Philipi

TE FAAITOITO NEI OIA IA RATOU EIAHA E FARII I TEI FAATIA I TE PERITOME.

3 E teie nei, e au mau taeae, e oaoa i te Fatu. E ere i te mea haumani ia ˈu ia papai faahou atu i taua parau ra ia outou na, e e parau ora hoi ia outou. 2 E ara i te urî, e ara i te feia parau iino ra, e ara i te katatome. 3 O tatou peritome, o tei haamori i te Atua ma te varua, o tei oaoa i te Mesia ra ia Iesu, e aita roa e turuiraa i te tino nei. 4 E tia noa ˈtu â hoi au ia tiaturi i ta te tino ahiri e faufaa. Te manaˈo ra te hoê taata ˈtu, e e tiaturiraa ta ˈna i ta te tino, e rahi atu ïa ta ˈu: 5 i peritomehia vau i te rui vau ra, e ati Iseraela, i te opu o Beniamina, e Hebera na te Hebera; e i te haapaoraa i te ture ra, e Pharisea ïa; 6 i te haapaoraa i te itoito ra, ua hamani ino ïa vau i te ekalesia; i te parau-tia a te ture ra, aita a ˈu e hapa i te reira. 7 O taua mau mea taoˈa na ˈu ra, o ta ˈu ïa i faariro ei mea faufaa ore i te Mesia nei. 8 Oia mau ïa e mea faufaa ore atoa te mau mea atoa nei ia ˈu, i te maitai rahi ra i te ite i te Mesia i tau Fatu ra ia Iesu: e faarue ai au i te mau mea atoa ra, e e aua ïa ia ˈu, ia noaa ia ˈu te Mesia. 9 Ia riro vau ei taata no ˈna, eiaha ma te parau-tia na ˈu iho i te ture ra, o tei noaa mai râ i te faaroo i te Mesia ra, o te parau-tia a te Atua i te faaroo ra: 10 ia ite hoi au ia ˈna, e te puai o to ˈna tia-faahou-raa, e te apiti-atoa-raa ˈtu i to ˈna mau ati, i te faaauraa ˈtu i to ˈna ra pohe; 11 ia roaa noa ˈtu â ia ˈu te tia-faahou-raa mai te pohe maira. 12 Eita vau e parau e, ua noaa ia ˈu e ua oti nehenehe roa to ˈu hororaa i teie nei, te titau nei râ vau, peneiaˈe o te noaa ia ˈu te mea i roohia mau ai au nei e te Mesia ra e Iesu. 13 E au mau taeae, aore au i manaˈo ia ˈu iho nei, e ua noaa, hoê roa a ˈu mea e rave nei, i te haamoeraa i te mau mea i muri ra, e te titauraa ˈtu hoi i tei mua, 14 te nenei tia ˈtu nei au i te tapao, ia noaa te berabeio i te parauraa a te Atua no nia maira i te Mesia nei ia Iesu. 15 E teie nei, e na reira to tatou manaˈo, to te feia atoa i paari ra: e e manaˈo ê to outou i te tahi mea ˈtu, na te Atua e faaite mai ia outou i te reira. 16 Ta tatou râ vahi i noaa maira, e na reira tatou i te haere na taua tapao nei â ma te haapao maite â hoi i te mea hoê a.

17 E au mau taeae ra, ei pee atoa outou atoa na ia ˈu, e hiˈo maite hoi i te feia e na reira atoa ra, o matou hoi to outou hiˈoraa. 18 (Ta te tahi paeau haerea, e mea ê ïa, o ta ˈu i faaite pinepine atu ia outou, e te faaite atu nei hoi au ia outou i teie nei ma te roimata, e e enemi ratou no te satauro a te Mesia ra; 19 o te pohe roa to ratou hopea, te opu hoi to ratou atua, e ta ratou parau haama ra, o to ratou ïa teoteoraa; e to teie nei ao anaˈe ra ta ratou e haapao.) 20 Area matou e ta matou parau no te ao ïa; e te tiai atoa nei matou i te Ora no reira mai, i te Fatu ra ia Iesu Mesia. 21 E na ˈna e faahuru ê i to tatou tino haehaa, ia hoê atoa huru i to ˈna iho tino maitai rahi ra, i te ravea mana na ˈna e tia ˈi ia ˈna ia rave i te mau mea atoa nei, e vi atoa ˈi i raro aˈe ia ˈna ihora.