Korinetia 1
O TE MAU MAITAI I HOROAHIA MAI E TE VARUA RA.
12 E teie nei, aita vau i hinaaro, e au mau taeae, e ia ore outou ia ite i te mau mea a te Varua ra. 2 Ua ite hoi outou e e Etene outou, e riro noa ˈtura i te mau idolo vava ra a tuiau haere-noa-hia ˈi outou na. 3 E teie nei, e faaite atu vau ia outou, aore roa e taata na te Varua o te Atua ta ˈna parau, e parau ia Iesu e, ua anatemahia: aore roa e taata e tia ia parau e, o Iesu te Fatu, maori râ o tei parau i ta te Varua Maitai ra. 4 E rave rahi te huru o te mau mea i horoahia, hoê râ Varua. 5 E rave rahi â hoi te toroa, hoê râ Fatu. 6 E rave rahi â hoi te ohipa, hoê râ Atua e ohipa i te mau mea atoa i roto i te taata atoa. 7 Ua horoahia ta te Varua faaite i te taata atoa, ia maitai paatoa. 8 I horoahia mai te parau paari e te Varua, i te hoê ra; e i horoahia mai e taua Varua ra te parau e noaa ˈi te ite, i te hoê. 9 Ta te tahi ra, o te faaroo ïa, na taua Varua ra; ta te tahi ra, o te ite ïa i te faaora mai na taua Varua ra. 10 Ta te tahi ra, o te rave tapao ïa; ta te tahi ra, o te tohu ïa; ta te tahi ra, o te ite varua ïa; ta te tahi ra, o te parau ěê ïa; ta te tahi ra, o te faaite parau ěê ïa. 11 Na taua Varua hoê ra i ohipa i taua mau mea atoa nei, i te opere-maite-raa i ta te taata atoa i ta ˈna i hinaaro ra.
12 Mai te tino hoi hoê nei, e rave rahi to ˈna melo, e te mau melo atoa no taua tino hoê ra, rahi noâ ratou, hoê â ïa tino, oia atoa hoi te tino o te Mesia. 13 I bapetizohia hoi tatou e te Varua hoê i roto i te tino hoê ra, te ati Iuda, e te Heleni, te tavini e te tiamâ, e ua faainuhia tatou i ta te Varua hoê ra. 14 E ere hoi te tino nei i te melo hoê, e rave rahi ra. 15 Ia parau hoi te avae e, E ere au i to te tino, no te mea e e ere au i te rima; e ere mau anei oia i to te tino i reira? 16 Ia parau hoi te tariˈa e, E ere au i to te tino, no te mea e ere au i te mata; e ere mau anei oia i to te tino i reira? 17 Ahiri e mata anaˈe te tino atoa nei, eaha ihora te faarooraa? Ahiri hoi e faarooraa anaˈe te tino nei, eaha ihora te hoˈiraa? 18 I teie nei râ, ua haamauhia e te Atua te mau melo o te tino nei i ta ˈna vahi hinaaro ra. 19 Ahiri hoi ratou atoa e melo hoê ra, teihea ihora te tino i reira? 20 I teie nei râ, e rave rahi te melo, hoê roa râ tino. 21 E ore hoi te mata e tia ia parau i te rima e, Ore noa ˈtu â oe ia ˈu nei; e te upoo hoi ia parau i te avae e, Ore noa ˈtu â orua ia ˈu nei. 22 Eiaha ˈtu â ïa, o te mau melo huru paruparu o te tino nei, eita roa ˈtu ïa e tia ia ore. 23 E te mau melo o te tino ta tatou e manaˈo nei e, aore e maitai rea, te haaati nei tatou i te reira i te maitai rahi; e to tatou mau vahi nehenehe ore ra, te hau nei te reira i te nehenehe. 24 To tatou mau vahi nehenehe ra hoi, ore noa ˈtu ïa: ua taati maite râ te Atua i te tino atoa, e ua tuu i te maitai rahi i te vahi i ere ra. 25 Ia ore roa te au ore i te tino nei, ia faito atoa râ to te mau melo haapao ia ratou iho. 26 Ia mauiui te hoê melo ra, e mauiui atoa te mau melo atoa ra; e ia faateiteihia te hoê melo ra, e oaoa ïa te mau melo atoa ra. 27 E teie nei, o te tino outou no te Mesia, e e melo anaˈe outou e ati noa ˈˈe. 28 E ua tuu hoi te Atua i te aposetolo i roto i te ekalesia, o mua ïa, e te piti ra, e peropheta ïa, te toru ra, e haapii ïa, e te rave tapao, e te faaora maˈi, e te tauturu, e te faaite, e te parau ěê. 29 E aposetolo anaˈe anei? e peropheta anaˈe anei? e haapii anaˈe anei? e rave tapao anaˈe anei? 30 Ua ite paatoa anei i te faaora maˈi? e parau paatoa anei i te parau ěê? e faaite paatoa anei i te parau ěê? 31 Te nounou na outou i te mau toroa rahi ra; e faaite atu râ vau ia outou i te eˈa maitai rahi roa ra.