Isaia

TE EVANELIA I HAAPIIHIA E IOANE BAPETIZO RA.

40 E haamahanahana outou, e haamahanahana i to ˈu ra mau taata, te na reira maira to outou Atua. 2 E faaitoito atu outou ia Ierusalema, e parau hua ˈtu outou ia ˈna, ua hope to ˈna tau tamaˈi; e ua fariihia te taraehara i ta ˈna hara; ua noaa hoi ia ˈna i te rima o Iehova te pohe au rahi roa i ta ˈna ra mau hara.

3 Te pii maira te hoê reo i te medebara; a faanehenehe na i te eˈa o Iehova, e faatitiaifaro na i te fenua mǎrǒ i te haerea o to tatou Atua. 4 E faaǐîhia te mau peho, e faahaehaahia te mouˈa e te mau aivi; e faatitiaifarohia te piˈo, e te mau vahi puupuu ra, e faarirohia ïa ei vahi papu; 5 e faaitehia mai te hanahana o Iehova, e ite paatoa te taata i te ora a te Atua: o te vaha hoi o Iehova tei parau mai. 6 Te na ô maira te hoê reo, A faaite. Ua parau atura vau, Eaha ta ˈu e faaite? A faaite, E aihere te taata atoa nei, e to ˈna unauna mai te tiare ïa o te fenua nei: 7 te maehe noa nei te aihere, te maheahea nei te tiare, ia farara mai te mataˈi no ǒ ia Iehova i nia ihora: e aihere mau â te taata nei. 8 Te maehe nei te aihere, te maheahea nei te tiare; area te parau a to tatou Atua, e tia ïa i te vai-maite-raa.

9 A paiuma i nia i te mouˈa teitei, e tei hopoi mai i te parau maitai i Ziona nei; a faateitei na i to reo ma te uˈana, o tei hopoi mai i te parau maitai i Ierusalema nei. A faateitei na; eiaha e mǎtaˈu; a parau atu i te mau oire o Iuda, A hiˈo na i to outou Atua.

10 Inaha, te haere maira te Fatu ra o Iehova ma te puai, e na to ˈna iho rima e faatupu i ta ˈna. Inaha, tei ia ˈna iho te utua ta ˈna e hopoi, e te hoo ta ˈna e horoa ra, tei mua ïa i tana aro. 11 E faaamu oia i ta ˈna nǎnǎ mai te tiai mamoe ra; e haaputu oia i te mau fanauˈa rii i roto i tana rima, e ei roto ratou i tana ouma ia hopoi; e aratai rii maite oia i te mau maiaa faaote pinia ra.

12 O vai tei faito i te moana i tana apu rima; e ua aa hoi i te raˈi i te rima no ˈna, e ua faaô hoi i te repo fenua nei i roto i te salesa; e ua faito i te mau mouˈa ra i te faito, e te mau aivi ra i te tapao? 13 Na vai i faaite i te Varua o Iehova; e no te mea oia te tahi aˈo ia ˈna, i faaite atu ai ia ˈna? 14 O vai ta ˈna i uiui atu ia faaite mai oia ia ˈna, e ia haapii mai oia ia ˈna i te eˈa parau au ra; e ia faaite mai ia ˈna i te paari, e ia tuu mai ia ˈna i te eˈa ra o te ite? 15 Inaha, e au te mau fenua nei mai te topata iti no roto i te bakete, e ua haapaohia mai te huˈa repo i nia i te faito ra: inaha te mau fenua rii nei, mai te huˈa repo hoê ia rave oia ra. 16 E ore hoi Lebanona e navai ei vahie; e to reira mau puaa e ore e navai ei tusia taauahi. 17 E au hoi te mau fenua atoa mai te mea aore ra ia ˈna; e ua haapaohia e ana mai te mea aore e te faufaa ore.

18 O vai ta outou e faafaito i te Atua? eaha ta outou hohoˈa ia faaau ia ˈna? 19 Te faatô nei te rave ohipa i te hohoˈa; e te vehî nei te tahuˈa i te auro, e te rave nei i te fifi ario no taua hohoˈa ra. 20 O tei ore e tia ia ˈna ia rave i te taoˈa maitatai ra, te imi ra ïa i te raau paari eita e tahuti ra; e ua imi ihora i te tahuˈa paari, ei rave i te tahi hohoˈa e ore e maoi ia rave ra. 21 Eitâ outou e ite? eitâ outou e faaroo? aitâ outou i faaitehia mai mai te matamua mai â? aitâ outou i ite mai te haamauraa mai o te tumu o te fenua nei? 22 E na ˈna, na te parahi i nia i te hugo o te fenua nei, e ua riro to te ao nei mai te vivi ia ˈna; o tei nena i te raˈi nei mai te ahu rairai paruru ra, e ua hohora hoi i te reira mai te tiahapa parahiraa ra; 23 o tei faariro i te hui arii ei mea faufaa ore, e ei mea faufaa ore atoa te mau haava o te fenua nei. 24 Oia ïa, e ore ratou e tanuhia, e ore e ueuehia, e ore te aa o to ratou tumu e toro i raro i te repo, e haafarara oia i te mataˈi i nia ia ratou atoa ra, oriorio atura ratou; riro ê atura ratou i te puahiohio mai te aihere ra.

25 O vai hoi ta outou e faaau mai ia ˈu nei? e au vau nei ia vai? te ui maira Tei Moˈa ra. 26 A nânâ na i to outou mata i nia; a hiˈo ai i tei hamani i te reira, te aratai ra oia i taua mau nuu ra i rapae ma te taiohia; e ua mairi-anaˈe-hia to ratou mau iˈoa e ana: no to ˈna ra puai rahi e te mana rahi ra, i ore ai te hoê i toe ai i te haere mai.

27 Eaha ihora hoi oe i parau ai, e Iakoba, e eaha hoi oe i na ô mai ai ta oe parau, e Iseraela? Ua moe to ˈu nei haerea ia Iehova: e ua haapaehia ta ˈu nei parau e tau Atua, 28 Aitâ oe i ite, aitâ oe i faaroo, e e parahiraa mure ore to te Atua, to Iehova, o tei hamani i te fenua e tae noa ˈtu i te hopea ra; e ore hoi oia e matapouri, e ore te rohirohi; e to ˈna ite, e ore e noaa ˈtu ia titau! 29 Te horoa nei oia i te itoito no te matapouri; e te faarahi nei oia i te etaeta no tei paruparu ra. 30 E matapourihia te taata apî nei, e pohe hoi i te rohirohi; e turori hoi te mau taata apî i maitihia ra, e e hiˈa ˈtu i raro: 31 o te feia râ e tiaturi ia Iehova, e noaa ïa te etaeta apî; e pee ratou i nia mai tei nia i te pererau o te aeto ra; e horo ratou, e e ore e rohirohi; e haere â hoi ratou, e e ore e matapourihia.