Levitiko

TE MAU OROA RA, E TE HURU O TE RAVERAA IA RAVE.

23 Ua parau maira Iehova ia Mose, na ô maira, 2 E parau atu oe i te tamarii a Iseraela, e na ô atu ia ratou, Te mau oroa a Iehova ta outou e haapao, i te amuiraa moˈa ra, o teie ïa tau mau oroa ra. 3 E ravehia te ohipa i na mahana e ono ra; area te mahana hitu, i te sabati faaearaa ra, ei amuiraa moˈa ïa; aore roa e ohipa e ravehia i reira; ei sabati ïa no Iehova i to outou mau fare atoa ra.

4 Teie â te tahi pae oroa a Iehova, e amuiraa moˈa ïa, ta outou e haapao, i to ratou ra taime mau i haapaohia ra. 5 I te marama matamua, i te rui hoê ahuru ma maha i te ahiahi, o te pasa ïa na Iehova. 6 E te rui hoê ahuru ma pae i taua marama ra, o te oroa maa faahopue-ore-hia ïa na Iehova; ia rui hitu outou i te amuraa i te maa faahopue-ore-hia ra: 7 i te mahana matamua ra, ei amuiraa moˈa ta outou; eiaha roa outou e rave i te ohipa: 8 e hopoi râ outou i te tusia taauahi na Iehova i taua mau mahana atoa e hitu ra; ei te mahana hitu hoi te hoê amuiraa moˈa ra; eiaha roa outou e rave i te ohipa.

9 Ua parau maira hoi Iehova ia Mose, na ô maira, 10 E parau atu oe i te tamarii a Iseraela, e na ô oe ia ratou, Ia tae outou i te fenua ta ˈu e horoa ˈtu nei no outou, e ua motu ia outou te maa auhune ra, e hopoi mai outou i te tahi pǔpǔ i taua oho matamua o ta outou maa auhune i te tahuˈa ra; 11 e na ˈna e ueue i taua pǔpǔ sitona ra i mua i te aro o Iehova, ia fariihia mai na outou, ia poipoi aˈe ia oti te sabati ra e ueue ai te tahuˈa i te reira: 12 ei te mahana e ueuehia ˈi te pǔpǔ sitona ra, e hopoi ai outou i te hoê mamoe oni matahiti hoê, maau ore, ei tusia taauahi na Iehova: 13 e te tusia amu no te reira, ia piti ïa omera faraoa hua i anoihia i te hinu olive, ei tusia taauahi hauˈa noˈanoˈa na Iehova; e te tusia inu ra, ia hoê ïa tuata hina uaina: 14 eiaha outou e amu i te pane, e te huero sitona tunu, e te huero sitona ota, e tae noa ˈtu i te mahana mau e hopoi mai ai i te tusia na to outou Atua ra: ei ture vaiiho tamau teie e tae noa ˈtu i to outou atoa ra mau ui, i to outou mau fare atoa ra.

15 E taio hoi outou i na sabati mau e hitu, e na taua mahana i muri aˈe i te sabati, ta outou i hopoi i te pǔpǔ sitona e ueue ra, i te taio; 16 e tae noa ˈtu i te mahana i muri aˈe i te sabati hitu ra, ia pae ahururaa te mahana ta outou e taio; a hopoi ai outou i te tahi tusia amu apî na Iehova. 17 E hopoi mai outou i na pane ueue omera piti e piti aˈe, no roto i to outou mau fare; ei pane faraoa hua, e euhia ma te faahopue atoa, ei oho matamua na Iehova: 18 e hopoi atoa outou i na fanauˈa mamoe matahiti hoê, e te maau ore, e hitu ra, e na pane, e te puaatoro oni apî hoê, e na mamoe oni e piti; ei tusia taauahi te reira na Iehova; e to reira hoi tusia amu, e to reira tusia inu; ei tusia taauahi hauˈa noˈanoˈa ïa na Iehova: 19 ei reira outou e taparahi ai i te hoê puaaniho ei taraehara, e na fanauˈa mamoe matahiti hoê ei tusia no te maitai: 20 e na te tahuˈa e ueue i te reira, e te pane oho matamua ra, ei tusia ueue i mua i te aro o Iehova, e na pinia mamoe atoa: e mea moˈa te reira na Iehova, na te tahuˈa ïa: 21 e ei amuiraa moˈa ta outou e haapao i te reira mahana, eiaha roa outou e rave i te ohipa i te reira mahana: ei ture vaiiho tamau te reira e tae noa ˈtu i to outou atoa ra mau ui, i to outou mau fare atoa ra.

22 Ia ooti outou i te maa auhune i to outou na fenua, eiaha oe e ooti haapau roa i te peho rii i ta oe mau aua, eiaha hoi oe e ohi haere i te toea rii maa auhune na oe na; e vaiiho oe i te reira na te taata rii, e na te taata ê: o vau o to outou Atua ra o Iehova.

23 Ua parau maira Iehova ia Mose, na ô maira, 24 E parau atu oe i te tamarii a Iseraela, e na ô atu, Ia tae i te marama hitu ra, i te mahana matamua o taua marama ra, ei sabati ïa ta outou, ei manaˈoraa faaotoraa pu ei amuiraa moˈa; 25 eiaha roa outou e rave i te ohipa: e hopoi râ outou i te tusia taauahi na Iehova.

26 Ua parau maira Iehova ia Mose, na ô maira, 27 Te ahuru o te mahana o taua marama hitu ra, ei mahana tatararaa hara ïa; ei apooraa moˈa ta outou; e e faahaehaa outou ia outou iho, e hopoi hoi i te tusia taauahi na Iehova ra. 28 Eiaha roa ta outou ei ohipa e rave i taua mahana ra; e mahana tatararaa hara hoi te reira, ei hopoiraa i te taraehara na outou i te aro o to outou Atua ra o Iehova. 29 O te taata aore i faahaehaa ia ˈna iho i te reira mahana, e tâpû-ê-hia ïa i to ˈna ra nunaa. 30 E tei rave i te ohipa i taua mahana ra, e pohe roa te reira taata ia ˈu i roto i to ˈna ra nunaa; 31 eiaha roa outou e rave i te ohipa; ei ture vaiiho tamau teie e tae noa ˈtu i to outou atoa na mau ui, i to outou mau fare atoa ra: 32 ei sabati faaea noa ïa te reira no outou, e e faahaehaa outou ia outou iho: mai te ahiahi mai o te mahana iva i taua marama ra, e tae noa ˈtu i te tahi ahiahi, o ta outou ïa e haapao ei sabati.

33 Ua parau maira hoi Iehova ia Mose, na ô maira, 34 E parau atu oe i te tamarii a Iseraela, e na ô atu, O te ahuru ma pae o te mahana i taua marama hitu ra, o te oroa patiaraa tiahapa ïa na Iehova e ia rui hitu: 35 ei apooraa moˈa tei te mahana matamua ra; eiaha outou e rave i te ohipa: 36 e hopoi outou i te tusia taauahi na Iehova e ia rui hitu; e ei apooraa moˈa ta outou i te mahana vau, e e hopoi â i te tusia taauahi na Iehova: e mahana faaearaa ïa; eiaha outou e rave i te ohipa. 37 O na oroa eie a Iehova, ta outou e haapao ma te apooraa moˈa ra, e te tusia taauahi i te hopoiraa na Iehova; i te tusia taauahi e te tusia amu; i te tusia mea tupai e te mau tusia inu i to ratou ra mahana mau: 38 e te mau sabati atoa o Iehova, e te mau mea horoa noa atoa na outou, e ta outou mau euhe atoa, e ta outou taoˈa hopoi noa atoa, ta outou e horoa na Iehova. 39 E ia tae i te ahuru ma pae o te mahana i te marama hitu ra, ia pue mai te maa o to outou na fenua, ei oroa ta outou e haapao na Iehova e ia rui hitu: o te mahana matamua ra ei sabati ïa, e ei sabati atoa te mahana vau ra: 40 ei te mahana matamua e rave ai outou i te papua raau maitai ra, e te amaa tamara, e te amaa raau ruperupe, e te arobe i raro i te pape ra, e oaoa outou i mua i te aro o to outou Atua ra o Iehova, e ia rui hitu: 41 ei oroa ta outou e haapao na Iehova, e ia rui hitu â i te mau matahiti atoa ra; ei ture vaiiho tamau ïa e tae noa ˈtu i to outou mau ui atoa ra: ei te marama hitu ra outou e haapao ai i te reira: 42 ei roto outou i te mau tiahapa parahi ai e ia rui hitu; o to Iseraela mau ra, ei roto ïa ei te tiahapa parahi ai; 43 ia ite to outou a muri atu, e ua haaparahi au i te tamarii a Iseraela i roto i te tiahapa, ia ˈu i aratai mai ia ratou mai te fenua maira mai Aiphiti: o vau to outou Atua ra o Iehova.

44 Ua faaite atura Mose i te tamarii a Iseraela i te mau oroa a Iehova ra.