Salamo
BUKA MAHA
TE PARUPARU E TE AHO POTO O TE TAATA.
Te pure a te taata o te Atua ra, a Mose.
90 E te fatu, o oe to matou haapuraa, i tera ui, i tera ui. 2 Aore te mau mouˈa nei i fanau, e aore hoi te fenua e te ao atoa nei i hamanihia e oe ra, te vai ra oe, e te Atua, mai tahito mai â e a muri noa ˈtu! 3 O te taata nei râ te faariro faahou nei oe ei repo; te parau ra hoi oe, A hoˈi, e te tamarii a te taata na. 4 Ia oe ra hoi, hoê tausani noa ˈtu i te matahiti e au i te mahana hoê i mahemo ra; e mai te araraa hoê i te rui ra. 5 Te riro nei ratou ia oe mai te riro pape pue ra! e mai te varea taoto ra ratou: i te poipoi ra, mai te aihere e tupu ra ratou; 6 o tei oteu e tei tupu i te poipoi ra, e ua ahiahi anaˈe ra, ua tâpûhia e ua oriorio atura. 7 Oia teie ua pau matou i to oe ra riri, e ua riaria matou i ta oe ra mainaina. 8 Ua tuu oe i ta matou hara i mua ia oe; e ta matou hapa moe i roto i te maramarama o to mata ra. 9 Ua mou aˈenei to matou mau mahana i to oe ra riri; ua pau to matou mau matahiti mai te manaˈo aau e pee ra! 10 To matou pue mahana i te oraraa nei e hitu ïa ahuru i te matahiti, e ia tae i te vau i te ahuru i te matahiti i te etaeta, e riro râ taua etaeta ra ei rohirohi e ei taiâraa: e ore hoi e mahia motu ê atura, maue atura matou! 11 O vai ra tei haapao i te puai o to oe ra riri? e ta oe ra tairoiro, mai te mǎtaˈu e au ia oe ra. 12 E haapii mai ia matou i te taio i to matou pue mahana, ia riro to matou aau i te haapao maitai. 13 E fariu mai ia matou, e Iehova, ahea ra ïa? a faite mai oe i to mau tavini nei. 14 A haamauruuru vave mai oe ia matou i to oe ra aroha, ia rearea matou e ia oaoa i to matou nei pue mahana toe. 15 A faaoaoa mai ia matou e ia faito i te mau mahana i ati ai matou ra; e te mau matahiti i faaoromai ai matou i te ino ra. 16 A faaite mai i ta oe ra ohipa i to mau tavini nei, e to oe ra hanahana i ta ratou ra tamarii. 17 Ia vai mai â te here o to matou nei Atua, o Iehova, i nia ia matou nei; e te ohipa a to matou nei rima e haamau oe; oia ïa, o te ohipa a to matou rima i rave ta oe e haapapu.