Salamo

TO DAVIDA AHOAHORAA RAHI.

Na te Menasehe, na nia i te Neginota. Masekila. E Salamo na Davida.

55 E faaroo mai, e te Atua, i tau pure; eiaha e purou i to mata i ta ˈu e ani nei: 2 e haapao mai na, e faaroo mai, e ati to ˈu i te manaˈo-haere-noa-raa, e te autâ noa nei, 3 no te reo o te enemi, no te hamani ino o te feia paieti ore. Te pari mai nei ia ˈu i te hara; e te faateitei nei ia ratou iho ma te riri ia ˈu nei. 4 Ua horuhoru tau aau i roto ia ˈu nei; e ua roohia vau i te riaria pohe ra. 5 Ua roohia vau i te mǎtaˈu e te rurutaina, e ua haaatihia vau e te horiri. 6 E ua na ô aˈera vau, Ahiri â e pererau to ˈu, mai to te uupa e! e maue au i te vahi faaearaa. 7 Inaha, e maue ê au i te tahi vahi roa, a faaea ˈi au i roto i te medebara. Sela. 8 E haere etaeta ïa vau i te haapuraa i te puahiohio uˈana nei.

9 E faaore, e Iehova, eiaha ta ratou parau ia mau: te ite nei hoi au i te hamani ino e te mârô i roto i te oire nei. 10 Te haaati nei te reira i te rui e te ao na nia i te mau aua ra: e tei ropu ra, o te piˈo ïa e te parau ino. 11 E ino rahi tei rotopu ia ˈna; e ore hoi te haavare e te faahema e taa ê i to reira mau aroâ. 12 Ahiri hoi e enemi tei faaino mai ia ˈu ra, e tia ia ˈu ia faaoromai i te reira; ahiri ei taata i tairoiro mai ia ˈu, tei tia mai e rave ia ˈu ra, e tia ïa ia ˈu ia tapuni ia ˈna. 13 E inaha o oe â, o te taata auhia e au ra; o te aratai ia ˈu e te hoa here no ˈu. 14 E parau maitatai ta tâua i paraparau ra; e ua hahaere atoa i te fare o te Atua ra. 15 E roohia-noa-hia mai ratou e te pohe; e reva ora noa ratou i raro i hade ra, e hara rahi hoi tei roto i to ratou mau parahiraa.

16 Area vau nei, e tiaoro vau i te Atua; e na Iehova e faaora ia ˈu. 17 Ei te ahiahi, ei te poipoi, e te avatea, e pure ai au; e pii hua vau, ia itea mai tau reo. 18 Ua faaora oia i tau varua ma te hau, i tei tamaˈi mai ia ˈu: e feia rahi hoi tei ati mai ia ˈu. 19 E faaroo mai hoi te Atua, e e faahaehaa ˈtu oia ia ratou; oia o tei parahi mai tahito mai â. Sela. No te mea te vai noa maira to ratou huru, i ore ai ratou i mǎtaˈu ai i te Atua. 20 Te rave nei to ˈna rima i tei parahi hau noa ia ˈna ra, e ua tahemo oia i ta ˈna parau faaau ra: 21 e paia rahi to to ratou vaha i to te hemae ra, e tamaˈi râ tei opuahia e to ratou aau ra; ta ratou parau, e mǎrû rahi ïa i to te monoˈi ra, e au râ i te mau ˈoˈe i unuhihia ra.

22 E tuu oe i ta oe hopoia ia Iehova ra, e na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia. 23 Area i tera, e te Atua, na oe e tuu i raro, i te apoo ra o te pohe: o te feia toto ra e te haavare ra, e ore ïa e tae rea i ropu i to ratou ra pue mahana e pohe ai; e tiaturi râ vau ia oe.