Salamo
TE AˈO RA DAVIDA I TE TAATA IA HAAMAITAI I TE ATUA.
Na te Menasehe. E Himene, e Salamo.
66 E pii hua i te oaoa i te Atua, e te mau fenua e: 2 e himene ei haamaitai i to ˈna iˈoa: e faariro i to ˈna hanahana ei haamaitairaa ia ˈna. 3 E parau atu i te Atua, E mau ravea mataˈutaˈu ta oe! No to oe ra mana rahi i auraro mai ai to mau enemi ia oe ra. 4 E haamori te mau fenua atoa nei ia oe; e himene ia oe, e himene i to oe ra iˈoa. Sela. 5 E haere mai e hiˈo i te mau ohipa a te Atua! E mea mataˈutaˈu ta ˈna i rave i te taata nei. 6 Ua faariro oia i te tai nei ei repo mǎrô: ua na raro noa ratou na te moana i te haere: i reira to tatou oaoaraa ia ˈna.
7 Te mana nei oia i to ˈna puai e a muri noa ˈtu; te tiatonu ra to ˈna mata i te mau etene: eiaha tei hauti ra e faateitei ia ratou iho. Sela.
8 E haamaitai i to tatou Atua, e te mau taata nei e! Ia itea hoi te reo i te haamaitairaa ia ˈna, 9 o oia tei tiai ia tatou e ora ˈi, e o tei faaitoito i to tatou avae ia ore ia pahee. 10 Ua tamata-mau-hia matou e oe, e te Atua e! ua tamâ oe ia matou mai te ario i tamâhia ra; 11 ua tuu oe ia matou i roto i te marei, e ua tuu oe i te hopoia teiaha i nia i to matou tauupu. 12 Na oe i faahoro i te taata na nia i to matou upoo; ua na roto matou i te auahi e te pape; ua aratai râ oe ia matou i te fenua taoˈa. 13 E tomo vau i to fare ma te tusia taauahi; e faatupu vau i tau mau euhe ia oe ra, 14 tei parauhia e tau vaha, e na tau vaha i faaite i tau atiraa ra. 15 Te tusia taauahi poria ra ta ˈu e hopoi atu ia oe ra: te mamoe oni, e te mea noˈanoˈa atoa; te puaatoro e te puaaniho ta ˈu e faatusia. Sela. 16 E haere mai, e faaroo, o outou atoa e mǎtaˈu i te Atua ra; e na ˈu e faaite i ta ˈna i rave i to ˈu nei varua. 17 Ua pii atura tau vaha ia ˈna, e ua faateitei tau arero ia ˈna; 18 ahiri râ te faatia ra tau aau i te ino, e ore au e faaroohia mai e Iehova. 19 Ua faaroo mau râ te Atua ia ˈu; e ua haapao mai i ta ˈu i ani atu. 20 Ia haamaitaihia hoi te Atua, oia aore i haapae i ta ˈu nei pure, e aore hoi i faahoˈi i to ˈna aroharaa ia ˈu nei.