Malaki

NO TO TATOU ORA RA NO TE MESIA, E TO ˈNA RA TOROA.

3 Inaha, e tono vau i tau vea, e na ˈna e haamaitai i te eˈa i mua ia ˈu ra: e te Fatu ta outou e imi na, o te tae vave mai ïa i to ˈna ra hiero, te vea no te faufaa ta outou i oaoa na: inaha, o te tae mai ïa, te parau maira Iehova sabaota ra. 2 E tia râ ia vai ra ia faaoromai ia tae i te mahana e haere mai ai oia ra? e o vai te mau ia fa mai oia ra? e au hoi oia i te auahi a te tamâ moni ra, e mai te pua a te tamâ ahu ra: 3 e parahi mai oia mai te tamâ e te haamaitai i te ario ra: e na ˈna e tamâ i te tamarii a Levi, e haamaitai hoi ia ratou mai te auro e te ario ra, e na ratou e hopoi mai i te tusia parau-tia ia Iehova ra. 4 E riro te tusia a Iuda e ta Ierusalema i te mea mauruuru na Iehova i reira, mai tei te anotau tahito ra, te mau matahiti i mutaa ihora. 5 E haafatata ˈtu vau i te parau faaau na ˈu ia outou; e riro ïa vau ei ite oioi i te feia tahutahu, e te feia faaturi, e te feia tǎpǔ haavare, e te feia i faaere i tei tarahuhia ra i ta ˈna ra utua, e te vahine ivi, e te otare, e te ruri ê atu i te taata ê i ta ˈna, e aore i mǎtaˈu mai ia ˈu, te parau maira Iehova sabaota ra. 6 O Iehova hoi au, aore o ˈu e huru ê; no reira outou, e te tamarii a Iakoba, i ore i pau ai.

7 Mai te anotau mai â o to outou mau metua ra to outou fariu-ê-raa i ta ˈu ra mau haapaoraa, e aore i haapao atu. E fariu mai outou ia ˈu, e na ˈu e fariu atu ia outou, te parau maira Iehova sabaota ra. Te parau mai nei râ outou, E fariu atu matou i te aha? 8 E haru anei te taata nei i ta te Atua? Ua haru maira outou i ta ˈu ra. Te parau nei râ outou, I haru matou i ta oe i te aha? I te ahuru o te taoˈa ra e te mau ô. 9 Ua roohia-mau-hia outou e te ino, ua haru mai hoi outou i ta ˈu, o te fenua taatoa nei â. 10 Hopoi mai na outou i te ahuru atoa o te mau taoˈa i roto i te fare vairaa, ia maahia tau fare nei, e tamataraa te reira ia ˈu nei, te parau maira Iehova sabaota ra; i te oreraa vau i te iritiraa i te mau haamaramarama o te raˈi ra, a ninii atu ai i te taoˈa rahi roa ei maitai no outou. 11 E no outou e aˈo atu ai au i te amu ra, e eiaha oia e amu i te maa o to outou fenua; e ore hoi ta outou vine e auparahia i to outou fenua, te parau maira Iehova sabaota ra. 12 E parauhia outou e te fenua atoa, o te maitai: e riro outou ei fenua nehenehe, te parau maira Iehova sabaota ra.

13 Te na ô maira Iehova, E parau mǎtaˈu ore ta outou ia ˈu nei, e te na ô maira outou e, Eaha ta matou parau ia oe ra? 14 Ua parau outou e, E mea faufaa ore te haamori i te Atua: e eaha ta tatou faufaa i te haapaoraa i ta ˈna parau, e tatou i haere ma te faahaehaa i mua i te aro o Iehova sabaota ra? 15 E tena na, te parau ra tatou i te feia teoteo ra, o te maitai ïa; e te feia i rave i te parau ino ra, tei faateiteihia ïa; e te feia i faaooo i te Atua, ua ora ïa.

16 I reira te feia i mǎtaˈu ia Iehova i te parau pinepineraa te tahi i te tahi; e ua faaroo maira Iehova, e ua ite, e papaihia ihora te tahi buka manaˈoraa i mua ia ˈna, no te feia i mǎtaˈu ia Iehova, e tei manaˈo i to ˈna ra iˈoa. 17 Ua na ô maira Iehova sabaota ra, E riro ratou na ˈu, ia tae i te mahana ta ˈu e faataa ra, ei taoˈa maitai roa ra; e na ˈu e faaherehere ia ratou mai te taata e faaherehere i ta ˈna ihora tamaiti ia tavini atu ia ˈna ra. 18 Ei reira outou e ite ai i te huru-ê-raa i te taata parau tia e te taata parau ino, i te taata i haamori i te Atua, e te taata e ore e haamori ia ˈna.