Roma

IA AU MAITE TE MAU TAEAE RATOU RATOU IHO E MAITAI AI.

15 E teie nei, o tatou o tei itoito nei, e faaoromai i te paruparu o te itoito ore e tia ˈi, eiaha e faatia i ta tatou iho. 2 E haamauruuru tatou atoa nei ia vetahi ê, ia maitai oia, ia itoito. 3 Aore atoa hoi te Mesia i haamauruuru ia ˈna iho, i tei papaihia ra e, Te faaino a te feia i faaino ia oe ra, ua iri mai ïa i nia iho ia ˈu. 4 Te mau parau atoa hoi i papaihia i mutaa ihora, i papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia ra. 5 E teie nei, ia faafaito mai te Atua no ˈna te faaoromai e te mahanahana i to outou aau, outou outou iho, ia au i te hinaaro o te Mesia ra o Iesu. 6 Ia haamaitai outou i te Atua, i te Metua o to tatou Fatu ra o Iesu Mesia, ma te aau hoê, e te vaha hoê. 7 E teie nei, e farii outou ia outou iho mai te Mesia i farii mai ia tatou nei ra, ia maitai te Atua.

8 Teie ta ˈu parau, e diakono Iesu Mesia no te peritome ia itea te parau mau a te Atua, e ia tupu te parau i parauhia mai i te feia tupuna ra. 9 E ia haamaitai te Etene i te Atua i to ˈna ra aroha; oia hoi tei papaihia ra e, No reira vau e haamaitai ai ia oe i ǒ te Etene, e e himene hoi i to oe ra iˈoa. 10 E te na ô ra hoi, E oaoa outou, e te Etene e, e to ˈna atoa ra taata. 11 E te na ô faahou ra hoi, E haamaitai outou ia Iehova, e te mau fenua atoa ra, e o outou hoi e te taata atoa ra, ia rahi te haamaitai ia ˈna. 12 Te na ô maira hoi Isaia, E itea mai te hoê huaai no Iese, e te tupu ei arii no te Etene, ei ia ˈna e tiaturi ai te Etene. 13 Ia faaîhia mai outou i te oaoa e te hau i te faarooraa e te Atua, e noaa ˈi te tiaturiraa, ia rahi to outou tiaturi i te mana o te Varua Maitai ra.

14 O vau iho hoi tei ite ia outou, e au mau taeae, e ua î atoa outou i te maitai, e ua faaîhia outou i te ite, e e tia ia haapii ia outou iho. 15 Ua papai noa ˈtu râ vau i te parau ia outou ma te mǎtaˈu ore, e te mau taeae, ia tupu to outou manaˈo otahi, no te maitai i horoahia mai e te Atua ia ˈu nei ra. 16 Ia riro vau ei tavini no Iesu Mesia i te Etene, i te tuuraa ˈtu i te evanelia o te Atua, ia tiahia te perosephora Etene, i haamoˈahia e te Varua Maitai. 17 E teie nei, e oaoaraa to ˈu ia Iesu Mesia ra, i te mau mea o te Atua ra. 18 Eita râ vau e tia ia parau i te mau mea atoa aore i ravehia e te Mesia ia ˈu nei, i te mau mea râ ta ˈna i rave, i te faahaapaoraa i te Etene, i te parau e te ohipa, 19 ma te semeio rahi e te tapao, i te mana o te Varua o te Atua; e ua parau hua hoi au i te evanelia o te Mesia na Ierusalema ˈtu i te haaati haerea e tae roa aˈenei i Iliriko. 20 Oia ïa, i titau maite na hoi au ia parau vau i te evanelia, i te mau vahi aore i ite i te iˈoa o te Mesia ra, oi patu noa hoi au i nia i ta vetahi ê ra niu. 21 Mai tei papaihia ra râ, Te feia aore i taea e te parau no ˈna ra, e hiˈo ratou: e te feia aore â i faaroo ra, e ite ïa ratou. 22 No reira hoi au i maoro ai, i ore au i tae atu ai ia outou na. 23 I teie nei râ, aita a ˈu e vahi toe i teie nei mau fenua, e no te hinaaro rahi to ˈu e rave rahi aˈenei te matahiti i te haere atu ia outou na; 24 ia haere ra vau i Hisepania ra, e haere atu ai au ia outou na, te hinaaro nei au ia ite au ia outou i taua tere no ˈu ra, e ia arataihia vau e outou i to ˈu haerea i reira, ia mauruuru aˈe na râ vau i te amuiraa ia outou na. 25 Te haere nei râ vau i Ierusalema e turu atu i te feia moˈa ra. 26 Ua aufau hoi to Makedonia e to Ahaia i te moni no to ratou hinaaro, na te feia moˈa taata rii i Ierusalema ra. 27 Ua hinaaro â hoi ratou, e e amutarahu â hoi ratou na ratou. Ua rave atoa hoi te Etene i ta ratou taoˈa no te varua ra, e hopoi atu hoi ratou i ta te tino ra na ratou e tia ˈi. 28 E teie nei, ia oti ia ˈu taua ohipa nei, e ia tuu-mau-hia ˈtu e au teie nei maitai ia ratou ra, na ǒ na ˈtu vau ia outou na i te haere, a haere tia ˈtu ai i Hisepania. 29 Ua ite mau hoi au, e ia haere atu vau ia outou na, e haere atu ïa vau ma te î atoa i te maitai o te evanelia o te Mesia ra.

30 E aˈo atura vau ia outou, e au mau taeae, i te Fatu ra ia Iesu Mesia, e te aroha o te Varua ra, e faaitoito tatou atoa i te pure i te Atua ia ˈu; 31 ia ora vau i te feia faaroo ore i Iudea ra, e ta ˈu e rave nei na to Ierusalema ra, ia farii-maitai-hia mai e te feia moˈa ra; 32 ia tae atu vau ia outou na ma te oaoa i te tia a te Atua ra, ia anaanaea tatou atoa nei. 33 E teie nei, ei ia outou atoa na te Atua hau. Amene.