Ieremia

TO ISERAELA HOˈIRAA MAI, E TE FAAITERAAHIA RA.

31 Ia tae i te reira tau, te parau maira Iehova, e riro ai au ei Atua no te mau fetii atoa o Iseraela, e ei taata hoi ratou no ˈu.

2 Te na ô maira Iehova, te mau taata, i toe i te ˈoˈe ra, i ite-aroha-hia i te medebara; o Iseraela ra ia ˈu i haere e faaau i to ˈna ra faaearaa. 3 Itehia mai au e Iehova mai tahito mai â, i te na ôraahia mai e, Ua herehia oe e au i te hereraa mure ore ra; i faatae mai ai au ia oe i te aroha hamani maitai ra. 4 E patu faahou vau ia oe, e e patuhia oe, e te paretenia ra e Iseraela; e faaunaunahia oe ma te tophe na oe ra, a haere atoa ˈi i te oriraa a te feia oaoa ra. 5 E tanu faahou â oe i te ô vine i nia i te mau mouˈa i Samaria; a tanu, e te feia tanu, e a amu noa ai outou i tei hotu ra. 6 Ua tae hoi i taua mahana ra, e pii te mau faehau i nia i te mouˈa ra i Epheraima; A tia, e haere tatou i Ziona, e to tatou Atua ra, ia Iehova. 7 Ua na ô maira hoi Iehova, A himene ma te oaoa ia Iakoba, a pii i rotopu i te feia rarahi o te mau fenua ra; e faaite hua outou, haamaitai â outou, e na ô e, E faaora, e Iehova, i to oe taata, i te toea o Iseraela. 8 Inaha, e aratai mai au ia ratou mai te fenua i te pae i apatoerau, e haaputuputu mai au ia ratou mai te mau hopea mai o te fenua ra; o ratou, e te matapo, e te pirioi atoa ra, e te vahine hapu, e tei roohia-atoa-hia e te mauiui ra; e feia rahi te hoˈi mai i ǒ nei. 9 Inaha, e haere mai ratou ma te oto, e ma te pure atoa ra ratou ia aratai mai au; e aratai au ia ratou i te pape rii tahe ra, i na te eˈa manina, e ore ïa ratou e turori i reira; ua riro hoi au ei metua no Iseraela, e o Epheraima, o to ˈu ïa matahiapo.

10 Faaroo mai i te parau a Iehova, e te mau fenua e, e faaite outou i te mau fenua roa ra, a na ô atu ai, O tei haapurara ia Iseraela, na ˈna ïa e haaputu ia ˈna, e na ˈna oia e tiai, mai te tiai mamoe ra e tiai i ta ˈna ra nǎnǎ. 11 Ua faaora hoi Iehova ia Iakoba, e ua hoohia oia e ana i te rima o tei te rahi puai i to ˈna ra. 12 E haere mai hoi ratou, e himene hoi ratou i te mau vahi teitei i Ziona, e tairuru noa mai ratou i te hamani maitai a Iehova, i te sitona, e te uaina apî, e te hinu olive, e te mau fanauˈa o te nǎnǎ e no te mau puaatoro; e riro hoi to ratou varua mai te ô i rari maitai i te pape ra, e ore hoi ratou e oto faahou i te poia. 13 Ei reira te paretenia e oaoa ˈi i te oriraa, e te taata apî, e tei paari atoa ra; e faariro hoi au i to ratou oto ei oaoa, e haamahanahana hoi ia ratou, e faarearea hoi ia ratou i to ratou oto ra. 14 E haafiu hoi au i te varua o te feia tahuˈa i te meˈi, e paia tau mau taata ia ˈu i te maitai na ˈu ra, te parau maira Iehova.

15 Te na ô maira Iehova, E reo tei itea i Rama, te mihi, e te oto rahi roa; o Rahela, i te otoraa i ta ˈna tamarii, e eita e nâ, no te mea, aita nei ratou. 16 Te na ô maira Iehova, A faaea na to reo i te oto, e to mata i te roimata na; te na ô maira Iehova, e faautuahia hoi ta oe ohipa, e e hoˈi mai ratou mai te fenua o te enemi mai. 17 Te vai na te tiaturiraa tei to oe hopea, te na reira maira Iehova, e hoˈi mai hoi to mau tamarii i to ratou ihora fenua.

18 Ua faaroo hoi au ia Epheraima i te otoraa ia ˈna iho; ua na ô aˈera, Ua aˈo mai oe ia ˈu, e ua aˈohia vau, mai te puaatoro aore i haamatarohia ra; e faafariu oe ia ˈu, e ua faafariuhia ïa vau i reira, o oe hoi tau Atua, o Iehova. 19 E faafariuhia aˈera vau, ua tatarahapa ihora vau; e ia haapiihia vau ra, ua papai ihora vau i tau humaha. Haama aˈera vau, e maheahea aˈera, no te mea tei nia ia ˈu te faaino i tau apîraa ra. 20 O tau tamaiti here anei Epheraima? e tamaiti hinaaro-rahi-hia anei oia? e ua parau anaˈe au ia ˈna, ua riro faahou atura tau manaˈo i te papuraa ˈtu ia ˈna; e teie nei, ua horuhoru tau aau ia ˈna: e aroha ˈtu â vau ia ˈna, te na reira maira Iehova.

21 A faatia na i te tapao eˈatia ra, ei raau roa te faatia; a fariu na i to aau i te eˈa e haerehia ra; na te eˈa ta oe i haere ra, na reira te hoˈi; e te paretenia ra e Iseraela, a hoˈi i te mau oire no oe ra. 22 Mai te aha te maoro o tena na feaapiti, e tera ra tamahine taiva? te rave nei hoi Iehova i te tahi mea apî i te ao nei, e horo te taata puai i te vahine. 23 Te na ô maira Iehova sabaota ra, te Atua o Iseraela, E parau faahou ratou i teie nei parau i te fenua o Iuda, e i to ˈna ra mau oire, ia ruri ê au i to ratou tîtîraa ra, Ia ora na oe ia Iehova, e tera ra parahiraa no te feia parau-tia ra, e tera ra mouˈa no Tei Moˈa roa ra. 24 O Iuda te parahi i reira, e i roto i te mau oire atoa i reira; te feia faaapu e te feia atoa i tiai i te nǎnǎ puaatoro ra. 25 Ua faaanaanaea hoi au i te varua poihâ ra, e ua haamâha hoi au i te mau varua i oto ra. 26 Ua ara aˈera vau i reira, e ite atura vau; e ua aa maite aˈera taua taoto no ˈu ra.

27 Inaha, te fatata maira te anotau, te parau maira Iehova, e faarahi atu ai au i te taata e te puaa i te utuafare o Iseraela, e te utuafare o Iuda. 28 E riro hoi mai ia ˈu i tiai ia ratou, ei iriti, e ei vavahi i raro, e ei huritumu, e ei faaore, e ei haapohe; e tiai atoa vau ia ratou, ei patu faahou, e ei tanu faahou, te na reira maira Iehova. 29 Ia tae i te reira anotau, e ore ratou e parau faahou e, Ua amu te mau metua i te vine avaava, e ua mania te niho o te tamarii; 30 e pohe râ te taata atoa i ta ˈna ihora hara; te taata atoa i amu i taua vine avaava ra, to ˈna iho te niho e mania ra.

31 Te parau maira Iehova, Inaha, te fatata maira te anotau, e faaau ai au i te utuafare o Iseraela, e te utuafare o Iuda, i te tahi faufaa apî; 32 eiaha mai te faufaa ta ˈu i faaau atu i to ratou ra mau metua, i te mahana i rave atu ai au i to ratou rima, ia aratai mai au ia ratou mai te fenua ra i Aiphiti; e ua ino ihora taua faufaa na ˈu ra ia ratou, i haapao noa ˈi au ia ratou mai te tane ra, te na reira maira Iehova. 33 Teie râ te faufaa ta ˈu e faaau atu i te utuafare o Iseraela; te na ô maira Iehova, Ia oti aˈe te reira anotau, e tuu vau i tau ture i roto ia ratou, e papai au i te reira i roto i to ratou aau; e e riro vau ei Atua no ratou, e ei taata hoi ratou no ˈu. 34 E ore hoi ratou e haapii faahou, o te taata o to ˈna iho taata-tupu, o te taata a to ˈna iho taeae, i te na ôraa ˈtu e, Ia ite hoi outou ia Iehova; e ite paatoa hoi ratou ia ˈu, o tei haehaa e o tei rahi, te parau maira Iehova; e faaore hoi au i ta ratou hara, e ore au e manaˈo faahou i ta ratou ino.

35 Te na ô maira Iehova, o tei haapao i te mahana ei maramarama no te ao, e te haerea o te marama e te mau fetia ei maramarama no te po; o tei hamanino mai i te miti ia haruru to ˈna are ra; o Iehova sabaota to ˈna iˈoa: 36 I mou teie nei mau peu e aita ra i mua ia ˈu nei, te na reira maira Iehova, ei reira atoa e mou ai te huaai o Iseraela e ore atura e parauhia ei fenua i mua ia ˈu nei e a muri noa ˈtu. 37 Te na ô maira Iehova, Ia tia te raˈi i nia ra ia faito, e ia itea te tumu o te fenua nei ia imi, ei reira vau e faarue ai i te huaai atoa o Iseraela, no te mau mea atoa ta ratou i rave ra, te parau maira Iehova.

38 Te na ô maira Iehova, Inaha, te fatata maira te tau, e patu-faahou-hia ˈi no Iehova te oire nei, mai te pare o Hananeela, e i te opani i te poro aua ra; 39 e tatai-tia-hia te leni faito ra, i te titiaifaroraa na nia i te aivi ra o Gareba, e haaatihia Goata. 40 E taua peho taata pohe atoa ra e te rehu auahi, e te mau aua atoa e tae noa ˈtu i te pape ra i Kiderona, e tae noa ˈtu i te poro aua i te uputa puaahorofenua i te pae i te hitia o te râ ra; e moˈa ïa no Iehova, e ore e taihitumuhia, e ore hoi e huri-faahou-hia i raro e a muri noa ˈtu.