaaro i te ora na oe ra, e parau ïa ratou e, Ia faarahihia Iehova e a muri noa ˈtu.

17 E ati e te veve to ˈu, te manaˈo maira râ Iehova ia ˈu. O oe tau tauturu e tau ora; eiaha e faaroaroa, e tau Atua.