Ohipa

TA PAULO FAAITERAA I TO ˈNA IHO FAARIRORAA EI TAATA FAAROO.

22 E homa, e te mau taeae, e te feia metua nei, e faaroo mai na outou i ta ˈu parau ia outou ia ˈu iho nei, 2 (E ia faaroo atura ratou ia ˈna, te parau Hebera maira oia ia ratou ra, rahi atura to ratou mamû, ua parau atura oia), 3 E ati Iuda mau vau i Tareso i Kilikia to ˈu fanauraa, i teie nei ra oire to ˈu haapiiraahia i te avae iho o Gamaliela; i haapii-hua-hia hoi au i te ture a to tatou hui metua ra, itoito hoi au i te parau a te Atua mai ia outou atoa na i teie nei mahana. 4 I hamani ino hoi au i teie nei parau, i te ruuruuraa i te tane e te vahine, e te huriraa ˈtu i roto i te tapearaa, e ia pohe roa ˈtu. 5 Ua ite atoa hoi te tahuˈa rahi nei ia ˈu, e te feia paari atoa ra, na ratou ta ˈu mau leta i te mau taeae i te noaaraa mai, haere atura vau i Damaseko, e aratai mai i to reira ma te auri fifi i Ierusalema nei, ia pohe. 6 Ia ˈu ra i haere noa i taua tere no ˈu ra, e fatata maira Damaseko ia ˈu, aore aˈera i mahia, ua ati ihora vau i te maramarama rahi i te anaanaraa mai no nia i te raˈi i te avatea. 7 I hiˈa ihora vau i raro i te repo, faaroo atura vau i te hoê reo i te parauraa mai ia ˈu e, E Saulo, e Saulo, eaha oe i hamani ino mai ai ia ˈu? 8 Ua parau atura vau, E te Fatu, o vai oe? Ua parau maira oia ia ˈu, O vau o Iesu i Nazareta ra, ta oe i hamani ino mai nei. 9 Ua ite hoi ratou o tei haere atoa ra i taua maramarama ra, e mǎtaˈu ihora, aita râ ratou i ite i ta ˈna parau ta tei parau mai ia ˈu ra. 10 Ua parau atura vau, E te Fatu, eaha vau? Ua parau maira te Fatu ia ˈu, A tia, a haere i Damaseko ei reira oe e faaitehia mai ai i te mau ohipa atoa i haapaohia na oe e rave ra. 11 E aita aˈera e tia ia ˈu ia hiˈo, i te anaana o taua maramarama ra, i aratai-rima-hia vau e te feia i haere atoa ra, e tae atura vau i Damaseko. 12 E te hoê taata râ o Anania, e taata paieti i te haapaoraa i te ture ra, e roo maitai hoi to ˈna i te ati Iuda atoa i parahi i reira, 13 Haere maira e tia maira i pihai iho ia ˈu, na ô maira, E tau taeae, e Saulo, a hiˈo mai na. Hiˈo atura vau ia ˈna i taua hora ra. 14 E ua parau maira oia, Ua haapaohia na oe e te Atua o to tatou hui metua ra ia ite oe i to ˈna hinaaro, e ia hiˈo oe i taua Taata Parau-Tia ra, e ia faaroo hoi oe i te parau i to ˈna vaha. 15 Ei faaite hoi oe na ˈna i te taata atoa i ta oe i hiˈo na, e ta oe i faaroo na. 16 E teie nei, eaha oe i haamaoro ai? a tia, ia bapetizohia oe, e horoi ê atu i ta oe mau hara i te tauraa ˈtu i te iˈoa o te Fatu. 17 E hoˈi faahou maira vau i Ierusalema nei, ia ˈu ra hoi i pure i roto i te hiero ra, tarehua maira vau; 18 ite atura vau ia Iesu i te parauraa mai ia ˈu e, E haapeepee, e haere ê atu oe i tena na, faarue mai i Ierusalema nei; e ore hoi ratou e faaroo i ta oe parau ia ˈu. 19 Ua parau atura vau, E te Fatu, ua ite hoi ratou e i tapea na vau, e i papai na hoi au i te feia i faaroo ia oe i te mau sunago atoa ra: 20 a manii ai hoi te toto o te faaite ia oe ra o Setephano, te tia atoa ra vau i pihai iho, i te faatiaraa i to ˈna pohe; e na ˈu hoi i tiai i te ahu o te feia i taparahi ia ˈna ra. 21 Ua parau maira oia ia ˈu, A haere, e tono ê atu hoi au ia oe i te Etene ra.

22 Ua faaroo hoi ratou ia ˈna e tae aˈera i te reira reo, ua faateitei atura i to ratou reo, na ô atura, E faarue ê atu i tena na taata, eiaha e vaiihohia i teie nei ao, eita e au ia ˈna te ora. 23 Te tiaoro noa ra ratou ma te hahae i to ratou ahu, e ma te haapuehu i te repo i nia, 24 ua faaue atura hoi te tapena rahi e hopoi ia ˈna i roto i te pare, parau atura hoi e, e ui atu ia ˈna ma te papai, ia ite oia i te hara i pii hua mai ai ratou ia ˈna ra. 25 E te taamu ra ratou ia ˈna i te taura, ua parau atura hoi Paulo i te raatira hanere i tia i pihai ihora, E au anei i te ture ia papai outou i te taata no Roma aore i faahapahia ra? 26 Ite aˈera râ te tapena i te reira, haere atura oia parau atura i te tapena rahi, na ô atura, E ara i ta oe e rave nei, no Roma hoi teie nei taata. 27 Ua haere maira te tapena rahi, ua parau maira ia ˈna, No Roma oe? e faaite mai oe. Ua parau atura oia, E. 28 Ua parau maira te tapena rahi, E moni rahi hoi ta ˈu i riro ai au ei taata no reira. Ua parau atura Paulo, E taata fanau mau vau. 29 E te feia i fatata i te ui atu ia ˈna ra, haere ê atura ïa i reira ra, mǎtaˈu atoa ihora hoi te tapena rahi, i te iteraa oia e, no Roma hoi oia, e oia hoi i ruuruu ia ˈna ra. 30 E ao aˈera, ua tatara aˈera oia i to ˈna tapea, faaue atura oia i te mau tahuˈa rarahi e to ratou sunederi atoa ra, e haaputuputu mai, ia ite mau oia i te hara i parihia mai ai oia e te ati Iuda ra; ua aratai maira ia Paulo i raro, ua tuu atura ia ˈna i mua i to ratou aro ra.