Salamo

TE TURE A IEHOVA I TE FAAITERAAHIA.

Masekila a Asapha.

78 E faaroo mai, e au mau taata, i ta ˈu ra ture; e fariu mai to outou tariˈa i te parau a tau vaha. 2 E parau tau vaha i te parau taa maitai; e faaite au i te parau a manaˈo tahitohia ra, 3 O ta tatou hoi i faaroo e ua itea, e ua faaite mai to tatou mau metua ia tatou. 4 E ore te reira e hunahia e tatou i ta ratou mau tamarii, e faaite faahou râ tatou i te tahi ui, i te haamaitairaa ia Iehova, e to ˈna mana; e te ohipa taa ê i ravehia e ana ra.

5 Ua tuu mai oia i te parau na Iakoba e ua haapao i te ture na Iseraela; ta ˈna i faaue mai i to tatou mau tupuna ra, ia faaite atu ratou i ta ratou ra mau tamarii: 6 ia ite te ui i pihai atu; te mau tamarii e fanau mai; e ia tupu ia faaite atu ratou i ta ratou mau tamarii: 7 ia tiaturi ratou i te Atua, e eiaha e haamoe i ta ˈna ra ohipa, e haapao ra ratou i ta ˈna parau. 8 E eiaha ratou ia faito i to ratou ra mau metua, ei ui etaeta e te haapao ore; ei ui aau mau ore, e aore to ratou aau i haapao i te Atua.

9 Te mau tamarii a Epheraima, mai te mau taata e fana te mauhaa ra, e ua hoˈi maira i muri i te mahana aroraa ra. 10 Aore ratou i haapao i te faufaa a to ratou ra Atua, e aore aˈera i haapao i ta ˈna ra ture. 11 Haamoe atura ratou i ta ˈna ra mau ohipa, e te mau mea i maerehia ta ˈna i faaite ia ratou: 12 te mau mea taa ê i ravehia e ana i mua i te aro o to ratou ra mau metua, i te fenua ra i Aiphiti, e te vahi ra i Ziona.

13 Ua vahi oia i te miti ia taea ia ratou ia haere; e ua haapue oia i te moana mai te puea ra. 14 I te ao ra ua aratai oia ia ratou i te ata ra, e te rui ra e ao noa ˈˈe, i te maramarama auahi ïa. 15 Ua haaparari oia i te mato i te medebara, e ua tuu maira i te pape na ratou mai te moana te rahi. 16 Ua faatahe mai oia i te pape no roto i te mato ra, e ua tahe maira mai te mau anavai ra! 17 Ua tamau râ ratou i te rave i te hara ia ˈna, i te faaririraa ˈtu i Tei Teitei i te medebara ra. 18 Ua faaooo to ratou aau i te Atua, i te aniraa i te maa ta ratou i hiaai ra. 19 Ua parau ino hoi ratou i te Atua, ua na ô aˈera, E tia anei i te Atua ia hohora mai i te amuraa maa i te medebara nei? 20 Inaha, ua tairi oia i te mato, e ua hî noa maira te pape, e ua tahe maira mai te vai pue ra; e tia atoa anei ia ˈna ia horoa mai i te maa ra? e noaa anei ia ˈna te inaˈi na to ˈna nei taata?

21 Ite aˈera Iehova i te reira, ua riri ihora, ama aˈera te auahi ia Iakoba, tupu aˈera te riri ia Iseraela; 22 no te mea aore ratou i faaroo i te Atua, aore hoi i tiaturi i te ora na ˈna.

23 Ua faauehia ra e ana te mau ata i nia ra, e ua iritihia e ana te mau uputa o te raˈi ra, 24 e ua haamairi noa maira i te mâna ei maa, e te sitona no te mau raˈi ra tei horoahia mai e ana na ratou; 25 ua amu te taata atoa i te maa a te feia mana; e ua navai roa te maa ta ˈna i hopoi maira.

26 Ua haafarara maira oia i te maoaˈe mai te raˈi mai, e na to ˈna puai i haafarara mai i te maraamu; 27 ua haamairi maira i te inaˈi i nia ia ratou mai te huˈa rii repo ra, e te manu pererau mai te one tahatai ra. 28 Ua haamairi maira oia i te reira i rotopu i to ratou puhapa, e ati noa ˈˈe to ratou ra parahiraa. 29 Ua amu ihora ratou e paia aˈera ratou: ua hopoi mai hoi oia i ta ratou i hiaai ra.

30 E aita aˈera ratou i paia maitai; e te vai noa ra ta ratou maa i to ratou vaha, 31 i roohia mai ai ratou i te riri o te Atua; pohe ihora te feia poria o ratou ra ia ˈna, e tairihia ihora te taata maitatai o Iseraela ra.

32 Te rave noa râ ratou i te hara, e aore i faaroo i te mau ohipa taa ê na ˈna ra. 33 I haamauˈa noa ˈi oia i to ratou pue mahana ei mea faufaa ore, e to ratou mau matahiti i te fatimauu.

34 Ia tairi oia ia ratou ra, ua imi ihora ia ˈna, e ua fariu e ua uiui i te Atua. 35 Ua manaˈo aˈera ratou e, o te Atua to ratou haapuraa, e o te Atua, o Tei Teitei ra, to ratou ïa Ora. 36 Ua haapaia ra to ratou vaha ia ˈna, e ua haavare ia ˈna to ratou arero: 37 aore hoi to ratou aau i tia ia ˈna, aore hoi ratou i haapao maitai i ta ˈna parau. 38 Oia râ, no te î i te aroha, ua faaore aˈera i ta ratou hara, e aore aˈera i rave pohe roa ia ratou; ua faahoˈi pinepine ra oia i te riri, e aore to ˈna riri i faahope-hua-hia: 39 ua manaˈo hoi oia ia ratou e e taata; e mataˈi e pee noa ra e e ore e hoˈi mai.

40 Te pinepine o ta ratou faaoooraa ˈtu ia ˈna i te fenua moemoe ra e! e te pinepine hoi o ta ratou faaririraa ˈtu ia ˈna i te medebara! 41 Oia ïa, ua na nia iho ua na nia iho ratou i te faaooo i te Atua e ua aa ˈtu i Tei Moˈa i Iseraela nei. 42 Aore ratou i manaˈo i te ohipa i ravehia e tana rima, i te mahana i faaora ˈi oia ia ratou i te enemi. 43 Te mau semeio ta ˈna i rave i Aiphiti; e te mau ohipa taa ê ta ˈna i rave i taua vahi ra i Zoana! 44 I te faariroraa i ta ratou pape ei toto, e te pape rii matatia ra, e aita ˈtura e tia ia inu! 45 Ua tuu atura i te popoti i rotopu ia ratou, e pau ihora, e te rana e pohe atura ratou. 46 Ua horoa hoi oia i ta ratou maa na te he, e ta ratou i ohipa ra na te arabe. 47 Ua tairi ihora oia i ta ratou mau vine i te ûa-paari, e ta ratou mau sukamino i te toetoe. 48 Ua horoa oia i ta ratou mau puaa i te ûa-paari, e ta ratou mau nǎnǎ mamoe i te uira. 49 Ua huri noa maira i to ˈna riri rahi i nia ia ratou, te riri rahi, e te tairoiro, e te riri faauˈana, i te tonoraa mai i te mau vea parau ino ra. 50 Ua rave oia i te eˈa no to ˈna riri; ua tuu noa ˈtu oia ia ratou no te pohe, ua horoa noa ˈtu oia ia ratou no te maˈi pohe ra. 51 Ua tairi oia i te mau matahiapo no Aiphiti; te matamehai o to ratou puai i te mau tiahapa o Hama ra. 52 Ua aratai râ oia i to ˈna ihora taata mai te mamoe ra, e ua tiai oia ia ratou mai te nǎnǎ i te medebara ra. 53 Ua aratai oia ia ratou ma te ora e aore ratou i mǎtaˈu; ua pau hoi to ratou mau enemi i te horomiihia e te miti ra. 54 Ua aratai oia ia ratou i to ˈna ra vahi moˈa; i teie nei mouˈa i noaa i tana rima atau. 55 Ua tiahi oia i te mau etene i mua ia ratou; e ua tufa i te fenua ei parahiraa, e ua haaparahi i te mau opu o Iseraela i to ratou ra mau tiahapa.

56 Ua faaooo râ ratou e ua faariri i te Atua teitei, e aore i haapao i ta ˈna ra parau! 57 Ua taiva â ratou e ua haavare mai to ratou mau metua ra, ua hoˈi faahou i te huru tahito ra mai te fana i te tarahia te hua ra. 58 Ua faariri ratou ia ˈna i ta ratou mau vahi teitei ra, e ua faaooo atu ia ˈna i to ratou mau idolo taraihia ra. 59 Ia hiˈo maira te Atua i te reira ua riri ihora, e ua faafaufau roa ia Iseraela, 60 e ua faarue ihora i te tiahapa i Silo ra, i te sekene ta ˈna i parahi i roto i te taata nei. 61 Ua tuu atura oia i te afata o to ˈna puai ei tîtî, e to ˈna hanahana i te rima o te enemi. 62 Ua tuu atu hoi oia i to ˈna iho mau taata no te ˈoˈe, e riri aˈera hoi oia i ta ˈna ra tufaa. 63 Pau ihora to ratou mau taata apî i te auahi, e aore ta ratou paretenia i faaipoipohia ra. 64 Ua mairi ta ratou mau tahuˈa i te ˈoˈe, e aore ta ratou mau ivi vahine i oto.

65 Maoro aˈera râ, ua ara maira Iehova mai te ara taoto ra; e mai te taata itoito e pii i te uaina ra, 66 e ua tairi ihora i tana mau enemi i muri ra; e ua tuu atura i te haama vaiiho taiata ia ratou.

67 Ua faarue hoi oia i te tiahapa o Iosepha, e aore hoi hinaaro i te opu o Epheraima; 68 i hinaaro aˈera râ i te opu o Iuda, te mouˈa ra o Ziona ta ˈna i hinaaro ra: 69 ua patu ihora i tana vahi moˈa ra mai te fare teitei ra, e ua haamauhia mai te fenua i haamau-roa-hia nei. 70 I hinaaro aˈera râ i tana tavini ia Davida, ta ˈna i rave mai mai te aua mamoe ra; 71 ua aratai mai oia ia ˈna mai te peeraa i te mamoe i faaote i te û ra, ia faaamu oia i to ˈna taata, i te mau huaai o Iakoba, e te mau tamarii a Iseraela ta ˈna ra tufaa.

72 Ua faaamu oia ia ratou ma te aau haavare ore, e ua aratai oia ia ratou i te aravihi o to ˈna ra rima.