Koheleta

TE HAAPAO MAITAI, E TE HOROA, E TE MANAˈO I TE POHE, E TE HAAVARAA I FAATIAHIA NEI.

11 A ueue i ta oe sitona i nia i te pape; e rave rahi aˈera te mahana i mairi, noaa faahou atura ia oe. 2 E hopoi noa ˈtu i te tufaa i na taata toohitu, e ia toovau noa ˈtu; aore hoi oe i ite i te ati e tupu i nia i te fenua nei. 3 Te îî ra te mau ata i te ûa, e mairi mai ïa i nia i te fenua nei; e ia hiˈa te raau i te pae i apatoa ra e te pae i apatoerau ra, i taua vahi i mairihia ˈi ra ei reira ra vai ai. 4 O tei hiˈo i te mataˈi ra, e ore oia e ueue i te huero, e o tei haapao i te ata ra, e ore oia e ooti. 5 Mai ia oe aore i ite i te tupuraa o te mataˈi ra, e te tupuraa o te ivi i roto i te opu hapu ra; aita atoa oe i ite i ta te Atua ra ohipa, i tana raveraa e oti ai te mau mea atoa nei. 6 Ei te poipoi a ueue ai i ta oe huero, e ei te ahiahi eiaha e parahi noa, aore hoi oe i ite i tei tupu, teie e tera, e ia maitai apipiti atoa ra.

7 E mea maitai mau â te maramarama, e maitai hoi te mata ia hiˈo i te mahana ra: 8 maoro noâ ˈtura to te taata nei parahiraa, e ia oaoa oia i taua mau matahiti atoa ra, e haamanaˈo râ oia i te mau mahana pouri, o te riro atoa hoi te reira i te rahi atoa; o te riro hoi tei toe ra ei mea faufaa ore. 9 A oaoa, e tena na taata apî, i to oe na apîraa, e ia rearea hoi to aau i to oe vai apîraa na; oia â ïa, e haere noa oe na te mau eˈa, na to oe ihora aau, e titau hoi oe i ta to mata e hinaaro ra; e hopoihia râ oe e te Atua i te haavaraa, i taua mau mea atoa ra, ia ite mai hoi oe. 10 E teie nei, e faataa ê atu i te mea e peapea ˈi to aau, e faataa ê atu hoi i te mea e viivii ai to tino; te tamarii-rii-raa ra hoi e te apîraa, e mea mau ore ïa.