Exodo

NA PARURU O TE VAHI MOˈA HOÊ AHURU I FAAITEHIA RA.

26 E hamani atoa oe i te sekene, ia hoê ahuru paruru ahu vavai tavirihia ra, ma te ereere tape moana, e te uraura, e te uteute; e te mau kerubi ohipa rii nehenehe ta oe e rave ra. 2 Ia piti ahuru e vau tiahapa te kubiti i te maoro i taua mau paruru ahu atoa ra, e ia maha hoi kubiti i taua mau paruru atoa ra i te aano; ia hoê â hete faito o taua mau paruru atoa ra; 3 o e pae paruru ra e tia honohonohia ïa; e o e pae hoi e tia honohono-atoa-hia ïa. 4 E hamani hoi oe i te haavaro ereere tape moana i te hiti o te paruru, i te hiti i rapae au i te tia atiraa ra; e na reira atoa i te hamani i te tahi paruru i te hiti i rapae au ra, ei taatiraa ˈtu i te tahi. 5 E pae ahuru a oe haavaro e hamani i te hiti o te hoê paruru, e e hamani atoa hoi oe i e pae ahuru haavaro i te hiti o te tahi paruru o te taatihia i te tahi ra, ia ati na paruru ra i taua mau haavaro ra. 6 E hamani hoi oe i te pae ahuru tapea auro ra, a taati ai i te mau paruru ra i taua mau tapea ra, ia riro ei sekene hoê ra.

7 E hamani atoa oe i te ahu pu huruhuru puaaniho ra, ei tapoˈi i nia iho i te sekene ra; ia hoê ahuru e hoê tiahapa ahu pu ta oe e hamani; 8 e toru ahuru kubiti i te maoro o taua mau ahu pu atoa ra, e maha hoi kubiti o taua mau ahu pu atoa ra i te aano; ia hoê â hete faito taua mau ahu pu atoa, hoê ahuru e hoê tiahapa ra; 9 e tia honohono hoi oe i na ahu pu e pae raa e taa ˈtura ïa, e na ahu pue e ono ra hoi e taa ˈtura te reira, e e tiafetu oe i te ono o te ahu i te aro atu o te sekene ra. 10 E hamani hoi oe i te haavaro e pae ahuru ei te hiti o te hoê ahu tapoˈi, ei te hiti i rapae au ei tia atiraa; e e pae ahuru hoi haavaro ei te hiti i rapae au i te tahi ahu tapoˈi, ia taatihia na ahu tapoˈi ra. 11 E hamani hoi oe i e pae ahuru tapea veo, a tuu ai i te mau tapea i roto i te mau haavaro ei taatiraa i taua tapoˈi ra, ia riro ïa ei hoê. 12 E te maa tape e toe i taua mau ahu paruru o te tiahapa ra, te afa o te hoê ahu pu ra, e vaiiho noa ˈtu ia tautau noa na i muri mai i te sekene ra. 13 E te kubiti hoê i te tahi pae, e te kubiti hoê hoi i te tahi pae, e tei hau i te maoro i te mau ahu paruru o te tiahapa ra, e vaiiho noa ˈtu, ia tautau noa na, i na hiti o te sekene ra, i te tahi pae, e i te tahi pae ei paruru. 14 E hamani hoi oe i te tahi tapoˈi iri mamoe oni rapaau-uteute-hia no te tiahapa ra; e te tahi tapoˈi iri tekesa i nia ihora.

15 E tarai hoi oe i te pǎpǎ no te sekene e sitima te raau e faatia noa i nia. 16 Ia hoê ahuru kubiti i te maoro i taua mau pǎpǎ ra, hoê hoi kubiti e afa kubiti te aano i te mau pǎpǎ ra e ati noa ˈˈe. 17 Ia piti hoi auri to te pǎpǎ hoê, ia faito maite te huru te tahi e te tahi; e na reira oe i te hamani i te mau pǎpǎ atoa no taua sekene nei. 18 E te mau pǎpǎ no te sekene ta oe e tarai, e piti ahuru pǎpǎ i to te pae i apatoa ra. 19 E hamani atoa oe i te tiaraa ario e e maha ahuru, no raro aˈe i taua mau pǎpǎ ra, e piti ahuru; e piti tiaraa to te pǎpǎ hoê no na auri e piti ra. 20 E e piti ahuru pǎpǎ no te tahi pae sekene ra, no te pae i apatoerau ra: 21 e to te reira hoi mau tiaraa ario e maha ahuru ra: e piti tiaraa to te pǎpǎ hoê, e piti hoi tiaraa to te tahi pǎpǎ e ati noa ˈˈe. 22 E e ono hoi a oe pǎpǎ e tarai no te tahi pae sekene i te pae i te tooa o te râ ra. 23 E tarai hoi oe i e piti pǎpǎ no na peho o te sekene i te tahi pae e te tahi pae. 24 E e haamauhia hoi taua na pǎpǎ ra i raro, e haamau-atoa-hia hoi i nia i te mauhaa hoê ra: mai te reira atoa te tahi e te tahi; no na peho ra taua na pǎpǎ ra. 25 E vau taua na pǎpǎ ra, e to ratou tiaraa ario ra, hoê ïa ahuru e ono tiahapa; e piti tiaraa i raro aˈe i te tahi pǎpǎ, e piti tiaraa i raro aˈe i te tahi pǎpǎ.

26 E tarai hoi oe i te teˈa e sitima te raau; o e pae ra no te mau pǎpǎ i te tahi pae sekene, 27 e pae hoi teˈa no te mau pǎpǎ i te tahi pae sekene; e pae hoi teˈa no te mau pǎpǎ i te opani mai o te sekene i te pae i te tooa o te râ ra. 28 E te teˈa i ropu ra, o tei na roto i taua mau pǎpǎ ra, mai te tahi hopea ïa, e tae roa ˈtu i te tahi hopea. 29 E vehî hoi oe i te mau pǎpǎ i te auro, e te mau potaa ra ei auro ïa, ei oomoraa i te mau teˈa ra; e e vehî atoa oe i te mau teˈa i te auro. 30 E na reira oe i te faatia i taua sekene nei, ia au i te huru i faaitehia ˈtu ia oe i nia i te mouˈa ra.

31 E e hamani hoi oe i te tahi paruru ereere tape moana, e te uraura, e te uteute, e te vavai i tavirihia ra, e te ohipa rii nehenehe i nia ihora, e te kerubi ia hamani oe ra. 32 E e faauta oe i te reira i nia iho i na pou sitima e maha, i vehîhia i te auro ra; e ei auro hoi te mau tapea, e na tiaraa ario e maha ra te tiaraa.

33 E faauta oe i te paruru i raro aˈe i te mau tapea ra, a hopoi ai oe i te afata ture i reira i roto mai i te paruru ra; e taua paruru ra ta outou otia, i te vahi moˈa, e te vahi moˈa roa ˈtu. 34 E tuu hoi oe i te tapoˈi i nia iho i te afata ture i roto i te vahi moˈa roa ˈtura. 35 E tuu hoi oe i te airaa-maa ra i rapae au atu nei i taua paruru ra, e te vairaa-lamepa i te tahi pae, ia faito maite i te airaa-maa ra, ei te pae i apatoa i te sekene ra, e e tuu hoi oe i te airaa-maa i te pae i apatoerau ra.

36 E hamani atoa hoi oe i te paruru no te tomoraa i te fare ra; ei ahu ereere tape moana, e te uraura, e te uteute, e te vavai tavirihia ra, ma te ohipa nehenehe i nia ihora, 37 E tarai hoi oe i e pae pue pou sitima no taua paruru ra, e vehî hoi i taua na pou ra i te auro i rapae au ra; e ei auro hoi te mau tapea ra; e faatô hoi oe i e pae tiaraa veo no taua na pou ra.