Ioane

TO MARIA MA HAERE ITE-ORE-RAA MAI I TE MENEMA RA.

20 E tae aˈera i te mahana matamua o te hebedoma ra, ua haere atura Maria i Magadala ra i te poipoi roa i te menema ra, te vai arehurehu ra, e ite aˈera e ua huri-ê-hia te ofai i te uputa o te menema ra. 2 Horo maira oia ia Simona Petero ra, e te pǐpǐ herehia e Iesu ra, ua parau maira ia raua e, Ua hopoi-ê-hia e ratou te Fatu i te menema ra i rapae, e aore matou i ite i te vahi i vaiihohia ˈi oia e ratou ra. 3 Ua haere atura Petero i rapae i reira ra, e taua pǐpǐ atoa ra, e tae atura i te menema ra. 4 Ua hohoro atura raua atoa, e hemo ihora Petero i taua pǐpǐ ra, o tei tae atu na ïa i te menema ra. 5 E piˈo ihora oia i raro hiˈo atura i te ahu vehî ra i te vainoaraa, aore râ oia i tomo i roto. 6 Ua haere maira Simona Petero i muri iho ia ˈna, tomo atura i roto i te menema ra, hiˈo ihora oia i te ahu vehî ra i te vainoaraa, 7 e te ahu i vehîhia i tana upoo ra, aore ïa i vaiihohia i te vairaa i te ahu vehî ra, i tiafetuhia ïa e vaiiho-ê-hia i te vairaa ê. 8 Ua tomo atoa ˈtura hoi te hoê pǐpǐ i roto, o tei tae atu na i te menema ra; ite ihora oia e faaroo atura. 9 Aore â hoi ratou i ite i te parau i papaihia ra e, e tia faahou mai oia i pohe ra. 10 Hohoˈi faahou atura na pǐpǐ i to ratou ra.

11 Area Maria te tia noa ra ia i rapae i pihai iho i te menema ra, te oto noa ra. Piˈo ihora oia i raro ma te oto, e hiˈo atura i roto i te menema ra. 12 E ite atura oia i e toopiti pue melahi ma te ahu teatea, i te parahiraa i te vahi i vaiihohia ˈi te tino o Iesu ra, i te upoo te tahi, e i te avae hoi te tahi. 13 Ua parau maira raua ia ˈna, Eaha oe i oto ai, e tera ra vahine? Ua parau atura oia ia raua, No tau Fatu i hopoi-ê-hia e ratou nei, e aore au i ite i te vaiihoraahia e ratou ra. 14 E tei te na reiraraa ˈtu oia ra e oti aˈera, ua fariu tia ˈtura oia i muri, ite atura oia ia Iesu i te tia-noa-raa, aita râ oia i ite e o Iesu. 15 Ua parau maira Iesu ia ˈna, E tera ra vahine, eaha oe i oto ai? o vai ta oe e imi na? Parau aˈera oia e o te taata faaapu ra, e ua na ô atura ia ˈna, E hoa, na oe oia i hopoi ê ra, e faaite mai oe i te vaiihoraahia oia e oe na, e na ˈu oia e tii atu e hopoi ê. 16 Ua parau maira Iesu ia ˈna, E Maria. Ua fariu atura oia ua parau atura ia ˈna, E Raboni, (o tei parauhia ra e, E te Orometua.) 17 Ua parau maira Iesu ia ˈna, Eiaha e tapea mai ia ˈu; aore â vau i tae i nia i tau Metua ra: e haere râ oe i tau mau taeae ra, e parau atu ia ratou e, Te haere nei au i tau Metua ra e to outou Metua ra, e i tau Atua ra e to outou Atua ra. 18 Haere atura Maria i Magadala ra, e ua faaite atura i te mau pǐpǐ ra e ua ite oia i te Fatu, e na ˈna oia i parau mai i taua parau ra.

19 E i te ahiahi o taua mahana matamua o te hebedoma ra, ua putuputu maira te mau pǐpǐ, ua opanihia na opani i te mǎtaˈu i te ati Iuda ra, ua haere maira Iesu i reira ra, tia noa ihora i ropu, ua parau maira ia ratou, Ia ora na outou. 20 I na reira mai oia, e ua faaite maira ia ratou i tana rima e i tana aoao. Oaoa aˈera te mau pǐpǐ i te iteraa ˈtu i to ratou Fatu ra. 21 Ua parau faahou maira Iesu ia ratou, Ia ora na outou. Mai tau Metua hoi i tono mai ia ˈu nei ra, e tono atoa hoi au ia outou na. 22 I na reira maira oia, e ua haapuai maira i te aho i nia ia ratou ra, e ua parau maira, A farii i te Varua Maitai. 23 Ta outou i faaore i ta ratou hara ra, ua faaorehia ïa; e ta outou hoi i vaiiho i ta ratou hara ra, ua vaiihohia ïa.

24 E te hoê o te ahuru ma piti ra, o Toma, o te parauhia ïa, ia Didimo ra, aore ra ïa ia ratou ra a tae mai ai Iesu ra. 25 Ua parau atura te mau pǐpǐ ra ia ˈna, Ua ite aˈenei matou i te Fatu. Ua parau maira oia ia ratou, I ore au i ite i te puta auri i tana rima ra, e aore i tuu i tau rima i taua puta auri ra, e aore hoi tau rima i tuu i tana aoao ra, e ore roa ïa vau e faaroo. 26 E rui vau aˈera, tei roto faahou atura te mau pǐpǐ i te fare, e o Toma atoa hoi, ua haere maira Iesu, ua opanihia na opani, ua tia maira oia i ropu, ua parau maira, Ia ora na outou. 27 Ua fariu maira ia Toma, ua parau maira, A faatoro mai na to rima, e a hiˈo mai na hoi i tau rima nei; e a faatoro mai na hoi i to rima e fafa i tau aoao, eiaha e faaroo taiata, e faaroo râ. 28 Ua parau atura Toma ia ˈna, na ô atura, E tau Fatu, e tau Atua. 29 Ua parau maira Iesu ia ˈna, No te mea te hiˈo mai nei oe ia ˈu, e Toma, i faaroo ai oe: e ao to te feia aore i ite ia ˈu a faaroo mai ai.

30 E rave rahi atu â te tapao a Iesu i rave i mua i te aro o ta ˈna mau pǐpǐ ra, aore i papaihia i roto i teie nei buka. 31 O teie râ tei papaihia, ia faaroo outou e, o Iesu te Mesia te Tamaiti a te Atua, e ia noaa hoi to outou ora i to ˈna iˈoa i te faarooraa.