Ieremia

TE TOHU HAAVARE A HANANIA, E FAAHOˈIHIA MAI TE MAU AUˈA, E IA IEREMIA.

28 Tei taua matahiti ra hoi, i te matamehai o te hau o Zedekia arii no Iuda, i te maha o te matahiti, e te pae o te marama, i parau mai ai Hanania a Azura ra, e peropheta i Gibeona, ia ˈu i roto i te fare o Iehova, i te aro o te feia tahuˈa e te taata atoa ra, na ô maira, 2 Ua na ô maira Iehova sabaota ra, te Atua o Iseraela, i te parauraa mai, na ô maira, Ua ofatihia e au te zugo a te arii o Babulonia. 3 E piti mau matahiti toe e faahoˈi mai ai au i te mau farii atoa o te fare o Iehova, ta te arii o Babulonia ta Nebukanesa i hopoi mai ǒ nei atu e tae atura i Babulonia. 4 E o Iekonia a Iehoiakima, arii no Iuda, e te mau tîtî atoa o Iuda, tei tae i Babulonia, ta ˈu ïa e faahoˈi mai i teie nei vahi, te parau maira Iehova; e ofati hoi au i te zugo a te arii o Babulonia.

5 Ua parau atura Ieremia peropheta i te peropheta ra ia Hanania, i te aro o te feia tahuˈa, e te aro atoa o te taata i tia noa mai i roto i te fare o Iehova, 6 Ua na ô atura te peropheta ra o Ieremia, Amene; ia na reira mai Iehova; ia haapapu mai Iehova i taua parau ta oe i tohu mai ra, ia faahoˈi mai â i te mau farii no te fare o Iehova, e te mau tîtî atoa i Babulonia e tae noa mai â i ǒ nei. 7 Faaroo mai na râ oe i teie nei parau ta ˈu e parau atu nei i mua ia oe, e i mua atoa i te taata atoa nei. 8 Te mau peropheta i mutaa ihora, hou vau nei hou hoi oe, mai tahito mai â, ua tohu ïa i te mau fenua e rave rahi, e te mau basileia rarahi atoa ra, i te tamaˈi hoi, e te ati rahi, e te pohe rahi. 9 Te peropheta ia tohu mai i te parau hau ra, ia tupu ra te parau a taua peropheta ra, e itea-maitai-hia ˈi taua peropheta ra, e na Iehova mau oia i tono mai.

10 Ua rave atura taua peropheta ra o Hanania i te zugo i nia i te aˈî o te peropheta ra o Ieremia, ua ofati ihora. 11 Ua parau atura Hanania i mua i te aro o te taata atoa ra, na ô atura, Te na ô maira Iehova, Mai te reira ta ˈu ofati i te zugo a te arii o Babulonia a Nebukanesa ra, i nia i te aˈî o te mau fenua atoa i eie nei pue matahiti e piti nei. Reva ˈtura taua peropheta ra o Ieremia.

12 I reira te taeraa mai o te parau a Iehova ia Ieremia ra, ia oti te zugo i te ofatihia e Hanania peropheta ra i nia i te aˈî o te peropheta ra o Ieremia, na ô maira, 13 Haere a parau atu ia Hanania, e na ô atu, Te na ô maira Iehova, Ua ofatihia e oe te zugo raau, ei zugo auri râ ta oe e hamani ei mono mai. 14 Te na ô maira Iehova sabaota ra, te Atua o Iseraela; ua tuu vau i te zugo auri i nia i te aˈî o teie nei mau fenua, ia auraro atu ratou i te arii o Babulonia ia Nebukanesa ra; e auraro ratou ia ˈna; e ua horoa atoa ˈtu vau i te mau manu o te aru ra na ˈna.

15 Ua parau atura te peropheta ra o Ieremia i taua peropheta ra ia Hanania, A faaroo mai na, e Hanania; Aore Iehova i tono mai ia oe ra; ua faatiaturi râ oe i teie nei feia i nia i te haavare. 16 E teie nei, te na ô maira Iehova, Inaha, teie au a faarue ia oe eiaha oe i nia i te fenua nei; ei teie nei matahiti oe e pohe ai, o oe i parau i te parau faarue ia Iehova. 17 Pohe atura taua peropheta ra o Hanania i taua matahiti ra, i te hitu o te marama ra.