Exodo

NA TE TAATA I FAAUE, E NA AARONA I HAMANI I TE KAFA AURO RA.

32 Ite aˈera râ te mau taata e, ua maoro Mose, aita i haere mai i raro mai nia mai i taua mouˈa ra, ua tairuru maira taua mau taata ia Aarona ra, ua na ô maira ia ˈna, Ahiri, a hamani i te atua no tatou ei na mua ia tatou nei; area o Mose, o te taata i aratai mai ia tatou mai Aiphiti maira, aore tatou i ite i to ˈna haerea. 2 Ua parau atura Aarona ia ratou, E iriti mai na outou i te poe auro i te tariˈa o ta outou mau vahine, e ta outou mau tamarii tamaroa, e ta outou mau tamahine, a hopoi mai ai ia ˈu nei. 3 Ua iriti aˈera taua feia atoa ra i to ratou mau poe auro i to ratou tariˈa, e ua hopoi maira ia Aarona ra. 4 Ua rave atura hoi oia i to ratou ra rima; hamani ihora oia i te reira ma te hoê tohi ra, e ua faatô ihora ei kafa. Ua na ô ihora ratou, Teie to oe atua, e Iseraela, o tei aratai mai ia oe mai te fenua maira mai Aiphiti. 5 E ia hiˈo aˈera Aarona i taua kafa ra, ua hamani ihora oia i te hoê fata i mua i taua kafa ra; e ua faaite atura Aarona i te parau, na ô atura, E mahana oroa ananahi no Iehova. 6 E ao aˈera, ua tia aˈera ratou i te poipoi roa, e ua haapae i te tusia taauahi e ua hopoi mai i te tusia no te maitai; e ua parahi te mau taata i raro e amu e e inu hoi, e ua tia aˈera i nia e upa.

7 Ua parau maira Iehova ia Mose, na ô maira, A haere, a pou oe i raro; ua ino to mau taata ta oe i aratai mai mai Aiphiti maira. 8 Ua faarue vave roa iho nei ratou i te eˈa ta ˈu i faaue ia ratou e e na reira. Ua hamani ratou i te kafa faatô na ratou e ua haamori atu i te reira; e ua hopoi ratou i te tusia, e ua parau e, Teie to oe atua, e Iseraela, o tei aratai mai ia oe mai te fenua maira mai Aiphiti.

9 E ua na ô maira hoi Iehova ia Mose, Ua hiˈo vau i taua feia nei; e inaha, e feia etaeta. 10 E teie nei, eiaha oe e parau mai ia ˈu, ia tupu noa na tau riri ia ratou a haapau roa ˈtu ai au ia ratou, e o oe ta ˈu e faariro ei nunaa rahi. 11 Pure ihora Mose i to ˈna Atua ia Iehova, na ô atura, Eaha i tupu ai to riri, e Iehova, i to mau taata nei, i ta oe i aratai mai mai te fenua maira mai Aiphiti, ma te mana rahi, e ma te rima puai? 12 O te parau hoi to Aiphiti e, I aratai oia ia ratou ia roohia e te ino, ia taparahi oia ia ratou i nia i te mouˈa, e ia mou roa ratou i te ao nei? e faarue i taua riri rahi no oe na, ruri ê aˈe oe i to oe manaˈo i te pohe no teie nei mau taata. 13 E haamanaˈo i to mau tavini ra ia Aberahama, e ia Isaaka, e ia Iseraela, ta oe i tǎpǔ atu i to oe iho iˈoa, e ua parau atu ia ratou e, E faarahi au i to outou huaai e mai te fetia o te raˈi ra te rahi, e taua fenua atoa ra ta ˈu i parau ra, e horoa ïa vau no to outou na huaai, e na ratou e parahi e a muri noa ˈtu. 14 Ua ruri ê aˈera Iehova i to ˈna manaˈo i te ino ta ˈna i parau e e hopoi i nia iho i to ˈna ra mau taata.

15 Ua fariu maira Mose, pou maira i raro mai nia mai i taua mouˈa ra, e ma na pǎpǎ ture ra i tana rima, na paeau e piti atoa tei papaihia i taua na pǎpǎ ra; te tahi pae e te tahi pae tei papaihia. 16 E ohipa na te Atua taua na pǎpǎ ra, e te parau i ootihia i nia iho i taua na pǎpǎ ra, e mea ootihia ïa e te Atua.

17 E ia faaroo aˈera Iosua i te reo o taua feia ra i te pii-noa-raa, ua parau atura oia ia Mose, E umere tamaˈi tei te puhapa ra. 18 Ua na ô maira râ oia, E ere tera ra i te reo umere tamaˈi, e ere hoi i te auê pau, e reo upaupa râ ta ˈu e faaroo nei.

19 E fatata maira oia i te puhapa, ite maira oia i taua kafa ra, e te upauparaa, tupu roa aˈera to Mose riri, taora ihora i na pǎpǎ i tana rima i raro, parari roa aˈera i te tumu o taua mouˈa ra. 20 Ua rave ihora oia i taua kafa i hamanihia e ratou ra, ua tutui ihora i te auahi, pâpâhia ihora e huˈahuˈa roa aˈera, ua ueue atura i raro i te pape, e ua faainu atura i te tamarii a Iseraela i taua pape ra. 21 Ua parau atura Mose ia Aarona, I aha mai teie nei mau taata ia oe, i hara rahi roa ˈi ratou nei ia oe? 22 Ua parau maira Aarona, Eiaha e faatupu hua i to riri, e tau fatu e; ua ite hoi oe e, tei te parau ino teie nei feia. 23 Ua parau mai hoi ratou ia ˈu e, E hamani oe i te tahi atua no tatou ei na mua ia tatou; area o Mose nei, o te taata i aratai mai ia tatou mai te fenua maira mai Aiphiti, aore tatou i ite i to ˈna haerea: 24 ua parau atura vau ia ratou, E poe auro to ˈna ra, e iriti mai ïa; e ua hopoi maira ratou ia ˈu nei; ua titiri atura hoi au i roto i te auahi, noaa maira teie nei kafa.

25 E ia hiˈo aˈera Mose e te nane noa ra te taata (na Aarona hoi ratou i tiarepu ia pau ratou i to ratou mau enemi): 26 ua tia aˈera Mose i te uputa o te puhapa ra, ua na ô maira, O vai to Iehova ra? o te horo mai ïa ia ˈu nei. Ua rǔrǔ atoa maira te mau tamarii atoa a Levi ia ˈna ra. 27 Ua parau atura oia ia ratou, Te na ô maira te Atua o Iseraela ra o Iehova, A taati na te taata atoa i tana ˈoˈe i to ˈna aoao; a haere e a haere mai hoi, i tera uputa i tera uputa e ati noa ˈˈe te puhapa atoa nei; a taparahi ai i te taata o to ˈna iho taeae, i te taata o to ˈna iho hoa, i te taata o to ˈna iho taata tupu. 28 Ua na reira te tamarii a Levi i ta Mose i parau maira; pohe ihora to taua mau taata ra, e toru atoa tausani i taua mahana ra. 29 Ua na ô atura Mose, Ua faataa outou ia outou iho i teie nei mahana no Iehova, i te raveraa te taata atoa i ta ˈna iho tamaiti, e to ˈna iho taeae; ia horoa mai hoi oia i te tahi maitai no outou i teie nei mahana.

30 E poipoi aˈera, ua parau atura Mose i te taata, E hara rahi ta outou hara i rave iho nei: e teie nei, e haere au i nia ia Iehova ra: peneiaˈe o te matara ta outou hara ia ˈu. 31 Ua hoˈi atura Mose ia Iehova ra, na ô atura, Auê! e hara rahi te hara a te mau taata i rave iho nei, ua hamani i te tahi atua auro no ratou: 32 e teie nei, ia tia ia oe i te faaore mai i ta ratou hara, e aore ra, teie ta ˈu parau ia oe, o to ˈu ra iˈoa ta oe e parai atu i roto i te buka i te papaihia e oe ra: 33 ua parau maira Iehova ia Mose, O tei harahia ia ˈu nei, o ta ˈu ïa e parai i roto i ta ˈu nei buka: 34 e tena na, a haere, e aratai i te mau taata i te vahi i parauhia ˈtu e au ia oe ra; inaha, e na mua tau melahi ia oe: ia tae râ i te mahana e rave ai au ra, ei reira vau e rave ai ia ratou i ta ratou ra hara. 35 Ua tuu maira Iehova i te pohe maˈi i roto i taua feia ra, no te hamaniraa i te kafa, ta Aarona i hamani ra.