Ioane

TE HAAMAHANAHANA NEI TE MESIA I TE MAU PǏPǏ, I TE FAAITERAA MAI I TE VARUA RA.

16 I parau atu ai au ia outou i teie nei mau parau, ia ore outou ia maheaitu. 2 E tuu ratou ia outou i rapae i te mau sunago ra; e te fatata mai nei hoi te hora e manaˈo ai te taata e taparahi ia outou na e ua haamori oia i te Atua. 3 E na reira mai ratou ia outou, no te mea aore ratou i ite i te Metua e ia ˈu hoi. 4 Te faaite atu nei au ia outou i teie nei mau parau, ia tae i taua hora ra ia manaˈo outou e, ua parau atu vau ia outou i taua parau ra. Aore hoi au i parau atu ia outou i te matamua ra, no te mea tei pihai atoa iho vau ia outou. 5 E teie nei, te haere tia nei au ia ˈna ra i tei tono mai ia ˈu nei ra, e aore te hoê o outou nei e ui mai e, E haere oe i hea? 6 No te parau râ i faaite-atea-hia ˈtu e au ia outou teie nei ra, i î roa ˈi to outou aau i te oto.

7 E parau mau râ ta ˈu e parau atu ia outou nei, e maitai ai outou o vau e haere ê nei; ahiri au aore i haere e, e ore e tae mai te Faaaˈo ia outou nei; ia haere ê râ vau ra, na ˈu ïa oia e tono mai ia outou nei. 8 E ia tae mai oia ra, na ˈna ïa e faaite mai i to te ao i te hara, e te parau-tia, e te faahapa: 9 o te hara ra, o ratou ïa aore i faaroo mai ia ˈu ra; 10 e o te parau-tia ra, o vau ïa e haere i tau Metua ra, e eita ˈtura outou e ite mai ia ˈu; 11 o te faahapa ra, o te arii ïa o teie nei ao e faahapahia ra. 12 E rave rahi â ta ˈu parau ia parau atu ia outou, eita râ e tia ia outou i teie nei. 13 Ia tae mai râ te Varua parau mau ra, na ˈna ïa e aratai ia outou i te mau parau mau atoa ra; e ore hoi ta ˈna parau e riro na ˈna iho; o ta ˈna râ i faaroo ra, o ta ˈna ïa e parau mai, e na ˈna hoi e faaite mai ia outou i te mau mea e tupu a muri atura. 14 E haamaitai oia ia ˈu; e rave hoi oia i ta ˈu ra, a faaite atu ai ia outou. 15 O te mau mea atoa a te Metua ra, na ˈu ïa; i parau atu ai au e, e rave oia i ta ˈu ra e a faaite atu ai ia outou. 16 Ia roaroa iti aˈe, eita ˈtura outou e hiˈo mai ia ˈu; e roaroa iti aˈera hoi ua hiˈo mai outou ia ˈu; no te mea te haere tia nei au i te Metua ra.

17 Ua paraparau ihora e toofanu mau pǐpǐ ia ratou iho e, Eaha teie ta ˈna i parau mai ia tatou nei e, Ia roaroa iti aˈe eita ˈtura outou e hiˈo mai ia ˈu; e roaroa iti aˈera hoi ua hiˈo mai outou ia ˈu; e no te mea te haere tia nei au i te Metua ra? 18 I parau ai hoi ratou, Eaha taua roaroa iti aˈera ta ˈna e parau nei? Aita tatou i ite i ta ˈna parau. 19 Te ite atura Iesu e te hinaaro ra ratou i te ui mai ia ˈna, e ua parau atura ia ratou, Te ui noa na outou outou iho i te parau ta ˈu i parau atu na e, Ia roaroa iti aˈe eita ˈtura outou e hiˈo mai ia ˈu; e roaroa iti aˈera ua hiˈo mai outou ia ˈu? 20 Amene, amene, e parau atu vau ia outou, E oto outou e, e anau hoi, o to te ao râ, e oaoa ïa; e mihi outou; area to outou mihi, e faarirohia ïa ei oaoa. 21 E oto te vahine ia roohia e te fanau ra, no te mea ua tae i to ˈna ra hora: ia fanau râ te tamaiti ra, aita ˈtura oia i manaˈo i te mauiui i te oaoa, i te mea e taata tei fanau mai i te ao nei. 22 Oia hoi outou e oto i teie nei ra; e ite faahou mai râ vau ia outou, e e oaoa to outou aau, e e ore roa to outou oaoa e riro ia vetahi ê. 23 E ia tae taua mahana ra, e ore outou e uiui mai ia ˈu. Amene, amene, e parau atu vau ia outou, Ta outou e ani atu i te Metua ma to ˈu ra iˈoa, na ˈna ïa e horoa mai ia outou na. 24 Aore a outou mea i ani ma to ˈu nei iˈoa; e ani, e roaa ïa ia outou, ia tia roa to outou oaoa. 25 I parau-parabole-hia ˈtu outou e au i teie nei mau parau; te fatata mai nei râ te hora e ore ai au e parau parabole faahou atu ai ia outou, e faaite hua ˈtu râ ïa ia outou i te parau o te Metua ra. 26 Ei reira outou e ani aˈe ai ma to ˈu nei iˈoa, e aore hoi au i parau atu ia outou e, na ˈu e parau maitai atu i te Metua ia outou. 27 Te hinaaro maira hoi te Metua iho ia outou, o outou i hinaaro ia ˈu nei, e ua faaroo e, mai ǒ mai au i te Atua ra. 28 I haere mai nei au i te ao nei mai mua mai i te aro o te Metua ra: te faarue nei au i teie nei ao, e te hoˈi faahou nei au i te Metua ra. 29 Ua parau maira ta ˈna mau pǐpǐ ia ˈna, Inaha, ua parau papu hua mai oe i tena na, aore ïa e parabole. 30 Ua ite atura matou i teie nei e, ua hope roa te mau mea atoa i te itea ia oe, eiaha noa ˈtu â te hoê taata e ui noa ˈtu ia oe. O te mea teie i faaroo ai matou e, mai ǒ mai oe i te Atua ra. 31 Ua parau atura Iesu ia ratou, Ua faaroo outou i tena na? 32 Inaha, te fatata mai nei te hora, e teie nei hoi, e purara ê atu ai outou, o te taata o to ˈna iho utuafare, e faarue ihora ia ˈu o vau anaˈe ra; e ere râ e, o vau anaˈe ra, tei pihai atoa iho hoi te Metua ia ˈu ra. 33 I parau atu vau ia outou i teie nei mau parau, ia hauhia to outou ia ˈu nei. E pohe to outou i teie nei ao. E faaitoito râ, ua riro te re o teie nei ao ia ˈu.