Koheleta

TE IMIRAA O TE TAATA I TE MAITAI I TEIE NEI HAAPAORAA, E MEA FAUFAA ORE ÏA.

3 E tau to te mau mea atoa nei, e taime to te mau mea atoa i imihia i raro aˈe i te raˈi nei. 2 E taime to te fanau, e taime to te pohe; e taime to te tanu, e taime to te iriti i tei tanuhia ra. 3 E taime to te taparahi, e taime to te faaora; e taime to te vavahi i raro, e taime to te patu tia i nia ra. 4 E taime to te oto, e taime to te ata; e taime to te mihi, e taime to te ori. 5 E taime to te faarue i te ofai, e taime to te haaputu i te ofai; e taime to te tauahi e taime to te tauahi ore. 6 E taime to te noaaraa, e taime to te riroraa, e taime to te tapea, e taime to te faarue. 7 E taime to te hahae, e taime to te tifai; e taime to te mamû noa, e taime to te parau. 8 E taime to te aroha, e taime to te riri; e taime to te tamaˈi, e taime to te faahau. 9 Eaha ta te rave ohipa faufaa i noaa i ta ˈna ohipa?

10 Ua ite au i te mau ohipa rohirohi i haapaohia e te Atua na te taata nei, ia rave â ratou i te reira. 11 Ua faanehenehe oia i te mau mea atoa i te tau mau ra, e ua tuu oia i te manaˈo i to teie nei ao i roto i to ratou aau; aita râ e taata i ite i te ohipa a te Atua mai te matamua mai e tae noa ˈtu i te hopea. 12 Ite aˈera vau e aita ˈtu e maitai i taua mau mea ra, maori râ ia oaoa te taata e ia hamani maitai i te oraraa nei. 13 O te reira ra, ua amu anaˈe te taata i te maa e ua inu i te pape, e ua rave oia i te maitai no ta ˈna ra ohipa, e mea ho-mai-hia mai ïa e te Atua. 14 Te ite nei hoi au e, o ta te Atua e rave ra, e mau maite ïa; e ore e tia te hoê mea iti ia taati atoa ˈtu, e ore atoa e tia te hoê mea iti ia rave mai: oia â ïa, i na reira te Atua ia mǎtaˈu te taata ia ˈna. 15 Te mea i tupu i mutaaihora, ua tupu ïa i teie nei, e te tupu a muri atu, ua tupu ê na ïa; te faahoˈi maira hoi te Atua i tei tupu ê na hoi.

16 Ua hiˈo hoi au i raro aˈe i te mahana nei, i te vahi faaauraa parau, e te vai ra te paieti ore i reira: e te vahi parau-tia ra, e te vai ra te paieti ore i reira. 17 Ua manaˈo ihora vau i roto ia ˈu iho, e riro te Atua i te haava mai i te feia parau-tia e te paieti ore atoa ra; no te mea e tau to te mau mea i opuahia ra, e to te mau ohipa atoa, tei haapaohia e ana ra. 18 Ua na ô faahou ihora vau i te parau ia ˈu iho, te huru o te taata atoa nei i teie nei; te tamata nei te Atua ia ratou, ia ite ratou hoê â o ratou huru e to te puaa. 19 Hoê â hete hopea to te taata atoa nei, e to te puaa atoa ra; hoê o ratou roohiaraahia mai: te pohe nei te tahi pae, e te na reira atoa nei te tahi pae i te pohe; hoê hoi o ratou atoa ra aho; e aita ˈtura te taata i hau i te puaa; e mea faufaa ore ratou atoa ra. 20 Te haere nei ratou i te vahi otahi; no te repo anaˈe ratou e te hoˈi anaˈe nei i te repo â. 21 O vai te ite i te varua o te taata e reva i nia ra? e te varua o te puaa e reva i raro i te repo ra? 22 Te ite nei hoi au e aita ˈtu e mea maitai i te taata nei, maori râ ia oaoa oia i ta ˈna ra mau ohipa, o te reira hoi ta ˈna tufaa i haapaohia na ˈna: e tia hoi ia vai ia faahoˈi mai ia ˈna i ǒ nei e hiˈo i te mau mea e tupu i muri aˈe ia reva oia ra?