Kolosa

TE FAAITE NEI I TE IMIRAA I TE MESIA, E IA TINAI I TE INO.

3 E tena na, ua faatiahia outou i nia e te Mesia atoa ra, e titau i te mau mea i nia ra, i te vahi e parahihia e te Mesia i te rima atau o te Atua ra. 2 E haamau i to outou aau i te mau mea i nia ra, eiaha i to teie nei ao ra. 3 I pohe na hoi outou, e tei o te Mesia ra to outou ora, tei te Atua. 4 Ia fa mai te Mesia, tei ia ˈna to tatou ora i te vairaa ra, ei reira atoa outou e itea-atoa-hia ˈi, e oia atoa i te ao ra.

5 E tena na, uumi iho i to outou mau melo i te mau mea o teie nei ao, mai te faaturi, te parau faufau ra, te paia ra, te hinaaro tia ore ra, e te nounou taoˈa, e haamori idolo ïa. 6 No taua mau mea ra e roohia mai ai te tamarii faaroo ore i te riri o te Atua ra: 7 o ta outou â ïa parau i haapao i mutaa ihora, ia outou i parahi i roto ia ratou ra. 8 I teie nei râ, e haapae atoa outou i taua mau parau atoa nei, i te riri, te tairoiro, te feii, te faaino, e te parau tiaâ i to outou vaha. 9 Eiaha e haavare te tahi i te tahi, ua haapae hoi outou i te taata tahito e ta ˈna atoa ra mau parau; 10 e ua faa-taata-apî, o tei faahouhia i te ite ra, mai te huru atoa o tei hamani ia ˈna ra. 11 Aita e Heleni e te ati Iuda; aore e peritome e te peritome ore; aore e Barebaro e te Sekute; aore e tavini e te tiamâ: o te Mesia anaˈe râ e i roto i te feia atoa i faaroo ra. 12 E tena na, e faaaau aroha noa, e te hamani maitai, e te haehaa, e te mǎrû, e te faaoromai rahi, mai te feia moˈa e te herehia i maitihia e te Atua ra; 13 e faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai te Mesia atoa i faaore i ta outou na, e na reira atoa outou: 14 e ei nia roa iho i taua mau mea atoa nei, o te aroha o taua tatua nehenehe roa ra ïa. 15 E ei te hau a te Atua ra te mana i roto i to outou aau, i parauhia ˈi hoi outou ei tino hoê; e ia mauruuru roa outou i te Atua.

16 Ia vai hua na te parau a te Mesia i roto ia outou ma te ite papu atoa ra; i te haapiiraa e te aˈoraa te tahi i te tahi, ma te salamo, e te himene, e te sire a te varua, ma te haamaitai i roto i to outou aau i te Fatu. 17 E te mau mea atoa ta outou e rave ra, i te ohipa e te parau a rave anaˈe ïa ma te iˈoa o te Fatu ra o Iesu, ma te haamaitai i te Atua ra i te Metua ia ˈna ra.

18 E te mau vahine ra, e auraro maite outou i ta outou mau tane, o te mea au ïa i te Fatu nei. 19 E te mau tane ra, e aroha outou i to outou mau vahine, e eiaha e iria ˈtu ia ratou. 20 E te mau tamarii ra, e faaroo i to outou mau metua i te mau mea atoa nei, e mea mauruuru hoi te reira i te Fatu nei. 21 E te mau metua ra, eiaha e faariri atu i ta outou tamarii, o te taiâ hoi ratou. 22 E te mau tavini ra, e faaroo i to outou mau fatu i te tino nei i te mau mea atoa ra, eiaha ei faaroo mata, mai te faarearea taata ra, ma te aau haavare ore râ, i te mǎtaˈuraa i te Atua. 23 E ta outou mau mea atoa e rave ra, e rave ma te aau atoa mai te mea e e na te Fatu, eiaha na te taata. 24 Ua itea hoi e, e noaa mai ta outou ra utua i te aiˈa no ǒ mai i te Fatu ra; te tavini nei hoi outou i te Fatu ra i te Mesia. 25 O tei rave râ i te parau-tia ore ra, e utua ïa ta ˈna i taua parau-tia ore ta ˈna i rave ra; e e ore hoi te huru o te taata e haapaohia.