Isaia
TE AMAA NO ROTO I TE TUMU NO IESE.
11 E tupu te hoê ohǐ no roto i te tumu ra o Iese; e riro te hoê aveave no roto i to ˈna aa i te hotu rahi. 2 E vai â te varua o Iehova i nia ia ˈna; te varua o te paari e no te ite; te varua faaaˈo e no te puai; te varua no te ite, e no te mǎtaˈu ia Iehova; 3 e rahi hoi to ˈna ite i te mǎtaˈu ia Iehova; e ore hoi ta ˈna parau e faaauhia i tei itea e tana mata; e ore hoi oia e aˈo i ta to ˈna tariˈa i faaroo ra: 4 e haava râ oia i te taata rii ma te parau-tia ra; e tuu hoi oia i te parau au i te feia mamahu o te fenua nei: e tairi oia i te fenua nei i te papai ra o tana vaha; e pohe te paieti ore ia ˈna i te mataˈi o tana vaha. 5 E te parau-tia ra, o te tatua ïa o tana tauupu; e te parau mau ra, o te ruuruu ïa o tana opu.
6 Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taotoraa; e te fanauˈa puaatoro, e te liona apî, e te puaatoro haaporia ra, hoê â amuiraa mai, e na te hoê tamaiti iti e aratai. 7 Te puaatoro apî ra, e te daba maiaa ra, hoê â ïa amuraa, e hoê â taotoraa to te fanauˈa. E amu hoi te liona i te aihere mai te puaatoro atoa ra. 8 E hauti noa hoi te tamarii aiû i te apoo o te asepi, e te tamaiti no mairi aˈe te û ra, e tuu ïa i te rima i nia i te pupuniraa o te zepho ra. 9 E ore ratou e hauti, e ore e rave ino, i to ˈu atoa nei mouˈa moˈa, te na reira maira Iehova; e î hoi te fenua i te ite ia Iehova, mai te vairaa miti e î i te miti ra.
10 E ia tae i taua mahana ra, e itea mai ai te hoê no te tumu ra o Iese, e tia i nia ei reva no te taata, e imi hoi te mau fenua atoa ia ˈna; e maitai maite to ˈna faaearaa. 11 Ei reira Iehova e faatoro faahou ai i tana rima, e faaora i te toea o to ˈna taata, o tei toe i Asura ra, e i Aiphiti, e i Patarota, e i Kusa, e i Elama, e i Sinara, e i Hamata, e to te pae i te tooa o te râ ra. 12 E na ˈna e hopoi i te tahi tapao no te mau fenua i nia ra; e na ˈna e haaputu mai i to Iseraela i faaruehia ra, e amui mai hoi i to Iuda i haapurarahia ra, mai na hopea mai o te fenua e maha atoa ra. 13 E mairi te miimii o Epheraima, e te riri o Iuda e ore ïa, e ore hoi Epheraima e miimii ia Iuda, e ore hoi Iuda e riri ia Epheraima. 14 E ravehia râ te Philiseti e ratou i te pae i te tooa o te râ ra; e pau atoa te mau tamarii i te pae i te hitia o te râ ia ratou; e rave hoi to ratou rima ia Edoma raua o Moabi, e riro hoi te mau tamarii a Amona i te faaroo ia ratou. 15 Na Iehova e rave haapau roa ˈtu te miti Aiphiti toro arero noa ra; e ueue oia i tana rima i nia i te pape, i te Eupharate, i te mataˈi rahi puai na ˈna ra; e ia taihitu atu anapape ia tairi ra; e haere anaˈe hoi ratou ma te avae rari ore ia ˈna. 16 E riro hoi i te aratia mau no te toea o to ˈna ra taata, o tei toe, mai Asura maira, mai to Iseraela ra i te mahana i haere mai ai oia mai te fenua ra mai Aiphiti.