Ioane

TE MESIA TE TIAI MAMOE MAITAI, E TE UPUTA MAU.

10 Amene, amene, e parau atu vau ia outou, O te ore e na te uputa i te tomo i roto i te aua mamoe ra, o te paiuma na te tahi eˈa ê ra, e eiâ ïa e te haru. 2 E na te uputa â te tiai mamoe i te tomo. 3 E iriti mai ïa te tiai opani ra ia ˈna, e e faaroo mai te mamoe i to ˈna reo, e tao atu â oia i tana iho mamoe ma te faahiti atu i te iˈoa, e e aratai oia ia ratou i rapae au. 4 E ia aratai oia i tana iho mamoe i rapae au ra, e na mua oia ia ratou i te haere, e pee mai ratou ia ˈna, ua ite hoi ratou i to ˈna reo. 5 E ore ratou e pee i te taata ê, e horo ê ratou i reira, aore hoi ratou i ite i to te taata ěê reo. 6 I parau tia ˈtura Iesu ia ratou i taua parabole nei; e aita roa ratou i ite i te parau ta ˈna i parau atu ia ratou ra.

7 Ua parau faahou atura Iesu ia ratou, Amene, amene, e parau atu vau ia outou, O vau te uputa o te aua mamoe. 8 O to mua atoa ia ˈu nei, e eiâ ïa e te haru, aita râ te mamoe i faaroo ia ratou. 9 O vau te uputa; o te na o nei mai ia ˈu nei i te tomo ra, e ora ïa, e haere ratou i roto e i rapae, e noaa hoi te maa. 10 O te eiâ anaˈe ra ta te eiâ i haere mai ai, e o te taparahi hoi e ia pau roa; i haere mai nei au ia noaa to ratou ora, e ia rahi atu â te ora.

11 O vau te tiai mamoe maitai. E horoa te tiai mamoe maitai i to ˈna iho ora no te mamoe. 12 O tei tarahuhia ra, e ere oia i te tiai mamoe ra, e ere hoi i tana iho te mamoe, ia ite ra oia i te urî taehae i te haereraa maira, faarue ihora i te mamoe horo ê atura, motumotu ihora te tahi pae i te urî taehae, purara ê atura te nǎnǎ. 13 I horo ai tei tarahuhia ra, no te mea e taata tarahuhia oia, aore oia e haapao i te mamoe. 14 O vau te tiai mamoe maitai ra, ua ite au i ta ˈu iho, e ua itehia vau e ratou, 15 mai te Metua i ite ia ˈu nei ra, e o vau hoi i ite i te Metua ra; e e horoa hoi au i to ˈu ora no te mamoe. 16 E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai. 17 I here mai ai tau Metua ia ˈu, o vau e horoa i to ˈu ora, e a rave faahou atu ai. 18 Aore roa e taata e riro ai ia haru, na ˈu iho râ e horoa noa ˈtu. E tia ia ˈu ia horoa, e e tia hoi ia ˈu ia rave faahou. O ta tau Metua ïa i faaue mai ia ˈu.

19 Ua amaha faahou ihora te ati Iuda i taua parau ra. 20 Ua parau ihora tahi pae o ratou, E demoni to ˈna, e ua maamaahia, eaha outou i faaroo atu ai ia ˈna? 21 Ua na ô aˈera hoi te tahi pae, E ere teie parau i ta te taata demoni; e ora anei te matapo i te demoni?

22 I reira te oroa i te faahouraa i Ierusalema ra, e vero tei taua tau ra. 23 E te hahaere noa ra Iesu i roto i te hiero i te poretiko o Solomona ra. 24 Ua haapuni aˈera te ati Iuda ia ˈna, ua parau maira ia ˈna, Mai te aha ra te roa o to matou feruriraa ia oe? O te Mesia oe ra, e faaite hua mai oe. 25 Ua parau atura Iesu ia ratou, Ua parau atu hoi au ia outou e aore outou i faaroo mai: o te mau ohipa ta ˈu i rave ma te iˈoa o tau Metua ra, o te faatia mai ïa ia ˈu. 26 Area outou, aore ïa e faaroo, no te mea e ere outou i ta ˈu mamoe. 27 E faaroo mai ta ˈu ra mamoe i to ˈu reo, o ta ˈu i parau atu ia outou ra, ua ite au ia ratou, e e pee mai hoi ratou ia ˈu. 28 E e horoa ˈtu â hoi au i te ora mure ore no ratou; e ore roa ratou e pohe, e e ore roa hoi ratou i roto i tau rima nei e riro i te haru ia vetahi ê. 29 O tau Metua i horoa mai ia ratou no ˈu ra, o te hau ê atu â ïa; e ore roa e tia ia vetahi ê ia haru atu ia ratou i roto i te rima o tau Metua ra. 30 O vau e te Metua ra, hoê â ïa. 31 Ua rave faahou ihora te ati Iuda i te ofai e taora ia ˈna. 32 Ua parau atura Iesu ia ratou, E rave rahi ta ˈu ohipa maitatai i faaite atu ia outou na tau Metua ra; no te hea ohipa i taua mau ohipa ra i taora mai ai outou ia ˈu i te ofai na? 33 Ua parau maira te ati Iuda ia ˈna, na ô maira, E ere i to te ohipa maitai e taora ˈtu ai matou ia oe i te ofai, no te tuhi râ, o oe o te taata na i faa-Atua ia oe iho. 34 Ua parau atura Iesu ia ratou, E ere anei ua papaihia i roto i ta outou ture na e, Ua parau na vau, E atua outou? 35 I parau te ture i te feia i parauhia ˈtu i te parau a te Atua ra e, e atua ratou, e aore hoi i hapa te parau i papaihia ra; 36 i pari mai hoi outou i te tuhi i ta te Metua i faataa e i tono mai i te ao nei, o vau i parau ia ˈu iho e, E Tamaiti au na te Atua? 37 Aore au i rave i te ohipa a tau Metua ra, eiaha ïa e faaroo mai ia ˈu. 38 Te rave nei au, e aore outou i faaroo mai ia ˈu ra, a faaroo i te mau ohipa, ia ite outou, ia faaroo hoi outou e tei roto ia ˈu te Metua, e tei roto hoi au ia ˈna. 39 Ua tamata faahou atura ratou i te haru ia ˈna, ora ˈtura râ oia i to ratou rima. 40 Haere faahou atura oia e mairi maira Ioridana i te vahi ta Ioane i bapetizo i mutaa ihora, parahi atura oia i reira. 41 E e rave rahi tei haere mai ia ˈna ra, e ua parau ihora e, Aita â hoi ta Ioane tapao i rave, area te mau parau a Ioane i parau i teie nei taata, e parau mau anaˈe ïa. 42 E rave rahi hoi tei faaroo ia ˈna i reira.