Hebera

TE FAAITOITO NEI IA TAMAU MA TE FAAROO, E TE FAAOROMAI, E TE PAIETI.

12 E teie nei, ua haaatihia tatou e taua nahoa rahi i ite nei, e haapae tatou i te mau mea teimaha atoa, e te ino e hara ˈi tatou nei, a horo tamau maite ai i teie nei hororaa i mua ia tatou nei, 2 ma te tiatonu maite to tatou mata ia Iesu, i te tumu e te faaoti i to tatou faaroo; o tei faaoromai i te satauro, aore i haapao i te haama, i te maitai i tuuhia mai i mua i tana aro; e te parahi ra i teie nei i te pae atau i te terono o te Atua ra. 3 E haamanaˈo maite hoi ia ˈna, o tei faaoromai i te reira huru faaino a te feia rave hara ia ˈna ihora, ia ore hoi outou ia toaruaru, ia ore ia taiâ to outou aau. 4 Aitâ hoi i tae i te maniiraa toto to outou taputǒraa i te ino ra. 5 E ua moe anei ia outou te aˈo i aˈohia mai ai outou mai te mea e, e tamarii ra, E tau tamaiti, eiaha oe e faafaufaa ore i te aˈo a te Fatu nei, eiaha hoi ia pau te aho ia faahapahia mai oe e ana ra: 6 o ta te Fatu e here ra, o ta ˈna ïa e aˈo mai, e e papai â oia i te mau tamarii atoa ta ˈna e ite maira. 7 Te aˈohia mai na outou, mai te rave a te metua i te tamarii ra ta te Atua rave ia outou; o vai hoi ïa tamaiti aore i aˈohia e te metua ra? 8 Aore outou i aˈohia i te aˈo i te tamarii atoa ra, na te faaturi ïa outou, e ere i te tamarii mau. 9 E e metua hoi to tatou to te tino nei, o tei aˈo mai ia tatou, e ua faaiti hoi tatou, eiaha ia rahi atu to tatou auraro i te metua o te varua nei, e ia ora ˈtu? 10 I aˈo mai hoi ratou ia tatou i te reira ra pue mahana aore rea ra, no to ratou iho ïa hinaaro, area oia ia faufaahia tatou, ia noaa atoa ia tatou to ˈna ra maitai. 11 Aita roa hoi e aˈo e riro ei mea oaoa i reira ra, e mea oto râ; area i muri aˈe, o te maitai ra ïa o te parau-tia te tupu i taua aˈo ra, i te feia i haamatarohia i te reira.

12 E tena na, e afai na i na rima i faatautauhia i raro ra i nia, e e faaetaeta i te turi paruparu ra; 13 e haamanina hoi i te eˈa o to outou avae, ia ore te pirioi ra ia maoia roa, ie faaorahia râ. 14 E tapi i te hau i te taata atoa nei, e te maitai, aore e maitai ra, aore roa ïa e taata e ite i te Fatu. 15 E hiˈo maite â o te ere noa ˈtu te tahi i te maitai a te Atua ra, o te tupu noa ˈˈe te tahi tumu ino, peapea ihora outou, e viivii atura te taata atoa e rave rahi: 16 o te tupu noa ˈˈe te tahi faaturi, e te taata paieti ore, mai ia Esau ra, o tei hoo i ta ˈna ra tufaa matahiapo i te amuraa maa hoê ra. 17 Ua ite hoi outou e, ia nounou oia i taua maitai ra i muri aˈe, ei tufaa na ˈna, aore oia i itehia mai: aore roa e tatarahaparaa i te itearaa ia ˈna, titau noa ˈtu ai oia i taua maitai ra ma te roimata. 18 E ere hoi i te mouˈa e tiaia ˈtu ta outou i haere mai na, e te auahi i ura ra, e ere hoi i te ata ereere, e te pouri, e te vero, 19 e te oto pu ra, e te haruru o te parau; i ta te feia i faaroo ra i parau e, eiaha roa ïa parau e parau-faahou-hia mai ia ratou ra: 20 (aita ˈtura hoi i tia ia ratou ia haamahu i tei faaitehia maira, E ia faatiaia noa ˈtu te hoê puaa i taua mouˈa ra, e tuihia ïa i te ofai, e e patia-pupu-roa-hia ïa i te hoto ra; 21 e no te mea mǎtaˈu rahi tei faaitehia maira, ua parau ihora Mose, Mǎtaˈu rahi to ˈu e te rurutaina.) 22 I te mouˈa râ o Siona ta outou e haere mai nei, e te oire o te Atua ora ra, Ierusalema i te ao ra, e te pǔpǔ melahi atoa eita e hope ia taio ra, 23 i te tairururaa rahi ra i te ekalesia feia matahiapo ra, tei papaihia te iˈoa i te ao ra, e te Atua hoi te haava i te taata atoa ra, e te mau varua o te feia parau-tia i haamaitai-roa-hia ra, 24 e ia Iesu hoi i te arai i te faufaa apî ra, e te toto pîpî ra, e parau maitai rahi to te reira i to te toto o Abela ra.

25 E ara ia ore outou ia patoi atu ia ˈna e parau maira; aore hoi i ora te feia i patoi i tei parau mai i nia i te fenua nei, a tae ai hoi ia tatou ia ore tatou ia farii i to te raˈi ra: 26 i tei aueue te fenua i to ˈna reo i reira, i teie nei râ ua parau mai ïa oia, ua na ô maira, Hoê a ˈu faaaueueraa toe, e ere hoi te fenua anaˈe ra, o te raˈi atoa ïa. 27 E to taua parau nei, Hoê faaaueueraa toe, no te faaoreraa ïa i te mau mea e aueue noa ra, mai te mau mea i hamanihia ra, ia vai â te mau mea aueue ore ra. 28 E teie nei, ua noaa ia tatou te basileia aueue ore, e tapea maite tatou i taua maitai ra, ia haamori tatou i te Atua ma te itehia mai, ma te haehaa, e te paieti. 29 E auahi aamu hoi to tatou Atua.