Ieremia
TE MANA O TE ATUA I FAAITEHIA I TE OHIPA A TE POTERA RA.
18 Te parau no ǒ ia Iehova i tae mai ia Ieremia ra, i te na ôraa mai e,
2 A tia, a haere i raro i te fare o te potera ra, ei reira vau e faaite atu ai ia oe i ta ˈu nei parau. 3 Ua haere atura vau i raro i te fare o te potera ra, e inaha, te ohipa ra oia i nia i te mau pereoo ra. 4 Ino ihora taua auˈa araea i hamanihia e ana i te rima o te potera ra; ua rave faahou ihora oia ei auˈa ê ïa, ta ˈna iho i hinaaro ra ta te potera ra. 5 Ua tae maira te parau a Iehova ia ˈu nei, na ô maira,
6 E ore anei e tia atoa ia ˈu ia rave mai ta teie nei potera ia outou, e te utuafare o Iseraela, te na reira maira Iehova. Inaha, mai te araea tei te rima ïa o te potera te rave, tei ia ˈu atoa te rave ia outou, e te utuafare o Iseraela. 7 Ia parau vau i te hoê fenua e te hoê basileia, i te taihitumuraa, e te faarueraa i raro, e te haamouraa; 8 ia fariu ê maira taua fenua i parauhia e au ra, i ta ˈna ra mau parau ino ra, e riro atoa vau i tatarahapa i taua ino i manaˈohia e au e tuu i reira ra. 9 E ia parau vau i te hoê fenua e te hoê basileia, i te paturaa i nia, e te tanuraa; 10 ia rave râ oia i te parau ino i mua i tau aro, e ia ore ia faaroo mai i tau reo; e riro atoa vau i te tatarahapa i taua maitai ra, ta ˈu i parau ra e rave ia maitai oia ra.
11 E teie nei, teie ta ˈu parau, e parau atu i te mau taata no Iuda, e te feia atoa i parahi i Ierusalema, e na ô atu, Te na ô maira Iehova, Inaha, te manaˈo nei au i te ino no outou, e te imi nei au i te ravea ia outou; e fariu mai outou o te taata atoa i ta ˈna ihora parau ino, e haamaitai na i to outou mau haerea e ta outou e rave na. 12 Ua parau mai râ ratou, Aita ïa o reira manaˈoraa; e pee â matou i to matou iho manaˈo, e rave matou atoa i te hinaaro o to ˈna iho aau ino. 13 E teie nei, te na ô maira Iehova, A ui na i te mau fenua, o vai ïa taata i ite i te parau mai teie nei â te huru? e mea riaria roa tei ravehia e te paretenia a Iseraela nei. 14 E faaruehia anei te hiona o Lebanona i te mato o te aihere ra? e faarue anei te taata i te pape rii tahe haumaru ra i te pape ěê ra? 15 Ua haamoe râ to ˈu ra mau taata ia ˈu; e ua tutui i te mea noˈanoˈa i te mea faufaa ore; ua faaturori ratou ia ratou i to ratou haerea i te mau haerea tahito i te haere-noa-raa na te mau eˈa aore i opehia ra: 16 i te faariroraa i to ratou fenua ei mea maerehia, e ei tâhitohitoraa tamau; e maere te taata atoa ia haere na pihaiiho, e e ueue hoi i te upoo. 17 Mai te mataˈi no te hitia o te râ ra ia haapuehu vau ia ratou i mua i te enemi; o te tua ta ˈu e faaite atu, e ore te aro, i te mahana e pohe ai ratou ra.
18 Ua na ô ihora ratou, Haere mai tatou e imi i te ravea ia Ieremia: e ore hoi te tahuˈa e ere i te ture, e te taata paari i te aˈo, e te peropheta i te parau: haere mai tatou e tairi ia ˈna i te arero, eiaha tatou e haapao noa ˈtu i ta ˈna parau.
19 E haapao mai ia ˈu, e Iehova e, e faaroo mai i te reo o tau mau enemi nei. 20 E tahoohia mai anei te maitai i te ino? ua ô ratou i te apoo no ˈu. Haamanaˈo mai oe ia ˈu i te tia-noa-raa i mua ia oe, ei tia ia ratou ia ora, ei faafariu ê atu i to oe riri ia ratou. 21 E teie nei, e tuu ê atu oe i ta ratou mau tamarii no te poia, e ia patiahia hoi ratou i te ˈoˈe; ia parahi ivi noa ta ratou mau vahine eiaha ei tamarii, e ia pohe ta ratou mau tane i te ˈoˈe; e ia pohe ta ratou mau tane apî i te ˈoˈe tamaˈi. 22 Ia itea mai te auě i to ratou mau fare, ia tuu-vave-hia mai e oe te hoê pǔpǔ taata i nia ia ratou aore i mahia; no te mea ua ô ratou i te apoo ia noaa vau, e ua tuu huna ratou i te upeˈa ia fifi tau avae. 23 Ua ite noa na râ oe, e Iehova, i ta ratou mau parau atoa ia ˈu nei ia pohe au: eiaha e farii noa ˈtu i te taraehara i ta ratou hara, e ta ratou hara e vai i mua ia oe ra eiaha e parai-ê-hia: ia hurihia râ ratou i raro i mua i to aro ra; e na reira oe i te rave atu ia riri oe ra.