Salamo
TE BASILEIA O TE MESIA.
Na te Menasehe, i nia i te Sosanima, na te tamarii a Kora. Masekila, e himene na tei herehia ra.
45 Te î nei tau aau i te parau maitai; e parau na vau i tei faaauhia e au no te arii ra; e riro hoi tau arero mai te peni o te taata papai oioi i te parau ra.
2 E maitai rahi to oe i to te tamarii atoa a te taata nei: ua manii te maitai i nia i to vaha na; i tamau ai to te Atua haamaitai ia oe ra.
3 A tatua na i to ˈoˈe i to humaha, e tei puai ra, to oe ra hinuhinu e to oe ra mana; 4 e ma to mana ra, a horo ai ma te maitai, ei faatupu i te parau mau, e te mǎrû, e te parau-tia; e na to rima atau e faaite ia oe i te mau mea riaria: 5 e mairi te mau taata i raro ia oe ra! e ooi te mau ohe na oe ra i te aau o te mau enemi o te arii ra. 6 To terono, e te Atua, e vai â e a muri noa ˈtu: e sepeta parau-tia te sepeta o to oe ra basileia. 7 I hinaaro oe i te parau-tia, e te riaria ra oe i te ino; i faatahinu ai te Atua, to Atua ra, ia oe, i te monoˈi ra i te oaoa e hau ê atura i to mau hoa ra: 8 E mura, e te aloe, e te kuziou, tei to oe ahu. No ǒ i te mau fare sena te faaoaoa ia oe. 9 E tamahine anaˈe no te hui arii to roto i tei herehia e oe ra; tei to rima atau te arii vahine i te tiaraa, te ahu ra i te ahu auro no Ophira. 10 E faaroo mai, e tera ra tamahine; e haamanaˈo, e fariu mai i to tariˈa; e haamoe atu i to oe ra mau taata e te utuafare o to metua ra; 11 ei reira e riro ai te aau o te arii i to oe ra maitai: oia to oe Fatu; e haamori â oe ia ˈna. 12 Na te tamahine a Turia e hopoi mai i te ô ia oe ra; e na te feia taoˈa rahi e titau mai ia itehia ˈtu e oe.
13 Nehenehe rahi to te tamahine a te arii ra i roto; ua faaunaunahia to ˈna ahu i te auro. 14 E arataihia oia i te arii ra ma te ahu unauna rahi; e tana mau hoa paretenia i te peeraa ia ˈna; e arataihia ratou ia oe ra; 15 e arataihia ratou ma te popou e te oaoa, e tomo hoi ratou i te fare o te arii ra. 16 E monohia mai to mau metua ra i to tamarii, e na oe ïa e faaarii i te mau fenua atoa nei.
17 E faariro hoi au i to iˈoa ra, ei iˈoa manaˈohia, e ati noa ˈˈe te mau ui atoa ra: e haamaitai te taata atoa ia oe e a muri noa ˈtu.